ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ

ⵉⵙⵏⵓⴱⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ 14 ⵉⴱⵔⵉⵔ 2022 ⴰⴽⴰⴱⴰⵕ ⵙⴳ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⵍⵍⵉ ⵉⵙⵙⵉⵅⴼ ⵎⴰⵙⵙ ⵔⵉⵎⵉ ⵏⴽⵡⵉ ⵍⵓⵎⴱⵓ ⵍⵍⵉ ⵉⵙⵏⵓⴱⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙⴳ 11  ⴰⵔ 15 ⵉⴱⵔⵉⵔ.

ⵉⵙⵏⵉⵎⵎⵔ ⵎⴰⵙⵙ ⵍⵓⵎⴱⵓ ⴷ ⵓⴽⴰⴱⴰⵕ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴼ ⵓⵙⵏⵓⴱⴳ, ⵉⵙⵎⵏⵉⴷ ⵜⴰⵙⵇⵇⵉⵎⵜ ⴷ ⵜⵡⵡⵓⵔⵉ ⵏⵏⵙ, ⵢⵉⵏⵉ ⵎⴰⵙ ⵉⴳⴰ ⵓⵔⵣⴰⴼ ⴰⴷ ⵢⴰⵏ ⵓⵏⵄⴰⵔ ⴰⴽⴷ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵓⵎⵇⵏ ⴰⴼⵔⵉⵇⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ, ⴷ ⵓⵙⴷⵓⵙ ⵏ ⵓⵎⵙⴰⵡⴰⵍ ⴰⴽⴷ ⵜⵉⵎⵔⵙⴰⵍ ⴳ ⵜⵍⵍⴰ ⵜⵎⵔⵙⵍⵜ ⵜⴰⵣⵣⵔⴰⴼⵜ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⴼⵔⵉⵇⵢⴰ.

ⵢⵉⵏⵉ ⵓⵍⴰ ⵎⴰⵙ ⵉⴳⴰ ⵓⵏⵎⵓⵇⵇⴰⵔ ⴰⴷ ⴰⴽⴷ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⴹⴰⴽⴰⵕ ⴼ ⵓⵎⵇⵇⵏ ⴰⵏⵏ ⵃⵎⴰ ⴰⴷ ⵙⵔⵙ ⴽⵛⵎⵏ ⵎⵏⵏⴰⵡ ⵉⵡⴰⵏⴽⵏ ⵉ ⵓⵎⵙⴰⵙⴰ ⵊⴰⵔ ⵓⵏⴳⵔⴰⵡ ⴰⵏⴰⵎⵓⵔ ⴷ ⵓⵏⴳⵔⴰⵡ ⴰⴼⵔⵉⵇⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⴳ ⵓⵎⵏⵉⴷ ⵏⵏⵙ, ⵉⵙⵏⵏⵉⵎⵔ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵎⴰⵙⵙ ⵔⵉⵎⵉ ⵏⴽⵡⵉ ⵍⵓⵎⴱⵓ ⴷ ⵓⴽⴰⴱⴰⵕ ⴼ ⵓⵔⵣⴰⴼ ⴰⴷ, ⵉⵙⵎⵏⵉⴷ ⵜⴰⵣⵣⵉⴳⵣⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵉⵥⵉⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵉⵙⴰⵡⵍ ⴼ ⵜⵉⵔⵎⵉⵜ ⵏ ⵍⵎⵖⵔⵉⴱ ⴳ ⵜⵣⵔⴼⵜ ⵜⴰⵙⵎⴰⵜⵜⴰⵢⵜ ⵙ ⵎⴰⴷ ⵉⵍⵍⴰⵏ ⴳ ⵓⴷⵓⵙⵜⵓⵔ ⵏ 2011, ⴷ ⵎⴰⵙ ⵉⵍⵍⴰ ⵍⵎⵖⵔⵉⴱ ⴰⴽⴷ ⵉⵣⵔⴼⴰⵏ ⵏ ⵓⴼⴳⴰⵏ ⵎⴽ ⴷⴰ ⵍⵍⴰⵏ ⴳ ⵓⵎⴰⴹⴰⵍ, ⴷ ⵜⵎⵥⵍⴰⵢ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵎⵢⴰⵡⴰⵙ ⵏⵏⵙ ⴰⴽⴷ ⴰⵙⵇⵇⵉⵎ ⵏ ⵉⵎⵓⵔⴰ.

ⵉⵙⴰⵡⵍ ⵓⵍⴰ ⴼ ⵜⵎⵥⵍⴰⵢ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵙⴷⵓⵙ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵣⵣⵔⴰⴼ ⴷ ⵜⵉⴹⴰⴼ ⵙ ⵉⵙⵇⵙⵉⵜⵏ ⵉⵎⵉⵔⴰⵢⵏ ⴷ ⵉⵎⵉⵡⴰⵏⵏ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵓⵎⴹⴰⴽⴰⵕ ⵏ ⵉⵏⵇⵇⵉⵙⵏ ⵏ ⵜⵎⵔⵙⴰⵍ ⵏ ⵜⵏⵏⵓⴱⴹⴰ ⵙ ⵎⴰⴷ ⵉⵍⵍⴰⵏ ⴳ ⵓⴷⵓⵙⵜⵓⵔ.

ⵖⵎⴽ ⵍⵍⵉ ⵉⵙⴰⵡⵍ ⴼ ⵓⵎⵎⵉⵥⵏ ⵏ ⵓⵙⵇⵇⵉⵎ ⴷ ⵓⴷⵖⴰⵔ ⵏⵏⵙ ⴷⴰⵔ ⵜⴳⵔⴰⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ , ⴷ ⵎⴰⵙ ⵢⵓⵊⴰⴷ ⵓⵙⵇⵇⵉⵎ ⵃⵎⴰ ⴰⴷ ⵉⴼⵔⵓ ⵜⵉⵔⵎⵉⵜ ⵏⵏⵙ ⴷ ⵜⵎⵔⵙⴰⵍ  ⴷ ⵜⵙⵇⵇⵉⵎⵉⵏ  ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵏⵏⵓⵕⵥⵎ ⴷ ⵡⴰⵎⵓⵏ ⴰⵖⵔⵎⴰⵏ ⵙ ⵓⵙⵎⵏⵉⴷ ⵏ ⵜⵓⵍⴽⵉⵎⵉⵏ ⴷ ⵜⵓⵜⵔⴰⵡⵉⵏ.

ⵢⵓⵎⴰ ⵓⴽⴰⴱⴰⵕ ⴰⴷ: ⵎⴰⵔⵉ ⵍⵡⵉⵙ ⴰⴱⵓⵎⵓ, ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵏ ⵜⵡⵡⵓⵔⵉ ⴼ ⵉⵣⵔⴼⴰⵏ ⵏ ⵉⵡⴷⴰⵏ ⵅⴰⵜⵔⵏⵉⵏ ⴷ ⵉⵎⵃⴹⴰⵕ ⴳ ⵉⴼⵔⵉⵇⵢⴰ , ⵓⴼⵉⵏⴰ ⵊⵉⵔⵉⵏⵉ ⵜⵓⴱⵙⵉ, ⵜⴰⵎⵖⵜⴰⵙⵜ ⵏ ⵓⵣⵔⴼ ⵏ ⵡⴰⵡⴰⵍ ⴷ ⵓⵍⴽⴰⵎ ⵙ ⵜⵎⵓⵛⴰ ⴳ ⵉⴼⵔⵉⵇⵢⴰ, ⵉⴷⵔⵉⵙⴰ ⵙⵓ, ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ  ⵏ ⵜⵡⵡⵓⵔⵉ ⴼ ⵜⵉⵏⵖⵉ ⴷ ⵉⵚⵕⵓⴹⵏ ⵡⴰⵔⵍⴳⵉⵏⵏ ⴳ ⵉⴼⵔⵉⵇⵢⴰ, ⴰⵏⴰ ⴼⵓⵔⵙⵜⵔ, ⵜⴰⵎⵏⵀⴰⵍⵜ ⵏ ⵡⴰⵎⵎⴰⵙ ⴰⴼⵔⵉⵇⵉ ⵉ ⵜⴷⵉⵎⵓⵇⵔⴰⵟⵉⵜ ⴷ ⵜⵖⵓⵔⵉⵡⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.