ⵉⵎⴹⴰⴽⴰⵕ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴷ ⵓⵏⵙⵙⵉⵅⴼ ⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ

ⵉⵙⵏⵓⴱⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵎⴰⵙⵙ ⵏⵏⵄⵎ ⵎⵉⵢⵢⴰⵕⴰ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵎⴰⵙⵙ Duarte Pacheco ⴰⵏⵙⵙⵉⵅⴼ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴷ ⵎⴰⵙⵙ Martin Chungong ⴰⵏⴼⵍⵓⵙ ⴰⵎⴰⵜⴰⵢ ⵏ ⵜⴰⵎⵓⵏⵜ, ⴰⵙⵉⵏⴰⵙ 13 ⵢⵓⵏⵢⵓ 2023 ⵙ ⵜⵎⵍⴷⴰ ⵏ ⵓⴳⵔⴰⵡ ⴰⴱⵕⵍⴰⵎⴰⵏⵉ ⴰⴳⵔⴰⵖⵍⴰⵏ ⴼ “ⵓⵎⵙⴰⵡⴰⵍ ⴳⵔ ⵉⵙⴳⴷⴰⵏ: ⴰⴷ ⵏⵎⵢⴰⵡⴰⵙ ⵉ ⵉⵎⴰⵍ ⵉⵛⵛⴰⵔⵏ”, ⵍⵍⵉ ⵉⵙⵏⵎⴰⵍⴰ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴷ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴳ ⵡⴰⵎⵓⵔ ⵏ ⵡⴰⴽⵓⵛ ⵙⴳ 13 ⴰ ⵔ15 ⵢⵓⵏⵢⵓ 2023.  

ⵉⵙⵓⵜⴳ ⵓⵏⵙⵙⵉⵅⴼ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⴰⵎⵓⵏⵜ ⵜⵓⵎⴰⵢⵜ ⵏ ⵜⴱⵔⴰⵜ ⵜⴰⴳⵍⴷⴰⵏⵜ ⵜⴰⵎⴰⵜⵜⵓⵢⵜ ⵍⵍⵉ ⵉⵚⵕⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⵉ ⵉⵎⴷⵔⴰⵡⵏ ⴳ ⵓⴳⵔⴰⵡ ⴰⴷ, ⵖ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴼ ⵓⵙⴽⵔ ⵏ ⵉⵎⵉⵙⵙ ⵉⵔⴽⵙⵏ ⴷⴰⵔ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ, ⵃⵎⴰ ⴰⴷ ⵜⵙⴽⵔ ⴳ ⵓⵎⵙⴰⴰⵍ ⴳⵔ ⵉⵙⴳⴷⴰⵏ ⴰⵡⵜⵜⴰⵙ ⴰⵎⴰⵜⵜⵓⵢ ⵉⵛⵛⴰⵔⵏ ⵊⴰⵔ ⵎⴰⵕⵕⴰ ⵉⴼⵔⴷⴰⵙ ⵏ ⵜⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ, ⴷ ⵓⵎⵣⴰⵖ ⵏⵏⵙ ⴳ ⵉⵏⵎⵓⵇⵇⴰⵔⵏ ⵉⴳⵔⴰⵖⵍⴰⵏⵏ, ⵜⴳ ⵙⴳ ⵉⵙⵖⴰⵍⵏ ⵏ ⵜⵏⵏⵓⴱⴹⴰ ⵜⴰⴷⵉⵎⵓⵇⵔⴰⵟⵜ ⴳ ⵜⵎⵙⴽⵔⵜ ⵜⴰⴱⵕⵍⴰⵎⴰⵏⵉⵜ ⴷ ⵜⵙⵖⴰⵍ ⵏ ⵓⵡⵇⵇⵔ ⵏ ⵜⵎⵏⵏⴰⵡⵜ ⵜⴰⴷⵍⵙⴰⵏⵜ. 

ⴳ ⵓⵙⴰⵜⵉ ⴰⴷ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⴰⵎⵓⵏⵜ ⴼ ⵡⴰⵜⵉⴳ ⵏ ⵓⵙⴽⵔ ⵏ ⵉⵎⵉⵙⵙ ⵉⵥⵍⵉⵏ ⵙ ⵓⵎⵙⴰⵡⴰⵍ ⴳⵔ ⵉⵙⴳⴷⴰⵏ ⴳ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⵍⵍⵉ ⵔⴰⴷ ⵉⴳ ⵜⴰⵙⵇⵇⵉⵎⵜ ⵙⴳ ⵜⵙⵇⵇⵉⵎⵉⵏ ⵏ ⵜⴰⵎⵓⵏⵜ, ⵉⵏⵉⵏ ⵎⴰⵙ ⵜⵓⵊⴰⴷ ⵜⴰⵎⵓⵏⵜ ⵉ ⵓⴹⴼⵕ ⵏ ⵜⵙⵓⵎⵔⵉⵏ ⴳ ⵓⵎⵏⵉⴷ ⴰⴷ, ⵙⵍⵡⴰⵏ ⴰⴽⴽⵯ ⵎⴰⵙ ⵔⴰⴷ ⵜⵙⵏⴼⵍ ⵜⴰⵎⵓⵏⵜ ⵜⵏⴳⵔⴰⵡ ⵏⵏⵙ ⴰⴳⵯⵏⵙⴰⵏ ⴳ ⵉⵢⵢⵉⵔⵏ ⴷ ⵓⵛⴽⴰⵏⵉⵏ. 

ⵖⵎⴽ ⵍⵍⵉ ⵙⵏⵉⵎⵎⵔⵏ ⵙⵉⵏ ⵉⵎⵙⵜⴳⴳⴰⵔⵏ ⵜⴰⴳⵍⴷⵉⵜ ⵏ ⵍⵎⵖⵔⵉⴱ ⴷ ⵓⴱⵕⵍⴰⵎⴰⵏ ⵏⵏⵙ ⴼ ⵓⵎⵓⵔⵣ ⵏ ⵓⴳⵔⴰⵡ ⴷ ⵓⵙⵏⵎⴰⵍⴰ ⵏⵏⵙ ⵉⵥⵉⵍⵏ, ⵍⵍⵉⵖ ⵉⴳⴰ ⴰⵎⵣⵡⴰⵔⵓ ⵉⵙⵎⵓⵏⵏ ⵉⴱⵕⵍⵎⴰⵏⵉⵢⵏ ⴷ ⵉⵅⴰⵜⴰⵔⵏ ⵉⵙⴳⴷⴰⵏⵏ ⴷ ⵉⵙⵔⵜⴰⵏⵏ ⴷ ⵡⴰⵎⵓⵏⴰⵖⵔⵎⴰⵏ ⴷ ⵉⵎⵔⵣⵓⵜⵏ ⴷ ⵉⵎⵓⵣⴰⵢⵏ, ⴰⴳⵔⴰⵡ ⴰⴷ ⵉⵥⵍⵉⵏ ⵉ ⵓⵎⵙⵡⴰⵡⴰⵍ ⴳⵔ ⵉⵙⴳⴷⴰⵏ.