ⵜⵔⵣⴼ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵖⵔⵉⴱ ⵛⵛⵉⵍⵉ ⵜⴰⴳⴷⵓⴷⴰⵏⵜ ⵏ ⵛⵛⵉⵍⵉ

ⵙ ⵜⵖⵔⵉ ⵏ ⵓⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ ⵛⵛⵉⵍⵉ-ⵍⵎⵖⵔⵉⴱ ⴷ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵣⴷⴰⵢⵉⵏ ⵏ ⴱⵕⵕⴰ ⴷ ⵜⵖⴰⵡⵙⵉⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵓⵙⵉⴷⴼ ⴰⵍⴰⵜⵉⵏⵉ-ⴰⵎⵉⵔⵉⴽⴰⵏⵉ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵛⵛⵉⵍⵉ, ⵜⵙⴽⵔ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵖⵔⵉⴱ-ⵛⵛⵉⵍⵉ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⴰⵔⵣⴰⴼ ⵏ ⵜⵡⵡⵓⵔⵉ ⵉ ⵛⵛⵉⵍⵉ ⵙⴳ 29 ⵎⴰⵢ ⴰⵔ 1 ⵢⵓⵏⵢⵓ 2023. 

ⵢⵓⵎⴰ ⵓⴽⴰⴱⴰⵕ ⵎⴰⵙⵙ ⵄⵉⵛⴰ ⵍⴽⵔⵊⵉ ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵖⵔⵉⴱ-ⵛⵛⵉⵍⵉⵍ ⵙⴳ ⵜⵔⴰⴱⴱⵓⵜ ⵜⴰⵙⵔⵎⵓⵏⵜ-ⵜⵓⵣⵍⵜ ⵏ ⵍⵉⵜⵜⵉⵃⴰⴷ, ⵎⴰⵙⵙⴰ ⴼⴰⵜⵉⵏ ⵍⵖⴰⵍⵉ ⵙⴳ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ, ⵎⴰⵙⵙⴰ ⵅⴰⴷⵉⵊⴰ ⵣⵣⵓⵎⵉ ⵙⴳ ⵜⵔⴰⴱⴱⵓⵜ ⵜⴰⵙⵉⵎⴰⵏⵜ ⵉ ⵜⵎⵓⵏⵉ ⴷ ⵢⵉⵙⴽⵉⵍ, ⵎⴰⵙⵙⴰ ⵙⵓⴽⴰⵢⵏⴰ ⵍⵃⵎⵓⵛ ⵙⴳ ⵜⵔⴰⴱⴱⵓⵜ ⵜⴰⵃⴰⵔⴰⴽⵉⵜ, ⵎⴰⵙⵙ ⵙⴰⵄⵉⴷ ⵣⵣⴰⵢⴷⵉ ⵙⴳ ⵜⵔⴰⴱⴱⵓⵜ ⵏ ⵜⴳⵎⵉ ⴷ ⵜⵙⵔⵎⵓⵏⵜ, ⵎⴰⵙⵙⴰ ⵀⵉⵏⴷ ⴱⵏⵏⴰⵏⵉ ⵕⵕⵟⵍ ⵙⴳ ⵜⴳⵔⵓⵎⵎⴰ ⵏ ⵜⵣⵔⴳⵜ ⴷ ⵜⴳⵎⵉ.

ⴳ ⵓⵔⵣⴰⴼ ⴰⴷ, ⵉⵎⴹⴰⴽⴰⵕ ⵓⴽⴰⴱⴰⵕ ⴰⵎⵖⵔⵉⴱⵉ ⴷ ⵎⴰⵙⵙ Jaime de Aguirre Hoffa ⴰⵎⴰⵡⵙⴰⵙ ⵏ ⵜⴷⵍⵙⵉⵡⵉⵏ ⴷ ⵜⵥⵓⵕⵉⵡⵉⵏ ⴷ ⵡⴰⵢⴷⴰ, ⴷ ⵎⴰⵙⵙ Elizalde Álvaro ⴰⵎⴰⵡⵙⴰⵙ ⵏ ⵜⵏⴼⵍⵓⵙⵜ ⵜⴰⵎⴰⵜⴰⵢⵜ ⵏ ⵜⵏⵙⵙⵉⵅⴼⵜ ⵏ ⵜⴳⴷⵓⴷⴰⵏⵜ, ⴷ ⵎⴰⵙⵙ Alex Wetzing ⴰⵎⴰⵔⵉ ⵏ ⵓⵎⵡⵙⴰⵙ ⵏ ⴱⵕⵕⴰ, ⴷ ⵎⴰⵙⵙ Giorgio Jackson ⴰⵎⴰⵡⵙⴰⵙ ⵏ ⵜⴳⵎⵉ ⵜⴰⵏⴰⵎⵓⵏⵜ ⴷ ⵜⵓⵡⵊⴰ, ⴷ ⵜⵎⴰⵔⵉⵜ ⵏ ⵓⵎⴰⵡⵙⴰⵙ ⵏ ⵜⵥⴹⴰⵕⵜ.

ⵜⵃⴰⴹⵕ ⴳ ⵓⵏⵎⵓⵇⵇⴰⵔ ⴰⴷ ⵎⴰⵙⵙ ⴽⴰⵏⵣⴰ ⵍⵖⴰⵍⵉ ⵜⴰⵎⵙⵇⵇⴰⴷⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵙⴰⵏⵜⵢⴰⴳⵓ, ⵙⵓⵜⴳⵏ ⵉⵎⴰⵡⵙⴰⵙⵏ ⵏ ⵛⵛⵉⵍⵉ ⵜⵉⵣⴷⴰⵢⵉⵏ ⵥⵉⵍⵏⵉⵏ ⵊⴰⵔ ⵍⵎⵖⵔⵉⴱ ⴷ ⵛⵛⵉⵍⵉ, ⵢⵉⵍⵉ ⵓⵎⴹⴰⴽⴰⵕ ⴼ ⵜⵎⵢⴰⵇⵇⴰⵏⵉⵏ ⴷ ⵜⵎⵙⵙⴽⵯⵜⵉⵜⵉⵏ ⵏ ⵓⵏⵔⴰⵎⴰⵙ ⴳ ⵉⴳⵔⴰⵏ ⵉⵙⵔⵜⴰⵏⵏ ⴷ ⵉⴷⵎⵙⴰⵏⵏ ⴷ ⵉⴷⵍⵙⴰⵏⵏ, ⵙⵓⵜⴳⵏ ⵓⵍⴰ ⵉⵎⵓⴽⵏⵏ ⴷ ⵜⵎⵙⴽⴰⵔ ⵜⵓⵏⴳⵉⵎⵉⵏ ⵍⵍⵉ ⵉⵙⴽⵔ ⵍⵎⵖⵔⵉⴱ ⴳ ⵎⴰⵕⵕⴰ ⵜⵉⵙⴳⴳⵉⵡⵉⵏ ⵏⵏⵙ. ⵖⵎⴽ ⵍⵍⵉ ⵙⴰⵡⵍⵏ ⴼ ⵜⵉⵔⴰⵜ ⵏⵏⵙⵏ ⴰⴷ ⵢⵉⵍⵉ ⵚⴰⵃⴰ ⵙⴳ ⵜⵉⵔⵎⵉⵜⵉⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵓⴳⵔⴰⵏ ⵏ ⵜⵥⴹⴰⵕⵜ ⵜⴰⵎⴰⵢⵏⵓⵜ ⴷ ⵓⵙⵎⵓⵜⵜⵉ ⴰⵎⵓⵟⵟⵏ ⴷ ⵓⴼⵔⴰⴳ ⴰⵏⴰⵎⵓⵏ, ⵉⵏⵉⵏ ⵎⴰⵙ ⵉⴳⴰ ⵍⵎⵖⵔⵉⴱ ⴰⵏⴰⵡ ⴰⴳⵔⴰⵖⵍⴰⵏ ⴷ ⵓⵎⴷⵔⴰⵡ ⴳ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ.

ⵉⵙⴰⵡⵍ ⵓⴽⴰⴱⴰⵕ ⵏ ⵍⵎⵖⵔⵉⴱ ⴼ ⵓⵙⵓⵜⴳ ⵏ ⵜⵣⴷⴰⵢⵉⵏ ⴷⵓⵙⵏⵉⵏ ⵊⴰⵔ ⵍⵎⵖⵔⵉⴱ ⴷ ⵛⵛⵉⵍⵉ, ⴷ ⵓⵙⵏⴰⵍ ⵏ ⵛⵛⵉⵍⵉ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵙⴷⴷⵉⴷⵏ ⴰⴹⴼⵔ ⵏ ⵜⵔⴰⴱⴱⵓⵜ ⴰⴷ ⵏ ⵜⴷⴷⵓⴽⴽⵯⵍⴰ ⵏ ⵜⵣⵣⵉⴳⵣⵜ ⵉⵕⵡⴰⵏ ⵏ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⵛⵛⵉⵍⵉ ⴷ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ. ⵉⵙⴰⵡⵍ ⵓⵍⴰ ⴼ ⵜⵉⵍⴰⵍⵜ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵓⵙⵎⴰⴷ ⵏ ⵜⴷⵉⴱⵍⵓⵎⴰⵙⵉⵜ ⵜⵓⵏⵚⵉⴱⵜ, ⴷ ⵓⴷⵖⴰⵔ ⵉⵥⵉⵍⵏ ⵏ ⵍⵎⵖⵔⵉⴱ ⴳ ⵉⴼⵔⵉⵇⵢⴰ ⴷ ⵓⵎⴰⴹⴰⵍ ⴰⵄⵕⴰⴱ ⴷ ⵉⵥⵥⵍⵎⴹ ⵏ ⵉⴼⵔⵉⵇⵢⴰ.

ⴳ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵉⵙⴽⵔ ⵓⴽⴰⴱⴰⵕ ⴰⴷ ⵉⵏⵎⵓⵇⵇⴰⵔⵏ ⴷ ⵎⴰⵙⵙ Vlado Mirosevic ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵛⵛⵉⵍⵉ ⴷ ⵎⴰⵙⵙ Juan Antonio Coloma ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵉⵡⴰⵕ ⴷ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵛⵛⵉⵍⵉ-ⵍⵎⵖⵔⵉⴱ, ⴷ ⵎⴰⵙⵙ Tomás de Rementeria ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵜⵖⴰⵡⵙⵡⵉⵏ ⵊⴰⵔ ⵉⴱⵕⵍⴰⵎⴰⵏⵏ, ⴷ ⵎⴰⵙⵙⴰ María Francisca Bello ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵜⵎⵖⴰⵔⵜ ⴷ ⵢⵉⵙⴽⵉⵍ.

ⴳ ⵉⵏⵎⵓⵇⵇⴰⵔⵏ ⴰⴷ, ⵉⵍⵍⴰ ⵓⵙⵓⵜⴳ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵙ ⵓⵙⵏⴼⵍ ⵏ ⵉⵔⵣⴰⴼⵏ ⴷ ⵓⵙⵎⵔⵙⵍ ⵏ ⵜⵣⴷⴰⵢⵉⵏ ⴰⴷ ⵙ ⵜⵎⵙⵙⴽⵯⵜⵉⵜ ⵏ ⵓⵏⵔⴰⵎⴰⵙ.  ⵢⵉⵍⵉ ⵓⵙⴷⴷⵉⴷ ⴼ ⵓⵙⵎⵖⵔ ⵏ ⵓⵎⵢⴰⵡⴰⵙ ⴷ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⴷ ⵓⴷⵔⴰⵡ ⵏ ⵜⵉⵔⵎⵉⵜⵉⵏ ⴳ ⵉⴳⵔⴰⵏ ⵏ ⵓⵣⵣⵔⴰⴼ ⴷ ⵜⵉⴹⴰⴼ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⵖⵎⴽ ⴰⵏⵏ ⴷ ⵓⵎⵛⴰⵡⴰⵕ ⴷ ⵓⵣⴷⴰⵢ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ ⵉ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵛⵛⵉⵍⵉ ⴷ ⵍⵎⵖⵔⵉⴱⵏ. ⵉⵍⴰ ⵡⴰⵡⴰⵍ ⵓⵍⴰ ⴼ ⵓⵙⵙⵓⵙⵎ ⵏ ⵉⵙⴰⵡⵓⵔⵏ ⵓⵏⴳⵉⵎⵏ ⵉⵅⴰⵜⴰⵔⵏ ⵍⵍⴰⵏ ⴳ ⵎⴰⵕⵕⴰ ⵜⵉⵙⴳⴳⵉⵡⵉⵏ ⵏ ⵍⵎⵖⵔⵉⴱ ⴷ ⵜⵣⵣⵉⴳⵣⵜ ⵏ ⵜⴳⵍⴷⵉⵜ ⴳ ⵜⵎⵙⴰⵔⵉⵏ ⵜⵉⵏⴰⵎⵓⵏⵉⵏ ⴰⵎ ⴰⵙⵉⵥⴹⵕ ⵏ ⵜⵎⵖⴰⵔⵜ ⴷ ⵢⵉⵙⴽⵉⵍ ⵊⴰⵔ ⵉⵡⵜⵎⴰⵏ.

ⵢⵓⵎⴰ ⵓⵖⴰⵡⴰⵙ ⵏ ⵓⵔⵣⴰⴼ ⴰⴷ ⵓⵍⴰ ⵜⵉⵍⵉⵜ ⵏ ⵓⴽⴰⴱⴰⵕ ⵏ ⵍⵎⵖⵔⵉⴱ ⴳ ⵜⴼⴼⵓⴳⵍⴰ ⵏ ⵓⵙⵎⵏⵉⴷ ⵏ ⵜⵉⵢⵢⴰⴼⵓⵜ ⵜⴰⵙⴳⴳⵯⵙⴰⵏⵜ ⵏ ⵓⵏⵙⵙⵉⵅⴼ ⵏ ⵛⵛⵉⵍⵉ ⵎⴰⵙⵙ Gabriel Boric, ⴰⵙⵙ ⵏ 1 ⵢⵓⵏⵢⵓ.