ⵉⵎⴹⴰⴽⴰⵕ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⴽⴰⴱⴰⵕⴰ ⴰⴱⵕⵍⴰⵎⴰⵏⵉ ⵏ ⵍⴱⵉⵔⵓ, ⵉⵙⴽⵔ ⵓⴽⵓⵏⴳⵕⵉⵚ ⵏ ⵍⴱⵉⵔⵓ ⵜⴰⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵏⴰⵍ ⵏ ⵜⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ

ⵉⵙⵏⵓⴱⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ 29 ⵎⴰⵢ 2023 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ ⴰⴽⴰⴱⴰⵔ ⴰⴱⵕⵍⴰⵎⴰⵏⵉ ⴰⵡⴰⵜⴰⵔ ⵍⵍⵉ ⵉⵙⵙⵉⵅⴼ ⵎⴰⵙⵙ ERNESTO BUSTAMANTE DONAYRE ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ  ⵍⴱⵉⵔⵓ-ⵍⵎⵖⵔⵉⴱ ⴷ ⵓⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵓⵙⵏⴰⵍ ⵏ ⵜⵏⵙⵜⴰⵢⵜ ⵜⴰⵎⵖⵔⵉⴱⵉⵜ ⵉ ⵓⵏⴱⴰⴹ  ⴰⵏⵉⵎⴰⵏ ⴳ ⵓⴽⵓⵏⴳⵕⵉⵚ ⵏ ⵍⴱⵉⵔⵓ.

 ⴳ ⵓⵏⵎⵓⵇⵇⴰⵔ ⴰⴷ, ⵉⵏⵏⴰ ⵎⴰⵙ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵖⵔⵉⴱ-ⵍⴱⵉⵔⵓ ⵎⴰⵙ ⵜⵜⵓⵙⴽⴰⵔ ⵜⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ ⴳ ⵓⴽⵓⵏⴳⵕⵉⵚ ⵏ ⵍⴱⵉⵔⵓ ⵉ ⵓⵙⵏⴰⵍ ⵏ ⵜⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ ⴳ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ, ⵍⵉⵖ ⵉⴳⴰ “ⴰⴼⵙⵙⴰⵢ ⴰⵙⵔⵜⴰⵏ ⵉⴳⴰⵏ ⵢⴰⵏ ⴷ ⵡⵉⵏ ⵜⵉⵍⴰⵡⵜ ⵉ ⵓⴼⵓⴽⴽⵓ ⵏ ⵜⵎⴰⵖⵜ” ⵅⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ. ⵢⵉⵏⵉ ⵎⴰⵙ ⵉⴽⵛⵎ ⵓⵔⵣⴰⴼ ⴰⴷ ⴳ ⵓⵙⴰⵜⵉ ⵏ ⵓⵙⵡⵓⵔⵉ ⵏ ⵜⵔⴰⴱⴱⵓⵜ ⴼ ⵓⵙⵓⵊⴷ ⵏ ⵓⵏⵇⵇⵉⵙ ⵅⴼ ⵜⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ ⵍⵍⵉ ⵔⴰⴷ ⵉⵜⵜⵓⵎⵏⵉⴷ ⴳ ⵓⴽⵓⵏⴳⵕⵉⵚ ⴷ ⵜⵎⴰⵡⴰⵙⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⵏ ⵍⵍⴱⵉⵔⵓ.

ⴳ ⵓⵎⴹⴰⴽⴰⵕ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵙⴷⴷⵉⴷ ⵓⴽⴰⴱⴰⵕ ⵏ ⵍⴱⵉⵔⵓ ⵎⴰⵙ ⵜⴳⴰ ⵜⵙⵓⵎⵔⵜ ⵏ ⵓⵏⴱⴰⴷ ⴰⵏⵉⵎⴰⵏ ⵍⵍⵉ ⵉⵙⵎⵏⵉⴷ ⵍⵎⵖⵔⵉⴱ ⵜⴰⴷ ⵉⵎⵙⴰⵙⴰⵏ ⴷ ⵜⵣⵔⴼⵜ ⵜⴰⴳⵔⴰⵖⵍⴰⵏⵜ, ⵙⴰⵡⵍⵏ ⴼ ⵡⴰⵜⵉⴳ ⵏ ⵓⵙⵙⵏ ⵏ ⵡⴰⴷⴷⴰⴷ ⵏ ⵓⵎⴰⴷⴰⵏ ⵏ ⵍⴱⵉⵔⵓ ⵜⴰⵔ ⵜⴰⵢⴷⵢⵓⵍⵓⵊⵉⵜ.

ⴳ ⵓⵎⵏⵉⴷ ⵏⵏⵙ, ⵉⵙⵏⵉⵎⵎⵔ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵉⴳⵎⴰⵎⵏ ⵏ ⵓⴽⵓⵏⴳⵕⵉⵚ ⵏ ⵍⴱⵉⵔⵓ ⴼ ⵓⵙⵏⴰⵍ ⵏ ⵜⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ, ⵉⵙⵎⵏⵉⴷ ⴰⵙⵎⴰⵇⵇⵍ ⴼ ⵓⵎⵣⵔⵓⵢ ⴷ ⵜⵓⴳⴳⴰⵙ ⵏ ⵍⵎⵖⵔⵉⴱ ⵉ ⵓⵙⵎⴰⴷ ⵏ ⵜⵢⴰⵏⵜ ⵏⵏⵙ ⵜⴰⵏⴰⴽⴰⵍⵜ, ⴷ ⵉⵙⴰⵡⵓⵔⵏ ⵍⵍⴰⵏⵉⵏ ⴳ ⵜⴳⵍⴷⵉⵜ ⵖⵎⴽ ⴰⵏⵏ ⴷ ⵜⵎⵙⴽⴰⵔ ⵜⵓⵏⴳⵉⵎⵉⵏ ⵍⵍⴰⵏⵉⵏ ⴳ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵙ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ.

ⵉⵃⴰⴹⵕ ⴳ ⵓⵏⵎⵓⵇⵇⴰⵔ ⴰⴷ ⵎⴰⵙⵙ ⴰⵎⵉⵏ ⵛⵛⵓⴷⵔⵉ ⴰⵎⵙⵇⵇⴰⴷ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵍⴱⵉⵔⵓ,  ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵖⵔⵉⴱ-ⵍⴱⵉⵔⵓ ⵎⴰⵙⵙ ⵎⵓⵚⵟⴰⴼⴰ ⵉⴱⵔⴰⵀⵉⵎⵉ.

ⵢⵓⵎⴰ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⵏ ⵍⴱⵉⵔⵓ ⵍⵍⵉ ⵔⴰⴷ ⵉⵔⵣⴼ ⵜⴰⵎⴰⵣⵉⵔⵜ ⵏⵏⵖ ⴼ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ: ⵎⴰⵙⵙⴰ MARIA DEL CARMEN ALVA PRIETO ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵜⵏⵙⵙⵉⵅⴼⵜ ⵉⵣⵔⵉⵏ ⵏ ⵓⴽⵓⵏⴳⵕⵉⵚ, ⵎⴰⵙⵙ JOSÉ ERNESTO CUETO ASERVI ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵉⵙⵏⵖⵎⵉⵙⵏ, ⵎⴰⵙⵙⴰ ROSANGELA ANDREA BARBARAN REYES ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵉⴱⴰⵏⴽⵏ ⴷ ⵓⴼⵓⵍⵍⵙ ⴰⵥⵕⴼⴰⵏ, ⴷ ⵎⴰⵙⵙⴰ YESSICA ROSSELLI AMURUZ DULANTO ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵉⵏ ⵥⵍⵉⵏⵉⵏ ⵜⵜⵓⵙⵎⴰⴳⵍⵏⵉⵏ ⵙ ⵓⵙⴽⵔ ⵏ ⵉⵔⵣⵣⵓⵜⵏ ⴷ ⵜⵖⵓⵔⵉⵡⵉⵏ ⵜⵉⵣⵔⴼⴰⵏⵉⵏ.