ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵏⵙⵙⵉⵅⴼ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ

ⵉⵙⵏⵓⴱⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵡⴰⵙ 14 ⵢⵓⵍⵢⵓⵣ 2022 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ, ⵎⴰⵙⵙ ⴷⵡⴰⵔⵜⵉ ⴱⴰⵛⵉⴽⵓ ⴰⵏⵙⵙⵉⵅⴼ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ, ⵙ ⵜⵎⵍⴷⴰ ⵍⵍⵉⵖ ⵉⴷⵔⵓ ⴳ ⵜⵖⵉⵎⵉⵜ ⵜⴰⵎⴰⵜⴰⵢⵜ ⵏ ⵓⴱⵕⵍⴰⵎⴰⵏ ⴰⴳⵔⴰⵖⵍⴰⵏ ⵏ ⵓⵎⵙⵓⵔⵓⴼ ⴷ ⵓⴼⵔⴰ ⵉⵜⵜⵓⵙⵏⵎⴰⵍⴰⵏ ⴳ ⵜⵙⵓⵜⵍⵜ ⵏⵏⵙ ⵜⵉⵙ ⵎⵔⴰⵡⵜ ⴳ ⵕⵕⴱⴰⵟ ⴷ ⴷⴷⴰⵅⵍⴰ ⵙⴳ 13 ⴰⵔ 15 ⵢⵓⵍⵢⵓⵣ 2022.

ⵙⴰⵡⵍⵏ ⵙⵉⵏ ⵉⵎⵙⵜⴳⴳⴰⵔⵏ ⴼ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴷ ⵜⵣⴷⴰⵢⵉⵏ ⵍⵍⴰⵏⵉⵏ ⵊⴰⵔ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴷ ⵜⵔⴰⴱⴱⵓⵜ ⵜⴰⵙⵔⵜⴰⵏⵜ ⵍⵍⵉ ⴰⵙ ⵉⴹⴼⵕⵏ. ⵙⵎⵏⵉⴷⵏ ⴰⵖⴰⵡⴰⵙ ⴰⴱⵕⵍⴰⵎⴰⵏⵉ ⴰⵙⵉⵏⵔⴰⵏ ⴷ ⵓⴳⵜⵉⵔⴰⵏ ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴷ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ ⵙ ⵎⴰⴷ ⵉⵟⵟⴰⴼ ⵍⵎⵖⵔⵉⴱ ⴳ ⵡⴰⵢⴷⴰ ⴰⴷⵉⴱⵍⵓⵎⴰⵙⵉ ⵓⴱⵕⵍⴰⵎⵏⵉ ⵉⴳⴰⵏ ⴰⵏⴰⵡ. ⵙⴷⴷⵉⴷⵏ ⵓⵍⴰ ⴼ ⵓⵎⵔⴰⵙ ⵏ ⵉⴱⵕⵍⴰⵎⴰⵏⵏ ⴷ ⵉⴱⵕⵍⴰⵎⴰⵏⵉⵢⵉⵏ ⴳ ⵓⵣⵓⵣⵣⵔ ⵏ ⵜⴷⵍⵙⴰ ⵏ ⵓⵎⵙⵓⵔⵓⴼ ⴷ ⵜⵎⵢⵉⴷⵉⵔⵜ ⴷ ⵓⵎⵢⴰⵡⴰⴹ ⴷ ⵓⵎⵙⴰⵡⴰⵍ ⴷ ⵓⵎⵢⴰⵡⴰⴹ ⴷ ⵓⵕⵥⵥⵓⵎ ⵏ ⵜⵏⵙⵜⴰⵢⵉⵏ ⴷ ⵜⵉⵍⴰⵍ ⴳ ⵓⵎⵏⵉⴷ ⴰⴷ.

ⵉⵙⵏⵉⵎⵎⵔ ⵓⵏⵙⵙⵉⵅⴼ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵉⵜ ⵜⴰⴳⵔⴰⵖⵍⴰⵏⵜ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵏⵎⵓⵇⵇⴰⵔ ⴰⴷ, ⵉⵙⵓⵜⴳ ⵜⵉⵍⴰⵍⴰⵜ ⵏ ⵓⴱⵕⵍⴰⵎⴰⵏ ⴷ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴳ ⵓⵙⵏⴰⵍ ⵏ ⵜⵓⴳⴳⴰⵙ ⵏ ⵓⴼⵔⴰ ⴷ ⵜⵏⴼⵔⵓⵜ ⵜⵉⴳⵔⴰⵖⵍⴰⵏⵉⵏ ⴷ ⵓⵍⵜⴰⵖ ⵉⵙⵓⵍⵏ ⴳ ⵜⵙⵏⵜⴰⵢⵉⵏ ⵏ ⵓⵣⵓⵣⵣⵔ ⵏ ⵜⴷⵍⵙⴰ ⵏ ⵓⴼⵔⴰ ⴷ ⵓⵎⵙⴰⵡⴰⵍ ⴷ ⵓⵎⵙⵓⵔⵓⴼ, ⵢⵉⵏⵉ ⵎⴰⵙ ⵉⴳⴰ ⵓⵙⵏⵎⴰⵍⴰ ⵏ ⵜⵙⵓⵜⵍⵜ ⵜⵉⵙ ⵎⵔⴰⵡⵜ ⵏ ⵓⴱⵕⵍⴰⵎⴰⵏ ⴰⴳⵔⴰⵖⵍⴰⵏ ⵏ ⵓⵎⵙⵓⵔⵓⴼ ⴷ ⵓⴼⵔⴰ ⴳ ⵕⵕⴱⴰⵟ ⴷ ⴷⴷⴰⵅⵍⴰ ⵜⴰⵎⴰⵜⴰⵔⵜ ⴼ ⵓⵙⴳⵓⴷⵉ ⵍⵍⵉ ⵜⵙⴽⵔ ⵜⴳⵍⴷⵉⵜ ⵏ ⵍⵎⵖⵔⵉⴱ. ⵉⵙⵎⵏⵉⴷ ⵓⵍⴰ ⵜⵉⵏⴰⵥⴰⵕⵉⵏ ⴷⴰⵜ ⵏ ⵉⴱⵕⵍⴰⵎⴰⵏⵏ ⴷ ⵉⴱⵕⵍⴰⵎⴰⵏⵉⵢⵉⵏ, ⵉⵙⴷⴷⵉⴷ ⵎⴰⵙ ⵔⴰⴷ ⵜⵙⴽⵔ ⵜⴰⵎⵓⵏⵜ ⵜⴰⵖⴰⵡⵙ ⵏ ⵜⵡⵡⵓⵔⵉ ⵉⵏⵏⵓⵕⵥⵎⵏ ⴼ ⵜⵎⵙⴰⵔⵉⵏ ⵍⵍⴰⵏⵉⵏ ⴳ ⵓⵖⴰⵡⴰⵙ ⴰⴱⵕⵍⴰⵎⴰⵏⵉ ⴰⴳⵔⴰⵖⵍⴰⵏ ⴰⵢⵍⵍⵉ ⵔⴰⴷ ⵉⵙⵙⴷⵓⵙ ⵜⵉⵍⵉⵜ ⵏⵏⵙ, ⵖⵎⴽ ⴰⵏⵏ ⴷ ⵓⵙⵓⵜⴳ ⵏ ⵜⵡⵡⵓⵔⵉ ⴷ ⵜⵙⵏⵜⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴳⵔⴰⵖⵍⴰⵏⵉⵏ ⴳⴰⵏⵉⵏ ⵜⵉⵎⵣⵡⵓⵔⴰ.

ⴳ ⵓⵎⵏⵉⴷ ⵏⵏⵙ, ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵙⵓⵜⴳ ⵏⵏⵙ ⵉ ⵜⵎⴷⵔⴰⵡⵜ ⵏ ⵓⵏⵙⵙⵉⵅⴼ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⴳ ⵜⵖⵉⵎⵉⵜ ⵜⴰⵎⴰⵜⴰⵢⵜ ⵜⵉⵙ ⵎⵔⴰⵡⵜ ⵏ ⵓⴱⵕⵍⴰⵎⴰⵏ ⴰⴳⵔⵖⴰⵍⵏ ⵏ ⵓⵎⵙⵓⵔⵓⴼ ⴷ ⵓⴼⵔⴰ, ⵉⵙⴰⵡⵍ ⴼ ⵜⵣⴷⴰⵢⵉⵏ ⵍⵍⴰⵏⵉⵏ ⵊⴰⵔ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴷ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ, ⴰⵢⵍⵍⵉ ⵉⴷⵓⵙⵏ ⴳ ⵜⵎⵔⴰⵡⵜ ⵉⴳⴳⵔⴰⵏ ⵙ ⵓⵍⵜⴰⵖ ⵏ ⵍⵎⵖⵔⵉⴱ ⴳ ⵜⵙⵏⵜⴰⵢⵉⵏ ⵏ ⵜⴰⵎⵓⵏⵜ ⴰⴷ ⵉ ⵓⵙⵏⴰⵍ ⵏ ⵜⵡⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵉⵛⵛⴰⵔⵏ ⴷ ⵓⵙⵏⴼⵍ ⵏ ⵜⵉⵔⵎⵉⵜⵉⵏ, ⴷ ⵜⵡⵉⵙⵉ ⴳ ⵜⵓⴳⴳⴰⵙ ⵏ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴷ ⵜⴻⵟⵟⵓⵕⴼⴰ, ⴷ ⵓⵣⵓⵣⵣⵔ ⵏ ⵜⴷⵍⵙⴰ ⵏ ⵓⵎⵙⵓⵔⵓⴼ ⴷ ⵓⵎⵙⴰⵡⴰⵍ ⴷ ⵓⵙⴷⵓⵙ ⵏ ⵜⵡⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵜⴰⵙⵉⵏⵔⴰⵏⵜ ⴷ ⵜⴳⵜⵉⵔⴰⵏⵜ.