ⵜⴰⵙⵎⵓⵏⵉ ⵏ ⵓⵥⵟⵟⴰ ⵏ ⵜⵎⵖⴰⵔⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵉⴹⴼⵕⵏ ⵜⴰⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⴼⵕⴰⵏⴽⵓⴼⵓⵏⵉⵜ
ⵉⵙⵏⵓⴱⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 1 ⵎⴰⵕⵚ 2023, ⴰⵏⵎⵓⵇⵇⴰⵔ ⵏ ⵓⵥⵟⵟⴰ ⵏ ⵜⵎⵖⴰⵔⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵉⴹⴼⵕⵏ ⵜⴰⵎⵙⵎⵏⵓⵜ ⵜⴰⴱⵕⵍⴰⵎⴰⵏⵉⵜ ⵉ ⵜⴼⵕⴰⵏⴽⵓⴼⵓⵏⵉⵜ, ⴳⵉⵙ ⵜⴰⴳⵔⵓⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵍⵍⵉ ⵜⵙⵎⵏⵉⴷ ⵎⴰⵙⵙⴰ ⵅⴰⴷⵉⵊⴰ ⵣⵣⵓⵎⵉ, ⵜⴰⴳⵓⵔⵉ ⵏ ⵎⴰⵙⵙ ⵊⵡⵉⵍ ⴳⵓⴷⴰⵏ ⴰⵏⵙⵙⵉⵅⴼ ⵏ ⵓⵙⵉⵔⴰ ⵏ ⵜⵖⴰⵡⵙⵉⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵜⵉⵏ ⵎⴰⵙⵙⴰ ⵙⵓⵙⵉ ⵛⵓⵏⵜⴰⵍ ⵜⴰⵏⵙⵙⵉⵅⴼⵜ ⵏ ⵓⵥⵟⵟⴰ.
ⵜⵙⴰⵡⵍ ⵎⴰⵙⵙⴰ ⵣⵣⵓⵎⵉ ⴼ ⵡⴰⵜⵉⴳ ⵏ ⵓⵙⴰⵢⵔⵓⵔ ⴰⴼⵕⴰⵏⴽⵓⴼⵓⵏⵉ ⴷ ⵜⵎⵍⴷⴰ ⵍⵍⵉ ⵢⴰⴽⴽⴰ ⴷ ⵓⵎⵏⵉⴷ ⵏ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ. ⵜⵙⴷⴷⵉⴷ ⴼ ⵜⴷⵉⵎⵓⵇⵔⴰⵟⵉⵜ ⴳ ⵜⵡⵡⵓⵔⵉ ⵜⴰⴱⵕⵍⴰⵎⴰⵏⵉⵜ , ⵜⵖⵔ ⵉ ⵓⴼⴰⵔⵙ ⴰⵎⴳⵔⵓ ⵏ ⵉⵙⵡⵉⵏⴳⵉⵎⵏ ⵉ ⵚⴰⵃⴰ ⵏ ⴽⵓⵢⴰⵏ.
ⵖⵎⴽ ⵍⵍⵉ ⵜⵙⴰⵡⵍ ⴼ ⵓⴷⵖⴰⵔ ⴰⴼⵔⵉⵇⵉ ⴳ ⵜⵎⵙⵎⵓⵏⵜ ⴰⴷ, ⵜⵉⵏⵉ ⵎⴰⵙ ⴷ ⵜⵇⵇⴰⵏ ⵜⵉⵍⵉⵜ ⵏ ⵜⵎⵥⵍⴰⵢ ⵏ ⴽⵓ ⵜⴰⵎⴰⵣⵉⵔⵜ ⴷ ⵓⵡⵇⵇⵔ ⵏ ⵜⵅⵅⵓⵜⵔⴰ ⴷ ⵜⵢⴰⵏⵜ ⵜⴰⵏⴰⴽⴰⵍⵜ ⴷ ⵜⵉⵏ ⵉⵎⴰⴷⴰⵏⵏ.
ⵉⵙⵓⵜⴳ ⵎⴰⵙⵙ ⵊⵡⵉⵍ ⴳⵓⴷⴰⵏ ⵜⵓⴳⴳⵯⴰⵙ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵓⵙⵎⵖⵔ ⵏ ⵜⴼⵕⴰⵏⴽⵓⴼⵓⵏⵉⵜ ⵜⴰⴱⵕⵍⴰⵎⴰⵏⵉⵜ ⵍⵍⵉⵖ ⵉⵙⵏⵓⴱⴳ ⵓⵙⵇⵇⵉⵎ ⵏ ⵉⵎⵓⵔⴰ ⴽⵕⴰⴹ ⵉⵏⵎⵓⵇⵇⴰⵔⵏ: ⵜⴰⵙⵓⵜⵍⵜ ⵜⵉⵙ 28 ⵏ ⵜⵎⵙⵎⵓⵏⵜ ⵜⴰⵙⴳⴰⵡⴰⵏⵜ ⵜⴰⴼⵔⵉⵇⵉⵜ ⵍⵍⵉ ⵏⵉⵜ ⵉⴹⴼⵕⵏ ⵜⴰⵎⵙⵎⵏⵓⵜ ⴰⴷ ⴳ ⵢⵓⵏⵢⵓ 2022, ⴰⴳⵔⴰⵡ ⴰⵎⴰⵜⴰⵢ ⵏ ⵉⵏⴼⵍⴰⵙ ⵉⵎⴰⵜⴰⵢⵏ ⵏ ⵉⴱⵕⵍⴰⵎⴰⵏⵏ ⵉⴼⵕⴰⵏⴽⵓⴼⵓⵏⵉⵢⵏ, ⵜⴰⵡⵡⵓⵔⵉ ⵏ ⵓⵥⵟⵟⴰ ⵏ ⵜⵎⵖⴰⵔⵉⵏ ⴷ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴷⴼⴼⵉⵔ ⵏ ⵜⵙⵓⵜⵍⵉⵏ ⵏ 2006 ⴷ 2010.
ⵉⵙⴷⴷⵉⴷ ⵎⴰⵙ ⵉⴳⴰ ⵓⴱⵕⵍⴰⵎⴰⵏ ⵜⴰⵙⵉⵍⴰ ⵏ ⵓⵏⵎⵓⵇⵇⴰⵔ ⴷ ⵓⵙⵏⴼⵍ ⴳ ⵓⵙⴰⵢⵔⵓⵔ ⴰⴼⵕⴰⵏⴽⵓⴼⵓⵏⵉ ⴳ ⵜⵍⵍⴰ ⵜⴳⵯⵏⵙⴰⵙⵜ ⵏ ⴽⴽⵓⵥⵜ ⵜⵙⴳⴳⵉⵡⵉⵏ ⵏ ⵜⵎⵙⵎⵓⵏⵜ ⴰⴷ ⴳ ⵉⵏⵎⵓⵇⵇⴰⵕⵏ ⴰⴷ, ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵓⵙⵎⵖⵔ ⵏ ⵓⵎⴹⴰⴽⴰⵕ, ⵢⵉⵏⵉ ⵎⴰⵙ ⵉⴳⴰ ⵓⵏⵎⵓⵇⵇⴰⵔ ⴰⴷ ⵜⴰⵎⵍⴷⴰ ⵏ ⵓⵙⴷⵓⵙ ⵏ ⵓⵙⵜⴰⵢ ⴰⴷⵉⵎⵓⵇⵔⴰⵟⵉ ⴷ ⵓⵡⴰⵏⴽ ⵏ ⵓⵣⵔⴼ ⴷ ⵓⵙⵍⴳⵏ ⴷ ⵓⵙⵎⵖⵔ ⵏ ⵜⴷⵍⵙⴰ ⵏ ⵢⵉⵙⴽⵉⵍ ⴷ ⵓⵙⵏⵥⵕ ⴰⴷⵍⵙⴰⵏ ⵏ ⵜⴼⵕⴰⵏⵚⵉⵚⵜ.
ⵜⵙⵓⵜⴳ ⵎⴰⵙⵙ ⵙⵓⵙⵓ ⵛⵓⵏⵟⴰⵍ ⵜⵓⴳⴳⵯⴰⵙ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵉⵣⵔⴼⴰⵏ ⵏ ⵜⵎⵖⴰⵔⵜ ⴷ ⵉⵎⵓⴽⵏⵏ ⵉⵙⵔⵜⴰⵏⵏ ⵜⵉⵏⵉ ⵎⴰⵙ ⵉⵥⴹⴰⵕ ⵍⵎⵖⵔⵉⴱ ⴰⴷ ⵉⵙⵎⵓⵏ ⵊⴰⵔ ⵜⵥⵖⵕⵜ ⴷ ⵜⵎⴰⵜⵔⴰⵔⵜ.
ⵜⵙⵎⵏⵉⴷ ⵎⴰⵙⵙ ⵛⵓⵏⵟⴰⵍ ⴰⵙⵎⴰⵇⵇⵍ ⴼ ⵜⵡⵡⵓⵔⵉ ⵏ ⵓⵥⵟⵟⴰ ⵏ ⵜⵎⵖⴰⵔⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴳ ⵏⵉⵜ ⵉⵍⵍⴰ ⵓⵙⴷⵓⵙ ⵏ ⵓⴷⵖⴰⵔ ⵏ ⵜⵎⵖⴰⵔⵜ ⴳ ⵢⵉⴳⵔ ⵙⵔⵜⴰⵏ.
ⴰⵙⵙ ⵏ 2 ⵎⴰⵕⵚ 2023, ⵔⴰⴷ ⵉⵍⵉⵏⵜ ⵜⵡⵡⵓⵔⵉⵡⵉⵏ ⵏ ⵓⵥⵟⵟⴰ ⵏ ⵜⵎⵖⴰⵔⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ, ⵜⴰⵙⴰⵡⵓⵔⵜ ⵏ ⵓⵥⵟⵟⴰ ⵏ ⵜⵎⵖⴰⵔⵉⵏ ⴷ ⵓⵙⵎⵏⵉⴷ ⵏ ⵉⵏⵇⵇⵉⵙⵏ ⵏ ⵓⵙⴳⴳⵯⴰⵙ ⵏ 2023, ⴷ ⵜⵙⵔⵜⵉⵜ ⵉⵣⴷⵉⵏ ⴷ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ ⴳ ⵉⴱⵕⵍⴰⵎⴰⵏⵏ, ⴷ ⵉⵎⵔⵙⵉⵡⵏ ⴼ ⵉⵣⵔⴼⴰⵏ ⵏ ⵜⵎⵖⴰⵔⵜ ⴷ ⵢⵉⵙⴽⵉⵍ.
ⵔⴰⴷ ⵢⵉⵍⵉ ⵓⵍⴰ ⵓⵙⵏⴼⵍ ⵏ ⵓⵙⵉⵔⴰ ⵏ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵓⵙⵎⵏⵉⴷ ⵏ ⵉⵏⵇⵉⵙⵏ ⴼ ⵉⴷⵔⵉⵣⵏ ⵏ ⵜⴽⵔⴽⴰⵙ ⵜⵉⵏⵖⵎⴰⵙⵉⵏ ⴳ ⵡⴰⵎⵎⴰⵙ ⴰⴱⵕⵍⴰⵎⴰⵏⵉ, ⴷ ⵓⵙⵓⵜⴳ ⵏ ⵓⵎⵢⴰⵡⴰⵙ ⵍⵍⵉ ⵜⵙⴽⵔ ⵜⵎⵙⵎⵓⵏⵜ ⴳ 2022.