ⵉⵎⴹⴰⴽⴰⵕ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⴰⵏⴳⵓⵍⴰ, ⵣⵎⵎⵉⵎⵏ ⵜⴰⵎⵙⵙⴽⵯⵜⵉⵜ ⵏ ⵓⵏⵔⴰⵎⴰⵙ

ⵉⵎⴹⴰⴽⴰⵕ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ 25 ⵉⴱⵔⵉⵔ 2023 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴷ ⵎⴰⵙⵙⴰ CAROLINA CERQUEIRA ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⴰⵏⴳⵓⵍⴰ, ⵣⵎⵎⵉⵎⵏ ⵜⴰⵎⵙⵙⴽⵯⵜⵉⵜ ⵏ ⵓⵏⵔⴰⵎⴰⵙ ⵊⴰⵔ ⵙⵏⴰⵜ ⵜⵎⵔⵙⴰⵍ.

ⵜⵍⵍⴰ ⵎⴰⵙⵙⴰ CAROLINA CERQUEIRA ⴳ ⵓⵔⵣⴰⴼ ⴰⵎⴰⴷⴷⵓⴷ ⵉ ⵍⵎⵖⵔⵉⴱ ⴷ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ  ⴳ ⵍⵍⴰⵏ ⵉⴷ ⵎⴰⵙⵙⴰ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ: ALCIDES SAKALA SIMÕES, MARIA ANTONIETA JOSEFINA S. BAPTISTA, NARCISO DAMÁSIO DOS SANTOS BENEDITO, ⴷ ⵎⴰⵙⵙ PEDRO AGOSTINHO DE NERI ⴰⵎⴰⵔⴰ ⴰⵎⴰⵜⴰⵢ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏⴰ ⵏⴳⵓⵍⴰ, ⴷ ⵜⵔⴰⴱⴱⵓⵜ ⵜⴰⵎⵙⵙⵓⴳⵓⵔⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ.

ⵙ ⵜⵎⵍⴷⴰ, ⵜⵙⵓⵜⴳ ⵜⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⴰⵏⴳⵓⵍⴰ ⴰⵔⵣⴰⴼ ⴰⴷ ⵏⵏⵙ ⴰⵎⵣⵡⴰⵔⵉ ⵉ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⵍⵍⵉ ⵔⴰⴷ ⵉⵙⵎⵖ ⴰⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ. ⵖⵎⴽ ⵍⵍⵉ ⵜⵙⵓⵜⴳ ⵎⴰⵙⵙⴰ CAROLINA CERQUEIRA ⵜⴰⵣⵣⵉⴳⵣⵜ ⵜⴰⴷⵉⵎⵓⵇⵔⴰⵟⵉⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⵉⵔⵎⵉⵜ ⵏⵏⵙ ⵜⴰⴱⵕⵍⴰⵎⴰⵏⵉⵜ, ⵜⵉⵏⵉ ⵎⴰⵙ ⵉⴳⴰ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴰⵎⴷⵔⴰⵡ ⴰⵙⵜⵔⴰⵜⵉⵊⵉ ⵍⵍⵉ ⴷ ⴷⵔⵓⵏ ⴰⵜⵉⴳⵏ ⵏ ⵓⴼⵔⴰ ⴷ ⵓⵔⴳⴳⵉⴳ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵡⵇⵇⵔⵏ ⵏ ⵜⵅⵅⵓⵜⵔⴰ ⵏ ⵉⵡⴰⵏⴽⵏ...

ⴳ ⵓⵎⵏⵉⴷ ⵏⵏⵙ, ⵉⵙⴰⵡⵍ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴼ ⵜⵣⴷⴰⵢⵉⵏ ⵏ ⵓⵎⵣⵔⴰⵢ ⵊⴰⵔ ⵍⵎⵖⵔⵉⴱ ⴷ ⴰⵏⴳⵓⵍⴰ, ⵖⵎⴽ ⴰⵏⵏ ⵓⵍⴰ ⴰⵙⵏⴰⵍ ⴰⵅⴰⵜⴰⵔ ⵍⵍⵉ ⵜⴼⴽⴰ ⵜⴳⵍⴷⵉⵜ ⵏ ⵍⵎⵖⵔⵉⴱ ⵉ ⵓⵎⴰⴷⴰⵏ ⵏ ⴰⵏⴳⵓⵍⴰ ⵎⴳⴰⵍ ⵏ ⵓⵙⴷⵓⵔⵔⵓⵢ.

ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵓⵍⴰ, ⵜⴰⵣⵣⵉⴳⵣⵜ ⵜⴰⴷⵉⵎⵓⵇⵔⴰⵟⵉⵜ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵉⵙⴰⵡⵓⵔⵏ ⵉⵅⴰⵜⴰⵔⵏ ⵍⵍⴰⵏⵉⵏ ⴷⴷⵓ ⵏ ⵜⵏⵔⴰ ⵜⵓⵏⵥⵉⵣⵟ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵙ ⴰⴷ ⵜ ⵉⵏⵚⵕ ⵕⴱⴱⵉ ⵉ ⵚⴰⵃⴰ ⵏ ⵓⵡⴰⵏⴽ ⵏ ⵓⵣⵔⴼ ⴷ ⵓⵙⵍⴳⵏ ⴷ ⵜⵎⵔⵙⴰⵍ ⴷ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵖⴰⵔⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⵜⴰⵎⴰⵜⴰⵢⵜ ⴳ ⵜⴳⵍⴷⵉⵜ.

ⴳ ⵓⵏⵎⵓⵇⵇⴰⵔ ⴰⴷ, ⵉⵍⵍⴰ ⵓⵣⵎⵎⴻⵎ ⵏ ⵜⵎⵙⵙⴽⵯⵜⵉⵜ ⵏ ⵓⵏⵔⴰⵎⴰⵙ ⵊⴰⵔ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⴰⵏⴳⵓⵍⴰ, ⵙ ⵜⵉⵍⵉⵜ ⵏ ⵎⴰⵙⵙ Baltazar Diogo Cristóvão   ⴰⵎⵙⵇⵇⴰⴷ ⵏ ⴰⵏⴳⵓⵍⴰ ⴳ ⵕⵕⴱⴰⵟ ⴷ ⵎⴰⵙⵙⴰ ⵍⴰⵟⵉⴼⴰ ⵛⵛⵔⵉⴼ ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵖⵔⵉⴱ-ⴰⵏⴳⵓⵍⴰ.

ⵜⵡⴰⵜⵜⵙ ⵜⵎⵙⵙⴽⵯⵜⵉⵜ ⴰⵙⵎⵖⵔ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵊⴰⵔ ⵙⵏⴰⵜ ⵜⵎⵔⵙⴰⵍ ⵙ ⵜⵣⴷⴰⵢⵉⵏ ⵏ ⵜⴷⴷⵓⴽⴽⵯⵍⴰ ⵍⵍⴰⵏⵉⵏ ⵊⴰⵔ ⵉⵎⴰⴷⴰⵏⵏ ⵏ ⵍⵎⵖⵔⵉⴱ ⴷ ⴰⵏⴳⵓⵍⴰ, ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵓⵙⴷⵓⵙ ⵏ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ.

ⵖⵎⴽ ⵍⵍⵉ ⵔⴰⴷ ⵢⵉⵍⵉ ⵓⵙⴷⵓⵙ ⵏ ⵜⵣⴷⴰⵢⵉⵏ ⵜⵉⵙⵔⵜⴰⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⴷⵍⵙⴰⵏⵉⵏ ⴷ ⵜⵎⴰⵙⵙⴰⵏⵉⵏ ⵊⴰⵔ ⵍⵎⵖⵔⵉⴱ ⴷ ⴰⵏⴳⵓⵍⴰ, ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵙ ⵓⵎⵙⴰⵡⴰⵍ ⴷ ⵓⵎⵛⴰⵡⴰⵕ ⴷ ⵓⵣⴷⴰⵢ ⵏ ⵡⴰⴷⴷⴰⴷⵏ ⴳ ⵜⵎⴰⴷⴷⴰⵙⵉⵏ ⴷ ⵉⵏⵎⵓⵇⵇⴰⵔⵏ ⵉⴳⵔⴰⵖⵍⴰⵏⵏ ⴷ ⵉⵙⴳⴰⵡⴰⵏⵏ ⴷ ⵉⵏⵎⵏⴰⴹⵏ ⵙ ⵜⵎⵣⵡⴰⵔ ⵏ ⵜⵎⵉⵣⴰⵔ.

ⵖⵎⴽ ⴰⵏⵏ ⵓⵍⴰ ⴰⵙⵏⴼⵍ ⵏ ⵉⵏⵖⵎⵉⵙⵏ ⴷ ⵜⵎⵓⵣⴰⵢⵉⵏ ⴷ ⵜⵎⵙⴽⴰⵔ ⵥⵉⵍⵏⵉⵏ ⴳ ⵢⵉⴳⵔ ⵏ ⵓⵣⵣⵔⴰⴼ ⴷ ⵜⵎⵥⵍⴰⵢ ⵏ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ, ⴷ ⵓⵙⵏⴼⵍ ⵏ ⵉⵔⵣⴰⴼⵏ ⵊⴰⵔ ⵜⵉⵙⵇⵇⵉⵎⵉⵏ ⴷ ⵜⵔⵓⴱⴱⴰ ⵏ ⵜⴷⴷⵓⴽⴽⵯⵍ ⴷ ⵜⵎⵙⵙⵓⴳⵓⵔⵉⵏ ⵏ ⵙⵉⵏ ⵉⵙⵇⵇⵉⵎⵏ.