ⴰⴱⵕⵍⴰⵎⴰⵏ ⴰⴼⵔⵉⵇⵉ: ⴽⵕⴰⴹ ⵉⵙⵇⵙⵉⵜⵏ ⵉ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ

ⵉⵙⵎⴰⵢⵏⵓ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵜⵓⵚⴽⵉⵡⵉⵏ ⵏⵏⵙ ⴳ ⵡⴰⵢⵢⵓⵔ ⵏ ⵢⵓⵏⵢⵓ ⵉⵣⵔⵉⵏ, ⵉⵙⴱⴷⴷ ⵙⵉⵏ ⵓⵙⴳⴳⵯⴰⵙ ⵏ ⵓⵖⴰⵎⴰ ⴰⵎⵔⵙⵍⴰⵏ ⵍⵍⵉ ⵉⵙⴽⵔ ⵓⴱⴰⵢⵢⵓⵕ. ⴳ ⵓⵎⵙⴰⵡⴰⵍ ⴰⴷ ⴰⴽⴷ ⵍⴰⵎⴰⴱ, ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵜⵣⴷⴰⵢⵜ ⵏ ⵍⵎⵖⵔⵉⴱ ⴰⴽⴷ ⵜⵉⵏⴰⵥⴰⵕⵉⵏ ⵜⵉⵎⴰⵢⵏⵓⵜⵉⵏ ⵍⵍⵉ ⵍⵍⴰⵏⵉⵏ ⵎⵏⵉⴷ ⵏ ⵜⵎⵔⵙⵍⵜ ⴰⴷ ⵜⴰⴼⵔⵉⵇⵉⵜ. ⵍⵍⵉⵖ ⵉⴷⵔⵓ ⴳ ⵓⴳⵔⴰⵡ ⵡⵉⵙ 11 ⵏ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⴷ ⵉⵏⵎⵏⴰⴹⵏ ⵉⵍⵍⴰⵏ ⴳ ⵜⵖⵔⵎⵜ ⵏ ⵎⵉⴷⵔⴰⵏⴷ ⴳ ⵉⴼⴼⵓⵙ ⵏ ⵉⴼⵔⵉⵇⵢⴰ.

1- ⵎⴰⴷ ⵉⴳⴰⵏ ⵜⵉⵍⴰⵍⵜ ⵏ ⵍⵎⵖⵔⵉⴱ ⴳ ⵓⵙⵎⴰⵢⵏⵓ ⵏ ⵜⵓⵚⴽⵉⵡⵉⵏ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ?

ⵉⴷⵔⵓ ⵍⵎⵖⵔⵉⴱ ⵖ ⵜⵉⴽⴽⵍⵉⵜ ⵜⴰⵎⵣⵡⴰⵔⵓⵜ ⴳ ⵓⴳⵔⴰⵡ ⴰⵙⴳⴳⵯⵙⴰⵏ ⵏ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⴷ ⵉⵏⵎⵏⴰⴹⵏ ⵉⴼⵔⵉⵇⵉⵢⵏ, ⵍⵍⵉ ⵉⵎⴹⴰⴽⴰⵕⵏ ⴼ ⵉⵙⵏⵜⵍⵏ ⵣⴷⵉⵏⵉⵏ ⴷ ⵜⵏⴼⵔⵓⵜ ⵏ ⵓⵜⵛⵓ ⴷ ⵓⵙⵎⵔⵙ ⵉⴳⴳⵓⵜⵏ ⵏ ⵉⵙⵓⴳⴰⵎ ⵉⴳⴰⵎⴰⵏⵏ ⴷ ⵓⵖⵓⵍ ⴰⴷⵎⵙⴰⵏ ⴷⴼⴼⵉⵔ ⵏ ⴽⵓⴼⵉⴷ 19.

ⵉⵇⵇⴰⵏ ⴷ ⴼ ⵜⴳⵍⴷⵉⵜ ⴷ ⵓⴱⵕⵍⴰⵎⴰⵏ ⴰⴼⵔⵉⵇⵉ ⴰⴷ ⵙⵡⵓⵔⵉⵏ ⵃⵎⴰ ⴰⴷ ⵍⴽⵎⵏ ⵉⵡⵜⵜⴰⵙⵏ ⵍⵍⵉ ⵜⵜⵓⵙⵔⴰⵙⵏⵉⵏ. ⵖ ⵉⵍⵍⴰ ⵓⵣⵣⵔⴰⵢ ⵏ ⵓⴳⵔⴰⵡ ⵏ ⵜⵏⵏⵓⴱⴹⴰ ⴷ ⵓⵙⵍⴳⵏ ⴰⴳⵯⵏⵙⴰⵏ, ⵃⵎⴰ ⴰⴷ ⵜⵉⵍⵉ ⵜⵉⵔⵡⵉ ⴷ ⵜⵏⵏⵓⴱⴹⴰ ⵉⵥⵉⵍⵏ ⴳ ⵜⵎⵔⵙⵍⴰⵜ ⴰⴷ.

ⵉⴳⴰ ⵡⴰⵡⵜⵜⴰⵙ ⴰⴷ ⵏⵙⴼⵍ ⴰⴱⵕⵍⴰⵎⴰⵏ ⴰⴼⵔⵉⵇⵉ ⵙ ⵢⴰⵜ ⵜⵎⵔⵙⵍⵜ ⵍⵍⵉ ⵔⴰⴷ ⵢⴰⵡⵙ ⴳ ⵜⵣⵣⵉⴳⵣⵜ ⵏ ⵓⵎⵏⵥⴰⵡ ⵉⴹⵎⵏ ⵓⵍⴰ ⴰⴹⴼⵕ ⵏ ⵉⵙⴰⵡⵔⵓⵏ ⵏ ⵓⵚⴽⵓ ⴳ ⵉⴼⵔⵉⵇⵢⴰ.

ⵉⴳⴰ ⴳ ⵜⵣⵡⵉⵔⵉ, ⴰⴷ ⵢⵉⵍⵉ ⵉⵙⵏⴼⵍ ⵏ ⵉⴷⵖⴰⵔⵏ ⵏ ⵜⵎⴰⵙⴰⵢⵜ ⵃⵎⴰ ⴰⴷ ⵢⵉⵍⵉ ⵓⵎⵢⴰⵙ ⵊⴰⵔ ⵉⴳⵏⵙⴰⵙⵏ ⵏ ⵙⵎⵎⵓⵙⵜ ⵜⵙⴳⴳⵉⵡⵉⵏ ⴳ ⵉⴼⵔⵉⵇⵢⴰ.

ⴰⵙⵏⴼⵎ ⵏ ⵜⵎⵢⴰⵇⵇⴰⵏⵜ ⵏ ⵎⴰⵍⴰⴱⵓ ⵍⵍⵉ ⵢⴰⴽⴽⴰⵏ ⵜⵉⵎⵥⵍⴰⵢ ⴳⴳⵓⵜⵏⵉⵏ ⵉ ⵓⴱⵕⵍⴰⵎⴰⵏ ⴰⴼⵔⵉⵇⵉ, ⵉⴳⴰ ⵙⴳ ⵉⵅⵎⵎⵉⵎⵏ ⵍⵍⵉⵖ ⵔⴰⴷ ⵢⴰⵡⵙ ⵍⵎⵖⵔⵉⴱ ⴰⴽⴷ ⵉⵎⵙⵜⴳⴳⴰⵔⵏ ⵉⴼⵔⵉⵇⵉⵢⵏ.

ⵜⴷⵓⵙ ⵜⵉⵍⵉⵜ ⵏ ⵎⵖⵔⵉⴱ ⴳ ⵜⵓⵚⴽⵉⵡⵉⵏ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ, ⵍⵍⵉⵖ ⵉⵜⵜⵓⵙⵜⴰⵢ ⴳ ⵡⴰⵢⵢⵓⵔ ⵏ ⵢⵓⵏⵢⵓ ⵉⵣⵔⵉⵏ ⴳ ⵜⵏⵙⵙⵉⵅⵜ ⵏ ⵓⴳⵎⴰⵎ ⵉⵥⵍⵉⵏ ⵙ ⵉⵄⵔⵔⵉⵎⵏ ⵖ ⵜⵍⵍⴰ ⵜⵎⴰⵔⵉⵜ ⵎⴰⵙⵙⴰ ⵍⴰⵢⵍⴰ ⴷⴰⵀⵉ ⵙⴳ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ ⴷ ⵜⵎⴰⵔⵉⵜ ⵙⴳ ⵜⵎⵏⴰⴹⵜ ⵏ ⵍⵄⵢⵓⵏ ⵙⴰⵇⵢⴰ ⵎⵀⵎⵕⴰ.

ⵖⵎⴽ ⵍⵍⵉ ⵜⴳⴰ ⵜⴳⵍⴷⵉⵜ ⴰⵏⴰⵡ ⴰⴷⵉⵎⵓⵇⵔⴰⵟⵉ ⵍⵍⵉ ⴱⴰⵀⵔⴰ ⵉⵣⵣⵉⴳⵣⵏ ⴳ ⵉⴼⵔⵉⵇⵢⴰ, ⵜⵓⵊⴰⴷ ⴰⴷ ⵜⴷⵔⵓ ⵜⵉⵎⵙⴽⴰⵔ ⵏⵏⵙ ⵜⵉⴷⵉⵎⵓⵇⵔⴰⵟⵉⵢⵉⵏ ⴷ ⵡⴰⵜⵉⴳⵏ ⵏⵏⵙ ⴰⴽⴷ ⵉⵏⴳⵎⴰⵎⵏ ⵢⴰⴹⵏⵉⵏ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ.

ⵉⵇⵇⴰⵏ ⴰⵖ ⴷ ⴰⴷ ⵏⵙⵡⵓⵔⵉ ⵉ ⵓⵚⴽⵓ ⵏ ⵉⵎⴰⵍ ⵏ ⵓⵎⵏⵥⴰⵡ ⵙ ⵜⵖⴰⵔⴰⵙⵜ ⵉⵛⵛⴰⵔⵏ, ⵉⵖ ⵓⵔ ⵏⵔⵉ ⵔⴰⴷ ⴱⴷⴷⴰ ⵏⵖⴰⵎⴰ ⵏⴰⴳⴳⵓⴳ ⴼ ⵜⵖⵜⴰⵙⵉⵏ ⵜⵉⵅⴰⵜⴰⵔⵉⵏ ⵀⵎⵎⴰⵏⵉⵏ ⴰⵎⵏⵥⴰⵡ ⵏⵏⵖ.

2 - ⵎⴰⴷ ⵉⴳⴰⵏ ⵜⵉⵍⴰⵍ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵍⵍⵉ ⵉⴳⴰⵏ ⵢⴰⵜ ⵜⴰⵎⵔⵙⵍⵜ ⵜⴰⵣⵣⵔⴰⴼⵜ ⴳ ⵓⵎⵏⵉⴷ ⵏ ⵓⵙⵎⵖⵔ ⵏ ⵜⵡⵡⵓⵔⵉ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ?

ⵉⴳⴰ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵢⴰⵜ ⵜⵎⵔⵙⵍⵜ ⵜⴰⵣⵣⵔⴰⴼⵜ ⵍⵍⵉ ⵉⵜⵜⵙⵎⴰⴷⵏ ⵜⴰⵡⵡⵓⵔ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ. ⴰⵔ ⵙⴰⵡⴰⵍ ⵉⵎⵓⵔⴰ ⵉⴼⵔⵉⵇⵉⵢⵏ ⴼ ⵉⵅⵎⵎⴻⵎⵏ ⴷ ⵉⵏⴰⵔⵓⵣⵏ ⵏ ⵉⵎⴰⴷⴰⵏⵏ ⵉⴼⵔⵉⵇⵉⵢⵏ ⴳ ⵓⴳⵏⵙ ⵏ ⵓⵙⵖⵉⵎ ⴰⴷ ⵜⵜⵓⴼⴽⵉⵏ ⵉⴼⵙⵙⴰⵢⵏ ⴷⵓⵙⴰⵏⵉⵏ.

ⴳ ⵓⵎⵏⵉⴷ ⵢⴰⴹⵏⵉⵏ, ⴽⵓ ⵜⴰⵏⴱⴰⴹⵜ ⵜⵙⵖⴰⵡⵙⴰ ⵙ ⵜⵏⴱⴰⴹⵜ ⵉⴳⴰⵏ ⵎⴳⴰⵍ ⵏⵏⵙ. ⵉⴳⵎⴰⵎⵏ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ ⵙⵖⴰⵡⵙⴰⵏ ⵙ ⵓⴱⵕⵍⴰⵎⴰⵏ ⴰⴼⵔⵉⵇⵉ, ⵎⴽ ⵏⵉⵜ ⵉⵍⵍⴰⵏ ⴳ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ. ⵉⵇⵇⴰⵏ ⴷ ⴰⴷ ⵉⵙⴽⵔ ⵓⴱⵕⵍⴰⵎⴰⵏⴰ ⴼⵔⵉⵇⵉ ⵜⴰⵡⵡⵓⵔⵉ ⵏⵏⵙ ⴷ ⵜⴰ,ⴱⴰⴹⵜ ⵜⴰⵣⵣⵔⴰⴼⵜ ⴳ ⵓⵙⵖⵣⵏ ⴷ ⵜⴰⴳⵯⵉⵜ ⴷ ⵓⵙⵖⵓⴷⵓ ⴷ ⵜⵉⴹⴰⴼ ⴷ ⵓⵣⵣⵔⴰⵢ ⵏ ⵉⵙⵍⴳⵏⵏ ⵀⵎⵎⴰⵏⵉⵏ ⵉⵎⴰⵍ ⵏ ⵉⴼⵔⵉⵇⵢⴰ.

ⵜⵥⴹⴰⵕ ⵜⴰⵎⵓⵏⵜ ⵜⴰⴼⵔⵉⵇⵉⵜ ⴷ ⵓⴱⵕⵍⴰⵎⴰⵏⴰ ⴼⵔⵉⵇⵉ ⴰⴷ ⵣⵣⵉⴳⵣⵏ ⵙ ⴷⴰⵜ ⵉ ⵚⴰⵃⴰ ⵏ ⵜⴳⵎⵉ ⵏ ⵓⵎⵏⵥⴰⵡ.

3- ⵎⴰⴷ ⵉⴳⴰⵏ ⵜⵉⵍⴰⵍⵜ ⵏ ⵍⵎⵖⵔⵉⴱ ⴳ ⵜⴳⵎⵉ ⵏ ⵉⴼⵔⵉⵇⵢⴰ?

ⵉⴳⴰ ⵍⵎⵖⵔⵉⴱ ⴰⵏⴰⵡ ⵏ ⵜⴳⵎⵉ ⴷ ⵓⵔⴳⴳⵉⴳ ⴰⵙⵔⵜⴰⵏ ⴷ ⵓⵏⴰⵎⵓⵏ. ⵜⵉⵡⵙ ⵜⴳⵍⴷⵉⵜ ⵙ ⵜⵖⴰⵔⴰⵙⵜ ⵉⵙⵎⴷⵏ, ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵙ ⴰⴷ ⵜ ⵉⵏⵚⵕ ⵕⴱⴱⵉ, ⴳ ⵜⴳⵎⵉ ⵏ ⵓⵎⵥⴰⵡ ⵜⴷⵔⵓ ⵓⵍⴰ ⵜⵉⵔⵎⵉⵜ ⵏⵏⵙ ⴰⴽ ⵜⵉⵎⵉⵣⴰⵔ ⵢⴰⴹⵏⵉⵏ ⵏ ⵉⴼⵔⵉⵇⵢⴰ.

ⵉⵏⵄⵔ ⴱⴷⴷⴰ ⵍⵎⵖⵔⵉⴱ ⴼ ⵜⵎⵙⴰⵔⵉⵏ ⵏ ⵜⴷⵔⴰⵡⵜ ⵉⴼⴼⵓⵙ-ⵉⴼⴼⵓⵙ, ⴰⵢⵍⵍⵉ ⵏⵉⵜ ⵎⵎⴰⵍⴰⵏ ⵉⵙⵙⴰⵔⵓⵜⵏ ⵏⵏⵙ ⵅⴰⵜⵔⵏⵉⵏ ⴳ ⴽⵉⴳⴰⵏ ⵏ ⵉⵡⴰⵏⴽⵏ, 60 % ⵏ ⵉⵙⵙⴰⵔⵓⵜⵏ ⵏ ⵍⵎⵖⵔⵉⴱ ⴳ ⴱⵕⵕⴰ ⵍⵍⴰⵏ ⴳ ⵉⴼⵔⵉⵇⵢⴰ.

ⵜⵓⵊⴰⴷ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵃⵎⴰ ⴰⴷ ⵜⴷⵔⵓ ⵜⴰⴷⵔⴰⵡⵜ ⵏⵏⵙ ⴰⴽⴷ ⵉⵙⵜⵎⴰⵙ ⵜⵉⵎⵉⵣⴰⵔ ⵏ ⵉⴼⵔⵉⵇⵢⴰ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵉⵟⵟⴰⴼ ⵜⴰⵎⵓⵣⴰⵢⵜ ⵉⵥⵉⵍⵏ ⴳ ⵉⴳⵔⴰⵏ ⵏ ⵜⴳⵎⵔⵜ ⵜⴰⵢⴰⵍⴰⵏⵜ ⴷ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵜⴼⵍⵍⴰⵃⵜ ⴷ ⵓⵙⵡⵓⴷⴷⵓ ⵏ ⵡⴰⵎⴰⵏ ⴷ ⵓⵙⵎⴰⵜⴰ ⵏ ⵜⵏⵓⴼⴰ ⵜⵉⴳⴷⵓⴷⴰⵏⵉⵏ ⴷ ⵓⵙⴱⴷⴷⵉ ⵏ ⵜⵎⵓⴹⴰⵏ ⴷ ⵜⵏⴼⵔⵓⵜ ⵏ ⵓⵜⵛⵓ.

ⵙ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴽⵉⴳⴰⵏ ⵏ ⵉⵙⵏⴼⴰⵔⵏ ⵎⵎⴰⵍⴰⵏⵉⵏ ⴰⵏⴰⵡ ⵏⵏⵙ ⴳ ⵜⵏⵏⵓⴱⴹⴰ ⵉⵥⵉⵍⵏ ⴷ ⵜⵎⴰⴼⴰⵡⵜ ⴷ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵉⴷⴼ ⵏ ⵜⵎⵖⴰⵔⵜ ⴳ ⵜⵓⴷⵔⵜ ⵜⴰⵙⵔⵜⴰⵏⵜ ⴷ ⵜⴷⵎⵙⴰⵏⵜ.

ⵖⵎⴽ ⴰⵏⵏ ⴰⴼ ⵉⴳⴰ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ ⴰⴱⵔⵉⴷ ⴰⵡⵍⴰⵡⴰⵢ ⵍⵍⵉ ⵔⴰⴷ ⵢⴰⵡⵙ ⵉ ⵉⴼⵔⵉⵇⵉⵢⵏ ⴰⴷ ⴰⴼⵉⵏ ⴰⵏⴰⵡ ⵉⵎⵙⴰⵙⴰⵏ ⴷ ⵓⵎⵏⴰⴹ ⵏ ⵓⵎⵏⵥⴰⵡ ⴷ ⵜⴷⵍⵙⴰ ⵏⵏⵙ ⴷ ⵓⵎⵣⵔⵓⵢ ⵏⵏⵙ.