ⴰⵎⴹⴰⴽⴰⵕ ⵏ ⵎⴰⵙⵙ ⵎⵓⵃⴰⵎⵎⴰⴷ ⵚⵚⴱⴱⴰⵕⵉ ⴰⵎⴰⵔⵉ ⵏ ⵓⵏⵏⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⴽⴰⴱⴰⵕ ⴷ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵏⴰⵎⵉⴱⵢⴰ ⴼ ⵓⵙⴷⵓⵙ ⵏ ⵓⵎⵢⴰⵡⴰⵙ ⴷ ⵜⴷⴷⵓⴽⴽⵯⵍⴰ

ⵙ ⵜⵎⵍⴷⴰ ⵏ ⵓⴷⵔⴰⵡ ⴳ ⵓⴳⵔⴰⵡ ⴰⵎⴰⵜⴰⵢ ⵡⵉⵙ 147 ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴷ ⵜⵙⵓⵜⵍⵜ ⵜⵉⵙ 2012 ⵏ ⵓⵙⵇⵇⵉⵎ ⵉⵏⴱⴹⵏ ⴷ ⵜⵙⵎⵓⵏⴰⵢ ⵏⵏⵙ, ⵍⵍⵉ ⵜⵙⵏⵓⴱⴳ ⴰⵏⴳⵓⵍⴰ ⴳ ⵜⵎⴰⵥⵓⵏⵜ ⵏⵏⵙ ⵍⵡⴰⵏⴷⴰ ⵙⴳ 23 ⴰⵔ 27 ⴽⵟⵓⴱⵕ 2023, ⵉⵙⵏⵎⴰⵍⴰ ⵎⴰⵙⵙ ⵎⵓⵃⴰⵎⵎⴰⴷ ⵚⵚⴱⴱⴰⵕⵉ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⴽⴰⴱⴰⵕ ⴰⵏⵎⵓⵇⵇⴰⵔ ⴷ ⵎⴰⵙⵙ ⴱⵉⵜⵔ ⴽⴰⵜⵊⴰⴼⵉⴼⵉ ⴰⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⵎⴰⵓⵔⵜ ⵏ ⵏⴰⵎⵉⴱⵢⴰ ⴰⵙⵙ ⵏ 26 ⴽⵟⵓⴱⵕ 2023.

ⵉⵍⵍⴰ ⵓⵏⵎⵓⵇⵇⴰⵔ ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵚⵟⴰⴼⴰ ⵔⴷⴷⴰⴷ ⵙⴳ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ, ⴷ ⵎⴰⵙⵙ ⵄⵓⵎⴰⵕ ⵃⵊⵉⵔⴰ ⵙⴳ ⵜⵔⴰⴱⴱⵜ ⵜⴰⵙⵉⵎⴰⵏⵜ ⵉ ⵜⵎⵓⵏⵉ ⴷ ⵢⵉⵙⴽⵉⵍ, ⵎⴰⵙⵙ ⵅⴷⴷⵓⵊ ⵙⵙⵍⴰⵙⵉ ⵙⴳ ⵜⵔⴰⴱⴱⵓⵜ ⵜⴰⵙⵔⵎⵓⵏⵜ-ⵜⵓⵣⵍⵜ ⵏ ⵍⵉⵜⵜⵉⵃⴰⴷ.

ⵜⵃⴰⴹⴰⵕ ⵙⴳ ⵏⴰⵎⵉⴱⵢⴰ ⵎⴰⵙⵙⴰ ⵍⵉⴷⵢⴰ ⴽⴰⵏⴷⵜⵓ ⵜⴰⵏⴼⵍⵓⵙⵜ ⵜⴰⵎⴰⵜⴰⵢⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵏⴰⵎⵉⴱⵢⴰ ⴷ ⵎⴰⵙⵙ ⵙⵉⵎⵓⵏ ⵡⵉⵔⴰⴱ ⴰⵏⵎⵀⴰⵍ ⵏ ⵓⴱⵔⵙⵉⵔⴰ ⵏ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵏⴰⵎⵉⴱⵢⴰ.

ⴳ ⵜⵣⵡⵉⵔⵉ, ⵉⵙⵙⴽⵯⵜⵉ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵏⴰⵎⵉⴱⵢⴰ ⴰⴽⵜⵜⵓⵢ ⵏ ⵜⵎⴷⵔⴰⵡⵜ ⴳ ⵓⴳⵔⴰⵡ ⴰⴳⵔⴰⵖⵍⴰⵏ ⵏ ⵉⵅⴰⵜⴰⵔⵏ ⵉⴼⵔⵉⵇⵉⵢⵏ ⵉⵍⵍⴰⵏ ⴳ ⵍⵎⵖⵔⵉⴱ ⴳ ⵓⵙⴳⴳⵯⴰⵙ ⵏ 1972 ⴳ ⵕⵕⴱⴰⵟ ⵙ ⵜⵏⵙⵙⵉⵅⴼⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵍⵃⴰⵙⴰⵏ ⵡⵉⵙ ⵙⵉⵏ ⴰⴷ ⵜ ⵉⵕⵃⵎ ⵕⴱⴱⵉ. ⵢⵉⵏⵉ ⵎⴰⵙ ⵜⵙⵜⴰⵡⵀⵎⵎⴰ ⵜⵎⵙⴰⵔⵜ ⴰⴷ ⵉⵙⵎⵓⵏⵏ ⵉⵅⴰⵜⴰⵔⵏ ⵙⴳ ⵉⴼⵔⵉⵇⵢⴰ, ⵢⵉⵍⵉ ⵓⵎⴹⴰⴽⴰⵕ ⵏ ⵜⵍⵙⴰⵔⵉⵏ ⴷ ⵜⵏⴰⵥⴰⵕⵉⵏ ⴷⴰⵜ ⵏ ⵉⴼⵔⵉⵇⵢⴰ ⴰⵎ ⴰⵙⵍⴻⵍⵍⵉ ⴰⵏⴰⵎⵓⵔ ⴷ ⵜⵙⵉⵎⴰⵏⵜ ⵜⴰⵏⴰⵎⵓⵔⵜ ⵏ ⵉⵡⴰⵏⴽⵏ ⵏ ⵉⴼⵔⵉⵇⵢⴰ ⴷ ⵓⵎⵢⴰⵡⴰ ⴰⵙⴳⴰⵡⴰⵏ ⴷ ⵓⵏⵎⵥⴰⵡ ⴷ ⵜⴳⵎⵉ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⴷ ⵉⵙⵓⵔⵙⵏ ⵉⵙⵔⵜⴰⵏⵏ ⴳ ⵜⵙⴳⴰ.

ⵉⵙⴰⵡⴰⵍ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⵎⵓⵔⵜ ⵏ ⵏⴰⵎⵉⴱⵢⴰ ⴼ ⵓⵅⵎⵎⴻⵎ ⵏⵏⵙ ⴳ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⴷ ⵜⴷⴷⵓⴽⴽⵯⵍⴰ ⴰⴽⴷ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵓⵙⴽⵔ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⴷ ⵓⵓⵣⵎⵎⴻⵎ ⵏ ⵜⵎⵙⵙⴽⵯⵜⵉⵜ ⵏ ⵓⵏⴰⵎⴰⵙ ⵉ ⵓⵙⵏⴰⵍ ⵏ ⵓⵎⵢⴰⴷⴰⵙ ⴷ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ ⴼ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⴳ ⵓⵣⵣⵔⴰⴼ ⴷ ⵓⵙⵡⵓⴷⴷⵓ ⴰⵎⵙⵙⵓⴳⵓⵔ ⵙⴳ ⵜⵉⵔⵎⵉⵜ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ ⴳ ⵢⵉⴳⵔ ⵏ ⵓⴱⵕⵍⴰⵎⴰⵏ ⴰⵍⵉⴽⵟⵕⵓⵏⵉ.

ⵉⵙⴰⵡⵍ ⴼ ⵜⵉⵔⴰⵜ ⵏ ⵜⵎⴰⵣⵉⵔⵜ ⵏⵏⵙ ⵃⵎⴰ ⴰⴷ ⵢⵉⵍⵉ ⵚⴰⵃⴰ ⵙⴳ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⵉⵣⵡⴰⵔⵏ ⴳ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⵖⵓⵙⵏⵉⵏ, ⵉⵙⴷⴷⵉⵙ ⴼ ⵡⴰⵜⵉⴳ ⵏ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ ⵊⴰⵔ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⴱⵍⴰ ⵜⵍⵍⴰ ⵜⵡⵉⵣ ⵏ ⵓⴱⵕⵕⴰⵏⵉ ⵉ ⵓⵙⴽⵔ ⵏ ⵜⴳⵎⵉ ⵜⴰⵙⵓⵍⴰⵏⵜ.

ⵉⵙⵓⵜⴳ ⵎⴰⵙⵙ ⵎⵓⵃⴰⵎⵎⴰⴷ ⵚⵚⴱⴱⴰⵕⵉ ⵜⵓⴳⴳⴰ ⵏ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵏⴰⵎⵉⴱⵢⴰ ⴳ ⵓⵙⵏⴰⵍ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵉ ⵉⵎⵓⵙⵙⵓⵜⵏ ⵏ ⵓⵙⵍⴻⵍⵍⵉ ⴳ ⵏⴰⵎⵉⴱⵢⴰ. ⵉⵙⴰⵡⵍ ⵓⵍⴰ ⴼ ⵡⴰⵜⵉⴳ ⵏ ⵓⵏⵎⵓⵇⵇⴰⵔ ⴰⴷ ⵉⴳⴰⵏ ⵜⴰⵎⵍⴷⴰ ⵏ ⵓⵙⴷⵙⵓ ⵏ ⵓⵎⵢⴰⴷⴰⵙ ⴷ ⵜⴷⴷⵓⴽⴽⵯⵍⴰ ⴷ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⴷ ⵜⵉⵔⵎⵉⵜⵉⵏ ⴷ ⵓⵎⵢⴰⵡⴰⵙ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ.

ⵖⵎⴽ ⵍⵍⵉ ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⴽⴰⴱⴰⵕ ⵏ ⵍⵎⵖⵔⵉⴱ ⴼ ⵡⴰⵜⵉⴳ ⵏ ⵓⴽⴰⴱⴰⵕ ⵏ ⵍⵎⵖⵔⵉⴱ ⴼ ⵡⴰⵜⵉⴳ ⵏ ⵜⵎⴷⵔⴰⵡⵜ ⴰⴽⴷ ⴰⵢⵜⵎⴰⵜⵏ ⵉⴼⵔⵉⵇⵢⵏ, ⵉⵖⵔ ⵉ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵏⴰⵎⵉⴱⵢⴰ ⵉ ⵓⵔⵣⴰⴼ ⴰⵎⴰⴷⴷⵓⴷ ⵉ ⵜⴳⵍⴷⵉⵜ ⵏ ⵍⵎⵖⵔⵉⴱ ⵉ ⵓⵙⵙⵏ ⵏ ⵜⵉⵔⵎⵉⵜ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ ⴳ ⵓⵣⵣⵔⴰⴼ ⴷ ⵜⵉⴹⴰⴼ ⴷ ⵜⵎⵙⵙⵓⴳⵓⵔⵜ ⵜⴰⵎⵓⵟⵟⵓⵏⵜ.

ⴳ ⵜⵜⴳⵉⵔⴰ, ⵉⵙⴰⵡⵍ ⵎⴰⵙⵙ ⴱⵉⵜⵔ ⴽⴰⵜⵊⴰⴼⵉⴼⵉ ⴼ ⵜⵓⵎⵔⵜ ⵏⵏⵙ ⵙ ⵓⵏⵎⵓⵇⵇⴰⵔ ⴰⴷ, ⵉⵙⴰⵡⵍ ⴼ ⵜⵉⵔⴰⵜ ⵏⵏⵙ ⵉ ⵓⵔⵣⴰⴼ ⴰⵎⴰⴷⴷⵓⴷ ⵉ ⵜⴳⵍⴷⵉⵜ ⵏ ⵍⵎⵖⵔⵉⴱⴷ ⵓⴽⴰⴱⴰⵕ ⴳ ⵍⵍⴰⵏ ⵉⴳⵏⵙⴰⵙⵏ ⵙⴳ ⵜⴰⵎⵙⵎⵓⵏⵜ ⵜⴰⵏⴰⵎⵓⵔⵜ ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵏⴰⵎⵉⴱⵢⴰ, ⵉ ⵜⵉⴽⴽⵉ ⵏ ⵓⵏⴼⵓⵙ ⵉⴷⵓⵙⵏ ⵉ ⵜⵣⴷⴰⵢⵉⵏ  ⵜⵉⵙⵉⵏⵔⴰⵏⵉⵏ ⵊⴰⵔ ⵙⵏⴰⵜ ⵜⵎⵔⵙⴰⵍ ⵉ ⵚⴰⵃⴰ ⵏ ⵜⵏⵓⴼⴰ ⵏ ⵉⵎⴰⴷⴰⵏⵏ ⴰⵢⵜⵎⴰⵜⵏ.