ⵉⵎⴹⴰⴽⴰⵕ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵎⴰⵔⵉ ⵏ ⵓⵏⵙⵙⵉⵅⴼ ⵏ ⵉⵎⴰⵡⵙⴰⵙⵏ ⴷ ⵓⵎⴰⵡⵙⴰⵙ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⴳ ⵜⴳⵍⴷⵉⵜ ⵏ ⴽⴰⵎⴱⵓⴷⵢⴰ

ⵉⵙⵏⵓⴱⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 28 ⵎⴰⵕⵚ 2023 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ, ⵎⴰⵙⵙ ⴱⵔⴰⴽ ⵙⵓⵅⵓⵏ, ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵉⵎⴰⵡⵙⴰⵙⵏ, ⴰⵎⴰⵡⵙⴰⵙ ⵏ ⴱⵕⵕⴰ ⴱ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⴳ ⵜⴳⵍⴷⵉⵜ ⵏ ⴽⴰⵎⴱⵓⴷⵢⴰ ⴷ ⵓⴽⴰⴱⴰⵕ ⵏⵏⵙ, ⵉⵍⵍⴰⵏ ⴳ ⵓⵔⵣⴰⴼ ⴰⵎⴰⴷⴷⵓⴷ ⵉ ⵜⴳⵍⴷⵉⵜ ⵏ ⵍⵎⵖⵔⵉⴱ ⵓⵙⵙⴰⵏ ⵏ 27 ⴷ 28 ⵎⴰⵕⵚ.

ⵉⵍⵍⴰ ⵓⵎⴹⴰⴽⴰⵕ ⴼ ⵓⵙⴷⵓⵙ ⵏ ⵜⵣⴷⴰⵢⵉⵏ ⵥⵉⵍⵏⵉⵏ ⵊⴰⵔ ⵙⵏⴰⵜ ⵜⴳⵍⴷⴰⵢ, ⵜⵜⴰⵡⵙⵙⴰⵏⵏⵉⵏ ⵙ ⵜⴷⴷⵓⴽⴽⵯⵍⴰ ⴷ ⵓⵡⵇⵇⵔ ⵉⵜⵜⵓⵙⵏⴼⴰⵍⴰⵏ ⴷ ⵓⵎⵛⴰⵡⴰⵕ ⵉⵙⵓⵍⵏ ⴷ ⵓⵣⴷⴰⵢ ⴳ ⵜⵎⵙⴰⵔⵉⵏ ⵛⵛⴰⵔⵏⵉⵏ, ⵖⵎⴽ ⴰⵏⵏ ⴷ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵙ ⵓⵙⵎⵔⵙⵍ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⴷ ⵜⴳⵜⵉⵔⴰⵏⵉⵏ ⴷ ⵓⵎⵢⴰⵡⴰⴹ ⵉⵙⵓⵍⵏ ⴷ ⵓⵙⵡⵉⵏⴳⵎ ⴳ ⵉⵙⴰⵢⵔⵓⵔⵏ ⵏ ⵓⵎⵙⴰⵡⴰⵍ ⵙ ⵓⵙⵏⴼⵍ ⴷ ⵓⴷⵔⴰⵡ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ.

ⵉⵙⵏⵉⵎⵎⵔ ⵓⵎⴰⵔⵉ ⵏ ⵓⵏⵙⵙⵉⵅⴼ ⵏ ⵉⵎⵡⴰⵙⴰⵙⵏ ⴷ ⵓⵎⴰⵡⵙⴰⵙ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⴳ ⴽⴰⵎⴱⵓⴷⵢⴰ ⴰⵙⵏⵓⴱⴳ ⴷ ⵓⵏⵎⵓⵇⵇⴰⵔ, ⵉⵙⴷⴷⵉⴷ ⴰⵙⵏⴰⵍ ⵏ ⵜⴳⵍⴷⵉⵜ ⵏ ⴽⴰⵎⵓⴱⵓⴷⵢⴰ ⵉⵙⵎⴷⵏ ⵏ ⵜⵅⵅⵓⵜⵔⴰ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⵢⴰⵏⵜ ⵏⵏⵙ ⵜⴰⵏⴰⴽⴰⵍⵜ ⴷ ⵓⵡⵇⵇⵔ ⵏ ⵜⵓⴳⴳⴰⵙ ⵏ ⵍⵎⵖⵔⵉⴱ ⵉ ⵜⵡⴰⴼⵉⵜ ⵏ ⵓⴼⵙⵙⴰⵢ ⴰⵙⵔⵜⴰⵏ ⵉ ⵜⵎⵙⴰⵔⵜ ⵏ ⵚⵚⵃⵕⴰ ⵜⴰⵎⵖⵔⵉⴱⵉⵜ.

ⵢⵉⵏⵉ ⵓⵎⵙⵜⴳⴳⴰⵔ ⵏ ⴽⴰⵎⴱⵓⴷⵢⴰ ⵎⴰⵙ ⵓⵎⵥⵏⵜ ⵙⵏⴰⵜ ⵜⵎⵉⵣⴰⵔ ⴰⴱⵔⵉⴷ ⵉⵥⵉⵍⵏ ⵏ ⵓⵙⴷⵓⵙ ⵏ ⵜⵣⴷⴰⵢⵉⵏ ⴳ ⵉⵎⵏⴰⴷⵏ ⵏ ⵜⴷⵎⵙⴰ ⴷ ⵜⵙⴱⴱⴰⴱⵜ ⴷ ⵜⴷⵍⵙⴰ ⴷ ⵜⵎⴰⵍⵍⴰⵢⵜ ⴷ ⵓⵙⴳⵎⵉ ⴷ ⵓⴱⵕⵍⴰⵎⴰⵏ, ⵢⵉⵏⵉ ⵎⴰⵙ ⵉⴽⵛⵎ ⵓⵔⵣⴰⴼ ⵏⵏⵙ ⴳ ⵓⵎⵏⵉⴷ ⴰⴷ.

ⵉⵙⵓⵜⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴰⴷⴷⴰⴷ ⵏ ⴽⴰⵎⴱⵓⴷⵢⴰ ⵉⵙⵏⴰⵍⵏ ⵜⵉⵅⵅⵓⵜⵔⴰ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⵢⴰⵏⵜ ⵏⵏⵙ ⵜⴰⵏⴰⴽⴰⵍⵜ, ⵉⵙⴰⵡⵍ ⴼ ⵓⵔⵣⴰⴼ ⵏⵏⵙ ⵉⵕⵡⴰⵏ ⵉ ⴽⴰⵎⴱⵓⴷⵢⴰ ⴳ ⵏⵓⵡⴰⵏⴱⵉⵔ ⴳ ⵓⵙⴳⴳⵯⴰⵙ ⵉⵣⵔⵉⵏ ⴷ ⵉⵏⵎⵓⵇⵇⴰⵔⵏ ⵏⵏⵙ ⴰⴽⴷ ⴰⵏⵙⵙⵉⵅⴼ ⵏ ⵉⵎⴰⵡⵙⴰⵙⵏ ⴷ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵍⵍⵉⵖ ⵉⴷⵔⵓ ⴳ ⵜⵙⵓⵜⵍⵜ ⵜⵉⵙ 43 ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⵣⵍⵖⴰ ⵏ ⵉⵡⴰⵏⴽⵏ ⵏ ⵉⴼⴼⵓⵙ ⵏ ⵍⵇⴱⵍⵜ ⵏ ⴰⵙⵢⴰ, ⵢⵉⵏⵉ ⵎⴰⵙ ⵜⴳⴰ ⴽⴰⵎⴱⵓⴷⵢⴰ ⵜⴰⵡⵡⵓⵔⵜ ⵏ ⵍⵎⵖⵔⵉⴱ ⴼ ⵉⵡⴰⵏⴽⵏ ⵏ ⵉⴼⴼⵓⵙ ⵏ ⵍⵇⴱⵍⵜ ⵏ ⴰⵙⵢⴰ, ⵉⴳ ⵍⵎⵖⵔⵉⴱ ⵜⵉⵏ ⴽⴰⵎⴱⵓⴷⵢⴰ ⴼ ⵉⴼⵔⵉⵇⵢⴰ.

ⵖⵎⴽ ⵍⵍⵉ ⵉⵎⵍⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵔⵎⵉⵜ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ, ⵉⵙⴷⴷⵉⴷ ⴰⵜⵉⴳ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵉ ⵓⵙⴷⵓⵙ ⵏ ⵓⵎⵢⴰⵡⴰⴹ ⴷ ⵓⵎⵙⴰⵡⴰⵍ ⴷ ⵓⵣⴷⴰⵢ ⴰⵏⵎⵏⴰⴹ ⴷ ⵓⴳⵔⴰⵖⵍⴰⵏ ⴷ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ ⵜⵉⴱⵔⵍⴰⵎⴰⵏⵉⵢⵉⵏ.

ⵉⴳⴰ ⵓⵙⵏⵓⴱⴳ ⴰⴷ ⵜⴰⵎⵍⴷⴰ ⵏ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ ⴼ ⵜⵎⵙⴰⵔⵉⵏ ⵜⵉⵙⴳⴰⵡⴰⵏⵉⵏ ⴷ ⵜⵎⵏⴰⴹⵉⵏ ⴷ ⵜⴳⵔⴰⵖⵍⴰⵏⵉⵏ ⵅⴼ ⵜⵉⵎⵙⴰⵔⵉⵏ ⵛⵛⴰⵔⵏⵉⵏ.