ⵉⵎⴹⴰⴽⴰⵕⵏ ⵏ ⵜⵔⵓⴱⴱⴰ ⵏ ⵜⴷⴷⵓⴽⴽⵯⵍⴰ ⵍⵎⵖⵔⵉⴱ-ⵉⵙⵜⵓⵏⵢⴰ
ⵜⵎⴹⴰⴽⴰⵕ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵖⵔⵉⴱ-ⵉⵙⵜⵓⵏⵢⴰ ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⵏⴰⵙ 30 ⵉⵏⵏⴰⵢⵔ 2023 ⴷ ⵉⵏⴳⴳⵯⴰ ⵏⵏⵙ ⴳ ⵓⴱⵕⵍⴰⵎⴰⵏ ⵏ ⵉⵙⵜⵓⵏⵢ, ⴳ ⵓⵙⴰⵜⵉ ⵏ ⵓⵔⵣⴰⴼ ⵏ ⵜⵡⵡⵓⵔⵉ ⵉ ⵜⵎⴰⵣⵉⵔⵜ ⵏⵏⵖ ⵖ ⵍⵍⴰⵏ ⴽⵉⴳⴰⵏ ⵏ ⵉⵏⵎⵓⵇⵇⴰⵔⵏ ⴳ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ.
ⵉⵃⴰⴹⵕ ⴳ ⵓⵏⵎⵓⵇⵇⴰⵔ ⴰⴷ ⵎⴰⵙⵙⴰ ⵛⴰⴼⵉⵇⴰ ⵍⵛⵕⴰⴼ ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵖⵔⵉⴱ-ⵉⵙⵜⵓⵏⵢⴰ ⴷ ⵎⴰⵙⵙⴰ ⵣⵉⵏⴰ ⵛⴰⵀⵉⵎ ⴷ ⵎⴰⵙⵙ ⵄⴰⴱⴷ ⵏⵏⴱⵉ ⵍⵄⴰⵢⴷⵓⴷⵉ ⴷ ⵎⴰⵙⵙ ⵎⵓⵃⴰⵎⵎⴰⴷ ⴰⵛⵔⵓⵔⵓ ⴷ ⵎⴰⵙⵙ ⵍⴰⵃⵙⵏ ⴰⵣⵓⴳⴳⴰⵖ.
ⴳ ⵜⵙⴳⴰ ⵏ ⵉⵙⵜⵓⵏⵢⴰ, ⵉⵃⴰⴹⵕ ⵎⴰⵙⵙ ⵔⴰⵢⴼⵓ ⵜⴰⵎ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵉⵙⵜⵓⵏⵢⴰ-ⵍⵎⵖⵔⵉⴱ, ⴷ ⵓⵎⴰⵔⵉ ⵏⵏⵙ ⵎⴰⵙⵙ ⵣⴼⵉⵏ ⵙⵉⵙⵜⵔ ⴷ ⵎⴰⵙⵙ ⵟⵓⵎⴰⵙ ⴽⵉⴼⵉⵎⴰⵊⵉ ⴰⴳⵎⴰⵎ ⵏ ⵜⵔⴰⴱⴱⵓⵜ.
ⵉⵙⴰⵡⵍ ⵓⴽⴰⴱⴰⵕ ⵏ ⵉⵙⵜⵓⵏⵢⴰ ⴼ ⵜⵓⵎⵔⵜ ⵏⵏⵙ ⵍⵍⵉⵖ ⵉⵍⵍⴰ ⴳ ⵍⵎⵖⵔⵉⴱ, ⵉⵙⵓⵜⴳ ⴰⵙⴽⵔ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵍⵎⵖⵔⵉⴱ-ⵉⵙⵜⵓⵏⵢⴰ, ⵉⵙⵓⵜⴳ ⵓⵍⴰ ⵜⴰⵡⵡⵓⵔⵉ ⵏ ⵜⵔⴰⴱⴱⵓⵜ ⵉⴱⴷⴷⵏ ⴼ ⵜⵔⵙⵍⵜ ⵉⵥⵉⵍⵏ ⵎⵇⵇⴰⵔ ⵓⴳⴳⵓⴳ. ⵉⵙⴷⴷⵉⴷ ⵓⵍⴰ ⴼ ⵜⵉⴽⴽⵉ ⵏ ⵓⵏⴼⵓⵙ ⴰⵎⴰⵢⵏⵓ ⵉ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⵍⵍⵉⵖ ⵉⴳⴰ ⵍⵎⵖⵔⵉⴱ ⵜⴰⵎⴰⵣⵉⵔⵜ ⵉⵇⵇⵔⴱⵏ ⵉ ⵜⴰⵎⵓⵏⵜ ⵏ ⵓⵕⵓⴱⴱⴰ.
ⵜⵉⵏⵉ ⵜⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵎⴰⵙ ⵔⴰⴷ ⵢⴰⵡⵙ ⵓⵏⵎⵓⵇⵇⴰⵔ ⴰⴷ ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵉⵣⴰⵔ ⴳ ⵎⴰⵕⵕⴰ ⵏ ⵉⴳⵔⴰⵏ, ⵊⴰⵔ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵖⵔⵉⴱⵉ ⴷ ⵓⵏⴳⴳⵯⵓ ⵏⵏⵙ ⴳ ⵉⵙⵜⵓⵏⵢⴰ.
ⵖⵎⴽ ⵍⵍⵉ ⵉⵙⵏⴰⵍ ⵓⴽⴰⴱⴰⵕ ⵜⴰⵢⴰⵏⵜ ⵜⴰⵏⴰⴽⴰⵍⵜ ⵏ ⵍⵎⵖⵔⵉⴱ, ⵉⵖⵔ ⵓⴽⴰⴱⴰⵕ ⵏ ⵍⵎⵖⵔⵉⴱ ⵉ ⵉⴱⵕⵍⴰⵎⴰⵏⵉⵢⵏ ⵏ ⵉⵙⵜⵓⵏⵢⴰ ⵉ ⵓⵔⵣⴰⴼ ⵏ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ ⴰⴼⴰⴷ ⴰⴷ ⵥⵔⵉⵏ ⴰⵙⵡⵉⵔ ⵏ ⵜⴳⵎⵉ ⵙⵍⴰⵡⴰⵏ ⴰⴽⴽⵯ ⵜⵉⵖⵔⵎⵉⵏ ⵏ ⵍⵄⵢⵓⵏ ⴷ ⴷⴷⴰⵅⵍⴰ.
ⴳ ⵓⵏⵎⵓⵇⵇⴰⵔ ⴰⴷ, ⵉⵍⵍⴰ ⵓⵎⴹⴰⴽⴰⵕ ⴼ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⵙ ⵓⵎⵢⴰⴷⴰⵙ ⵏ ⵜⴰⵏⵏⴰⵢⵢⵉⵏ ⴷ ⵓⵙⵏⴼⵍ ⵏ ⵓⵎⵛⴰⵡⴰⵕ ⵅⴼ ⵜⵎⵙⴰⵔⵉⵏ ⵜⵉⵏⵎⵏⴰⴹⵉⵏ ⴷ ⵜⴳⵔⴰⵖⵍⴰⵏⵉⵏ ⵛⵛⴰⵔⵏⵉⵏ.
ⵢⵉⵍⵉ ⵓⵎⵙⴰⵙⴰ ⵓⵍⴰ ⴼ ⵓⵙⴷⵓⵙ ⵏ ⵓⵙⵏⴼⵍ ⴰⴷⵎⵙⴰⵏ ⵊⴰⵔ ⵜⵉⵎⵉⵣⴰⵔ ⴷ ⵓⵙⵎⵖⵔ ⵏ ⵓⵙⵏⴼⵍ ⴰⵏⵙⴱⴰⴱ ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴳ ⵉⴳⵔⴰⵏ ⵏ ⵜⴷⵍⵙⴰ ⴷ ⵓⵙⵙⵍⵎⴷ ⴷ ⵜⴷⵎⵙⴰ.