ⵜⵙⵓⵜⴳ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⵄⵕⴰⴱⵜ ⵜⵓⴳⴳⴰⵙ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵍⵇⵓⴷⵙ, ⵜⵙⵙⵀⵔⵛ ⴳⴰⵔ ⵜⵉⵎⵙⴽⴰⵔ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ

ⵜⵙⵓⵜⴳ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⵄⵕⴰⴱⵜ ⵜⵓⴳⴳⴰⵙ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⴰⵎⴷ ⵡⵉⵙ ⵚⴹⵉⵚ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵍⵇⵓⴷⵙ, ⴳ ⵓⵎⵣⴰⵖ ⵏ ⵜⵖⵔⵎⵜ ⴰⴷ ⵜⴰⵎⵙⴼⵓⵥⵥⵕⵜ.

ⵜⵙⵓⵜⴳ ⵜⴰⵎⵓⵏⵜ ⴳ ⵓⴳⵔⴰⵡ ⵏⵏⵙ ⵡⵉⵙ 34 ⵉⵍⵍⴰⵏ ⴳ ⴱⴰⵖⴷⴰⴷ ⵓⵙⵙⴰⵏ ⵏ 25 ⴷ 26 ⴱⵕⴰⵢⵕ ⵜⴰⵡⵡⵓⵔⵉ ⵏ ⵜⵙⵏⵓⵔⴰⵢⵜ ⵏ ⵜⴳⵎⵎⵉ ⵏ ⵜⴷⵔⵉⵎⵜ ⵏ ⵍⵇⵓⴷⵙ ⵉⴹⴼⵕⵏ ⵜⴰⵙⵇⵇⵉⵎⵜ ⵏ ⵍⵇⵓⴷⵙ ⴳ ⵓⵙⵏⴰⵍ ⵏ ⵓⵎⴰⴷⴰⵏ ⵏ ⴼⴰⵍⵉⵙⵟⵉⵏ.

ⵜⵉⵏⵉ ⵜⴰⵎⵓⵏⵜ ⵎⴰⵙ ⴷ ⵉⵇⵇⴰⵏ ⴰⴷ ⵉⵟⵟⵉⴼ ⵓⵎⴰⴷⴰⵏ ⵏ ⴼⴰⵍⵉⵙⵟⵉⵏ ⵉⵣⵔⴼⴰⵏ ⵏⵏⵙ ⵃⵎⴰ ⴰⴷ ⵢⵉⵍⵉ ⵓⴼⵔⴰ ⴷ ⵜⵏⴼⵔⵓⵜ ⴷ ⵓⵔⴳⴳⵉⴳ ⴳ ⵜⵙⴳⴰ ⴰⴷ, ⵉⵖⵔ ⴰⴷ ⵉⵍⵉⵏⵜ ⵜⵓⴳⴳⴰⵙ ⵍⵍⵉ ⵔⴰⴷ ⵢⴰⵡⵙ ⴳ ⵓⴼⵓⴽⴽⵓ ⵏ ⵜⵎⵓⴽⵔⵉⵙⵉⵏ ⵊⴰⵔ ⵉⵡⴰⵏⴽⵏ ⴰⵄⵕⴰⴱⵏ ⵃⵎⴰ ⴰⴷ ⵜⵉⵍⵜ ⵜⴰⵎⵓⵏⵜ ⵏ ⵜⴳⵓⵔⵉ ⴷ ⵓⵙⴷⵓⵙ ⵏ ⵜⵏⴼⵔⵓⵜ ⴳ ⵜⵙⴳⴰ ⴰⴷ.

ⵜⵙⴷⴷⵉⴷ ⵜⴰⵎⵓⵏⵜ ⵜⴰⵄⵕⴰⴱⵜ ⵓⵍⴰ ⴼ ⵜⴰⴳⵯⵉⵜ ⵏ ⵜⵎⵙⴽⴰⵔ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⵎⴳⴰⵍ ⵏ ⵉⵡⴰⵏⴽⵏ ⴰⵄⵕⴰⴱⵏ ⴳ ⵓⴽⵛⵓⵎ ⴳ ⵜⵖⴰⵡⵙⵉⵡⵉⵏ ⵏⵏⵙ ⵜⵉⴳⵯⵏⵙⴰⵏⵉⵏ ⵙ ⵜⵖⴰⵔⴰⵙⵜ ⵜⵓⵙⵔⵉⴷⵜ ⵏⵖⴷ ⵜⴰⵔⵓⵙⵔⵉⴷⵜ. ⵖⵎⴽ ⵍⵍⵉ ⵜⵙⴷⴷⵉⴷ ⵜⴰⵎⵓⵏⵜ ⴼ ⵜⴰⴳⵯⵉⵜ ⵉⵙⵎⴷⵏ ⵏ ⵓⴽⵛⵓⵎ ⵏ ⴱⵕⵕⴰ ⴳ ⵜⵖⴰⵡⵙⵉⵡⵉⵏ ⵏ ⵉⵡⴰⵏⴽⵏ ⴰⵄⵕⴰⴱⵏ ⵙ ⵜⵖⴰⵔⴰⵙⵜ ⵜⵓⵙⵔⵉⴷⵜ ⵏⵖ ⵡⴰⵔⵜⵓⵙⵔⵉⴷⵜ.

ⵜⵙⴷⴷⵉⴷ ⵜⴰⵎⵓⵏⵜ ⴰⴷ ⵓⵍⴰ ⴼ ⴳⴰⵔ ⵉⴷⵔⵉⵣⵏ ⵏ ⵓⵙⵎⵔⵙ ⴰⵙⵔⵜⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵖ ⴰⵙⴷⴰⵡ ⵢⴰⴷⵏⵉⵏ ⵉⴱⴷⴷⵏ ⴼ ⵉⵏⵖⵎⵉⵙⵏ ⵓⵔ ⴷⵓⵙⵏⵉⵏ ⵓⵔ ⵉⵟⵟⴰⴼⵏ ⴰⵙⵖⵣⵏ.

ⵉⴷⵔⵓ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴳ ⵜⵙⵓⵜⵍⵜ ⵜⵉⵙ 34 ⵏ ⵓⴳⵔⴰⵡ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⵄⵔⴰⴱⵜ ⴷⴷⵓ ⵜⵎⴰⵜⴰⵔⵜ: “ⴰⵙⵏⴰⵍ ⴰⵄⵕⴰⴱ ⵉ ⵓⵙⴷⵓⵙ ⵏ ⵓⵔⴳⴳⵉⴳ ⵏ ⵍⵄⵉⵕⴰⵇ ⴷ ⵜⵅⵅⵓⵜⵔⴰ ⵏⵏⵙ”.

ⵔⴰⴷ ⵜⴳ ⵜⴰⴷⵔⴰⵡⵜ ⵏ ⵍⵎⵖⵔⵉⴱ ⴳ ⵓⵎⵓⵙⵙⴰ ⴰⴷ ⴰⴱⵕⵍⴰⵎⴰⵏⵉ ⵜⴰⵎⵍⴷⴰ ⵉ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⴷ ⵓⵙⴽⵔ ⵏ ⵉⵏⵎⵓⵇⵇⴰⵔⵏ ⵉⵙⵉⵏⵔⴰⵏⵏ ⴰⵢⵍⵍⵉ ⵉⵎⵎⴰⵍⴰⵏ ⴰⵙⵡⵉⵔ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵉⵙⵡⵉⵔⵏ ⴰⵏⵎⵏⴰⴷ ⴷ ⵓⴳⵔⴰⵖⵍⴰⵏ.

ⵉⵙⵙⵉⵅⴼ ⴰⴽⴰⴱⴰⵕ ⴰⴷ ⵎⴰⵙⵙ ⵃⴰⵙⴰⵏ ⴱⵏ ⵄⵓⵎⴰⵕ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵍⵉⵏ ⴳⵉⵙ ⵉⴷ ⵎⴰⵙⵙ ⵉⵎⵓⵔⴰ ⴷ ⵉⵎⵛⵛⵉⵡⴰⵕ: ⵎⵉⵍⵓⴷ ⵎⵄⵚⵉⴷ, ⴼⴰⵟⵉⵎⴰ ⵅⴰⵢⵔ, ⵍⴰⵃⵙⵏ ⵙⵙⵄⴷⵉ, ⵄⴰⴱⴷⵕⵕⴰⵃⵉⵎ ⵡⴰⵄⵎⵔ, ⵄⴰⴱⴷⵔⵔⴰⵣⵣⴰⵇ ⴰⵃⵍⵓⵛ, ⴼⴰⵢⵚⴰⵍ ⵣⵣⵕⵀⵓⵏⵉ, ⵛⵛⵉⵅ ⴰⵃⵎⴷⵓ ⵉⴷⴱⴷⴰ, ⴼⴰⵜⵉⵃⴰ ⵅⵓⵔⵜⴰⵍ ⵙⴳ ⵜⴰⵢⵢⴰⵡⵜ ⵜⴰⴱⵕⵍⴰⵎⴰⵏⵉⵜ ⵜⴰⵏⴰⵎⵓⵔⵜ ⴳ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⵄⵕⴰⴱⵜ.  

ⵉⴷⵔⵓ ⴳ ⵜⵙⵓⵜⵍⵜ ⴰⴷ 18 ⵏ ⵓⵡⴰⵏⴽ ⴰⵄⵕⴰⴱ ⴳⵉⵙ 14  ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴷ 4 ⵉⵎⵓⵔⴰ ⵏ ⵓⵏⵙⵙⵉⵅⴼ, ⴷ ⵜⵎⵔⵙⴰⵍ ⵜⵉⴱⵕⵍⴰⵎⴰⵏⵉⵢⵉⵏ ⴳⴰⵏⵉⵏ ⵜⴰⵏⴷⴰⴼⵉⵏ ⴳ ⵜⴰⵎⵓⵏⵜ ⵜⵉⵍⵉ ⴳⵉⵙⵏⵜ ⵜⴰⵎⵓⵏⵜ ⵜⴰⴱⵕⵍⴰⵎⵏⵉⵜ ⵜⴰⴳⵔⴰⵖⵍⴰⵏⵜ.

ⵉⵍⵍⴰ ⴳ ⵓⵖⴰⵡⴰⵙ ⵏ ⵜⵙⵓⵜⵍⵜ ⵜⵉⵡⵡⵓⵔⵉⵡⵉⵏ ⵏ ⵓⴳⵔⴰⵡ ⴷ ⵜⵙⵎⵓⵏⴰⵢ ⵏ ⵜⵙⵇⵇⵉⵎⵉⵏ ⵜⵉⵙⵓⵍⴰⵏⵉⵏ: ⵜⴰⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⵜⵙⵔⵜⵉⵜ ⴷ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ, ⵜⴰⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵜⵉⵥⵕⴼⴰⵏⵉⵏ ⴷ ⵜⴷⵎⵙⴰⵏⵉⵏ, ⵜⴰⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⵜⵎⵖⴰⵔⵜ ⴷ ⵜⵎⵥⵉ, ⵖⵎⴽ ⴰⵏⵏ ⴷ ⵉⵏⵇⵇⵉⵙⵏ ⵏ ⵜⵙⵓⵜⵍⵉⵏ ⵣⵔⵉⵏⵉⵏ ⴷ ⵜⵉⵍⴰⵍ ⵏ ⵜⵏⴼⵍⵓⵙⵜ ⵜⴰⵎⴰⵜⴰⵢⵜ ⵏ ⵜⴰⵎⵓⵏⵜ ⵙⴳ ⵓⴳⵔⴰⵡ ⵡⵉⵙ 32.