ⵉⵎⴹⴰⴽⴰⵕ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵜⴳⴷⵓⴷⴰⵏⵜ ⵏ ⵎⴰⵍⴰⵡⵉ

ⵉⵎⴹⴰⴽⴰⵕ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⵏⴰⵙ 9 ⵉⵏⵏⴰⵢⵔ 2023 ⴳ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵕⵕⴱⴰⵟ, ⴷ ⵎⴰⵙⵙⴰ Catherine Gotani Hara ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵜⴳⴷⵓⴷⴰⵏⵜ ⵏ ⵎⴰⵍⴰⵡⵉ, ⵍⵍⵉ ⵉⵍⵍⴰⵏ ⴳ ⵓⵔⵣⴰⴼ ⴰⵎⴰⴷⴷⵓⴷ ⵉ ⵜⵎⴰⵣⵉⵔⵜ ⵏⵏⵖ ⴷ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⵉⵙⵜⴰⵡⵀⵎⵎⴰⵏ.  

ⴳ ⵓⵏⵎⵓⵇⵇⴰⵔ ⴰⴷ, ⵉⵍⵍⴰ ⵓⵙⴷⴷⵉⴷ ⴼ ⵡⴰⵜⵉⴳ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵊⴰⵔ ⵙⵏⴰⵜ ⵜⵎⵉⵣⴰⵔ ⵉ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵛⵛⴰⵔⵏⵉⵏ, ⴷ ⵜⵉⵔⴰⵜ ⵉⴷⵓⵙⵏ ⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ, ⵢⵉⵍⵉ ⵓⵎⵙⴰⵙⴰ ⴼ ⵜⵎⵙⵙⴽⵜⵉⵜ ⵏ ⵓⵏⵔⴰⵎⴰⵙ ⵢⵓⵎⴰⵏ ⵉⵙⵏⴼⴰⵔⵏ ⴷ ⵉⴳⵔⴰⵏ ⵏ ⵓⵎⵢⴰⵡⴰⵙ ⴳⴰⵏⵉⵏ ⵉⵎⵣⵡⵓⵔⴰ.

ⴳ ⵜⵣⵡⵉⵔⵉ, ⵉⵙⴱⵔⵔⴽ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵓⵔⵣⴰⴼ ⵏ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵜⴳⴷⵓⴷⴰⵏⵜ ⵏ ⵎⴰⵍⴰⵡⵉ ⴷ ⵓⴽⴰⴱⴰⵕ ⵏⵏⵙ, ⵉⵙⵓⵜⴳ ⴰⴷⴷⴰⴷ ⵏ ⵎⴰⵍⴰⵡⵉ ⵉⵍⵍⴰⵏ ⴷ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴼ ⵉⴽⴰⵍⴰⵉⵡⵏ ⵏⵏⵙ, ⴷ ⵜⵖⵜⴰⵙⵜ ⵏ ⵓⵕⵥⵥⵓⵎ ⵏ ⵜⵙⵇⵓⵏⵙⵓⵜ ⵏ ⵜⴳⴷⵓⴷⴰⵏⵜ ⵏ ⵎⴰⵍⴰⵡⵉ ⴳ ⵜⵖⵔⵎⵜ ⵏ ⵍⵄⵢⵓⵏ.

ⵉⵙⵎⵏⵉⴷ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵜⵉⵔⵎⵉⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵢⵉⴳⵔ ⵏ ⵜⴼⵍⵍⴰⵃⵜ ⴷ ⵓⵙⴱⴷⴷⵉ ⵏ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵓⵙⵡⵓⴷⴷⵓ ⵏ ⵓⵙⵎⵔⵙ ⵏ ⵡⴰⵎⴰⵏ ⴷ ⵓⵙⵎⵔⵙ ⵏ ⵜⵥⴹⴰⵕⵜ ⵜⴰⵣⴳⵣⴰⵡⵜ ⵜⴰⵎⴰⵢⵏⵓⵜ, ⵉⵙⵙⴽⵯⵜⵉ ⴷ ⵉⵙⵡⴰⵍⴰⵢⵏ ⵉⵙⵜⵔⴰⵜⵊⵉⵢⵏ ⵏ ⵜⴳⵍⴷⵉⵜ ⴳ ⵓⵎⵏⵉⴷ ⴰⴷ ⵙ ⵜⵏⴰⵔⴰ ⵉⵥⵉⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ.

ⴳ ⵓⵎⵏⵉⴷ ⵏⵏⵙ, ⵜⵙⵓⵜⴳ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵜⴳⵓⴷⵓⴷⴰⵏⵜ ⵏ ⵎⴰⵍⴰⵡⵉ ⴰⵙⵏⴰⵍ ⵏ ⵍⵎⵖⵔⵉⴱ ⵉ ⵜⵎⴰⵣⵉⵔⵜ ⵏⵏⵙ ⴳ ⵎⴰⴷ ⵉⵥⵍⵉⵏ ⵙ ⵍⴰⵏⴳⵔⵉⵢⴰⵜ ⵉⵏⴼⵍⴰⵃⵏ ⴷ ⵡⴰⵜⵉⴳ ⵏⵏⵙ ⴷⴰⵔ ⵉⴼⵍⵍⴰⵃⵏ ⴳ ⵎⴰⵍⴰⵡⵉ. ⵜⵉⵏⵉ ⵎⴰⵙ ⵉⵡⴰⵜⵜⵙ ⵓⵔⵣⴰⴼ ⴰⴷ ⴰⵙⴷⵓⵙ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⴷ ⵜⵓⵙⵙⵏⴰ ⵏ ⵓⵎⵎⵉⵥⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⴽⵉⴳⴰⵏ ⵏ ⵉⴳⵔⴰⵏ ⴰⵎ ⵜⴰⴼⵍⵍⴰⵃⵜ ⴷ ⵜⵥⴹⴰⵕⵜ ⴷ ⵡⴰⵡⵏⴰⴷ ⴷ ⵓⵙⵙⵍⵎⴷ ⴷ ⵜⴷⵓⵙⵉ ⴷ ⵉⵄⵔⵔⵉⵎⵏ. ⵜⵙⴷⴷⵉⴷ ⵎⴰⵙ ⴷ ⵍⵎⵖⵉⵔⴱ ⴷ ⵎⴰⵍⴰⵡⵉ ⴷⴰⵔⵙⵏ ⵜⵉⵏⴰⵥⴰⵕⵉⵏ ⴷ ⵉⵇⵇⴰⵏ ⴷ ⵓⵙⵏⴰⵍ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ ⵊⴰⵔ ⵏⵏⵙⵏ.

ⵜⵙⵙⵔⵖⴷ ⵎⴰⵙⵙⴰ Catherine Gotani Hara ⵜⴰⵔⴰⴱⴱⵓⵜ ⵜⴰⵏⴰⵎⵓⵔⵜ ⵜⴰⵎⵖⵔⵉⴱⵉⵜ ⵍⵍⵉ ⵉⵥⴹⴰⵕⵏ ⴰⴷ ⵜⵍⴽⵎ ⴰⵣⴳⵏ ⵏ ⵓⵎⵃⵉⵣⵡⴰⵔ ⵏ ⵜⴽⵓⵔⵜ ⴳ ⵇⴰⵟⴰⵕ, ⵜⵉⵏⵉ ⵎⴰⵙ ⵉⵍⵍⴰ ⵡⴰⴷⴷⵓⵔ ⴷⴰⵔ ⵎⴰⵔⵔⴰ ⵉⴼⵔⵇⵉⵢⴰ ⵙ ⵜⵎⵙⴽⵔⵜ ⴰⴷ.

ⴳⴰⵏ ⵉⵎⴹⴰⴽⴰⵔⵏ ⴰⴷ ⵜⴰⵎⵍⴷⴰ ⵏ ⵓⵔⵣⵣⵓ ⵏ ⵉⵎⵔⵙⵉⵡⵏ ⵢⴰⴷⵏⵉⵏ ⴰⵎ ⵜⴰⵎⵓⵟⵟⵓⵏⵜ ⴷ ⵓⵣⵡⴰⴳ ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⴷ ⵓⴳⵜⵉⵔⴰⵏ.

ⵉⵃⴰⴹⵔ ⴳ ⵓⵏⵎⵓⵇⵇⴰⵔ ⴰⴷ ⵎⴰⵙⵙ ⵄⴰⵣⵉⵣ ⵍⴼⵉⴷⵉ, ⴰⵏⵙⵙⵉⵅⴼ ⵏⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⵏⵉⵜ ⵍⵎⵖⵔⵉⴱ-ⵎⴰⵍⴰⵡⵉ ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⵙⴳ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵜⴳⴷⵓⴷⴰⵏⵜ ⵏ ⵎⴰⵍⴰⵡⵉ ⵎⴰⵙⵙ ⴷ ⵉⴷ ⵎⴰⵙⵙ: Francesa Masamba Theula Arnold William Kadzanja، Jasson Isaac Kaneka، Bauden Mtonga، Fidson Chisesele.