ⵉⵎⴹⴰⴽⴰⵕ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴷ ⵓⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⵎⴰⵖⴰⵔⵉⴱⵉⵜ ⴳ ⵓⴱⵕⵍⴰⵎⴰⵏ ⵏ ⴰⵍⵎⴰⵏⵢⴰ

ⵉⵎⴹⴰⴽⴰⵕ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 21 ⵏⵓⵡⴰⵏⴱⵉⵔ 2023 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ ⴷ ⵎⴰⵙⵙ Carl Julius Cronenberg ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⵎⴰⵖⴰⵔⵉⴱⵉⵜ ⴳ ⵓⴱⵕⵍⴰⵎⴰⵏ ⵏ ⴰⵍⵎⴰⵏⵢⴰ (ⵍⴱⵓⵏⴷⵙⵜⴰⴳ), ⴰⴳⵎⴰⵎ ⵏ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⴷⵉⵎⵓⵇⵔⴰⵟⵉ ⵍⵍⵉ ⵉⵍⵍⴰⵏ ⴳ ⵓⵔⵣⴰⴼ ⵏ ⵜⵡⵓⵔⵉ ⵉ ⵍⵎⵖⵔⵉⴱ ⵙ ⵜⴰⵎⵓⵏⵜ ⴷ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵎⴰⵙⵙ Dietmar Friedhoff ⴰⴳⵎⴰⵎ ⵏ ⵓⴽⴰⴱⴰⵕ ⴰⵙⵏⴼⵍ ⵉ ⴰⵍⵎⴰⵏⵢⴰ ⴷ ⵎⴰⵙⵙⴰ Mareike lotte Wulf ⵜⴰⴳⵎⴰⵎⴰⵜ ⵏ ⵓⴽⴰⴱⴰⵕ ⵏ ⵜⴰⵎⵓⵏⵜ ⵜⴰⴷⵉⵎⵓⵇⵔⴰⵟⵉⵜ ⵜⴰⵎⴰⵙⵉⵃⵉⵜ / ⵜⴰⵎⵓⵏⵜ ⵜⴰⵏⴰⵎⵓⵏⵜ ⵜⴰⵎⴰⵙⵉⵃⵉⵜ. 

ⵉⵍⵍⴰ ⵓⵎⴹⴰⴽⴰⵕ ⴼ ⵓⵙⵓⵜⴳ ⵏ ⵜⵉⵕⵡⵉ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵊⴰⵔ ⵍⵎⵖⵔⵉⴱ ⴷ ⴰⵍⵎⴰⵏⵢⴰ ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⴼⴷ ⵓⴳⵜⵉⵔⴰⵏ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ, ⴰⵢⵍⵍⵉ ⵔⴰⴷ ⵉⴳ ⵜⴰⵔⵙⵍⵜ ⵢⴰⴹⵏⵉⵏ ⵉ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⴳ ⵉⵙⵡⵉⵔⵏ ⵏ ⵜⴷⵎⵙⴰ ⴷ ⵜⵙⴱⴱⴰⴱⵜ ⴷ ⵓⵙⵙⴰⵔⵓ. 

ⵉⵙⵓⵜⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵣⴷⴰⵢⵉⵏ ⵏ ⵓⵎⵢⴰⵡⴰⵙ ⴷⵓⵙⵏⵉⵏ ⵙⵎⵓⵏⵏⵉⵏ ⴰⵙⵇⵇⵉⵎ ⵏ ⵉⵎⵓⵔⴰ ⵏ ⵍⵎⵖⵔⵉⴱ ⴷ ⵓⴱⵕⵍⴰⵎⴰⵏ ⵏ ⴰⵍⵎⴰⵏⵢⴰ, ⵙⵍⴰⵡⴰⵏ ⴰⴽⴽⵯ ⴰⵙⵏⴰⵍ ⵉⵍⵍⴰⵏ ⴳ ⵢⵉⴳⵔ ⵏ ⵡⴰⵕⴰⵛⵉⴼ ⴷ ⵓⵙⵎⵓⵟⵟⵓⵏ ⵏ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ. 

ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⴰⵡⵓⵔⵏ ⵉⵅⴰⵜⴰⵔⵏ ⵍⵍⴰⵏⵉⵏ ⴳ ⵜⴳⵍⴷⵉⵜ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⴳ ⵓⵎⵏⵉⴷ ⵏ ⵜⵥⴹⴰⵕⵜ ⵜⴰⵎⴰⵢⵏⵓⵜ ⴷ ⵓⵙⵉⵜⵜ ⵏ ⵜⵖⴰⵔⵜ ⴷ ⵜⵎⵓⴽⵔⵉⵙⵜ ⵏ ⵜⵔⵖⵉ ⴷ ⵓⴼⴰⵔⵙ ⵏ ⵓⵀⵉⴹⵕⵓⵊⵉⵏ ⴰⵣⴳⵣⴰⵡ ⴷ ⵓⵙⵎⴽⵍ ⵏ ⵡⴰⵎⴰⵏ ⵏ ⵢⵉⵍ ⴷ ⵜⵏⴼⵔⵓⵜ ⵏ ⵓⵜⵛⵓ ⴷ ⵓⵚⴽⵓ ⵏ ⵓⴼⵜⴰⵙ ⴰⵅⴰⵜⴰⵔ ⴳ ⴷⴷⴰⵅⵍⴰ ⴷ ⵓⵙⴽⵔ ⵏ ⵓⵛⴰⵎⵓⵛ ⴰⴷⵎⵙⴰⵏ ⴰⵅⴰⵜⴰⵔ ⵉⵙⵎⵓⵏⵏ 23 ⵏ ⵓⵡⴰⵏⴽ ⴰⴼⵔⵉⵇⵉ ⴷ ⵡⵉⵏ ⴰⵟⵍⴰⵚ. 

ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⵎⴰⵖⴰⵔⵉⴱⵉⵜ ⴳ ⵓⴱⵕⵍⴰⵎⴰⵏ ⵏ ⴰⵍⵎⴰⵏⵢⴰ ⴼ ⵡⴰⵜⵉⴳ ⵉⵙⵜⴰⵡⵀⵎⵎⴰⵏ ⵏ ⵓⵔⵣⴰⴼ ⴰⴷ, ⵍⵍⵉ ⵉⴳⴰⵏ ⴰⵎⵣⵡⴰⵔⵓ ⵜⵙⴽⵜ ⵜⵔⴰⴱⴱⵓⵜ ⴰⴷ ⵙ ⴱⵕⵕⴰ ⴳ ⵜⵡⴰⵍⴰ ⴰⴷ ⵜⴰⴱⵕⵍⴰⵎⴰⵏⵉⵜ ⵜⴰⵍⵉⵎⴰⵏⵉⵜ, ⵉⵙⴰⵡⵍ ⴼ ⵜⵉⵕⵡⵉ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵖⵎⴽ ⴰⵏⵏ ⴷ ⵓⵎⴹⴰⴽⴰⵕ ⵏ ⵜⵎⵙⴰⵔⵉⵏ ⴷ ⵉⵙⵏⵜⵍⵏ ⵛⵛⴰⵔⵏⵉⵏ. 

ⵉⵙⵓⵜⴳ ⵓⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⵎⴰⵖⴰⵔⵉⴱⵉⵜ ⴳ ⵓⴱⵕⵍⴰⵎⴰⵏ ⵏ ⴰⵍⵎⴰⵏⵢⴰ ⴰⵙⵡⵉⵔ ⵉⵥⵉⵍⵏ ⵉⵍⴰⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⴳ ⵢⵉⴳⵔ ⴰⴷⵎⵙⴰⵏ, ⵉⵏⵏⵓⵔⵣ ⴰⵙⵎⵖⵔ ⵏ ⵓⵎⵢⴰⵡⴰⵙ ⴰⴷ ⴳ ⵉⴳⵔⴰⵏ ⵢⴰⴹⵏⵉⵏ ⴰⵎ ⵜⵉⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵜⵎⴳⵓⵔⵉ ⵏ ⵓⵀⵉⴹⵕⵓⵊⵉⵏ ⴰⵣⴳⵣⴰⵡ. ⵉⵙⴷⴷⵉⴷ ⵓⵍⴰ ⴼ ⵓⵔⴳⴳⵉⴳ ⴰⵙⵔⵜⴰⵏ ⵍⵍⵉ ⵉⴳⴰⵏ ⵜⴰⵔⵙⵍⵜ ⵏ ⵓⵙⵙⴰⵔⵓ, ⵢⵉⵏⵉ ⵎⴰⵙ ⵓⵊⴰⴷⵏⵜ ⵜⵎⵙⵙⵓⵔⵉⵏ ⵏ ⴰⵍⵎⴰⵏⵢⴰ ⵉ ⵓⵙⵎⵖⵔ ⵏ ⵓⵙⵙⵔⴰⵓ ⴳ ⵍⵎⵖⵔⵉⴱ, ⴷ ⵔⴰⴷ ⵉⴹⴼⵕ ⵓⴱⵕⵍⴰⵎⴰⵏ ⵉⵙⴷⵓⵙ ⵜⴰⴷⵉⵏⴰⵎⵉⵜ ⴰⴷ. 

ⵜⵃⴰⴹⵕ ⴳ ⵓⵏⵎⵓⵇⵇⴰⵔ ⴰⴷ ⵎⴰⵙⵙⴰ ⵏⴰⵄⵉⵎⴰ ⵍⴼⵜⵃⴰⵡⵉ ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵍⵎⵖⵔⵉⴱ-ⴰⵍⵎⴰⵏⵢⴰ ⴷ ⵓⵎⵙⵇⵇⴰⴷ ⵏ ⴰⵎⴰⵏⵢⴰ ⴳ ⵕⵕⴱⴰⵟ ⵎⴰⵙⵙ Dölger Robert.