ⴰⵏⵎⵓⵇⵇⴰⵔ ⵏ ⵓⵎⵢⴰⵡⴰⴹ ⴷ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴳ ⵓⵙⴰⵜⵉ ⵏ ⵜⵙⵏⵜⴰⵢⵜ ⵏ ⵜⵎⴷⵔⴰⵡⵜ ⵉ ⵜⵏⴱⴰⴹⵜ ⵉⵏⵏⵓⵕⵥⵎⵏ
ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 22 ⵢⵓⵏⵢⵓ 2022, ⴰⵏⵎⵓⵇⵇⴰⵔ ⴼ ⵉⵙⵖⵡⴰⵏ ⵏ ⵓⵙⵇⵇⵉⵎ ⴳ ⵓⵙⴰⵜⵉⵏ ⵏ “ⵜⵙⵏⵜⴰⵢⵜ ⵏ ⵜⵎⴷⵔⴰⵡⵜ ⵉ ⵜⵏⴱⴰⴹⵜ ⵉⵏⵏⵓⵕⵥⵎⵏ”, ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵔⴰ, ⴷ ⵜⵎⴷⵔⴰⵡⵜ ⵏ ⵎⴰⵙⵙ ⵎⵓⵚⵟⴰⴼⴰ ⴱⴰⵢⵜⴰⵙ ⴰⵎⴰⵡⵙⴰⵙ ⴰⵎⴰⵔⵉ ⵖⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵜⵜⵓⵙⵎⴰⴳⴰⵍⵏ ⵙ ⵜⵣⴷⴰⵢⵉⵏ ⴰⴽⴷ ⵓⴱⵕⵍⴰⵎⴰⵏ, ⴰⵎⵙⵙⵉⵡⵍ ⴰⵎⴰⴷⴷⵓⴷ ⵙ ⵢⵉⵙⵎ ⵏ ⵜⵏⴱⴰⴹⵜ, ⴷ ⵉⴳⵏⵙⴰⵙⵏ ⵏ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴷ ⵉⵎⴷⵔⴰⵡⵏ ⵙⴳ ⵉⵖⴰⵡⴰⵙⵏ ⴰⴳⵔⴰⵖⵍⴰⵏ.
ⵉⵥⵍⵉ ⵓⵏⵎⵓⵇⵇⴰⵔ ⴰⴷ ⵙ ⵓⵙⵎⵏⵉⴷ ⵏ ⵜⵢⵢⴰⴼⵓⵜ ⵏ ⵓⵖⴰⵡⴰⵙ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵢⵉⴳⵔ ⵏ ⵜⵎⴷⵔⴰⵡⵜ ⵉ ⵜⵏⴱⴰⴹⵟ ⵉⵏⵏⵓⵕⵥⵎⵏ ⴳ 2019-2021 ⴷ ⵓⵙⵎⵏⵉⴷ ⵏ ⵓⵖⴰⵡⴰⵙ ⵏ ⵓⵙⵇⵇⵉⵎ ⵉ 2022-2023.
ⴳ ⵜⴳⵓⵔⵓ ⵏⵏⵙ, ⵉⵙⵎⵏⵉⴷ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵉⵙⵖⵡⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⵏⵉⴷ ⵏ ⵜⵙⵏⵜⴰⵢⵜ ⴰⴷ, ⵍⵍⵉ ⵉⵙⴽⵔⵏ ⴳ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⵢⴰⵏ ⵓⵎⴷⵔⵓ ⴰⴷⵙⵍⴰⵏ ⵏ ⵉⴱⵕⵍⴰⵎⴰⵏⵏ ⴷ ⵜⵏⴱⴰⴹⵉⵏ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴳ ⵓⵙⴽⵔ ⵏ ⵉⵖⴰⵡⴰⵙⵏ ⵏⵏⵙ ⴳ ⵓⵙⴰⵜⵉ ⵏ ⵜⵏⵙⵜⴰⵢⵜ ⵜⴰⴷ, ⵍⵍⵉⵖ ⵟⵟⴰⴼⵏ ⵜⵉⵍⴰⵍ ⴳ ⵢⵉⴳⵔ ⵏ ⵓⵏⵄⴰⵕ ⴰⵖⵔⵎⴰⵏ ⴷ ⵜⵉⴹⴰⴼ ⴷ ⵓⵙⴰⵜⵉ ⴰⵏⴰⵎⵓⵏ.
ⵢⵉⵏⵉ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ ⵎⴰⵙ ⵉⵙⴽⵔ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴰⵎⴷⵔⵓ ⴳ ⵓⵙⴽⵔ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⴷ ⵜⵏⵎⵓⵔⵉ ⵙ ⵎⴰⴷ ⵉⵍⵍⴰⵏ ⴳ ⵓⴷⵓⵙⵜⵓⵔ ⵏ ⵜⴳⵍⴷⵉⵜ, ⵢⵉⵏⵉ ⵎⴰⵙ ⵍⵍⴰⵏ ⵚⴹⵉⵚ ⵉⵙⵖⵡⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵖⴰⵡⴰⵙ ⴰⵎⵣⵡⴰⵔⵓ ⴳ ⴽⵕⴰⴹ ⵉⵙⴷⴰⵡⵏ; ⵜⴰⵎⴰⴷⵔⴰⵡⵜ ⵜⴰⵏⵎⵓⵔⵉⵜ, ⴰⴽⵛⵓⵎ ⵙ ⵓⵏⵖⵎⵉⵙ, ⴰⵣⴷⴰⵢ ⵏ ⵜⵎⴰⵙⴰⵢⵜ ⴷ ⵓⵙⵉⵟⵏ.
ⴼ ⵓⵙⵏⴼⴰⵔ ⵏ ⵓⵖⴰⵡⴰⵙ ⵏ ⵓⵙⵇⵇⵉⵎ ⵉ ⵜⴼⵔⴽⴰ ⴷ ⵢⵓⵛⴽⴰⵏ, ⵉⵏⵏⴰ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ ⵎⴰⵙ ⵔⴰⴷ ⵜⵜⵓⵙⴽⵉⵔⵏ ⵙⴰ ⵏ ⵉⵙⵖⵡⴰⵏ ⴳⴰⵏⵉⵏ ⵉⵙⵡⵓⴷⴷⵓⵜⵏ ⴷ ⵜⵖⵜⴰⵙⵉⵏ ⵉ ⵓⵣⵓⵣⵣⵔ ⵏ ⵜⴷⵍⵙⴰ ⵏ ⵜⴷⵉⵎⵓⵇⵔⴰⵟⵉⵜ ⴷ ⵜⴱⵕⵍⴰⵎⴰⵏⵉⵜ, ⴷ ⵓⵙⴽⵔ ⵏ ⵓⴱⵕⵍⴰⵎⴰⵏ ⵏ ⵡⴰⴷⴰⵙ ⴷ ⵓⵏⵏⵓⵕⵥⵎ ⴼ ⵓⴳⴷⵓⴷⵏ ⴷ ⵓⵙⴷⵔ ⵏ ⵉⵏⵎⵓⵔⴰⵏ ⴳ ⵜⵡⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵙ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⴷ ⵓⴷⵔⴰⵡ ⴷ ⵜⵎⵔⵙⵉⵟⵜ ⵏ ⵓⵏⴱⴷⵓ ⵉ ⵓⵣⵓⵣⵣⵔ ⵏ ⵡⴰⵜⵉⴳⵏ ⵏ ⵜⴷⵉⵎⵓⵇⵔⴰⵟⵉⵜ ⴷ ⵜⴷⵍⵙⴰ ⵏ ⵜⵎⴷⵔⴰⵡⵜ.
ⴳ ⵓⵎⵏⵉⴷ ⵏⵏⵙ, ⵉⵏⵏⴰ ⵎⴰⵙⵙ ⵎⵓⵚⵟⴰⴼⴰ ⴱⴰⵢⵜⴰⵙ ⵎⴰⵙ ⴰ ⵜⵎⵎⴰⵍ ⵜⵙⵏⵜⴰⵢⵜ ⵏ ⵓⵙⵇⵇⵉⵎ ⴰⴼⵔⴰⴽ ⵙ ⵡⴰⵜⵉⴳ ⵏ ⵜⵉⵍⴰⵍⵜ ⵏ ⵡⴰⵎⵓⵏ ⴰⵖⵔⵎⴰⵏ ⴳ ⵓⴱⵔⵉⴷ ⵏ ⵜⵎⴷⵔⴰⵡⵜ ⵜⴰⵏⵎⵓⵔⵉⵜ ⵎⴽ ⵉⵖⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜⵉⵏⵚⵕ ⵕⴱⴱⵉ ⴳ ⵉⵏⴰⵡⵏ ⵉⴳⵍⴷⴰⵏⵏ, ⵎⴽ ⵍⵍⵉ ⵜⵙⴰⵡⵍ ⵜⴻⵜⴳⴰⵔⵜ ⵜⴰⴷⵙⵜⴰⵔⵜ ⵏ ⵜⴳⵍⴷⵉⵜ ⴷ ⵉⵙⵍⴳⵏⵏ ⵉⵎⴰⴷⴷⴰⵙⵏ ⵏ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⵙ ⵓⵙⴽⵔ ⵏ ⵉⵙⵡⵓⴷⴷⵓⵜⵏ ⴷ ⵜⵎⵙⴽⴰⵔ ⴼⴰⵡⵏⵉⵏ ⵉ ⵓⵙⵎⵖⵔ ⵏ ⵓⴱⵔⵉⴷ ⵓⵏⴳⵉⵎ ⴰⵎⴰⵢⵏⵓ ⵏ ⵜⵎⴰⵣⵉⵔⵜ ⵏⵏⵖ.
ⵢⵉⵏⵉ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⵉⵟⵟⴰⴼ ⵓⵥⵟⵟⴰ ⴰⵎⵙⵎⵓⵏⴰⵏ ⴰ ⴰⵏⴰⵎⵓⵔ ⵜⵉⵍⴰⵍ ⴳⴳⵓⵜⵏⵉⵏ ⴳ ⵡⴰⵎⵓⵔ ⵏⵏⵖ ⴳ ⴽⵓ ⵉⴳⵔⴰⵏ ⵉⵏⴰⵎⵓⵏⵏ ⵓⴷⴷⵉⵔⵏ, ⵎⴽ ⵍⵍⵉ ⵏⵉⵜ ⵜⴱⴷⵔ ⵜⴱⵔⴰⵜ ⵜⴰⴳⵍⴷⴰⵏⵜ ⵉ ⵉⵎⴷⵔⴰⵡⵏ ⴳ ⵓⵙⵙⴰⵏ ⵏ ⵜⵖⵓⵔⵉ ⴼ ⵓⵙⵡⵓⴷⴷⵓ ⴰⵎⵙⵎⵓⵏⴰⵏ ⵏ 2002.
ⴳ ⵓⵙⴰⵜⵉ, ⴰⴷ, ⵉⵙⴰⵡⵍ ⵎⴰⵙⵙ ⴰⵎⴰⵡⵙⴰⵙ ⴼ ⵜⵓⴳⴳⴰⵙ ⵏ ⵜⵎⴰⵡⴰⵙⵜ ⵜⴰⵎⴰⵔⵉⵜ ⴷⴰⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵜⵜⵓⵙⵎⴰⴳⴰⵍⵏ ⵙ ⵓⵙⵎⴰⵜⵜⵉ ⴰⵎⵓⵟⵟⵓⵏ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ ⴳ ⵓⵙⵕⵚⵓ ⵏ ⵓⵖⴰⵡⴰⵙ ⵏ ⵜⵏⴱⴰⴹⵜ ⵉⵏⵏⵓⵕⵥⵎⵏ, ⵖⵎⴽ ⵍⵍⵉ ⵜⵉⵡⵉⵙ ⵜⵎⴰⵡⴰⵙⵜ ⵉⵜⵜⵓⵙⵎⴰⴳⴰⵍⵏ ⵙ ⵜⵣⴷⴰⵢⵉⵏ ⴰⴽⴷ ⵓⴱⵕⵍⴰⵎⴰⵏ ⴳ ⵓⵎⵓⵔⵙ ⵏ ⵓⵙⴰⵡⵓⵔ ⵙ ⵓⵙⴽⵔ ⵏ ⵜⵡⵡⵓⵔⵉ ⵉⵥⵍⵉⵏ ⵙ ⵜⵎⴰⵡⴰⵙⵜ ⴳ ⵓⵎⵏⵉⴷ ⴰⴷ.
ⴳ ⵓⵏⵎⵓⵇⵇⴰⵔ ⴰⴷ, ⵉⵙⵎⵏⵉⴷ ⵎⴰⵙⵙ ⵟⴰⵕⵉⵇ ⵏⴰⵛⵏⴰⵛ, ⴰⵎⵣⴷⴰⵢ ⴰⵏⵎⵏⴰⴹ ⵏ ⵜⵏⵙⵜⴰⵢⵜ ⵏ ⵜⵎⴷⵔⴰⵡⵜ ⵉ ⵜⵏⴱⴰⴹⵜ ⵉⵏⵏⵓⵕⵥⵎⵏ, ⵜⵉⵏⴰⵡⵜ ⴼ ⵜⵣⵡⵉⵔⵉ ⵜⴰⵎⵖⵔⵉⴱⵉⵜ ⴳ ⵢⵉⴳⵔ ⴰⴷ ⴳ ⵓⵙⵡⵉⵔ ⴰⵏⵎⵏⴰⴹ ⵙ ⵉⵙⵖⵡⴰⵏ ⵣⴷⵉⵏⵉⵏ ⴷ ⵜⵏⴱⴰⴹⵜ ⵉⵏⵏⵓⵕⵥⵎⵏ ⴷ ⵓⴱⵕⵍⴰⵎⴰⵏ ⵉⵏⵏⵓⵕⵥⵎⵏ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⵏⵏⵓⵕⵥⵎⵏⵉⵏ, ⵉⵙⴰⵡⵍ ⵓⵎⴰ ⴼ ⵓⵙⵜⴰⵢ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴳ ⵜⵙⵇⵇⵉⵎⵜ ⵏ ⵜⵏⴰⵔⴰ ⵏ ⵜⵙⵏⵜⴰⵢⵜ ⵏ ⵜⵎⴷⵔⴰⵡⵜ ⵉ ⵜⵏⴱⴰⴹⵜ ⵉⵏⵏⵓⵕⵥⵎⵏ 2021-2024.
ⴳ ⵓⵏⵎⵓⵇⵇⴰⵔ ⴰⴷ, ⵙⴰⵡⵍⵏ ⵉⴳⵏⵙⴰⵙⵏ ⵏ ⵜⵎⵙⵎⵓⵏⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⵍⵍⵉ ⵙⵓⵜⴳⵏⵉⵏ ⵜⵓⴳⴳⴰⵙ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵏⵏⵓⵕⵥⵎ ⵏⵏⵙ ⴷ ⵜⵎⵔⵙⵍⵜ ⵜⴰⴷⵙⵜⴰⵔⵜ ⴼ ⵓⴳⴷⵓⴷ, ⵜⵜⵓⴼⴽⵉⵏ ⵓⵍⴰ ⴽⵉⴳⴰⵏ ⵏ ⵜⵙⵓⵎⴰⵔ ⴳ ⵓⵎⵏⵉⴷ ⴰⴷ.
ⵔⴰⴷ ⵢⵉⵍⵉ ⵓⵣⵓⵣⵣⵔ ⵏ ⵓⵙⵏⴼⴰⵔ ⵏ ⵓⵖⴰⵡⴰⵙ ⵏ ⵓⵙⵇⵇⵉⵎ ⵉ 2022-2023 ⴳ ⵓⵙⵉⵜ ⴰⵍⵉⴽⵟⵕⵓⵏⵉ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵃⵎⴰ ⴰⴷ ⵜⵜⵓⴼⴽⵉⵏⵜ ⵜⴰⵏⵏⴰⵢⵢⵉⵏ ⵏ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴷⴰⵜ ⵏ ⵓⵙⵖⵣⵏ ⵓⵙⵎⵉⴷ.