ⵜⴰⴳⵓⵔⵉ ⵏ ⵎⴰⵙⵙⴰ ⵅⴰⴷⵉⵊⴰ ⵣⵣⵓⵎⵉ, ⵜⴰⵎⴰⵔⵉⵜ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵕⵥⵥⵓⵎ ⵏ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⴼ: “ⵜⵉⵍⵉⵜ ⵏ ⵜⵎⵖⴰⵔⵉⵏ ⴳ ⵉⴱⵕⵍⴰⵎⴰⵏⵏ: ⵜⵉⵎⵙⴽⴰⵔ ⴷ ⵉⵎⵏⴰⴷⵏ”

ⵎⴰⵙⵙⴰ ⵜⴰⵎⵙⵇⵇⴰⴷⵜ ⵏ ⴽⴰⵏⴰⴹⴰ ⴳ ⵕⵕⴱⴰⵟ,

ⵎⴰⵙⵙⴰ ⴽⴰⵕⵓⵍⵉⵏ ⵏⵓⴽⵙ, ⵜⴰⴳⵎⴰⵎⵜ ⵏ ⵓⵙⵇⵇⵉⵎ ⴰⴱⵕⵉⵟⴰⵏⵉ ⵏ ⵉⴳⴷⵓⴷⵏ

ⵜⵉⵏⴳⴳⵯⴰ ⴷ ⵉⵏⴳⴳⵯⴰ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵉⴳⴰ ⵉⵢⵉ ⴰⴼⴼⵓⵔ ⴰⴷ ⵏⵕⵥⵎ ⵙ ⵉⵙⵎ ⵏ ⵓⵙⵇⵇⵉⵎ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵏⵎⵓⵇⵇⴰⵔ ⴰⴷ ⵖ ⵉⵍⵍⴰ ⵓⵎⴹⴰⴽⴰⵕ ⵏ ⵢⴰⵜ ⵜⵎⵓⴽⵔⵉⵙⵜ ⵜⴰⵏⴰⵎⵎⴰⵙⵜ ⴳ ⵡⴰⵎⵓⵏⵏ ⴰⵜⵔⴰⵔⵏ, ⵙⵍⴰⵡⴰⵏ ⴰⴽⴽⵯ ⴳ ⵜⴷⵉⵎⵓⵇⵔⴰⵟⵉⵢⵉⵏ ⵣⵣⵉⴳⵣⵏⵉⵏ. ⵜⴳⴰ ⵜⵜ ⵜⵉⵏ ⵓⵙⵉⵥⴹⵕ ⵏ ⵜⵎⵖⴰⵔⵉⵏ ⵃⵎⴰ ⴰⴷ ⵉⵍⵉⵏⵜ ⴳ ⵉⴱⵕⵍⴰⵎⴰⵏⵏ ⵏⴹⵎⵏ ⵜⴰⴳⵯⵏⵙⴰⵙⵜ ⵏⵏⵙⵜ ⴷ ⵢⵓⵙⴰⵏ ⴳ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ, ⴰⴷ ⵓⵔ ⵜⵉⴷⵔⵓⵙ ⴼ ⵜⵏⴳⴰⴷⴷⴰⵢⵜ ⴷ ⵉⵔⴳⴰⵣⵏ, ⴰⵢⵍⵍⵉ ⵉⴳⴰⵏ ⴰⴽⵛⵓⵎ ⴰⵎⵔⵙⵍⴰⵏ ⴷ ⵓⵙⵔⵜⴰⵏ ⵙ ⵢⵉⵙⴽⵉⵍ ⴳ ⵜⵉⵍⵉⵜ ⴳ ⵡⴰⵎⵎⴰⵙⵏ ⵏ ⵜⵖⵜⴰⵙⵜ ⵜⴰⵎⵣⵣⴳⴰⵔⵜ ⵜⴰⴳⴷⵓⴷⴰⵏⵜ ⴷ ⵢⵉⵙⴽⵉⵍ ⴰⴷⵎⵙⴰⵏ ⴷ ⵓⵏⴰⵎⵓⵏ.

ⴳ ⵜⵣⵡⵉⵔⵉ, ⵔⵉⵖ ⴰⴷ ⵙⵏⵉⵎⵎⵔⵖ ⵉⵎⴷⵔⴰⵡⵏ ⵏⵏⵖ ⵉⴳⵔⴰⵖⵍⴰⵏⵏ ⴳ ⵓⵙⵏⵎⴰⵍⴰ ⵏ ⵡⴰⵏⴰⵡ ⵏ ⵉⵏⵎⵓⵇⵇⴰⵔⵏ ⴰⴷ, ⵙⵍⴰⵡⴰⵏ ⴰⴽⴽⵯ ⵜⵉⵎⵔⵙⵍⵜ ⵏ ⵡⵉⵙⵜⵎⵉⵏⵙⵜⵔ ⵉ ⵜⴷⵉⵎⵓⵇⵔⴰⵟⵉⵜ, ⵜⴰⵎⵙⵇⵇⴰⴷⵜ ⵏ ⴽⴰⵏⴰⴹⴰ ⴷ ⵜⵎⵙⵇⵇⴰⴷⵜ ⵏ ⵜⴳⵍⴷⵉⵜ ⵏ ⵀⵓⵍⴰⵏⴹⴰ ⴳ ⵕⵕⴱⴰⵜ ⴼ ⵓⴷⵔⴰⵡ ⵏⵏⵙⵏ ⴳ ⵓⵙⵏⵎⴰⵍⴰ ⵏ ⵡⴰⵙⵙⴰ ⴰⴷ, ⴷ ⵜⵉⵍⵉⵜ ⴷⵉⴷⵏⵖ . ⴰⵙⵏⵉⵎⵎⵔ ⵉ ⵎⴰⵙⵙⴰ ⵜⴰⵎⵙⵇⵇⴰⴷⵜ ⵏ ⴽⴰⵏⴰⴹⴰ ⴳ ⵕⵕⴱⴰⵟ ⴷ ⵓⵙⵉⵔⴰ ⵏ ⵜⵎⵔⵙⵍⵜ ⵏ ⵡⵉⵙⵜⵎⵉⵏⵙⵜⵔ ⴳ ⵕⵕⴱⴰⵟ. ⴰⵔ ⵙⴱⵔⵔⴰⴽⵖ ⵙ ⵉⵙⵎ ⵏ ⵓⵏⵙⵙⵉⵅⴼ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵏⵎⵓⵇⵇⴰⵔ ⴰⴷ, ⵏⴻⵏⵏⵓⵔⵣⵖ ⴰⴷ ⴳⵉⵏⵜ ⵜⵡⵡⵓⵔⵉⵡⵉⵏ ⵏⵏⵙ ⵢⴰⵏ ⵓⴳⵣⵣⵓⵎ ⴳ ⵓⴱⵔⵉⴷ ⵏ ⵓⵙⴳⵓⴷⵉ ⵏ ⵉⵙⵡⵉⵏⴳⵉⵎⵏ ⴷ ⵜⵙⵓⵎⴰⵔ ⵍⵍⵉ ⵔⴰⴷ ⵢⴰⵡⵙ ⴳ ⵓⵙⴷⵓⵙ ⵏ ⵜⵉⵍⵉⵜ ⵏ ⵜⵎⵖⴰⵔⵉⵏ ⴳ ⵜⵎⴰⵙⴰⵢⵉⵏ ⵜⵉⴳⴷⵓⴷⴰⵏⵉⵏ ⴷ ⵜⵉⵏ ⵜⴳⵯⵏⵙⴰⵙⵜ ⴷ ⵜⵎⵣⵣⴳⴰⵔⵉⵏ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵜⵉⵏⴳⴳⵯⴰ ⴷ ⵉⵏⴳⴳⵯⴰ

ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⵉⵎⵓⴽⵏⵏ ⵅⴰⵜⵔⵏⵉⵏ ⵉ ⵢⵉⵙⴽⵉⵍ ⴷ ⵜⵏⴳⴰⴷⴷⴰⵢⵜ ⵏ ⵜⵎⵖⴰⵔⵉⵏ, ⵜⵎⵎⴰⵖ ⴼ ⵓⵙⴷⵙⵜⵔ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ, ⴰⵔ ⵉⵜⵜⵉⵏⵉ ⵓⵎⵏⵏⵉ 19 ⵙⴳ ⵓⴷⵓⵙⵜⵓⵔ ⵎⴰⵙ ⵟⵟⴰⴼⵏ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⵉⵣⵔⴼⴰⵏ ⴷ ⵜⴻⵍⵉⵍⵍⵉⵢⵉⵏ ⵜⵉⵖⵔⵎⴰⵏⵉⵏ ⴷ ⵜⵙⵔⵜⴰⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⴷ ⵜⴷⵍⵙⴰⵏⵉⵏ ⴷ ⵜⵡⵏⴰⴹⵉⵏ..., ⵉⵙⴰⵡⵍ ⵓⵍⴰ ⵎⴰⵙ ⵔⴰⴷ ⵉⵣⵣⵉⴳⵣ ⵓⵡⵏⴽ ⴳ ⵓⵙⴽⵔ ⵏ ⵢⵉⵙⴽⵉⵍ ⵊⴰⵔ ⵉⵔⴳⴰⵣⵏ ⴷ ⵜⵎⵖⴰⵔⵉⵏ, ⵉⵙⴰⵡⵍ ⵓⵍⴰ ⴼ ⵓⵙⴽⵔ ⵏ ⵜⴳⵔⴰⵡⵜ ⵏ ⵢⵉⵙⴽⵉⵔ ⴷ ⵓⵙⴱⴷⴷⵉ ⵏ ⴽⵓ ⴰⵏⴰⵡⵏ ⵏ ⵓⵏⵙⵓⵃⵢⵓ.

ⵕⵥⵎ ⵓⵎⵓⴽⵏ ⴰⴷⵙⵜⴰⵔ ⵜⴰⴷⵉⵏⴰⵎⵉⵜ ⵜⴰⵎⴰⵢⵏⵓⵜ ⴳ ⵓⵣⵣⵔⴰⴼ, ⴷ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴼ ⵡⴰⵏⴰⵡ ⴰⵏⴰⵎⵓⵏ, ⵍⵍⵉ ⵡⴰⵜⵜⵙⵏⵉⵏ ⵜⵉⵍⵉⵜ ⵏ ⵢⵉⵙⴽⵉⵍ ⴷ ⵜⵏⴳⴰⴷⴷⴰⵢⵜ ⴷ ⵓⵙⵉⵥⴹⵕ ⴰⴷⵎⵙⴰⵏ ⵏ ⵜⵎⵖⴰⵔⵉⵏ, ⵢⵉⵍⵉ ⴳ ⵢⵉⵅⴼ ⵏ ⵉⵎⵓⴽⵏⵏ ⵍⵍⴰⵏⵉⵏ ⵉ ⵚⴰⵃⴰ ⵏ ⵜⵎⵖⴰⵔⵉⵏ. ⵙ ⵓⵎⴷⵢⴰ, ⵉⵡⵙⵏ ⵉⵎⵓⴽⵏⵏ ⵏ ⵉⵙⵍⴳⵏⵏ ⵏ ⵉⵙⵜⴰⵢⵏ ⴳ 2002 ⴳ ⵜⵉⵍⵉⵜ ⵏ ⵜⵍⴳⴰⵎⵜ ⵜⴰⵏⴰⵎⵓⵔⵜ ⵉⵥⵍⵉⵏ ⵉ ⵜⵎⵖⴰⵔⵉⵏ, ⴰⵢⵍⵍⵉ ⵉⵣⵉⵢⵢⴷⵏ ⴰⵏⵛⴽⴽ ⵏ ⵜⵎⵖⴰⵔⵉⵏ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵙⴳ 5 ⴰⵔ 35 ⵏ ⵜⵎⵖⴰⵔⵜ ⴰⵢⵍⵍⵉ ⵉⴳⴰⵏ ⴳ ⵓⵣⵎⵣ ⴰⵏⵏ ⵢⴰⵜ ⵜⵎⵙⴰⵔⵜ ⵉⴼⴰⵡⵏ ⴳ ⵓⵙⵡⵉⵔ ⵏ ⵜⵉⵍⵜⵉ ⵏ ⵜⵎⵖⴰⵔⵉⵏ ⴳ ⵉⴱⵕⵍⴰⵎⴰⵏⵏ ⴳ ⵜⵙⴳⴰ ⵏ ⵉⴼⵔⵉⵇⵢⴰ ⴷ ⵍⵇⴱⵍⵜ ⵜⴰⵏⴰⵎⵎⴰⵙⵜ, ⴰⵢⵍⵍⵉ ⵉⵙⵙⵎⵖⵔⵏ ⵜⴰⵎⵙⴰⵔⵜ ⵏ ⵜⵎⵖⴰⵔⵉⵏ ⴳ ⵓⵎⴹⴰⴽⴰⵕ ⴰⴳⴷⵓⴷⴰⵏ ⴷ ⵜⵎⵔⵙⴰⵍ ⵏ ⵜⴳⵯⵏⵙⴰⵙⵜ ⴷ ⵓⵣⵣⴳⵉⵔ, ⵉⵙⵏⴼⵍ ⵓⵍⴰ ⴽⵉⴳⴰⵏ ⵏ ⵉⵙⵡⵉⵏⴳⵉⵎⵏ ⵉⵏⴰⵎⵓⵏⵏ ⴼ ⵜⵡⵡⵓⵔⵉ ⵏ ⵜⵎⵖⴰⵔⵉⵏ, ⵉⴳ ⴰⵎⴷⵢⴰ ⵉ ⵜⵎⵔⵙⴰⵍ ⵢⴰⴹⵏⵉⵏ ⵃⵎⴰ ⴰⴷ ⵙⵔⵙⵏⵜ ⵜⴰⵎⵙⴰⵔⵜ ⵏ ⵡⴰⵏⴰⵡ ⴰⵏⴰⵎⵓⵏ ⴳ ⵓⵚⴽⵓ ⵏⵏⵙ ⴷ ⵉⵙⵡⵓⴷⴷⵓⵜⵏ ⵏⵏⵙⵏⵜ.

ⵉⴳ ⵙⴳ ⵜⵉⵢⵢⴰⴼⵓⵜⵏ ⵏ ⵓⵎⵓⴽⵏ ⴰⴷ ⴰⵢⵍⵍⵉ ⵉⵜⵜⵓⵙⴽⴰⵔⵏ ⴳ ⵜⵉⵍⵉⵜ ⵏ ⵜⵎⵖⴰⵔⵉⵏ ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵍⴽⵎ ⵓⵏⵛⴽⴽ ⵏⵏⵙⵏⵜ 95 ⵏ ⵜⵎⵖⴰⵔⵜ ⴳ 395 ⴰⵢⵍⵍⵉ ⵉⴳⴰⵏ 24 %, ⵖⵎⴽ ⴰⵏⵏ ⵓⵍⴰ ⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⵜⵉⴷⵖⵔⴰⵏⵉⵏ ⴷ ⵜⵙⴳⴰⵡⴰⵏⵉⵏ ⴷ ⵜⵎⵏⴰⴷⵉⵏ, ⴷ ⵜⵏⴱⴰⴹⵜ ⴷ ⵜⵎⵔⵙⴰⵍ ⴷ ⵜⵎⵙⵙⵏⵜⴰⵢ ⵜⵉⴳⴷⵓⴷⴰⵏⵉⵏ

ⴷⴼⴼⵉⵔ ⵏ ⵓⵎⵓⴽⵏ ⴰⴷ ⴷ ⵎⴰⴷ ⴷⵉⴷⵙ ⵉⵣⴷⵉⵏ ⴷ ⵜⴷⵉⵏⴰⵎⵉⵢⵉⵏ ⵜⵉⵣⵣⵔⴰⴼⵉⵏ ⴷ ⵜⵎⵔⵙⴰⵍⵏⵉⵏ, ⴳⴰⵏⵉⵏ ⵉⵏⵄⴰⵕⵏ ⵏ ⵜⵎⵖⴰⵔⵉⵏ ⵜⵉⴱⵕⵍⴰⵎⴰⵏⵉⵢⵉⵏ, ⴷ ⵜⵎⵖⵏⴰⵙⵉⵏ ⴳ ⵉⴽⴰⴱⴰⵕⵏ ⵉⵙⵔⵜⴰⵏⵏ ⵟⵟⴰⴼⵏⵉⵏ ⵜⵉⵍⴰⵍⵜ ⵏⵏⵙⵏ, ⵉⵇⵇⴰⵏⴷ ⴰⴷ ⵏⵙⴰⵡⵍ ⴼ ⵡⴰⵜⵉⴳ ⴰⵏⴰⵎⵎⴰⵙ ⵏ ⵓⵙⵍⴳⵏ ⵏ ⵜⵓⵡⵊⴰ ⵍⵍⵉ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⴳ 2004 ⴷ ⵜⵓⵏⵥⵉⵥⵜ ⴷ ⵓⵙⵎⴰⵇⵇⵍ ⴷ ⵓⴼⵔⴰⴳ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵙ ⴰⴷ ⵜⵉⵄⵣⵣⵓ ⵕⴱⴱⵉ ⵍⵍⵉ ⵉⵎⵎⴰⵖⵏ ⴰⴷ ⴷ ⵉⴼⴼⵓⵖ ⵓⵙⵍⴳⵏ ⴰⴷ ⵙⴳ ⵓⴱⵕⵍⴰⵎⴰⵏ ⵍⵍⵉ ⴼⵍⵍⴰⵙ ⵉⵍⵍⴰ ⵓⵎⵙⴰⵙⴰ ⴷ ⵓⵎⴹⴰⴽⴰⵔ ⴳ ⵡⴰⵎⵓⵏ ⴳ ⵓⵙⴰⵜⵉ ⵏ ⵢⴰⵜ ⵜⵙⵇⵇⵉⵎⵜ ⵉⵥⵍⵉⵏ. ⵉⴳⴰ ⵓⵎⵓⴽⵏ ⴰⴷ ⴰⵎⵣⵡⴰⵔⵓ ⴳ ⵓⵣⵎⵣ ⴰⵏⵏ ⵡⴰⴷ ⵉⵣⵡⴰⵔⵏ ⴳ ⵜⵙⴳⴰ ⴰⴷ ⵙ  ⵎⴰⴷ ⴳⵉⵙ ⵉⵍⵍⴰⵏ ⴳ ⵉⵣⵔⴼⴰⵏ, ⵢⴰⵡⵉ ⴷ ⵜⴰⵎⴰⵙⴰⵢⵜ ⵉⵛⵛⴰⵔⵏ ⵊⴰⵔ ⵓⵔⴳⴰⵣ ⵊⴰⵔ ⵓⵔⴳⴰⵣ ⴷ ⵜⵎⵖⴰⵔⵜ ⴳ ⵓⵙⵡⵓⴷⴷⵓ ⵏ ⵜⵓⵡⵊⴰ ⴷ ⵜⵓⴷⵔⵜ ⵏⵏⵙ.

ⵉⵍⵍⴰ ⴷⴰⵔⵏⵖ ⵖ ⵍⵎⵖⵔⵉⴱ ⵡⴰⴷⴷⵓⵔ ⵙ ⵉⵎⵓⴽⵏⵏ ⵉⴷⵙⵜⴰⵔⵏ ⴷ ⵉⵣⵣⵔⴰⴼⵏ ⵉⵎⵣⵡⵓⵔⴰ ⴱⴷⴷⵏⵉⵏ ⴼ ⵓⵙⴷⵔⵓ ⴷ ⵜⵉⵏⵡⵉⵜ ⴷ ⵓⵎⵙⴰⵙⴰ ⵊⴰⵔ ⵉⴼⵔⴷⴰⵙ ⵏ ⵜⵎⵜⵜⵉ, ⴷ ⵓⵙⴳⵓⴷⵉ ⴷ ⵓⵣⴷⴰⵢ, ⴳⴰⵏ ⵉⴽⵛⵓⵎⵏ ⵉⵅⴰⵜⴰⵔⵏ ⴷ ⵉⵏⴰⵎⵎⴰⵙⵏ ⵍⵍⵉ ⴷ ⵉⵇⵇⴰⵏ ⴰⴷ ⵉⵍⵉⵏ ⴳ ⵉⵣⵣⵔⴰⴼⵏ ⵓⵇⵇⵔⵏⵉⵏ ⴰⵏⴰⵡ ⴰⵏⴰⵎⵓⵏ, ⴳ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵜⵉⵏⴰⵎⵓⵔⵉⵏ ⵜⵉⵏⵎⵏⴰⴹⵉⵏ ⴷ ⵜⵉⴷⵖⴰⵔⴰⵏⵉⵏ ⵙⵙⴽⵛⵎⵏⵉⵏ ⵜⵉⵎⵖⴰⵔⵉⵏ ⴳ ⵜⴳⵎⵉ, ⵜⵙⵙⵔⵅⵓ ⵜⵉⵍⵉⵜ ⵏⵏⵙⵏⵜ ⴳ ⵡⴰⵎⵎⴰⵙⵏ ⵏ ⵜⵖⵜⴰⵙⵜ. ⴳ ⵓⵎⵏⵉⴷ ⴰⴷ, ⴰⵔ ⴷ ⵏⵙⵙⴽⵯⵔⵜⵉ ⴰⵡⴰⵍ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵕⴱⴱⵉⴳ ⵉⵏⴰⵡ ⵏ ⵓⴷⴰⴱⵓ ⵏ ⵓⵙⴳⴳⵯⴰⵙ ⵏ 2022: ⵙⴳ ⵉⵎⵓⴽⵏⵏ ⵙⵜⴰⵡⵀⵎⵎⴰⵏⵉⵏ ⵍⵍⵉ ⵏⵙⴽⵔ, ⴰⵙⵓⴼⵖ ⵏ ⵓⵙⵍⴳⵏ ⵏ ⵜⵓⵡⵊⴰ, ⴰⵙⵖⵣⵏ ⵏ ⵓⴷⵓⵙⵜⵓⵔ ⵏ 2011, ⵍⵍⵉ ⵉⵙⵔⵙⵏ ⵉⵙⴽⵉⵍ ⵊⴰⵔ ⵜⵎⵖⴰⵔⵜ ⴷ ⵓⵔⴳⴰⵣ, ⴳ ⵉⵣⵔⴼⴰⵏ ⴷ ⵓⵛⵛⵉⵍⵏ, ⵉⵙⵔⵙ ⵉⵙⴽⵉⵍ ⵉⴳⴰⵏ ⴰⵡⵜⵜⴰⵙ ⵍⵍⵉ ⵉⵔⴰ ⵓⵡⴰⵏⴽ ⴰⴷ ⵜ ⵉⵍⴽⵎ.

ⵜⴰⵖⴰⵡⵙⴰ ⵖⵉⴷ, ⵓⵔ ⵉⴳⵉ ⴰⴷ ⵏⴼⴽ ⵉ ⵜⵎⵖⴰⵔⵉⵏ ⴽⵔⴰ ⵏ ⵉⵚⴰⵃⴰⵟⵏ ⴱⴰⵟⵍ, ⵎⴰⵛⵛ ⴰⴷ ⴰⵙⵏ ⵜ ⵏⴼⴽ ⵉⵣⵔⴼⴰⵏ ⵏⵏⵙⵏⵜ ⵓⵣⵔⵉⴼⵏ ⴷ ⵓⵍⴳⵉⵏⵏ. ⴳ ⵍⵎⵖⵔⵉⴱ ⵏ ⵡⴰⵙⵙ ⴰⴷ, ⵓⵔ ⵏⵓⴼⵉ ⴰⴷ ⵏⴽⴽⵙ ⵉ ⵜⵎⵖⴰⵔⵜ ⵉⵣⵔⴼⴰⵏ ⵏⵏⵙ.

ⵖⵉⴷ, ⴰⵔ ⵏⴰⵇⵔⴰ ⵉ ⵓⵙⵎⵀⵍ ⵏ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ ⵥⵍⵉⵏⵉⵏ ⵙ ⵉⵣⵔⴼⴰⵏ ⵏ ⵜⵓⵡⵊⴰ ⴷ ⵜⵎⵖⴰⵔⵜ, ⴷ ⵓⵙⵎⴰⵢⵏⵓ ⵏ ⵉⵎⴰⵙⵙⵏ ⴷ ⵉⵣⵣⵔⴰⴼⵏ ⵉⵏⴰⵎⵓⵔⵏ, ⵉ ⵓⵙⵎⵖⵔ ⵏ ⵓⵙⵓⵔⵙ ⵏⵏⵙ. ⵢⵉⵏⵉ ⴱⴰⴱ ⵏ ⵡⴰⴷⴷⵓⵔ: ⵉⵖ ⵉⴳⴰ ⵓⵙⵍⴳⵏ ⵏ ⵜⵓⵡⵊⴰ ⴰⵥⵎⴰⵥⵥⵍ ⵙ ⴷⴰⵜ, ⵀⴰⵜⵉ ⵓⵔ ⵙⵓⵍ ⵜⴳⵓⵎ, ⴰⵛⴽⵓ ⵜⵉⵔⵎⵉⵜ ⴰⵔ ⵜⵎⵎⴰⵍ ⵎⴰⵙ ⵍⵍⴰⵏⵜ ⴽⵉⴳⴰⵏ ⵏ ⵜⴱⴱⴰⵢⴹⴰⵕⵉⵏ ⴷⴰⵜ ⵏ ⵓⵙⵎⴰⴷ ⵏ ⵜⵡⴰⴷⴰ ⴰⴷ, ⴱⴷⴷⵏⵜ ⴷⴰⵜ ⵏ ⵓⵙⴽⵔ ⵏ ⵉⵡⵜⵜⴰⵙⵏ ⵏⵏⵙ. ⵉⵙⵎⴷ ⵡⴰⵡⴰⵍ ⵏ ⴱⴰⴱ ⵏ ⵡⴰⴷⴷⵓⵔ.

ⴰⵔ ⵜⵜⵕⵥⵓⵎⵏ ⵉⵙⵡⴰⵍⴰⵢⵏ ⴰⴷ ⵉⴳⵍⴷⴰⵏⵏ ⵉⵎⵏⴰⴷⵏ ⵅⴰⵜⵔⵏⵉⵏ ⴷ ⵜⵇⵇⴰⵏ ⴷ ⵜⵣⵣⵉⴳⵣⵜ ⴳ ⵓⵎⵏⴰⴷ ⵏⵏⵙ ⴰⵏⴼⴳⴰⵏ ⴷ ⵓⴷⵉⵎⵓⵇⵔⴰⵟⵉ, ⵔⴰⴷ ⵢⵉⵍⵉ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⴳⵯⵏⵙ ⵏ ⵓⵙⵡⴰⵍⴰ ⴰⴷ.

ⵎⴽ ⵏⵏⴰ ⴳⴰⵏ ⵉⵣⵣⵔⴰⴼⵏ ⴷ ⵉⵍⵓⴳⵏⵏ ⴷ ⵜⵎⵙⴽⴰⵔ ⵜⵉⵎⵣⵣⴳⴰⵔⵉⵏ ⴷ ⵜⵙⵔⵜⴰⵏⵉⵏ, ⵀⴰⵜⵉ ⵓⵔ ⴳⵓⵎⵏⵜ ⵃⵎⴰ ⴰⴷ ⵏⵍⴽⵎ ⵜⴰⵏⴳⴰⴷⴷⴰⵢⵜ ⴷ ⵢⵉⵙⴽⵉⵍ, ⵉⴳⴰ ⵍⵃⴰⵍ ⵉⵙ ⵢⵓⵎⵥ ⵡⴰⵎⵓⵏ ⵜⴰⴷⵍⵙⴰ ⵏ ⵢⵉⵙⴽⵉⵍ, ⴷ ⵓⵙⵓⵜⴳ ⵏⵏⵙ ⵏ ⵜⵉⵍⴰⵍⵜ ⵏ ⵜⵎⵖⴰⵔⵉⵏ ⴳ ⵜⴳⵎⵉ, ⴳ ⵢⵉⴳⵔ ⴰⵎⴰⵜⴰⵢ ⵖⵎⴽ ⴰⵏⵏ ⵓⵍⴰ ⴳ ⵜⵓⵡⵊⴰ. ⵉⵇⵇⴰⵏⴷ ⴰⴷ ⵏⵙⵔⵙ ⵜⴰⵏⴰⵥⴰⵕⵜ ⵜⴰⴷⵍⵙⴰⵏⵜ, ⵜⴰⵏⴰⵥⴰⵔⵜ ⵏ ⵓⵙⵏⴼⵍ ⵏ ⵉⵙⵡⵉⵏⴳⵉⵎⵏ ⵏ ⵡⴰⵎⵓⵏ ⵉ ⵜⵎⵖⴰⵔⵉⵏ ⵙ ⵜⵖⴰⵔⴰⵙⵜ ⵉⵣⵉⵍⵏ ⴳ ⵓⴳⵯⵏⵙ ⵏ ⵜⵡⵡⵓⵔⵉ ⵜⴰⵙⵔⵜⴰⵏⵜ ⴷ ⵜⵎⵔⵙⵍⴰⵏⵜ, ⴳ ⵓⴳⵏⵙ ⵏ ⵓⵎⴹⴰⴽⴰⵕ ⴰⴳⴷⵓⴷⴰⵏ, ⴳ ⵓⵙⵏⵖⵎⵙ, ⴳ ⵓⴱⵕⵍⴰⵎⴰⵏ, ⴳ ⵜⵙⴷⴰⵡⵉⵢⵉⵏ ⴷ ⵉⴽⴰⴱⴰⵕⵏ ⴷ ⵜⵎⵙⵎⵓⵏⵉⵏ.

ⴳ ⵓⵎⵏⵉⴷ ⵢⴰⴹⵏⵉⵏ, ⵉⵇⵇⴰⵏ ⴷ ⵓⵙⵙⴰⵔⵓ ⴳ ⵓⵙⵙⵍⵎⴷ ⴷ ⵓⵙⴳⵎⵉ ⵉ ⵚⴰⵃⴰ ⵏ ⵜⵎⵖⴰⵔⵉⵏ ⵃⵎⴰ ⴰⴷ ⵙⴽⵔⵏⵜ ⴰⵙⵎⵖⵔ ⴰⵏⴰⵎⵓⵏ  ⵍⵍⵉ ⵔⴰⴷ ⵜⵏⵜ ⵢⴰⵍⵍ ⵙ ⵜⵎⴰⵙⴰⵢⵉⵏ ⵜⵉⵎⵣⵣⴳⴰⵔⵉⵏ ⴷ ⵜⵎⵙⵙⵏⵜⴰⵢ ⴷ ⵜⵎⵔⵙⴰⵍ.

ⵉⵇⵇⴰⵏⴷ ⵓⵍⴰ ⴰⴷ ⵏⵙⵔⵙ ⵜⴰⵎⵙⴰⵔⵜ ⵏ ⵜⵎⵖⴰⵔⵜ ⴳ ⵓⴳⵯⵏⵙ ⵏ ⴽⵔⴰⵢⴳⴰⵜ ⵜⴰⵙⵔⵜⵉⵜ ⵜⴰⴳⴷⵓⴷⴰⵏⵜ, ⵍⵍⵉⵖ ⵉⴳⴰ ⵓⵙⵎⵖⵔ ⵏ ⵉⵙⵓⵔⵙⵏ ⵏ ⵜⵎⵖⴰⵔⵜ ⴷ ⴰⵙⵖⵓⴷⵓ ⵏ ⵜⵖⵔⴰⴷ ⵏⵏⵙ, ⵜⴻⵟⵟⴼ ⵉⵖⴱⵓⵍⴰ ⵏ ⵜⵖⵔⴰⴷ ⴷ ⵜⵓⴷⵔⵜ ⵜⴰⵏⵙⵉⵎⴰⵏⵜ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵜⵉⵏⴳⴳⵯⴰ ⴷ ⵉⵏⴳⴳⵯⴰ,

ⴰⵢⵍⵍⵉ ⵙⴽⵔⵏⵜ ⵜⵎⵖⴰⵔⵉⵏ ⴳ ⴽⵉⴳⴰⵏ ⵏ ⵡⴰⵎⵓⵏⵏ ⴳ ⵓⵎⵎⵉⵥⵏ ⴷ ⵉⵣⵔⴼⴰⵏ, ⵓⵔ ⵉⵜⵜⵓⵙⴽⴰⵔ ⵖⴰⵔ ⵙ ⵢⴰⵜ ⵜⴽⴽⵍⵉⵜ, ⵉⵙⵖⴰⵡⵙⴰ ⵙ ⵓⵙⴳⵓⴷⵉ ⵏ ⵡⴰⵎⵓⵏⵏ ⴰⵏⵏ ⵉ ⵉⵙⴳⴱⴰⵔⵏ ⴷ ⵓⵚⴽⵓ ⴰⵎⵔⵙⵍⴰⵏ ⴷ ⵉⵎⵓⵜⵜⵓⵢⵏ ⵍⵍⵉ ⵜⵜⵓⵙⴽⴰⵔⵏⵉⵏ ⴳ ⵉⵙⵡⵉⵔⵏ ⴰⴷⵉⵎⵓⵇⵔⴰⵟⵉ ⴷ ⵓⴷⵎⵙⴰⵏ ⴷ ⵓⵏⴰⵎⵓⵏ ⴷ ⵜⴻⵜⵉⴽⵏⵓⵍⵓⵊⵉⵜ ⴷ ⵓⵙⵙⵍⵎⴷ...ⵉⵙⵖⴰⵡⵙⴰ ⵎⴰⵢⴰ ⵏⵏ ⵙ ⵜⵥⴹⴰⵕⵉⵏ ⵉⵡⵙⵏⵉⵏ ⴳ ⵓⵚⴽⵓ ⵏ ⵓⵎⵛⴰⴱⴱⴰⴽ ⴷ ⵓⵙⵉⴷⴼ ⴰⵏⴰⵎⵏ, ⵜⴳ ⵜⵎⵖⴰⵔⵜ ⴳ ⵓⴳⵯⵏⵙ ⴰⵏⵏ, ⵉⵣⴷⵉ ⵓⵙⵎⵖⵔ ⴰⴷ ⵙ ⵓⵏⵛⴽ ⵏ ⵉⵙⴳⴱⴰⵔⵏ ⵉⵡⵙⵏⵉⵏ ⴳ ⵓⵚⴰⵃⴰ ⵏ ⴽⵓⵢⴰⵏ.

ⵏⴽⴽⵏⵉ ⴳ ⵍⵎⵖⵔⵉⴱ, ⵏⵙⵓⵜⴳ ⵉⵎⵓⵜⵜⵓⵢⵏ ⵜⵜⴰⵡⵙⴽⴰⵔⵏⵉⵏ ⴷ ⵜⴳⵎⵉ ⵉⵍⵍⴰⵏ ⴷ ⵜⵣⵣⵉⴳⵣⵜ ⵜⴰⴷⵉⵎⵓⵇⵔⴰⵟⵉⵜ ⴷ ⵓⵚⴽⵓ ⴰⵎⵔⵙⵍⴰⵏ, ⵉⵙⵖⴰⵡⵙⴰ ⴰⵙⵉⵥⴹⵕ ⵢⵓⵎⴰⵏ ⵏ ⵜⵎⵖⴰⵔⵉⵏ ⴰⴷⵎⵙⴰⵏ ⴷ ⵓⵙⵔⵜⴰⵏ ⴷ ⵓⵏⴰⵎⵓⵏ ⵙ ⵜⵣⵣⵉⴳⵣⵜ ⵏ ⵓⵎⵓⴽⵏ ⵙ ⵓⵙⵎⴰⵇⵇⵍ ⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵍⵍⵉ ⵉⵙⴳⴰⴷⴷⴰⵏ ⵜⴰⵎⵖⴰⵔⵜ ⵉⴼⴽ ⴰⵙ ⴰⴷⵖⴰⵔ ⴷ ⵜⵉⵍⴰⵍⵜ ⵏⵏⵙ. ⵉⵇⵇⴰⵏ ⴷ ⴰⴷ ⵜⵉⵍⵉ ⵜⵎⵖⴰⵔⵜ ⴳ ⵓⴳⵯⵏⵙⴰ ⵏ ⵜⴷⵉⵏⴰⵎⵉⵢⵉⵏ ⵏ ⵜⴳⵎⵉ ⴷ ⵓⵙⴷⵓⵙ ⵏ ⴷⵖⴰⵔ ⵏⵏⵙ ⴳ ⵡⴰⵎⵎⴰⵙ ⵏ ⵜⵖⵜⴰⵙⵜ.

ⵓⵔ ⴳⵉⵙ ⵜⵓⵔⴷⴰ ⵎⴰⵙⴷ ⵉⵎⵙⵜⴳⴳⴰⵔⵏ ⵓⴷⴷⵉⵔⵏ ⴳ ⵡⴰⵎⵓⵏ, ⴳⵉⵙⵏ ⵉⴼⵔⴷⴰⵙ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ, ⵎⵓⵏⵏ ⴼ ⵜⵣⵣⵉⴳⵣⵔ ⵏ ⵉⵎⵓⴽⵏⵏ ⴳ ⵓⴱⵔⵉⴷ ⵏ ⵢⵉⵙⴽⵉⵍ. ⴳ ⵓⵎⵏⵉⴷ ⴰⴷ, ⴷⴰ ⵏⵙⵓⵜⴳ ⵛⵉⴳⴰⵏ ⵜⴰⴷⵉⵏⴰⵎⵉⵜ ⵏ ⵡⴰⵎⵓⵏ ⴰⵖⵔⵎⴰⵏ ⵏ ⵜⵎⵖⴰⵔⵉⵏ ⴷ ⵓⵣⵔⴼⴰⵏ, ⵉⵟⵟⴰⴼⵏ ⵜⵉⴹⴰⴼ ⵉ ⵉⵣⵔⴼⴰⵏ ⵏ ⵓⴼⴳⴰⵏ ⵉⵙⵔⵙⵏ ⵜⵓⵜⵔⴰ ⵏ ⵓⵎⵓⴽⵏ ⴳ ⵜⵎⵣⵡⵓⵔⴰ ⵏ ⵜⵓⵜⵔⴰⵡⵉⵏ ⵏⵏⵙ.

ⵔⴰⴷ ⵉⵙⵖⵏⵓ ⵓⵎⴹⴰⴽⴰⵕ ⵏ ⵡⴰⵙⵙ ⴰⴷ ⴳ ⵓⵙⴰⵜⵉ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴰⴱⵔⵉⴷ ⴰⴷ ⵏ ⵓⵎⵓⴽⵏ ⵉⴱⵙⵓⵙⵏ ⴳ ⵉⵡⵙⵏⵜ ⵜⵎⵖⴰⵔⵉⵏ ⵜⵉⵎⵣⵡⵓⵔⴰ. ⵔⴰⴷ ⵉ ⵙⴳ ⵚⴰⵃⴰ ⴰⴷ ⵏⵙⵙⵏ ⵜⵉⵎⵙⴽⴰⵔ ⵏ ⵜⵎⵉⵣⴰⵔ ⵢⴰⴹⵏⵉⵏ ⵜⵉⴷⵉⵎⵓⵇⵔⴰⵟⵉⵢⵉⵏ  ⵙ ⵓⵎⵏⴰⴹ ⴷ ⵜⵎⵥⵍⴰⵢ ⵏ ⴽⵔⴰⵢⴳⴰⵜ ⴰⵎⵓⵏ. ⴳ ⵓⵎⵏⴰⴹ ⴰⴷ, ⵔⴰⴷ ⵉⴼⴰⵍⴽⵉ ⴰⴷ ⵏⵣⴷⵉ ⵜⵉⵣⴷⴰⵢⵉⵏ ⵏⵏⵖ ⴷ ⵜⵉⴱⵕⵍⴰⵎⴰⵏⵉⵢⵉⵏ ⴳ ⵓⵙⴰⵜⵉ ⵏ ⵓⵏⵎⵓⵇⵇⴰⵔ ⵉⵙⵎⵓⵏⵏ ⵜⵉⵎⵖⴰⵔⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵎⵖⵔⵉⴱⵉⵢⵉⵏ ⴷ ⵜⵏⴳⴳⵯⴰ ⵏⵏⵙⵏⵜ ⴳ ⵜⵎⵉⵣⴰⵔ ⵜⵉⵎⴷⴷⵓⴽⴽⵯⴰⵍ ⴰⵎ ⵜⵉⵎⵉⵣⴰⵔ ⵍⵍⴰⵏⵉⵏ ⴳ ⵓⵏⵎⵓⵇⵇⴰⵔ ⵏ ⵡⴰⵙⵙ ⴰⴷ, ⵜⴰⴳⵍⴷⵉⵜ ⵉⵎⵓⵏⵏ ⴷ ⴽⴰⵏⴰⴹⴰ ⴷ ⵜⴳⵍⴷⵉⵜ ⵏ ⵀⵓⵍⴰⵏⴹⴰ ⴷ ⵉⵡⴰⵏⴽⵏ ⵢⴰⴹⵏⵉⵏ ⵉⵎⴷⴷⵓⴽⴽⵯⴰⵍ ⵙⴳ ⵓⵕⵓⴱⴱⴰ.

ⵜⴰⵏⵎⵎⵉⵔⵜ ⴼ ⵜⵉⵍⵉⵜ ⵏⵏⵓⵏⵜ, ⴰⵢⵍⵉ ⵢⵉⵡⵙⵏ ⴳ ⵓⵙⵖⵏⵓ ⵏ ⵓⵎⴹⴰⴽⴰⵔ ⵏ ⵡⴰⵙⵙ ⴰⴷ, ⵜⴰⵏⵎⵎⵉⵔⵜ ⵉ ⵉⵎⵓⵣⴰⵢⵏ  ⵍⵍⵉ ⵙⵓⵊⴰⴷⵏⵉⵏ ⵜⵉⵜⴳⴰⵔⵉⵏ ⵏ ⵓⵎⴹⴰⴽⴰⵕ ⵍⵍⵉ ⵔⴰⴷ ⵉⵙⵎⵖⵔ ⵜⵉⵎⵙⴽⴰⵔ ⵏⵏⵖ.

ⵜⴰⵏⵎⵎⵉⵔⵜ ⴼ ⵓⵙⵙⴼⵍⴷ