ⵉⵎⴹⴰⴽⴰⵕ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⴰⵎⵣⵣⴳⴰⵔ ⵏ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ

ⵉⵎⴹⴰⴽⴰⵕ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ 2 ⵎⴰⵢ 2023 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴷ ⵓⴽⴰⴱⴰⵕ ⵏ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ Acevedo Cerrud Amado ⴰⵏⵙⵙⵉⵅⴼ ⵏⵏⵙ 

ⵉⵍⵍⴰ ⵓⴽⴰⴱⴰⵕ ⴰⴷ ⴰⴱⵕⵍⴰⵎⴰⵏⵉ ⴳ ⵓⵔⵣⴰⴼ ⵉ ⵍⵎⵖⵔⵉⴱ ⴳ ⵓⵙⴰⵜⵉ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵙⵏⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴷ ⵓⵙⵙⵏ ⵏ ⵉⵙⴰⵡⵓⵔⵏ ⵓⵏⴳⵉⵎⵏ ⵏ ⵜⴳⵍⴷⵉⵜ, ⵔⴰⴷ ⵢⵉⵎⴹⵉⴽⵉⵕ ⵓⵍⴰ ⴷ ⴽⵉⴳⴰⵏ ⵏ ⵉⵎⵙⵜⴳⴳⴰⵔⵏ ⵉⵎⵖⵔⵉⴱⵉⵢⵏ. 

ⵉⵙⵓⵜⴳ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵓⴽⴰⴱⴰⵕ ⵜⵉⵣⵡⵉⵔⵉ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵓⵙⵡⵓⴷⴷⵓ ⵏ ⵓⵣⵡⴰⴳ, ⵉⵔⵉⵏ ⴰⴷ ⵙⵙⵏⵏ ⵜⵉⵔⵎⵉⵜ ⵏ ⵍⵎⵖⵔⵉⴱ ⴳ ⵢⵉⴳⵔ ⴰⴷ ⵃⵎⴰ ⴰⴷ ⴼⵓⴽⴽⵓⵏ ⴰⵙⴷⴰⵡ ⵏ ⵉⵎⵣⵡⴰⴳ ⴳ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ, ⵙⵓⵜⴳⵏ ⵓⵍⴰ ⵜⴰⵣⵣⵉⴳⵣⵜ ⵏ ⵜⴳⵍⴷⵉⵜ ⴳ ⵜⵥⴹⴰⵕⵉⵏ ⵖⵓⵙⵏⵉⵏ ⴷ ⵓⵙⵎⵖⵔ ⵏ ⵓⵙⵓⵔⵙ ⵏ ⵜⵎⵖⴰⵔⵜ ⴷ ⵜⵎⵙⴽⵔⵜ ⵜⴰⴷⵉⵎⵓⵇⵔⴰⵟⵉⵜ. 

ⵙⴷⴷⵉⴷⵏ ⵓⵍⴰ ⴼ ⵡⴰⵜⵉⴳ ⵍⵍⵉ ⵢⴰⴽⴽⴰ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⵉ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⴷ ⵓⵣⴷⴰⵢ ⵉⵙⵓⵍⵏ ⴷ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⵅⴼ ⵜⵉⵎⵙⴰⵔⵉⵏ ⵛⵛⴰⵔⵏⵉⵏ. 

ⴳ ⵓⵎⵏⵉⴷ ⵏⵏⵙ, ⵉⵙⴷⴷⵉⴷ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴼ ⵜⵏⴰⵥⵕⵉⵏ ⴷⴰⵜ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴷ ⵡⵉⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ, ⵍⵍⵉ ⵔⴰⵏⵉⵏ ⴰⵙⵡⵓⵔⵉ ⵉⵛⵛⴰⵔⵏ ⴳ ⵓⵙⴰⵜⵉ ⵏ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ. 

ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⴰⵡⵓⵔⵏ ⵉⵅⴰⵜⴰⵔⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴰⵎ ⵜⴰⵙⵔⵜⵉⵜ ⵏ ⵍⵎⵖⵔⵉⴱ ⴳ ⵓⵙⵡⵓⴷⴷⵓ ⵏ ⵓⵣⵡⴰⴳ ⵙ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵢⵉⵏⵉ ⵎⴰⵙ ⵉⴳⴰ ⵍⵎⵖⵔⵉⴱ ⴰⵏⴰⵡ ⴳ ⵢⵉⴳⵔ ⴰⴳ ⴳ ⵓⵙⵡⵉⵔ ⴰⴼⵔⵉⵇⵉ ⴳ ⵜⵙⴳⴰ ⵏ ⵓⵏⴰⵎⵎⴰⵙ. 

ⵉⵜⵜⵓⵙⵙⴰⵏ ⵎⴰⵙ ⵉⵍⵍⴰ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⵙ ⵙⵉⵏ ⵉⵙⵇⵇⵉⵎⵏ ⵏⵏⵙ ⴳ ⵓⴱⵕⵍⴰⴰⵎⵏ ⵏ ⵎⴰⵔⵉⴽⴰⵏ ⵜⴰⵎⴰⵏⴰⵎⵎⴰⵙⵜ ⴷ ⴰⴳⵎⴰⵎ ⵉⵎⵥⵕⵉ ⴳ 16 ⵢⵓⵏⵢⵓ 2015, ⵉⴳⴰ ⵓⴱⵕⵍⴰⵎⴰⵏ ⴰⴷ ⴰⵏⴰⵡ ⵏ ⵓⵏⴳⵔⴰⵡ ⵏ ⵉⵙⵉⴷⴼ ⴰⵏⵎⵏⴰⴷ ⴳ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ, ⴳⵉⵙ ⵙⴹⵉⵚ ⵉⵡⴰⵏⴽⵏ: ⴳⵡⴰⵜⵉⵎⴰⵍⴰ, ⵙⵙⴰⵍⴼⴰⴷⵓⵕ, ⵍⵀⵉⵏⴷⵓⵕⴰⵙ, ⵏⵉⴽⴰⵔⴰⴳⵡⴰ, ⴱⴰⵏⴰⵎⴰ, ⴷⴷⵓⵎⵉⵏⵉⴽⴰⵏ. 

ⵢⵓⵎⴰ ⵓⴽⴰⴱⴰⵕ ⵏ ⵓⵙⵉⵔⴰ ⴰⵎⵣⵣⴳⴰⵔ ⵏ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⵎⴰⵙⵙ Engels Martin Pineda Garcia ⴰⵎⴰⵔⵉ ⵏ ⵓⵏⵙⵙⵉⵅⴼ,  ⵎⴰⵙⵙⴰ Iliana Guadalupe Calles ⵜⴰⵎⴰⵔⵉⵜ ⵏ ⵓⵏⵙⵙⵉⵅⴼ, ⵎⴰⵙⵙ Eduardo Guerrero Solano ⴰⵎⴰⵔⵉ ⵏ ⵓⵏⵙⵙⵉⵅⴼ, ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⴼⵍⴰⵙ: José Narciso Ramos Reyes, Nedis Adrian Licona Reyes, Karina Ivette Sosa,  Santiago Rodriguez Peña,   ⴷ ⵎⴰⵙⵙⴰ ⵜⴰⵏⴼⵍⵓⵙⵜ ⵏ ⵓⴱⵔⵙⵉⵔⴰ ⵏ ⵓⵙⵉⵔⴰ ⴰⵎⵣⵣⴳⴰⵔ ⵏ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ.