ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2021-2026:
ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⴰⵣⵉⵔⴱⵉⵊⴰⵏ ⵎⵙⴰⵙⴰⵏ ⴼ ⵓⵙⴷⵓⵙ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵓⵙⵎⵖⵔ ⵏ ⵓⵎⵢⴰⵡⴰⴹ ⴷ ⵓⵣⴷⴰⵢ ⴳ ⵓⵙⴰⵜⵉ ⵏ ⵓⵡⵇⵇⵔ ⵉⵜⵜⵓⵙⵏⴼⴰⵍⵏ ⵏ ⵜⵅⵅⵓⵜⵔⴰ ⴷ ⵜⵢⴰⵏⵜ ⵜⴰⵏⴰⴽⴰⵍⵜ ⴳ ⵙⵏⴰⵜ ⵜⵎⵉⵣⴰⵔ
ⵉⵎⴹⴰⴽⴰⵕ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ 16 ⵎⴰⵢ ⴳ ⵓⵙⵖⵉⵎ ⵏ ⵓⴱⵕⵍⴰⵎⴰⵏ ⵏ ⴰⵣⵉⴱⵉⵔⵊⴰⵏ ⴷ ⵎⴰⵙⵙⴰ ⵚⴰⵃⵉⴱⴰ ⴳⴰⴼⴰⵔⵓⴼⴰ ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵙ ⵜⵉⵍⵉⵜ ⵏ ⵎⴰⵙⵙ ⵄⴰⴷⵉⵍ ⵉⵎⴱⴰⵔⵛ ⴰⵎⵙⵇⵇⴰⴷ ⵏ ⴱⴰⴱ ⵏ ⵡⴰⴷⴷⵓⵔ.
ⴳ ⵓⵏⵎⵓⵇⵇⴰⵔ, ⵉⵍⵍⴰ ⵓⵙⵓⵜⴳ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⴷ ⵓⵙⴷⴷⵉⴷ ⴼ ⵓⵙⴷⵙⵓ ⴷ ⵓⵙⵏⴰⵍ ⵏⵏⵙⵏⵜ ⵙ ⵓⵎⵢⴰⵡⴰⴹ ⴰⵙⵓⵍⴰⵏ ⵊⴰⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴷ ⵓⵙⵏⴼⵍ ⵏ ⵜⵉⵔⵎⵉⵜⵉⵏ. ⵖⵎⴽ ⵍⵍⵍⵉ ⵙⵓⵜⴳⵏ ⵙⵉⵏ ⵉⵎⵙⵜⴳⴳⴰⵔⵏ ⵜⵉⵕⵡⵉ ⵏ ⵜⵣⴷⴰⵢⵉⵏ ⴰⴷ ⵉⴱⴷⴷⵏ ⴼ ⵓⵡⵇⵇⵔ ⵉⵜⵜⵓⵙⵏⴼⴰⵍⵏ ⵏ ⵜⵅⵓⵜⵔⴰ ⴷ ⵜⵢⴰⵏⵜ ⵜⴰⵏⴰⴽⴰⵍⵜ ⴷ ⵓⵙⵏⴰⵍ ⵉⵙⵓⵍⵏ ⴳ ⵉⵏⵎⵓⵇⵇⴰⵔⵏ ⵉⵏⵎⵏⴰⴹⵏ ⴷ ⵉⴳⵔⴰⵖⵍⴰⵏⵏ.
ⵜⵙⵏⵉⵎⵎⵔ ⵜⵏⵙⵙⵉⵅⴼⵜ ⵏ ⵓⴱⵕⵍⴰⵎⴰⵏ ⵏ ⴰⵣⵉⵔⴱⵉⵊⴰⵏ ⵎⴰⵙⵙ ⵚⴰⵃⵉⴱⴰ ⴳⴰⴼⴰⵔⵓⴼⴰ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵜⴷⵔⴰⵡⵜ ⵏⵏⵙ ⴳ ⵜⵙⵓⵜⵍⵜ ⵉⵥⵍⵉⵏ ⵏ ⵓⴱⵕⵍⴰⵎⴰⵏ ⵉ ⵓⵙⴼⵓⴳⵍⵓ ⵏ ⵓⴽⵯⵜⵜⵓⵢ ⵡⵉⵙ 100 ⵏ ⵜⵍⴰⵍⵉⵜ ⵏ ⵓⵅⴰⵜⴰⵔ ⴰⵏⴰⵎⵓⵔ ⵃⴰⵢⴷⴰⵔ ⵄⵍⵉⵢⵢⵉⴼ ⴰⵎⵙⴽⴰⵔ ⵏ ⴰⵣⵉⵔⴱⵉⵊⴰⵏ ⵜⴰⵜⵔⴰⵔⵜ.
ⵜⵙⵓⵜⴳ ⵜⵏⵙⵙⵉⵅⴼⵜ ⴰⵙⵡⵉⵔ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵊⴰⵔ ⴰⵣⵉⵔⴱⵉⵊⴰⵏ ⴷ ⵍⵎⵖⵔⵉⴱ, ⵜⵙⴷⴷⵉⴷ ⴼ ⵓⵙⴷⵓⵙ ⵏⵏⵙⵏⵜ ⴷ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⵊⴰⵔ ⵙⵏⴰⵜ ⵜⵎⵔⵙⴰⵍ ⵍⵍⵉⵖ ⵟⵟⴰⴼⵏ ⵉⴱⵕⵍⴰⵎⴰⵏⵏ ⴰⵙⵡⵉⵔ ⴰⴷⵙⵍⴰⵏ ⴳ ⵜⴷⵉⵎⵓⵇⵔⴰⵟⵉⵢⵉⵏ ⵜⵉⵎⴰⵢⵏⵓⵜⵉⵏ, ⵜⵉⵏⵉ ⵎⴰⵙ ⴷ ⵜⴰⵎⴰⵣⵉⵔⵜ ⵏⵏⵙ ⴰⵔ ⵜⴰⴽⴽⴰ ⴰⵅⵎⵎⴻⵎ ⵉⵥⵍⵉⵏ ⵉ ⵓⵙⵎⵖⵔ ⵏ ⵜⵣⴷⴰⵢⵉⵏ ⵏⵏⵙ ⴰⴽⴷ ⵜⴰⴳⵍⴷⵉⵜ ⵏ ⵍⵎⵖⵔⵉⴱ ⵍⵍⵉⵖ ⵍⵍⴰⵏ ⴰⵜⵉⴳⵏ ⴷ ⵉⵅⵎⵎⵉⵎⵏ ⵛⵛⴰⵔⵏⵉⵏ ⴳ ⵜⵎⵉⵣⴰⵔ, ⵉⵇⵇⴰⵏⴷ ⴼ ⵉⴱⵕⵍⴰⵎⴰⵏⵏ ⴰⴷ ⵙⴽⵔⵏ ⵜⵉⵍⴰⵍⵜ ⵜⴰⵅⴰⵜⴰⵔⵜ ⴳ ⵓⵙⵎⵖⵔ ⵏ ⵜⵣⴷⴰⵢⵉⵏ ⴷ ⵜⴳⵎⵉ ⵏⵏⵙⵏⵜ ⵙⵍⴰⵡⴰⵏ ⴰⴽⴽⵯ ⵜⵉⴷⵍⵙⴰⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⵙⵔⵜⴰⵏⵉⵏ.
ⵜⵙⵓⵜⴳ ⵜⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⴰⵣⵉⵔⴱⵉⵊⴰⵏ ⵜⴰⴷⵔⴰⵡⵜ ⵉⵕⵡⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵜⵡⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵏ ⵓⵎⵓⵙⵙⵓ ⵏ ⵡⴰⵔⵡⴰⵍⴰ, ⴰⵥⵟⵟⴰ ⵉⵜⵜⵓⵙⴽⴰⵔⵏ ⵙ ⵜⵙⵏⵜⴰⵢⵜ ⵏ ⵓⵏⵙⵙⵉⵅⴼ ⵏ ⴰⵣⵉⵔⴱⵉⵊⴰⵏ ⵉⵍⵀⴰⵎ ⵄⵍⵉⵢⵢⵉⴼ, ⵜⵙⴰⵡⵍ ⴼ ⵓⴷⵔⵉⵙ ⵉⵙⵜⴰⵡⵀⵎⵎⴰⵏ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴳ ⵜⴳⵎⵉ ⵏ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔⵏ ⵜⵙⴷⴷⵉⴷ ⴼ ⵡⴰⵜⵉⴳ ⵏ ⵓⵎⵢⴰⵡⴰⵙ ⵏ ⵜⵔⵓⴱⴱⴰ ⵏ ⵜⴷⴷⵓⴽⴽⵯⵍⴰ ⴷ ⵜⵙⵏⵜⴰⵢⵉⵏ ⵛⵛⴰⵔⵏⵉⵏ ⵏ ⵉⴱⵕⵍⴰⵎⴰⵏⵉⵢⵏ ⴳ ⵜⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴳⵔⴰⵖⵍⴰⵏⵉⵏ.
ⵉⵙⵏⵉⵎⵎⵔ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⴼ ⵜⵖⵓⵔⵉ ⵏⵏⵙ, ⵉⵙⵓⵜⴳ ⵜⵉⵍⴰⵍⵜ ⵜⴰⵅⴰⵜⴰⵔⵜ ⵍⵍⵉ ⵉⵙⴽⵔ ⵓⵏⵎⵖⵓⵔ ⵃⴰⵢⴷⴰⵔ ⵄⵍⵉⵢⵢⵉ, ⴰⵢⵍⵍⵉ ⵢⵉⵡⵙⵏ ⵉ ⵜⴳⴷⵓⴷⴰⵏⵜ ⵏ ⴰⵣⵉⵔⴱⵉⵊⴰⵏ ⴰⴷ ⵜⵙⴽⵔ ⵜⵉⵎⵙⴽⴰⵔ ⴷ ⵓⵎⵎⵉⵥⵏ ⴳ ⴽⵉⴳⴰⵏ ⵏ ⵉⴳⵔⴰⵏ.
ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⴰⵡⵓⵔⵏ ⵉⵅⴰⵜⴰⵔⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵜⵓⵏⵥⵉⵣⵜ ⵉⵥⵉⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⴰⵎⴷ ⵡⵉⵙ ⵚⴹⵉⵙ ⴰⴷ ⵜ ⵉⵏⵚⵕ ⵕⴱⴱⵉ, ⵉⵙⵎⵏⵉⴷ ⴰⵙⵎⴰⵇⵇⵍ ⴼ ⵜⵉⵔⵎⵉⵜ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ ⴷ ⵜⵎⵥⵍⴰⵢ ⵏⵏⵙ, ⵉⵙⴰⵡⵍ ⴼ ⵡⴰⵜⵉⴳ ⵏ ⵓⵙⴷⵓⵙ ⵏ ⵓⵎⵙⴰⵡⴰⵍ ⴷ ⵓⵎⵛⴰⵡⴰⵕ ⴷ ⵓⵎⵢⴰⵡⴰⴹ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ ⴷ ⵓⵣⴷⴰⵢ ⴳ ⵉⵏⵎⵓⵇⵇⴰⵔⵏ ⵉⴱⵕⵍⴰⵎⴰⵏⵉⵢⵏ ⵉⵏⵎⵏⴰⴹⵏ ⴷ ⵉⵙⴳⴰⵡⴰⵏⵏ ⴷ ⵉⴳⵔⴰⵖⵍⴰⵏⵏ.
ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⴷ ⵜⵉⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵊⴰⵔ ⵍⵎⵖⵔⵉⴱ ⴷ ⴰⵣⵉⵔⴱⵉⵊⴰⵏ ⴳⴰⵏⵜ ⴳ ⵓⵙⵡⵉⵔ ⵉⵥⵉⵍⵏ, ⴱⴷⴷⵏⵜ ⴼ ⵓⵡⵇⵇⵔ ⵉⵜⵜⵓⵙⵏⴼⴰⵍⵏ ⵏ ⵜⵅⵅⵓⵜⵔⴰ ⴷ ⵜⵢⴰⵏⵜ ⵜⴰⴽⴰⵍⴰⵏⵜ ⴷ ⵓⵙⵏⴰⵍ ⵉⵣⵣⵉⴳⵣⵏ ⴳ ⵉⵏⵎⵓⵇⵇⴰⵔⵏ ⵉⵏⵎⵏⴰⴹⵏ ⴷ ⵉⴳⵔⴰⵖⵍⴰⵏⵏ, ⵉⵙⵏⵉⵎⵎⵔ ⴷ ⵉⵙⵓⵜⴳ ⵓⵍⴰ ⵜⴰⴳⴷⵓⴷⴰⵏⵜ ⵏ ⴰⵣⵉⵔⴱⵉⵊⴰⵏ ⴼ ⵡⴰⴷⴷⴰⴷ ⵏⵏⵙ ⵏ ⵓⵙⵏⴰⵍ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ.
ⵙ ⵜⵎⵍⴷⴰ ⴷ, ⵉⵖⵔⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵜⵏⵙⵙⵉⵅⴼⵜ ⵏ ⵓⴱⵕⵍⴰⴰⵎⵏ ⵏ ⴰⵣⵉⵔⴱⵉⵊⴰⵏ ⵎⴰⵙⵙⴰ ⵚⴰⵃⵉⴱⴰ ⴳⴰⴼⴰⵔⵓⴼⴰ ⵃⵎⴰ ⴰⴷ ⵜⴷⵔⵓ ⴳ ⵓⴳⵔⴰⵡ ⴰⴱⵕⵍⴰⵎⴰⵏⵉ ⵅⴼ ⵓⵎⵙⴰⵡⴰⵍ ⵊⴰⵔ ⵉⵙⴳⴷⵏ ⵍⵍⵉ ⵔⴰⴷ ⵢⵉⵍⵉ ⴳ ⵡⴰⵎⵓⵔ ⵏ ⵡⴰⴽⵓⵛ ⴳ ⵡⴰⵢⵢⵓⵔ ⵏ ⵢⵓⵏⵢⵓ.