ⵜⵙⵏⵓⴱⴳ ⵎⴰⵙⵙⴰ ⴱⵓⵄⵉⴷⴰ ⴰⴽⴰⴱⴰⵕ ⵙⴳ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ

ⵜⵎⴹⴰⴽⴰⵕ ⵎⴰⵙⵙⴰ ⵏⴰⴷⵢⴰ ⴱⵓⵄⵉⴷⴰ ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵜⵖⴰⵡⵉⵙⵉⵡⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵎⵖⵓⵔⵉⵏ ⵜⵓⵙⵍⵉⵎⵉⵏ ⴷ ⵉⵎⵖⵔⵉⴱⵉⵢⵏ ⵏ ⴱⵕⵕⴰ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙⴰ ⵜⴰⵙⵉⵏⴰⵜⵓⵔⵜ RIA OOMEN RUIJTEN  ⵜⴰⵎⵏⵇⵇⴰⵙⵜ ⵏ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵜⵉⵙⵔⵜⴰⵏⵉⵏ ⴷ ⵜⴷⵉⵎⵓⵇⵔⴰⵟⵉⵜ ⴳ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ, ⵍⵍⵉ ⵉⵍⵍⴰⵏ ⴳ ⵓⵔⵣⴰⴼ ⵉ ⵍⵎⵖⵔⵉⴱ.

ⵍⵍⴰⵏ ⵉⵎⴹⴰⴽⴰⵕⵏ ⴰⴷ ⴼ ⵓⵏⵇⵇⵉⵙ ⴰⵎⴰⵢⵏⵓ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵍⵍⵉ ⵜⵙⴽⴰⵔ ⴼ ⵜⵎⴷⵔⴰⵡⵜ ⵉ ⵜⴷⵉⵎⵓⵇⵔⴰⵜⵉⵜ ⵉⵚⴰⵃⴰⵏ ⵉ ⵍⵎⵖⵔⵉⴱ ⵙⴳ 2011.

ⵜⵙⵓⵜⴳ ⵎⴰⵙⵙⴰ ⴱⵓⵄⵉⴷⴰ ⵜⵉⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵍⵍⴰⵏⵉⵏ ⵊⴰⵔ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴷ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ, ⵜⵙⴰⵡⵍ ⴼ ⵉⵎⵓⴽⴽⵏ ⵍⵍⴰⵏⵉⵏ ⴳ ⵜⵎⴰⵣⵉⵔⵜ ⵏⵏⵖ ⴳ ⵎⴰⴷ ⵉⵥⵍⵉⵏ ⵙ ⵓⵙⵕⵚⵓ ⵏ ⵜⴷⵉⵎⵓⵇⵔⴰⵟⵉⵜ ⴷ ⵓⵙⵎⵖⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵍⴻⵍⵍⵉ ⵏ ⵡⴰⵡⴰⵍ.

ⵜⵙⴷⴷⵉⴷ ⵓⵍⴰ ⴼ ⵓⵕⵥⵥⵓⵎ ⵏ ⵉⵎⵛⵡⴰⵕⵏ ⵅⴼ ⵓⵏⵇⵇⵉⵙ ⴰⴷ ⴰⵎⴰⵢⵏⵓ ⴰⴽⴷ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵜⴰⴱⵕⵍⴰⵎⵏⵉⵜ ⵉⵛⵛⴰⵔⵏ ⵊⴰⵔ ⵓⴱⵕⵍⴰⴰⵎⵏ ⴰⵎⵖⵔⵉⴱⵉ ⴷ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ.

ⵖⵎⴽ ⵍⵍⵉ ⵜⵙⵎⵏⵉⴷ ⵎⴰⵙⵙⴰ ⴱⵓⵄⵉⴷⴰ ⵉⵙⵉⵙⴼⵉⵡⵏ ⴼ ⵜⵙⵎⵉⴳⴰⵍ ⵏ ⵜⵙⵇⵇⵉⵎⵜ ⵏ ⴱⵕⵕⴰ ⴳ ⵓⵙⵇⵇⵉⵎ ⵏ ⵉⵎⵓⵔⴰ.

ⴳ ⵓⵎⵏⵉⴷ ⵏⵏⵙ, ⵜⵏⵏⴰ ⵜⵎⵏⴰⵇⵇⴰⵙⵜ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ, ⵎⴰⵙ ⵉⵟⵟⴰⴼ ⵍⵎⵖⵔⵉⴱ ⴰⴷⵖⴰⵔ ⵉⵥⵉⵍⵏ ⵙ ⵜⴷⵉⵏⴰⵎⵉⵜ ⵍⵍⵉ ⵙⴽⵔⵏ ⵉⴳⵎⴰⵎⴰⵏ ⵏ ⵓⴽⴰⴱⴰⵕ ⴰⵎⵖⵔⵉⴱⵉ ⴳ ⵜⵖⵉⵎⵉⵜⵉⵏ ⵜⵉⵎⴰⵜⴰⵢⵉⵏ ⴷ ⵜⵙⵎⵓⵏⴰⵢ ⵏ ⵜⵙⵇⵇⵉⵎⵉⵏ ⴷ ⵜⵙⵏⵜⴰⵢ ⵍⵍⵉ ⵙⴽⴰⵔⵏ.

ⵜⵉⵏⵉ ⵎⴰⵙ ⵉⴳⴰ ⵓⵔⵣⴰⴼ ⵏⵏⵙ ⵉ ⵍⵎⵖⵔⵉⴱ ⵉⵎⵉⵙⵙ ⵏ ⵓⵙⵓⵜⴳ ⵏ ⵓⵙⵓⵔⵙ ⵏ ⵓⵎⴷⵔⴰⵡ ⵉ ⵜⴷⵉⵎⵓⵇⵔⴰⵜⵉⵜ ⵍⵍⵉ ⵉⵚⴰⵃⴰⵏ ⵉ ⵍⵎⵖⵔⵉⴱ, ⴷ ⵓⵣⵣⵔⴰⵢ ⵏ ⵜⴼⵔⴽⵉⵡⵉⵏ ⵏ ⵜⵎⴷⵔⴰⵡⵜ ⴰⴷ ⴳ ⵉⵍⵍⴰ ⵓⵙⴽⵔ ⵏ ⴽⵕⴰⴹ ⵉⵏⵇⵇⵉⵙⵏ ⴳ 2013 ⴷ 2015 ⴷ 2019.

ⵉⵜⵜⵓⵙⵙⴰⵏ ⵎⴰⵙ ⵜⴼⴽⴰ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⵉ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴰⵙⵓⵔⵙ ⵏ ⵓⵎⴷⵔⴰⵡ ⵉ ⵜⴷⵉⵎⵓⵇⵔⴰⵟⵉⵜ ⵙⴳ 2011.