ⴰⵙⵉⵡⴹ ⵏ ⵡⴰⵎⵓⵔ ⵏ ⵡⴰⴽⵓⵛ

ⵏⴽⴽⵯⵏⵉ ⵉⴱⵕⵍⴰⵎⴰⵏⵉⵢⵏ ⵏ ⵓⵎⴰⴹⴰⵍ ⵎⵓⵏⵏⵉⵏ ⴳ ⵉⴳⵏⵙⴰⵙⵏ ⵏ ⵉⵙⴳⴷⴰⵏ ⴷ ⵜⵎⴰⴷⴷⴰⵙⵉⵏ ⵜⵉⵙⴳⴷⴰⵏⵉⵏ ⴷ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴷ ⵉⵎⵓⵣⴰⵢⵏ ⵉⴳⵔⴰⵖⵍⴰⵏⵏ ⴳ ⵓⴳⵔⴰⵡⴰ ⴰⵎⵣⵡⴰⵔⵓ ⵅⴼ ⵓⵎⵙⴰⵡⴰⵍ ⴳⵔ ⵉⵙⴳⴷⴰⵏ, ⵍⵍⵉ ⵜⵙⵏⵎⴰⵍⴰ, ⴳ ⵜⵖⵔⵎⵜ ⵏ ⵡⴰⵎⵓⵔ ⵏ ⵡⴰⴽⵓⵛ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ 13 ⴰⵔ 15 ⵢⵓⵏⵢⵓ 2023, ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴷ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵓⵎⵢⴰⵡⴰⵙ ⴷ ⵜⴳⵔⴰⵡⵜ “ⵉⵙⴳⴷⴰⵏ ⵉ ⵓⴼⵔⴰ” ⴷ ⵓⵙⵏⴰⵍ ⵏ ⵜⴰⵎⵓⵏⵜ ⵏ ⵜⵖⵔⵎⵉⵡⵉⵏ ⴳ ⵜⵎⴰⴷⴷⴰⵙⵜ ⵏ ⵜⵎⵜⵜⴰ ⵎⵓⵏⵏⵉ ⴷ ⵜⵣⵍⵖⴰ ⵜⴰⵎⵓⵃⵎⵎⴰⴷⵉⵜ ⵉ ⵉⵎⴰⵙⵙⴰⵏⵏ.

ⴰⵔ ⵏⵙⴷⴷⵉⴷ ⵎⴰⵙ ⴰⵎⵙⴰⵡⴰⵍ ⴳⵔ ⵉⵙⴳⴷⴰⵏ ⵉⴱⴷⴷⵏ ⴼ ⵓⵙⴷⵓⵙ ⵏ ⵜⵍⴻⵍⵍⵉ ⴷ ⵉⵣⵔⴼⴰⵏ ⵉⴷⵙⵍⴰⵏⵏ, ⵉⴳⴰ ⵉⵎⵉⵙⵙ ⴰⴷⵙⴰⵍⵏ ⵉ ⵓⵙⴷⵓⵙ ⵏ ⵓⵙⵉⴷⴼ ⴷ ⵓⵙⵕⵚⵓ ⵏ ⵓⵡⴰⵏⴽ ⵏ ⵓⵙⵍⴳⵏ ⴷ ⵓⵙⵙⵇⵔⴱ ⵏ ⵜⵓⴳⴳⴰⵙ ⵛⵛⴰⵔⵏⵉⵏ ⵡⴰⵜⵜⵙⵏⵉⵏ ⴰⵙⵎⵖⵔ ⵏ ⵡⴰⵎⵓⵏⵏ.

ⵉⵖ ⵥⴹⴰⵕⵏ ⵎⴰⵕⵕⴰ ⵏ ⵉⵙⴳⴷⴰⵏ ⴰⴷ ⵙⵙⵉⵙⴼⵉⵡⵉⵏ ⴰⵙⵡⵉⵏⴳⵎ ⵏⵏⵖ ⴼ ⵓⵎⴰⴹⴰⵍ ⴷ ⵉⵙⵓⵔⵙⵏ ⵏ ⵉⵏⵎⵓⵔⴰⵏ ⵏⵏⵙ, ⵉⴳ ⵙⴳ ⵜⵓⵛⵛⵉⵍⵉⵏ ⵏⵏⵖ, ⵏⴽⴽⵯⵏⵉ ⴷ ⵉⵎⵣⵣⵔⴰⴼⵏ ⵎⵏⵉⴷ ⵏ ⵉⵡⴰⵏⴽⵏ ⴷ ⵉⵎⴰⴷⴰⵏⵏ, ⴰⴷ ⵏⵙⴽⵔ ⵜⵉⵎⵏⵜⵍⵉⵏ ⵍⵍⵉ ⵔⴰⴷ ⵉⵙⵙⵔⵅⵓ ⵜⵓⴷⵔⵜ ⵏ ⴼⵔⴰ ⴷ ⵜⵓⵎⵔⵜ ⵉ ⴽⵓⵢⴰⵏ.

ⵉⵇⵇⴰⵏ ⴰⵖ ⴷ ⴰⴷ ⵏⴹⵎⵏ ⴰⵡⵇⵇⵔ ⵏ ⵓⵡⴰⵏⴽ ⵏ ⵓⵙⵍⴳⵏ ⴷ ⵉⵣⵔⴼⴰⵏ ⵉⵏⴼⴳⴰⵏⵏ ⴷ ⵜⵍⴻⵍⵍⵉ ⵜⴰⵙⵉⵍⴰⵏⵜ, ⴰⵎ ⵜⵉⵍⴻⵍⵍⵉ ⵏ ⵓⵙⵡⵉⵏⴳⵎ ⴷ ⵓⵙⴳⴷ ⴷ ⵓⴳⵔⴰⵡ, ⵏⵎⵎⴰⵖ ⵓⵍⴰ ⴰⴷ ⵚⵉⵃⵉⵏ ⵉⵣⵔⴼⴰⵏ ⴰⴷ ⴷ ⵜⵍⴻⵍⵍⵉ ⴰⴷ ⵜⴰⵔ ⴰⵙⵏⵓⵃⵢⵓ.

ⴳ ⵓⵣⵎⵣ ⵍⵍⵉⵖ ⴷ ⵉⴼⴼⵓⵖ ⵓⵎⴰⴹⴰⵍ ⴳ ⵜⴰⵙⵙⴰⵙⵜ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19, ⵍⵍⵉ ⵢⵓⴷⴷⵏ ⵉ ⵓⵎⴰⴹⴰⵍ ⴳ ⴽⵕⴰⴹ ⵉⵙⴳⴳⵯⴰⵙⵏ, ⵉⵇⵇⴰⵏ ⴰⵖ ⵙ ⴰⴷ ⵏⵙⴱⴷⴷ ⵜⴰⵣⵣⵉⴳⵣⵜ ⵏ ⵉⵎⴰⵖⵏ, ⴷ ⵜⵎⵓⴽⵔⵉⵙⵉⵏ ⵜⵉⵊⵢⵓⵙⵔⵜⴰⵏⵉⵏ ⴷ ⵜⵎⵓⴽⵔⵉⵙⵉⵏ ⵏ ⵡⴰⵡⵏⴹ, ⴳⴰⵏ ⵜⵉⵎⵏⵜⵍⵉⵏ ⵍⵍⵉ ⵙⵎⵖⵔⵏⵉⵏ ⵡⴰⵔⵉⵙⴽⵉⵍ ⴷ ⵡⴰⵔⴳⴳⵉⴳ ⴰⴷⵎⵙⴰⵏ ⴷ ⵜⴰⵙⵙⴰⵙⵉⵏ ⵜⵉⵏⴼⴳⴰⵏⵉⵏ ⵍⵍⴰⵏⵉⵏ.

ⴷⴰ ⵏⵥⵕⵕⴰ ⵎⴰⵙ ⵉⵜⵜⵉⴷⵔⵓⵙ ⵢⵉⴳⵔ ⴰⵖⵔⵎⴰⵏ, ⵉⵣⵣⵉⴳⵣ ⵓⵙⵡⴰⵍⴰ ⴰⵢⴷⵢⵓⵍⵓⵊⵉ, ⴷ ⵜⴽⵕⴹⵉ ⵜⴰⵙⵔⵜⴰⵏⵜ ⴳ ⴽⵉⴳⴰⵏ ⵏⵉⵎⵏⴹⵏ, ⵣⵣⵉⴳⵣⵏ ⵓⵍⴰ ⵉⵏⵖⵎⵉⵙⵏ ⵏ ⵜⴽⵔⴽⴰⵙ ⴷ ⵉⵏⴰⵡⵏ ⵏ ⵜⴰⴳⵯⵉⵜ ⵙⵍⴰⵡⴰⵏ ⴰⴽⴽⵯ ⴳ ⵉⵥⵟⵡⴰⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ, ⴼⵔⴽⵏ ⵉⵏⵎⵓⵔⴰⵏ ⴳ ⴽⵉⴳⴰⵏ ⵏ ⵜⵙⴳⴳⵉⵡⵉⵏ ⵏ ⵓⵎⴰⴹⴰⵍ, ⵓⴳⴳⵯⴰⵔ ⵙ ⵓⴳⴳⵯⴰⵔ, ⵎⴰⵙ ⵓⵔ ⵍⵍⵉⵏ ⴳ ⵓⴼⵔⴰ ⴷ ⵎⴰⵙ ⵓⵔ ⴳⵉⵏ ⵜⴰⵎⵢⵉⵎⴰⵏⵜ ⴳ ⵜⵎⵔⵙⴰⵍ.

ⴳⴳⵓⵜⵏⵜ ⵜⵎⴰⵖⵉⵏ ⵏ ⵡⴰⵔⴰⵎⵙⵓⵔⵓⵔⴼ ⵎⵏⵉⴷ ⵏ ⵜⴷⵔⵓⵙⵉⵏ ⴷ ⵜⵔⵓⴱⴱⴰ ⵜⵉⵙⴳⴷⴰⵏⵉⵏ, ⵜⵉⵎⵖⴰⵔⵉⵏ ⴰⴷ ⴱⴰⵀⵔⴰ ⵉⴳⴰⵏ ⵜⵉⵏⴳⴰⵙⵉⵏ ⵏ ⵜⵎⴰⵖⵉⵏ ⴰⴷ, ⵉⵍⵉⵏ ⵓⵍⴰ ⴷⴰⵜ ⵏ ⵜⴰⵙⵙⴰⵙⵉⵏ ⵏ ⵓⵙⴽⵔ ⵏ ⵉⵣⵔⴼⴰⵏ ⵏⵏⵙⵏⵜ ⵉⵖⵔⵎⴰⵏⵏ ⵙ ⵢⵉⵙⴽⵉⵍ ⴷ ⵉⵔⴳⴰⵣⵏ, ⴷⴰ ⵜⵜⵔⴼⵓⴼⵏⵜ ⵙⴽ ⴰⵏⴰⵡⵏ ⵏ ⵓⵙⵏⵓⵃⵢⵓ ⴷ ⵜⴽⵔⴹⵉ ⵉⴱⴷⴷⵏ ⴼ ⵡⴰⵏⴰⵡ, ⴽⵔⴰ ⵏ ⵜⵉⴽⴽⴰⵍ ⵙ ⵉⵙⵎ ⵏ ⵓⵙⴳⴷ. ⵉⵄⵔⵔⵉⵎⵏ ⴳⴰⵏⵉⵏ ⵜⴰⴷⵓⵍⵉ ⵎⵇⵇⵓⵔⵏ ⴳ ⵓⵎⴰⴹⴰⵍ ⴷⴰ ⵜⵜⴰⴼⵉⵏ ⵜⵉⵎⵓⴽⵔⵉⵙⵉⵏ ⵃⵎⴰ ⴰⴷ ⵙⵙⵍⴽⵎⵏ ⴰⴳⵔⴷ ⵏⵏⵙⵏ ⵉ ⵓⵎⴰⴹⴰⵍ.

ⵉⵇⵇⴰⵏ ⴷ ⴰⴷ ⵓⵔ ⵉⴳ ⴽⵔⴰ ⵏ ⵓⵙⴳⴷ ⴰⵡⵜⵜⴰⵙ ⵏ ⵓⵙⵏⵓⵃⵓⵢ ⴷ ⵓⵙⵉⵜⵜⵉ ⵙⴳ ⴽⵔⴰ ⵏ ⵜⵔⴰⴱⴱⵓⵜ ⵢⴰⴹⵏⵉⵏ, ⵉⵇⵇⴰⵏ ⴷ ⴼ ⴽⵓⵢⴰⵏ ⴰⴷ ⵓⵔ ⵉⵙⵙⵍⴳⵏ ⵜⵉⴽⵕⴹⵉ ⵎⵏⵉⴷ ⵏ ⵜⵔⴰⴱⴱⵓⵜ ⵢⴰⴹⵏⵉⵏ.

ⴳ ⵓⵎⵏⴰⴹ ⴰⴷ, ⴰⵔ ⵏⵙⴷⴷⵉⴷ ⵎⴰⵙ ⴷ ⴰⴱⵔⵙⵙⵉⵡⴷ ⴷ ⵜⴻⵟⵟⵓⵕⴼⴰ ⴳⴰⵏ ⵜⵉⵎⵓⴽⵔⵉⵙⵉⵏ ⵅⴰⵜⵔⵏⵉⵏ ⴷⴰⵜ ⵏ ⵓⴼⵔⴰ ⴷ ⵜⵏⴼⵔⵓⵜ ⵍⵍⵉ ⵓⵔ ⵏⵓⴼⵉ ⴰⴷ ⵜⵏⵜ ⵏⵣⴷⵉ ⴷ ⴽⵔⴰ ⵏ ⵓⵙⴳⴷ ⵏⵖ ⴷ ⵜⴰⵔⴰⴱⴱⵓⵜ ⵜⴰⵥⵓⵕⴰⵏⵜ.

ⴷⴰ ⵏⵙⴷⴷⵉⴷ ⵎⴰⵙⴷ ⴰⵎⵎⴰⵙ ⴳ ⵓⴼⵓⴽⴽⵓ ⵏ ⵜⵎⴰⵖⵉⵏ ⵣⴷⵉⵏⵉⵏ ⴷ ⵓⵙⴳⴷ ⴷ ⵜⵉⵍⴰⵍⵜ ⵉⴼⴰⵡⵏ ⵏ ⵉⵎⴰⵙⵙⵏ ⴷ ⵜⵎⵔⵙⴰⵍ ⵍⵍⴰⵉⵏ ⵉ ⵓⴼⵓⴽⴽⵓ ⵏ ⵜⵎⴰⵖⵉⵏ.

ⵎⵏⵉⴷ ⴰⵏⵏ, ⴷⴰ ⵏⵙⴰⵡⴰⵍ ⴼ ⵓⵅⵎⵎⴻⵎ ⵏⵏⵖ ⴳ ⵎⴰⴷ ⵉⵍⵍⴰⵏ ⴳ ⴽⵉⴳⴰⵏ ⵏ ⵡⴰⵎⵓⵏⵏ ⴷ ⵜⵔⵓⴱⴱⴰ ⵏ ⵓⵎⴰⴹⴰⵍ, ⵙ ⵓⵙⵓⵔⵔⵉ ⴰⵎⴰⵜⴰⵢ ⵏ ⵜⴷⵉⵎⵓⵇⵔⴰⵟⵉⵜ ⴷ ⵓⵙⵓⵔⵔⵉ ⵏ ⵡⴰⵜⵉⴳⵏ ⵏ ⵜⵡⵉⵣⵉ ⴷ ⵜⵔⵙⴰⵍ ⵏ ⵜⵏⴼⴳⵓⵔⵉⵏ ⴳ ⵜⵙⵔⵜⵉⵜ ⴷ ⵡⴰⵎⴰⵏⵏ ⴰⴽⴽⵯ.  

ⴰⴼⵓⴽⴽⵓ ⵏ ⵜⵎⵓⴽⵔⵉⵙⵉⵏ ⴰⴷ ⵉⵇⵇⴰⵏ ⴷ ⵜⴰⵡⵡⵓⵔⵉ ⵉⴼⴰⵡⵏ ⴳ ⵓⵎⵏⵉⴷ ⵏⵏⵖ ⴰⴽⴽⵯ: ⵉⴱⵕⵍⴰⵎⴰⵏⵉⵢⵏ ⵙ ⵜⵏⴱⴰⴹⵉⵏ ⵏⵏⵙⵏ ⵜⵉⵣⵣⵔⴰⴼⵉⵏ, ⴷ ⵎⴰⵕⵕⴰ ⵉⵎⵙⴽⴰⵔⵏ ⴳ ⵡⴰⵎⵓⵏ, ⴳ ⵍⵍⴰⵏⵜ ⵜⵎⵔⵙⴰⵍ ⵜⵉⵎⴰⴷⴷⵓⴷⵉⵏ ⴷ ⵜⵔⵓⴱⴱⴰ ⵜⵉⵙⴳⴷⴰⵏⵉⵏ ⴷ ⵜⵎⴰⴷⴷⴰⵙⵉⵏ ⵜⵉⵙⴳⴷⴰⵏⵉⵏ ⴷ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴷ ⵡⴰⵎⵎⴰⵙⵏ ⵉⴽⴰⴷⵉⵎⵉⵢⵏ.

ⵉⵇⵇⴰⵏ ⴰⵖ ⴷ ⴳ ⵉⵣⵎⴰⵣ ⵏ ⵜⴰⵙⵙⴰⵙⵜ ⴷ ⵜⵓⵔⴷⴰ ⴰⴷ ⵏⵙⴽⵔ ⵉⵎⴰⵏ ⵏ ⵜⵏⴰⵔⴰ ⵉⴷⵓⵙⵏ ⵉ ⵓⵙⵎⵓⵏ ⵏ ⵉⵡⴷⴰⵏ ⴼ ⵓⵙⵎⴰⵇⵇⵍ ⵉⵛⵛⴰⵔⵏ ⵉ ⵉⵎⴰⵍ.

ⵏⴼⵔⴽ ⴰⴼⵔⴰⴽ ⵉⴳⴳⵓⵜⵏ ⴷ ⵓⵛⵛⵉⵍ ⵏ ⵓⵙⴽⵔ ⵏ ⵜⵎⴰⵖⵓⵏⵜ ⵜⴰⵏⴰⵎⵓⵏⵜ ⵉⵙⵙⵓⴷⵓⵙⵏ ⴰⴷⴷⵓⵔ ⵉⵛⵛⴰⵔⵏ ⴷ ⵜⴳⵯⵎⴰⵜ ⴷ ⵢⵉⵙⴽⵉⵍ ⵊⴰⵔ ⵎⴰⵕⵕⴰ ⵉⵡⴷⴰⵏ. ⵍⵍⵉⵖ ⵏⴳⴰ ⵉⴱⵕⵍⴰⵎⵏⵉⵢⵉⵏ, ⵉⵇⵇⴰⵏ ⴷ ⴰⴷ ⴰⴽⴽⵯ ⵏⵙⵡⵓⵔⵉ ⵉ ⵓⵚⴽⵓ ⵏ ⵡⴰⵎⵓⵏⵏ ⴷⵓⵙⵏⵉⵏ ⵍⵍⵉ ⵔⴰⴷ ⵉⵙⵉⴷⴼ, ⴳ ⵉⵥⴹⴰⵕ ⴽⵓ ⴰⴼⴳⴰⵏ ⴰⴷ ⵢⴰⴼⵉ ⵉⵅⴼ ⵏⵏⵙ.

ⵙ ⵖⵎⴽ ⴰⵏⵏ ⴰⴼ ⴷ ⵉⵇⵇⴰⵏ ⴰⴷ ⵏⵙⵙⵔⵇⴱ ⵜⴰⴷⵍⵙⴰ ⵏ ⵓⵎⵙⴰⵡⴰⵍ ⴳ ⵉⴱⵕⵍⴰⵎⴰⵏⵏ ⵍⵍⵉ ⴳⴰⵏⵉⵏ ⵜⵉⵎⵔⵙⴰⵍ ⵏ ⵓⵣⵓⵣⵣⵔ ⵏ ⵓⴼⵔⴰ ⴷ ⵓⵙⵉⴷⴼ, ⵏⵙⵡⵓⵔⵉ ⵙ ⵜⵎⵙⴽⴰⵔ ⵜⵜⴰⵡⵇⵇⴰⵔⵏⵉⵏ ⵎⴰⵕⵕⴰ ⵉⴼⴳⴰⵏⵏ ⴷ ⵓⵙⵉⵜⵜⵉ ⵏ ⵉⵏⴰⵡⵏ ⵏ ⵓⵙⵏⵓⵃⵢⵓ ⴼ ⵉⵙⴳⴷⴰⵏ ⴷ ⵓⵙⵎⵔⵙ ⵏⵏⵙⵏ ⵉ ⵡⴰⵡⵜⵜⴰⵙⵏ ⵉⵙⵔⵜⴰⵏⵏ.

ⴳⴰⵏ ⵉⵅⴰⵜⴰⵔⵏ ⵏ ⵜⵔⵓⴱⴱⴰ ⵜⵉⵙⴳⴷⴰⵏⵉⵏ ⵉⵡⵔⵉⴽⵏ ⵉⴳⴷⵓⴷⴰⵏⵏ ⵟⵟⴰⴼⵏⵉⵏ ⴰⵥⵏⵥⵕ ⵉⵙⵜⴰⵡⵀⵎⵎⴰⵏ ⴷ ⵎⴰⵙ ⵣⵔⵉⵏ ⵉⵥⵟⵡⴰⵏ ⵉⵙⴳⴷⴰⵏ ⵜⵉⵔⵓⴱⴱⴰ ⵏ ⵜⵏⵓⴼⴰ ⴷ ⵉⵡⵜⵜⴰ ⵉⵏⴰⵎⵓⵔⵏ, ⵙ ⵓⵎⴰⵜⴰ ⵍⵍⴰⵏ ⴱⴷⴷⴰ ⴳ ⵉⵣⵔⵉⵔⵉⴳⵏ ⵉⵎⵣⵡⵓⵔⴰ ⴳ ⵓⵙⴱⴷⴷⵉ ⵏ ⵉⵙⵓⵔⵙⵏ ⵉⵖⴰⵡⴰⵏⵏ ⴳⵉⵏ ⴰⴼⵔⴰⴳ ⵏ ⵓⴼⵔⴰ ⵉ ⵉⵡⴷⴰⵏ ⵍⵍⵉ ⵙⵔⵙ ⵙⵖⴰⵡⵙⴰⵏⵉⵏ.

ⴳ ⵓⵎⵏⴰⴷ ⴰⴷ, ⴰⵔ ⵏⵥⵕⵕⴰ ⵎⴰⵙ ⴳⴰⵏⵜ ⵜⵙⵏⵜⴰⵢⵉⵏ ⵏ ⵜⵔⵓⴱⴱⴰ ⵜⵉⵙⴳⴷⴰⵏⵉⵏ ⵎⵎⴰⵖⵏⵉⵏ ⴼ ⵓⵙⵎⵎⵖⵔ ⵏ ⵜⵎⵢⵉⴷⵉⵔⵜ ⵏ ⵓⴼⵔⴰ ⴷ ⵢⵉⵙⴽⵉⵍ ⴳ ⵢⵉⵙⴽⵉⵍ ⴳ ⵉⵣⵔⴼⴰⵏ ⵊⴰⵔ ⵎⴰⵕⵕⴰ ⵉⵎⴰⴷⴰⵏⵏ, ⴰⵏⴰⵡⵏ ⵉ ⵜⵡⵡⵓⵔⵉ.

ⴷ ⵉⴱⵕⵍⴰⵎⴰⵏⵉⵢⵏ, ⵉⵇⵇⴰⵏ ⴷ ⴰⴷ ⴷⴰⵔⵏⵖ ⵚⴰⵃⴰ ⵙⴳ ⵓⴼⵔⴰⴳ ⵉⵣⵣⵉⴳⵣⵏ ⵙ ⵡⴰⵜⵉⴳ ⵏ ⵉⵙⴳⴷⵏ ⴷ ⵜⵡⵉⵣⵉ ⵏⵏⵙⵏ ⴳ ⵓⴱⵓⵖⵍⵓ ⵏ ⵓⴼⴳⴰⵏ. ⵉⵇⵇⴰⵏ ⴷ ⵓⵍⴰ ⴰⴷ ⵏⵙⴽⵔ ⴳ ⵉⵥⵟⵡⴰⵏ ⴰⴷ ⵉⵙⵎⵓⵏⵏ ⴳ ⵜⵎⵙⴰⵔⵜ ⵏⵏⵖ ⵉⵛⵛⴰⵔⵏ ⵉ ⵜⵣⵔⴼⵜ ⵜⴰⵏⴰⵎⵓⵏⵜ ⴷ ⵜⵎⵢⵉⴷⵉⵔⵜ.  

ⵏⵍⵍⴰ ⴰⵙⵙ ⴰⴷ ⴷ ⵉⴱⵕⵍⴰⵎⴰⵏⵏ ⵙⴳ ⵉⴱⵕⵍⴰⵎⴰⵏ ⴰⴽⴽⵯ ⵏ ⵓⵎⴰⴹⵍ ⴳ ⵜⵖⵓⵔⵉ ⵉ ⵜⵎⵢⵉⴷⵉⵔⵜ ⵉⴱⴷⴷⵏ ⴼ ⵢⵉⵙⴽⵉⵍ ⴷ ⵓⴷⴷⵓⵔ ⵉ ⴽⵓⵢⴰⵏ, ⵏⵙⴷⴷⵉⴷ ⵜⵉⵔⴰⵜ ⵏⵏⵖ ⵉⵛⵛⴰⵔⵏ ⵉ ⵜⵎⵢⵉⴷⵉⵔⵜ ⴳ ⵓⴼⵔⴰ ⴷ ⵓⵙⵉⴷⴼ ⴷ ⵓⵚⴽⵓ ⵏ ⵜⵎⵔⵙⴰⵍ ⴷⵓⵙⵏⵉⵏ ⴳ ⵓⵙⴰⵜⵉ ⵏ ⵓⵡⵇⵇⵔ ⵉⵙⵎⴷⵏ ⵏ ⵓⵡⴰⵏⴽ ⵏ ⵓⵙⵍⴳⵏ.

ⴰⵔ ⵏⴰⵇⵇⵔⴰ ⵎⴰⵕⵕⴰ ⵏ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⵉ ⵜⵣⵣⵉⴳⵣⵜ ⵏ ⵜⵡⵡⵓⵔⵉ ⵃⵎⴰ ⴰⴷ ⵢⵉⵍⵉ:

* ⵉⵙⴽⵉⵍ ⴷⴰⵔ ⵎⴰⵕⵕⴰ ⵉⵙⴳⴷⴰⵏ ⴷ ⵜⵎⴰⴷⴷⴰⵙⵉⵏ ⵜⵉⵙⴳⴷⴰⵏⵉⵏ ⵜⴰⵔ ⴽⵔⴰ ⵏ ⵓⵙⵏⵓⵃⵢⵓ ⴷⴰⵜ ⵏ ⵓⵙⵍⴳⵏ.

* ⴰⵙⴷⵔⵓ ⵏ ⵉⴳⵏⵙⴰⵙⵏ ⵏ ⵉⵙⴳⴷⴰⵏ ⴷ ⵜⵎⴰⴷⴷⴰⵙⵉⵏ ⵜⵉⵙⴳⴷⴰⵏⵉⵏ ⴷ ⵡⴰⵎⵓⵏ ⴰⵖⵔⵎⴰⵏ ⴳ ⵜⵓⴳⴳⴰⵙ ⵏ ⵓⵣⵣⴳⵉⵔ ⵏ ⵉⵙⵍⴳⵏⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⴷ ⵓⵙⴷⵓⵙ ⵏ ⵓⵎⵛⴰⴱⴱⴰⴽⴰ ⴰⵏⴰⵎⵓⵏ ⴳ ⵏⵉⵜ ⵜⵍⵍⴰ ⵜⵎⵎⵏⵏⴰⵡⵜ.

* ⴰⵙⵕⵚⵓ ⵏ ⵓⵎⵙⴰⵡⴰⵍ ⴰⴽⴷ ⵉⵅⴰⵜⴰⵔⵏ ⴷ ⵜⵔⵓⴱⴱⴰ ⵜⵉⵙⴳⴷⴰⵏⵉⵏ ⵃⵎⴰ ⴰⴷ ⵏⴰⵡⵙ ⴳ ⵓⵙⴷⵓⵙ ⵏ ⵜⵡⵉⵣⵉ ⴷ ⵡⴰⵍⴰⵢ ⵏ ⵜⵏⴰⵥⴰⵕⵉⵏ ⵍⵍⴰⵏⵉⵏ ⴰⵎ ⴰⵥⵍⴰⴹ ⴷ ⵉⵙⵏⵓⵃⵢⵓⵜⵏ ⴷ ⵜⵎⵓⴽⵔⵉⵙⵉⵏ ⵏ ⵓⵏⵣⵡⵉ ⴷ ⵜⵎⴰⵖⵉⵏ ⴷ ⵓⵏⴳⴰⴹ ⴷ ⵡⴰⵏⴰⵡⵏ ⵏ ⵜⵙⵎⵓⵔⵜ ⵉⴳⴳⵓⵜⵏ ⴷ ⵜⴻⵜⵉⴽⵏⵓⵍⵓⵊⵉⵜ ⵜⴰⵎⵓⵟⵟⵓⵏⵜ ⴷ ⵏⵉⵜ ⵉⵍⵍⴰ ⴳⴰⵔ ⵓⵙⵎⵔⵙ ⵏ ⵓⴼⵓⵍⵍⵙ ⴰⵎⴳⵓⵔⴰⵏ.

* ⴰⵙⴽⵔ ⵏ ⵜⵔⵓⴱⴱⴰ ⵏ ⵜⵡⵡⵓⵔⵉ ⵏⵖ ⵜⵉⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴳ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⴼ ⵓⵎⵙⴰⵡⴰⵍ ⴳⵔ ⵉⴳⴷⴰⵏ ⴷ ⵜⴷⵍⵙⵉⵡⵉⵏ ⵉ ⵜⵎⵢⵉⴷⵉⵔⵜ ⵏ ⵓⴼⵔⴰ ⴷ ⵓⵙⵉⴷⴼ ⴰⵏⴰⵎⵓⵏ ⴷ ⵓⵙⵔⵅⵓ ⵏ ⵓⵎⵢⴰⵡⴰⵙ ⵊⴰⵔ ⵜⵉⵔⵓⴱⴱⴰ ⴷ ⵜⵙⵇⵇⵉⵎⵉⵏ ⴰⴷ.

* ⴰⵙⴷⵓⵙ ⵏ ⵓⵎⵢⴰⵡⴰⵙ ⵉⴳⴳⵓⵜⵏ ⵊⴰⵔ ⵉⴳⵏⵙⴰⵙⵏ ⵏ ⵉⵙⴳⴷⴰⵏ ⴷ ⵜⵏⴱⴰⴹⵉⵉⵏ ⵜⵉⵏⴰⵎⵓⵔⵉⵏ ⴳ ⵢⵉⴳⵔ ⵏ ⵓⵙⵏⴱⴷⴷⵉ ⵏ ⵉⴱⴽⴽⴰⴹⵏ ⴰⵎ ⴰⵙⵖⵏⵣⵉ ⴳ ⵓⴼⴳⴰⵏ ⴷ ⵓⵙⵎⵔⵙ ⴷ ⵜⴽⵕⴹⵉ ⴳ ⵜⴳⵯⵎⵎⴰ ⴷ ⵜⵡⵡⵓⵔⵉ ⵉⵛⴷⴷⴰⵏ ⴷ ⵓⴼⵔⴰⴳ ⵏ ⵉⵏⴳⴰⵙⵏ ⵏ ⵉⴱⴽⴽⴰⴷⵏ ⴰⴷ.

* ⴰⵙⵖⵣⵏ ⵏ ⵡⴰⵔⵔⴰⵜⵏ ⴼ ⵜⵎⵙⴽⴰⵔ ⵜⵉⴱⵕⵍⴰⵎⴰⵏⵉⵢⵉⵏ ⴳ ⵓⵙⵡⵉⵔ ⴰⵎⴰⴹⵍⴰⵏ ⵙ ⵎⴰⴷ ⵉⵜⵜⴰⵡⵉⵏ ⵙ ⵓⵡⵡⵇⵔ ⵏ ⵉⵙⴳⴷⴰⵏ ⵉⴼⵔⴳ ⵙⴳ ⵉⵏⴰⵡⵏ ⵏ ⵜⴰⴳⵯⵉⵜ.

* ⴰⵙⵎⵖⵔ ⵏ ⵜⵔⵙⴰⵍ ⵏ ⵓⵙⵉⴷⴼ ⴷ ⵜⵎⵏⵏⴰⵡⵜ ⴷⴰⵔ ⵉⵄⵔⵔⵉⵎⵏ ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⴳⴰⵏ ⴰⵡⵇⵇⵔ ⵏ ⵡⴰⵢⵢⴰⴷ ⵙ ⵓⵡⵇⵇⵔ ⵏ ⵉⵙⴳⴷⴰⵏ, ⴰⵢⵍⵍⵉ ⵉⴳⴰⵏ ⵙⴳ ⵜⵔⵙⴰⵍ ⵏ ⵡⴰⵎⵓⵏⵏ ⴳ ⵉⵍⵍⴰ ⵓⵙⵉⴷⴼ ⴷ ⴼⵔⴽⵏⵉⵏ ⵙ ⵓⴼⵔⴰ.

* ⴰⵏⵄⴰⵔ ⵉ ⵓⵙⴳⵎⵉ ⴷ ⵓⵙⴼⵔⴽ ⵏ ⵉⵡⴷⴰⵏ ⵙ ⵡⴰⵜⵉⴳⵏ ⵏ ⵓⵡⵇⵇⵔ ⴷ ⵓⵏⵔⴰⵎⴰⵙ ⵊⴰⵔ ⵉⵡⴷⴰⵏ ⴷ ⵜⵔⵓⴱⴱⴰ ⵉⴽ ⵏⵏⴰ ⴳⴰⵏ ⵉⵙⴳⴷⴰⵏ ⵏⵏⵙ, ⴷ ⵓⵡⵇⵇⵔ ⵏ ⵡⴰⴷⴷⵓⵔ ⵏ ⴽⵓ ⵢⴰⵏ.

* ⴰⵙⴱⴷⴷⵉ ⵏ ⵉⵏⴰⵡⵏ ⵏ ⵜⴰⴳⵯⵉⵜ ⴷ ⵡⴰⵔⵡⵇⵇⵔ ⵏ ⵉⵡⴷⴰⵏ ⵙ ⵓⵙⴳⴷ ⵏⵏⵙⵙ ⴷ ⵓⵙⴱⴷⴷⵉ ⵏ ⵉⵙⴽⴽⵉⵔⵏ ⵏ ⵓⵙⵏⵓⵃⵢⵓ ⵙ ⵜⵙⵏⵜⴰⵢ ⵏ ⵓⵣⵣⵔⴰⴼ. 

* ⴰⵙⵙⵔⵇⴱ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⵉ ⵉⵥⵉⵔ ⵏ ⵜⵎⵙⴽⴰⵔ ⵜⵉⴱⵕⵍⴰⵎⴰⵏⵉⵢⵉⵏ ⵥⵉⵍⵏⵉⵏ ⴼ ⵓⵙⵏⴰⵍ ⵏ ⵜⵎⵏⵏⴰⵡⵜ ⴷ ⵓⵎⵙⵓⵔⵓⴼ ⴷ ⵓⵎⵙⴰⵡⴰⵍ ⴷ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵜⵏⵎⵓⵔⵉ ⴷ ⵓⵡⴰⵏⴽ ⵏ ⵓⵙⵍⴳⵏ ⴷ ⵓⵙⵔⵙ ⵏ ⵜⵙⵓⵎⴰⵔ ⴳ ⵢⵉⴳⵔ ⴰⴷ ⵉ ⴱⵕⵍⴰⵎⴰⵏⵏ ⵉⴰⵏⵎⵓⵔⵏ.

* ⴰⵙⵙⵔⵇⴱ ⵏ ⵉⵅⴰⵜⴰⵔⵏ ⵉⵙⴳⴷⴰⵏⵏ ⴼ ⵓⵙⵎⵖⵔ ⵏ ⵓⵙⵉⴷⴼ ⴷ ⵉⵣⵔⴼⴰⵏ ⵉⴷⵙⵍⴰⵏⵏ ⴷ ⵢⵉⵙⴽⵉⵍ ⵊⴰⵔ ⵉⵡⵜⵎⴰⵏ ⴳ ⵜⵔⵓⴱⴱⴰ ⵏⵏⵙⵏ, ⵙ ⵓⵎⵙⴰⵙⴰ ⴷ ⵓⵣⵣⵔⴰⴼ ⴰⵏⴰⵎⵓⵔ ⴳ ⴽⵔⴰⵢⴳⴰⵜ ⵜⴰⵎⴰⵣⵉⵔⵜ, ⴷ ⵓⵡⵇⵇⵔ ⵏ ⵉⵙⵖⵡⴰⵏ ⵉⴳⵔⴰⵖⵍⴰⵏⵏ.

* ⴰⵙⴷⵓⵙ ⵏ ⵓⵎⵢⴰⵡⴰⵙ ⴷ ⵓⵎⵢⴰⵡⴰⴹ ⴷ ⵜⵎⴰⴷⴷⴰⵙⵜ ⵏ ⵜⵎⵜⵜⴰ ⵎⵓⵏⵏⵉⵏ ⴷ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵡⴰⵎⵓⵏ ⴰⵖⵔⵎⴰⵏ ⴷ ⵓⵙⵖⵣⵏ ⵏ ⵜⵙⵜⵔⴰⵜⵉⵊⵉⵢⵉⵏ ⴷ ⵜⵖⵜⴰⵙⵉⵏ ⵏ ⵜⵎⵜⵜⴰ ⵎⵓⵏⵏⵉⵏ ⵍⵍⵉ ⵣⴷⵉⵏⵉⵏ ⴷ ⵓⵎⵙⴰⵡⴰⵍ ⵏ ⵉⵙⴳⴷⴰⵏ ⴷ ⵜⴷⵍⵙⵉⵡⵉⵏ ⵃⵎⴰ ⴰⴷ ⵏⵍⴽⵎ ⵉⵡⵜⵜⴰⵙⵏ ⵏ ⵓⵣⴳⴳⵉⵔ ⴳ ⵉⵙⵡⵉⵔⵏ ⵉⵏⴰⵎⵓⵔⵏ.

* ⴰⵅⵎⵎⴻⵎ ⵃⵎⴰ ⴰⴷ ⴳⵉⵏⵜ ⵜⵏⵓⵕⵥⵎⵉⵏ ⵙ ⵜⵎⵍⴷⴰ ⵏ ⵜⴼⴼⵓⴳⵍⵉⵉⵡⵏ ⵜⵉⵙⴳⴷⴰⵏⵉⵏ ⵏⵖ ⵜⵉⵎⵙⴰⵔⵉⵏ ⵜⵉⵎⴰⴷⴷⵓⴷⵉⵏ ⴳⴰⵏⵉⵏ ⵜⵉⵏ ⴽⵔⴰ ⵏ ⵓⵙⴳⴷ ⵏⵖ ⵜⴰⵔⴰⴱⴱⵓⵜ ⵜⴰⵙⴳⴷⴰⵏⵜ, ⴰⴷ ⵎⵍⵉⵏⵜ ⵜⴰⵎⵏⵏⴰⵡⵜ ⵜⴰⵙⴳⴷⴰⵏⵜ ⴷ ⵜⵎⵏⵏⴰⵡⵜ ⵏ ⵉⵙⴳⴷⴰⵏ ⴳ ⵜⵎⴰⵣⵉⵔⵜ ⴰⵏⵏ.

* ⴰⵙⴽⵔ ⵏ ⵉⵎⵉⵙⵙ ⴰⵎⵔⵙⵍⴰⵏ ⴳ ⵓⵙⴰⵜⵉ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⵉⴱⴷⴷⵏ ⴼ ⵜⵉⵢⵢⴰⴼⵓⵜⵉⵏ ⵏ ⵓⴳⵔⴰⵡ ⵏ ⵡⴰⵎⵓⵔ ⵏ ⵡⴰⴽⵓⵛ ⵉ ⵜⵖⵔⵉ ⵏ ⵜⵎⵙⴽⴰⵔ ⵥⵉⵍⵏⵉⵏ ⴷ ⵓⴹⴼⵕ ⵏ ⵜⵎⴰⵢⵏⵓⵜⵉⵏ ⴷ ⵓⵙⵎⵏⵉⴷ ⵏ ⵜⵙⵓⵎⴰⵔ ⴳ ⵢⵉⴳⵔ ⵏ ⵓⵎⵙⵡⴰⵡⴰⵍ ⵏ ⵉⵙⴳⴷⴰⵏ. ⵔⴰⴷ ⵉⵙⵡⵓⵔⵉ ⵉⵎⵉⵙⵙ ⴳ ⵓⴹⴼⵕ ⵏ ⵓⵙⵉⴷⴼ ⵏ ⵓⵙⵎⴰⵇⵇⵍ ⵏ ⵉⴱⵕⵍⴰⵎⴰⵏⵉⵢⵉⵏ ⴷ ⵉⴳⵏⵙⴰⵙⵏ ⵏ ⵉⵙⴳⴷⴰⵏ ⴷ ⵉⴳⵏⵙⴰⵙⵏ ⵏ ⵡⴰⵎⵓⵏ ⴰⵖⵔⵎⴰⵏ ⴳ ⵎⴰⴷ ⵉⵥⵍⵉⵏ ⵙ ⵓⵎⵙⴰⵡⴰⵍ ⴳⵔ ⵉⵙⴳⴷⴰⵏ.

* ⵜⴰⵖⵓⵔⵉ ⵉ ⵜⴰⵎⵓⵏⵜ ⵜⴰⴱⵔⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴼ ⵓⵙⵉⴷⴼ ⵏ ⵜⵉⵢⵢⴰⴼⵓⵜⵉⵏ ⵏ ⵓⴳⵔⴰⵡ ⵏ ⵡⴰⵎⵓⵔ ⵏ ⵡⴰⴽⵓⵛ ⴳ ⵓⵖⴰⵡⴰⵙ ⵏ ⵜⵡⵡⵓⵔⵉ ⵏⵏⵙ ⴷ ⵓⵙⵎⵏⵉⴷ ⵏ ⵜⴻⵜⴳⴰⵔⵜ ⴰⴷ ⴳ ⵜⵙⵓⵜⵍⵜ 147 ⵏ ⵓⴳⵔⴰⵡ ⴰⵎⴰⵜⵢ ⵏ ⵜⴰⵎⵓⵏⵜ ⴳ ⴽⵟⵓⴱⵕ 2023.

* ⴰⵙⴱⵔⵔⴽ ⵏ ⵜⵖⵓⵔⵉ ⵉⵜⵜⵓⵙⵎⵏⴰⴷⵏ ⵙⴳ ⵓⴱⵕⵍⴰⵎⴰⵏ ⵏ ⵟⵟⴰⵍⵢⴰⵏ ⵉ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⵅⴼ ⵓⵙⴱⵔⵔⴽ ⵏ ⵓⵏⵎⵓⵇⵇⴰⵔ ⴰⵎⴰⴹⵍⴰⵏ ⵅⴼ ⵓⵎⵙⴰⵡⴰⵍ ⵏ ⵉⵙⴳⴷⴰⵏ ⴳ ⵕⵓⵎⴰ ⴳ 2025.

ⴳ ⵜⴳⵉⵔⴰ, ⵏⴽⴽⵯⵏⵉ ⵉⴱⵕⵍⴰⵎⵏⵉⵢⵏ ⴷ ⵎⴰⵕⵕⴰ ⵉⵎⴷⵔⴰⵡⵏ ⴳ ⵓⴳⵔⴰⵡ, ⴷⴰ ⵏⵙⵏⵉⵎⵎⵉⵔ ⴰⴱⵔⵍⴰⵎⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴼ ⵓⵙⴱⵔⵔⴽ ⵏ ⵓⴳⵔⴰⵡ ⴰⴷ ⵉⵥⵍⵉⵏ, ⴰⵙⵏⵉⵎⵎⵔ ⵏⵏⵖ ⴷ ⵓⵙⵓⵜⴳ ⵏⵏⵖ ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴳⵍⵍⵉⴷ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴼ ⵉⵡⵉⵣ ⴰⵎⴰⵜⵜⵓⵢ ⴼ ⵓⴳⵔⴰⵡ. ⴰⵔ ⵏⴰⵇⵇⵔⴰ ⵎⴰⵕⵕⴰ ⵉⵎⴷⵔⴰⵡⵏ ⵉ ⵓⵙⵡⵓⵔⵉ ⴼ ⵜⵖⴰⵔⴰⵙⵜ ⵍⵍⵉ ⵔⴰⴷ ⵢⴰⵡⵙ ⵉ ⵡⴰⵎⵓⵏⵏⵏⵙⵏ ⴰⴷ ⴰⵙⵉⵏ ⵙⴳ ⵉⵎⴰⵏ ⵏ ⵜⵡⵉⵣⵉ ⴷ ⵓⵎⵙⴰⵡⴰⵍ ⵍⵍⴰⵏⵉⵏ ⴳ ⵓⵙⵙⴰⵏ ⵏ ⵓⴳⵔⴰⵡ ⴰⴷ ⵉⵜⵜⵓⵙⵏⵎⴰⵍⴰⵏ ⴳ ⵡⴰⵎⵓⵔ ⵏ ⵡⴰⴽⵓⵛ.