ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵙⵓⵜⵍⵜ ⵏ ⴱⵕⴰⵢⵕ ⵏ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ

ⵜⴷⵔⵓ ⵜⵎⴰⵔⵉⵜ ⵎⴰⵙⵙ ⵃⴰⵢⴰⵜ ⵍⵄⵔⴰⵢⵛ ⴳ ⵜⵙⵓⵜⵍⵜ ⵏ ⴱⵕⴰⵢⵕ ⵏ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⴳ 20 ⴰⵔ 24 ⴱⵕⴰⵢⵕ 2023 ⴳ ⵜⴳⴷⵓⴷⴰⵏⵜ ⵏ ⴳⵡⴰⵜⵉⵎⴰⵍⴰ.

ⵜⵙⴽⵔⴰⵎⴰⵙⵙ ⵜⴰⵎⴰⵔⵉⵜ ⵜⴰⴳⵎⴰⵎⵜ ⵏ ⵜⴰⵢⵢⴰⵡⵜ ⵜⴰⵏⴰⵎⵓⵔⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⴷ ⵎⴰⵙⵙ Amado Cerrud Acevedo ⴰⵏⵙⵙⵉⵅⴼ ⵏ ⵜⵎⴰⴷⴰⵙⵜ ⴰⴷ ⵜⴰⴱⵕⵍⴰⵎⴰⵏⵉⵜ ⵜⴰⵏⵎⵏⴰⴹⵜ, ⵙ ⵜⵉⵍⵉⵜ ⵏ ⵎⴰⵙⵙⴰ Iliana Guadalupe Galles Domínguez   ⵜⴰⵎⴰⵔⵉⵜ ⵜⴰⵎⵣⵡⴰⵔⵓⵜ ⵏ ⵓⵏⵙⵙⵉⵅⴼ, ⴷ ⵎⴰⵙⵙ Carlos René Hernández Castillo ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵣⵡⴰⴳ ⴳ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ.   

ⵜⵙⴷⴷⵉⴷ ⵎⴰⵙⵙ ⵃⴰⵢⴰⵜ ⵍⵄⵔⴰⵢⵛ ⵎⴰⵙ ⴷ ⵜⵉⵍⵉⵜ ⵏⵏⵙ ⴳ ⵜⵙⵓⵜⵍⵜ ⴰⴷ ⴷ ⵜⴳⵯⵏⵙⴰⵙⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵍⵎⵖⵔⵉⴱ ⵜⴳⴰ ⵜⴰⵎⴰⵜⴰⵔⵜ ⵏ ⵓⵙⵖⵡⵏ ⵉⵙⵓⵍⵏ ⵏ ⵜⴳⵍⴷⵉⵜ  ⵏⵍⵎⵖⵔⵉⴱ ⵙ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ, ⵍⵍⵉ ⵎⵓ ⵢⴰⴽⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⴰⵅⵎⵎⴻⵎ ⴰⵅⴰⵜⴰⵔ, ⵜⵙⵎⵏⵉⴷ ⵓⵍⴰ ⵜⴰⵣⵣⵉⴳⵣⵜ ⵏ ⵜⵎⴰⵣⵉⵔⵜ ⵏⵏⵖ ⴳ ⵉⴳⵔⴰⵏ ⵏ ⵜⴳⵎⵉ ⵜⴰⵙⵓⵍⴰⵏⵜ ⴷ ⵓⵙⵎⵓⵜⵜⵉ ⴰⵥⴹⴰⵕⴰⵏ.

ⴳ ⵓⵎⵏⵉⴷ ⵏⵏⵙ, ⵉⵙⵓⵜⴳ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⵜⵉⵍⴰⵍⵜ ⵜⴰⵎⵣⵡⴰⵔⵓⵜ ⵏ ⵍⵎⵖⵔⵉⵉⴱ ⵍⵍⵉ ⵉⴳⴰⵏ ⵜⴰⵡⵡⵓⵔⵜ ⵙ ⵉⴼⵔⵉⵇⵢⴰ, ⵢⵉⵏⵉ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵚⴰⵃⴰ ⵙⴳ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⴳ ⵢⵉⴳⵔ ⵏ ⵓⵙⵡⵓⴷⴷⵓ ⵏ ⵢⵉⴳⵔ ⴷ ⵓⵙⴷⵓⵙ ⵏ ⵓⵣⴷⴰⵢ ⴰⴱⵕⵍⴰⵎⴰⵏⵉ ⴰⴽⴷ ⵜⴰⴳⵍⴷⵉⵜ ⵜⴰⵎⵖⵔⵉⴱⵉⵜ ⵍⵍⵉ ⵉⴳⴰⵏ ⵜⴰⵣⴷⴰⵢⵜ ⴷ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⵙ ⵓⵙⵏⴰⵍ ⵏ ⵓⵎⵢⴰⵡⴰⵙ ⵉⵛⵛⴰⵔⵏ ⴳ ⵓⵙⴰⵜⵉ ⵏ ⵓⵏⵎⵓⵇⵇⴰⵔⴰ ⴰⴱⵕⵍⴰⵎⴰⵏⵉ ⵏ ⵉⴼⵔⵉⵇⵢⴰ ⴷ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⵍⴽⴰⵔⵢⵉⴱ “ⴰⴼⵔⵓⵍⴰⴽ“.

ⴳ ⵜⵙⵓⵜⵍⵜ ⴰⴷ, ⵜⵙⵎⵏⵉⴷ ⵎⴰⵙⵙⴰ ⵃⴰⵢⴰⵜ ⵍⵄⵔⴰⵢⵛ ⵜⴰⴳⴰⵍⵍⵉⵜ ⴷⴰⵜ ⵏ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⵍⵍⵉⵖ ⵜⴳⴰ ⵜⴰⴳⵎⴰⵎⵜ ⴳ ⵜⴰⵢⵢⴰⵡⵜ ⵜⴰⵏⴰⵎⵓⵔⵜ ⴳ ⵜⵎⴰⴷⴷⴰⵙⵜ ⵜⴰⴱⵕⵍⴰⵎⴰⵏⵉⵜ ⵜⴰⵏⵎⵏⴰⴹⵜ. ⵢⵉⵍⵉ ⵓⵍⴰ ⵓⵙⵖⵣⵏ ⵏ ⵉⵙⵏⴼⴰⵔⵏ ⵏ ⵜⵖⵜⴰⵙⵉⵏ ⵍⵍⵉ ⵙⴽⵔⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵉⵏ ⵜⵉⵙⵓⵍⴰⵏⵉⵏ ⵅⴼ ⵉⵎⵔⵙⵉⵡⵏ ⵏ ⵜⵓⵡⵊⴰ ⴷ ⵓⴷⵡⴰⵙ ⴷ ⵜⴷⵍⵙⴰ ⴷ ⵜⵓⵜⵍⴰⵢⵉⵏ ⴷ ⵓⵣⵡⴰⴳ ⴷ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴳ ⵓⵏⴳⵔⴰⵡ ⵏ ⵓⵙⵉⴷⴼ ⴰⵏⵎⵏⴰⴹ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ (SICA).

ⵉⵜⵜⵓⵙⵙⴰⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⵙ ⵙⵉⵏ ⵉⵙⵇⵇⵉⵎⵏ ⵏⵏⵙ ⵎⴰⵙ ⵉⴽⵛⵉⵎ ⵙ ⵓⴱⵕⵍⴰⵎⴰⵏ ⵏ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⴷ ⴰⴳⵎⴰⵎ ⵉⵎⵥⵕⵉ ⴳ 16 ⵢⵓⵏⵢⵓ 2015. ⵖⵎⴽⵍ ⵍⵍⵉ ⵢⵓⵎⴰ ⵓⵏⴳⵔⴰⵡ ⴰⴷ ⵚⴹⵉⵚ ⵉⵡⴰⵏⴽⵏ: ⴳⵡⴰⵜⵉⵎⴰⵍⴰ, ⵙⵙⴰⵍⴼⴰⴷⵓⵔ, ⵍⵀⵉⵏⴷⵓⵔⴰⵙ, ⵏⵉⴽⴰⵔⴳⵡⴰ, ⴱⴰⵏⴰⵎⴰ, ⴷⴷⵓⵎⵉⵏⵉⴽⴰⵏ.