ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵕⵥⵥⵓⵎ ⵏ ⵓⵏⵎⵓⵇⵇⴰⵔ ⴼ: ⴰⵙⴷⵓⵙ ⵏ ⵜⵏⴰⵔⴰ ⵏ ⵜⵎⵖⴰⵔⵉⵏ

ⵎⴰⵙⵙⴰ ⵏⵉⵍ ⵙⵜⵉⵡⴰⵔⵜ, ⵜⴰⵎⵙⵇⵇⴰⴷⵜ ⵏ ⴽⴰⵏⴰⴹⴰ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ

ⵎⴰⵙⵙ ⵙⴰⵢⵎⵓⵏ ⵎⴰⵔⵜⴰⵏ, ⴰⵎⵙⵇⵇⴰⴷ ⵏ ⵉⵏⴳⵍⴰⵟⵉⵕⵕⴰ

ⵜⵉⵏⴳⴳⵯⴰ ⵜⵉⴳⵎⴰⵎⵉⵏ ⵏ ⵜⵙⵎⵙⵓⵏⵜ ⵜⴰⵏⴰⵎⵓⵔⵜ ⵏ ⵜⴳⴷⵓⴷⴰⵏⵜ ⵏ ⵍⴽⵓⵏⴳⵓ ⵜⴰⴷⵉⵎⵓⵇⵔⴰⵟⵉⵜ

ⵎⴰⵙⵙ ⴰⵏⵜⵓⵏⵉ ⵙⵎⵉⵜ, ⴰⵏⵙⵙⵉⵅⴼ ⵏ ⵜⵎⵔⵙⵍⵜ ⵡⵉⵙⵜⵎⵉⵏⵙⵜⵔ ⵉ ⵜⴷⵉⵎⵓⵇⵔⴰⵟⵉⵜ

ⵜⵉⵏⴳⴳⵯⴰ ⴷ ⵉⵏⴳⴳⵯⴰ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵖⵓⵔⵉ ⵜⵓⵎⵔⵜ ⵉⵥⵍⵉⵏ ⴷ ⵏⴽⴽⵉⵏ ⴰⵔ ⵜⵜⵕⵥⵓⵎⵖ ⴳ ⵓⵏⵎⵓⵇⵇⴰⵔ ⵍⵍⵉ ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵜⵎⴷⵔⴰⵡⵜ ⴷ ⵜⵎⵔⵙⵍⵜ ⵏ ⵡⵉⵙⵜⵎⵉⵏⵙⵜⵔ ⵉ ⵜⴷⵉⵎⵓⵇⵔⴰⵟⵉⵜ ⴷ ⵓⴼⵏⵉⵇ ⴰⴽⴰⵏⴰⴹⵉ ⵉ ⵜⵎⵙⵙⵏⵜⴰⵢ ⵜⵉⴷⵖⴰⵔⴰⵏⵉⵏ ⴼ ⵢⴰⵏ ⵉⵎⵔⵙⵉ ⵉⴳⴰⵏ ⵡⵉⵏ ⵡⴰⵙⵙ ⴰⴷ ⴳ ⵓⵎⵏⴰⴹ ⵏ ⵉⵎⵓⴽⵏⵏ ⵉⵎⵔⵙⵍⴰⵏⵏ ⴷ ⵉⵏⴰⵎⵓⵏⵏ ⵍⵍⵉ ⵜⵙⴽⴰⵔ ⵜⵎⴰⵣⵉⵔⵜ ⵏⵏⵖ ⵙ ⵜⵉⵔⴰⵜ ⴷ ⵓⵙⴳⵓⴷⵉ ⴼ: ⵜⵉⵔⵙⴰⵍ ⵏ ⵓⵙⴷⵓⵙ ⵏ ⵜⵏⴰⵔⴰ ⵏ ⵜⵎⵖⴰⵔⵉⵏ.

ⵔⵉⵖ ⴳ ⵜⵣⵡⵉⵔⵉ ⴰⴷ ⵙⵓⵜⴳⵖ ⵜⵉⵎⵥⵍⵉⵜ ⵏ ⵓⵙⴼⵓⴳⵍⵓ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵙⴳⴳⵯⴰⵙ ⴰⴷ, ⵏ ⵡⵇⵙⵙ ⴰⵎⴰⴹⵍⴰⵏ ⵏ ⵜⵎⵖⴰⵔⵜ, ⵖ ⵉⵍⵍⴰ:

1- ⴰⵙⵏⵎⴰⵍⴰ ⵏ ⵓⵏⵎⵓⵓⵇⴰⵔ ⵖ ⵏⵙⵡⵉⵏⴳⵎ ⴳ ⵜⴱⵔⵉⴷⵉⵏ ⴷ ⵜⵔⵙⴰⵍ ⵏ ⵓⵙⴷⵓⵙ ⵏ ⵜⵏⴰⵔⴰ ⵏ ⵜⵎⵖⴰⵔⵉⵏ ⴳ ⵡⴰⵎⵓⵏ ⴷ ⵜⵎⵔⵙⴰⵍ ⵙⵍⴰⵡⴰⵏ ⴰⴽⴽⵯ ⵜⵉⵎⵔⵙⴰⵍ ⵏ ⵜⴳⵯⵏⵙⴰⵙⵜ ⵜⵜⵓⵙⵜⴰⵢⵏⵉⵏ,

2- ⴰⵙⴼⵓⴳⵍⵓ ⵏⵏⵙ ⵉⵛⵛⴰⵔⵏ ⴰⴽⴷ ⵜⵉⵎⵉⵣⴰⵔ ⴷ ⵏⴷⵔⵓ ⴰⵜⵉⴳⵏ ⵉⵏⴼⴳⴰⵏⵏ ⴰⵜⵜⵓⵢⵏⵉⵏ ⴷ ⵜⵏⵓⴼⴰ ⴷ ⵜⵎⴳⵓⵔⵉ ⵏ ⵉⵎⴰⵍ.

ⵉⴳⴰ ⵍⵃⴰⵍ ⵉⵏⴳⵍⴰⵟⵉⵕⵕⴰ ⵙ ⵉⴷⵔⵓ ⵓⵎⵙⵇⵇⴰⴷ ⵏⵏⵙ ⵎⴰⵙⵙ ⵙⵜⵉⵡⴰⵔⵜ ⵎⴰⵔⵜⴰⵏ, ⵏⴷⵔⵓ ⵢⴰⴷ ⵙⵉⵏ ⵉⵙⴳⴳⵯⴰⵙⵏ ⴰⴷ ⵙ ⵓⵣⵔⴰⵢ ⵏ 800 ⵏ ⵓⵙⴳⴳⵯⴰⵙ ⴼ ⵜⵣⴷⴰⵢⵉⵏ ⵜⵉⴷⵓⴱⵍⴰⵎⴰⵙⵉⵢⵉⵏ ⴰⴽⴷ ⴷⵉⵙ, ⴷ ⴽⴰⵏⴰⴹⴰ ⵍⵍⵉⵖ ⵏⵙⴼⵓⴳⵍⴰ ⴰⵙⴳⴳⵯⴰⵙ ⴰⴷ ⴰⴽⵜⵜⵓⵢ ⵏ 60 ⵏ ⵓⵙⴽⵔ ⵏ ⵜⵣⴷⴰⵢⵉⵏ ⵜⵉⴷⵉⴱⵍⵓⵎⴰⵙⵉⵢⵉⵏ , ⵙ ⵜⴷⵔⴰⵡⵜ ⵏ ⵜⵎⵙⵇⵇⴰⴷⵜ ⵏⵏⵙ ⵎⴰⵙⵙⴰ ⵏⵉⵍ ⵙⵜⵉⵡⴰⵔⵜ ⵍⵍⵉ ⴷⵉⴷⵏⵖ ⵉⴷⵔⵓⵏ ⴳ ⵓⵙⴼⵓⴳⵍⵓ ⵏ ⵡⴰⵙⵙ ⴰⴷ ⴰⵎⴰⴹⵍⴰⵏ ⴷ ⵜⴳⴷⵓⴷⴰⵏⵜ ⵏ ⵍⴽⵓⵏⴳⵓ ⵜⴰⴷⵉⵎⵓⵇⵔⴰⵟⵉⵜ ⵖ ⴷⵉⴷⵏ ⵉⴷⵔⵓ ⵓⴽⴰⴱⴰⵕ ⵙⴳ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ, ⵍⵍⵉⴷ ⵏⴷⵔⵓ ⵜⵉⵍⵉⵜ ⵜⴰⴼⵔⵉⵇⵉⵜ ⵜⴰⵥⵓⵕⴰⵏⵜ ⴷ ⵜⵙⵔⵜⴰⵢ ⵏ ⵓⵏⵄⴰⵔ ⵉ ⵉⴼⵔⵉⵇⵢⴰ ⴷ ⵜⴳⵎⵉ.

ⵓⵔ ⵙⵖⴰⵡⵙⴰⵖ ⴰⴷ ⵙⴰⵡⵍⵖ ⴼ ⵓⴷⵎⴰⵡⵏ ⵏ ⵜⴷⴷⵓⴽⴽⵍⴰ ⴷ ⵓⵎⵢⴰⵡⴰⵙ ⴷ ⵉⵙⵏⴼⵍⵏ ⵍⵍⴰⵏⵉⵏ ⵊⴰⵔ ⵍⵎⵖⵔⵉⴱ ⴷ ⵜⵎⵉⵣⴰⵔ ⴰⴷ ⵜⵉⵎⴷⴷⵓⴽⴽⵯⴰⵍ ⵍⵍⵉ ⵏⵏ ⵣⵔⵉⵏⵉⵏ ⵜⵉⵏⵓⴼⴰ ⵜⵉⵎⵜⵜⵉⵡⵉⵏ ⵙ ⵡⴰⵜⵉⴳⵏ, ⴰⵜⵉⴳⵏ ⵏ ⵜⴷⵉⵎⵓⵇⵔⴰⵟⵉⵜ ⴷ ⵜⵎⵏⵏⴰⵡⵜ ⴷ ⵓⴼⵔⴰⴽ ⵙ ⵓⵣⵔⴼ ⴳ ⵓⵎⵣⵔⴰⵢ ⴷ ⵜⴷⵔⴼⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵎⵙⵓⵔⵓⴼ ⴷ ⵓⵏⵏⵓⵕⵥⵎ ⴷ ⵓⵙⴱⴷⴷⵉ ⵏ ⵜⴻⵟⵟⵓⵕⴼⴰ ⴷ ⵓⵎⵣⴰⵖ ⵏ ⵓⴼⵔⴰ ⴷ ⵜⵣⵔⴼⵜ ⵉⴳⵔⴰⵖⵍⴰⵏⵏ, ⴳ ⵓⵎⵏⴰⴹ ⵖ ⵜⵙⵖⴰⵡⵙⴰ ⵜⴼⴳⴰⵏⵉⵜ ⵉ ⵡⴰⵏⴰⵡ ⴰⴷ ⵏ ⵜⵣⴷⴰⵢⵉⵏ ⴷ ⵡⴰⵜⵉⴳⵏ ⵉⵎⴰⴹⵍⴰⵏⵏ ⴷ ⵓⴼⵔⴰⴳ ⵏⵏⵙⵏ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ, ⴳ ⵓⴳⵏⵙ ⵏ ⵡⴰⵜⵉⴳⵏ ⴰⴷ, ⵍⵍⴰⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴷ ⵉⵎⴰⵙⵙⵏ ⵏ ⵓⵙⵉⵥⴹⵕ ⵏⵏⵙⵏⵜ ⴰⵎⵜⵜⵉⵡ ⴷ ⵓⵏⴰⵎⵓⵏ, ⴷ ⵜⵉⵍⵉⵜ ⵏⵏⵙⵏ ⴳ ⵡⴰⵎⵎⴰⵙⵏ ⵏ ⵜⵖⵜⴰⵙⵜ ⵜⴰⵙⵔⵜⴰⵏⵜ ⴷ ⵜⵎⵔⵙⵍⴰⵏⵜ ⵜⴰⴳⴷⵓⴷⴰⵏⵜ, ⴷ ⵜⵎⴰⵙⴰⵢⵉⵏ ⴷ ⵜⵎⵙⵙⵏⵜⴰⵢ ⵥⵍⵉⵏⵉⵏ, ⵉ ⵓⵙⴷⵙ ⵏ ⵢⵉⵙⴽⵉⵍ ⴷ ⵓⵙⴰⵎⵓ, ⵍⵍⵉ ⵙⵖⴰⵡⵙⴰⵏⵉⵏ ⴰⵙⵎⵖⵉ ⵏ ⵜⴷⵍⵙⵉ ⵍⵍⵉ ⵙ ⵜⴼⵔⴽ, ⵜⴱⴷⴷ ⴷⵉⴷⵙ, ⵜⵙⴱⴷⴷ ⴰⵙⵏⵓⵃⵢⵓ ⵉⴱⴷⴷⵏ ⴼ ⵡⴰⵏⴰⵡ ⴰⵏⴰⵎⵓⵏ, ⴷ ⵓⵣⵣⵔⴰⵢ ⵏ ⵉⵙⵡⵉⵏⴳⵉⵎⵏ ⴳⴰⵏⵉⵏ ⴳⴰⵔ ⴳ ⵓⵏⵢⴰⵍⴰⴽⴰⵎ ⴰⴽⴷ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴷ ⵓⴷⵖⴰⵔ ⵏⵏⵙⵏⵜ ⴳ ⵡⴰⵎⵓⵏⵏ.

ⵉ ⵎⴰ ⵢⴰⵏⵏ, ⵜⵙⵔⵙ ⵜⵎⴰⵣⵉⵔⵜ ⵏⵏⵖ ⵉⵎⵓⴽⵏⵏ ⵃⵎⴰ ⴰⴷ ⵉⵍⵉⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴷ ⵢⵉⵙⴽⵉⵍ, ⴷⴼⴼⵉⵔ ⴰⵙⵍⴳⵏ ⵏ ⵜⵓⵡⵊⴰ ⵍⵍⵉ ⵉⵙⵖⵣⵏ ⵓⴱⵕⵍⴰⵎⴰⵏ ⴳ 2004, ⵍⵍⵉ ⵉⴳⴰⵏ ⵢⴰⵏ ⵓⵎⵓⴽⵏ ⴰⵣⵣⵔⴰⴼ ⴰⵅⴰⵜⴰⵔ ⴳ ⵓⵎⵏⴰⴹ ⵏⵏⵖ ⴰⵙⴳⴰⵡⴰⵏ, ⴷⴼⴼⵉⵔ ⵏ ⵓⵙⵖⵣⵏ ⵏ ⵜⵍⴳⴰⵎⵜ ⵜⴰⵏⴰⵎⵓⵔⵜ ⴳ ⵜⵉⵣⵉ ⵏ ⵉⵙⵜⴰⵢⵏ ⵉⵣⵣⵔⴰⴼⵏ ⴷⴼⴼⵉⵔ ⵏ 2002, ⵜⵙⴳⵓⴷⵉ ⵜⵎⴰⵣⵉⵔⵜ ⵏⵏⵖ ⵉⵎⵓⴽⵏⵏ ⵙⵜⵡⴰⵀⵎⵎⴰⵏⵉⵏ ⴳ ⵉⵍⵍⴰ ⵓⴷⵓⵙⵜⵓⵔ ⵍⵍⵉ ⵉⵙⵖⵣⵏ ⵓⵎⴰⴷⴰⵏ ⴰⵎⵖⵔⵉⴱⵉ ⴳ 2011 ⵉⵏⵏⴰⵏ ⵎⴰⵙ ⵉⵟⵟⴰⴼ ⵓⵔⴳⴰⵣ ⴷ ⵜⵎⵖⴰⵔⵜ ⵙ ⵢⵉⵙⴽⵉⵍ ⵉⵣⵔⴼⴰⵏ ⴷ ⵜⴷⵔⴼⵉⵢⵉⵏ ⵜⵉⵖⵔⵎⴰⵏⵉⵏ ⴷ ⵜⵙⵔⵜⴰⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⴷ ⵜⴷⵍⵙⴰⵏⵉⵏ ⴷ ⵜⵏⴼⴳⴰⵏⵉⵏ, ⴷ ⵎⴰⵙ ⵉⵎⵎⴰⵖ ⵓⵡⴰⵏⴽ ⵃⵎⴰ ⴰⴷ ⵢⵉⵍⵉ ⵢⵉⵙⴽⵉⵍ ⵊⴰⵔ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⴷ ⵓⵙⴽⵔ ⵏ ⵜⴳⵔⴰⵡⵜ ⵏ ⵢⵉⵙⴽⵉⵍ ⴷ ⵓⵙⴱⴷⴷⵓ ⵏ ⴽⵓ ⴰⵏⴰⵡⵏ ⵏ ⵓⵙⵏⵓⵃⵢⵓ (ⴰⵎⵏⵏⵉ 19 ⵏ ⵓⴷⵓⵙⵜⵓⵔ ⵏ ⵜⴳⵍⴷⵉⵜ).

ⵜⵜⵓⵙⴽⴰⵔⵏⵜ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵉ ⵚⴰⵃⴰ ⵏ ⵜⵎⵖⴰⵔⵉⵏ, ⵉⵍⵉⵏ ⵉⵣⵣⵔⴰⴼⵏ ⵙⵜⴰⵡⵀⵎⵎⴰⵏⵉⵏ ⴳ ⵢⵉⴳⵔ ⵏ ⵓⵙⴱⴷⴷⵉ ⵏ ⵓⵙⵏⵓⵃⵢⵓ, ⴷ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ ⴳⵉⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⵡⵉⴷⴰ ⵍⵍⴰⵏⵉⵏ ⴳ ⵉⵣⵣⵔⴰⴼⵏ ⵉⴷⵙⵍⴰⵏⵏ ⵢⴰⴹⵏⵉⵏ.

ⴳ ⵓⵙⵡⵉⵔ ⴰⵙⵔⵜⴰⵏ ⴷ ⵓⵎⵔⵙⴰⵍⵏ, ⵉⵍⵍⴰ ⵖⵓⵔⵏⵖ ⵓⴱⵓⵔⵣ ⴳ ⵍⵎⵖⵔⵉⴱ ⵙ ⵜⴷⵔⴰⵡⵜ ⵏ ⵜⵎⵖⴰⵔⵜ ⴳ ⵉⵙⵜⴰⵢⵏ, ⵙ ⵓⵙⵜⴰⵢ ⴷ ⵓⵙⵏⴽⴷ, ⵙⴳ ⵉⵙⵜⴰⵢⵏ ⵉⵎⵣⵡⵓⵔⴰ ⵍⵍⵉ ⵜⵙⵏⵎⴰⵍⴰ ⵜⵎⴰⵣⵉⵔⵜ ⵏⵏⵖ, ⵉⴳ ⵡⴰⵍⴰⵢ ⵉⵣⵣⵉⴳⵣⵏ ⵏ ⵜⵉⵍⵉⵜ ⵏ ⵜⵎⵖⴰⵔⵉⵏ ⴳ ⵜⵎⵔⵙⴰⵍ ⵜⵜⴰⵡⵙⵜⴰⵢⵏⵉⵏ, ⴰⵢⵍⵍⵉ ⵉⴳⴰⵏ ⵜⴰⵎⴰⵜⴰⵔⵜ ⵏ ⵓⵙⵓⵏⴼⵓ, ⵉⵖⵔ ⵉ ⵓⴼⴼⵓⴽⵙ ⵏⵏⵖ ⴰⵎⴳⵔⵓ ⵃⵎⴰ ⴰⴷ ⵏⵍⴽⵎ ⵉⵙⴽⵉⵍ ⴳ ⵓⵎⵏⵉⴷ ⵉⵇⵇⵔⴱⵏ. ⵉⵎⵎⴰⵜⵜⵉ ⵓⵏⵛⴽ ⵏ ⵜⴳⵎⴰⵎⵉⵏ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵙⴳ ⵙⵏⴰⵜ ⵜⵎⵖⴰⵔⵉⵏ ⴳ ⵜⵡⴰⵍⴰ ⵜⴰⵣⵣⵔⴰⴼⵜ 1993-1997 ⴰⵔ 95 ⵏ ⵜⵎⵖⴰⵔⵜ ⴳ ⵜⵡⴰⵍⴰ ⵏ ⵖⵍⴰⴷ ⵙ ⵎⴰⴷ ⵉⴳⴰⵏ 24.3 % ⵎⴳⴰⵍ 26.64 ⴳ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ.

ⵉⴳⴰ ⵢⵢⵉ ⴰⴷⴷⵓⵔ ⴰⴷ ⵙⵡⵓⵔⵉⵖ ⴷ ⴽⴽⵓⵥⵜ ⵜⵎⵖⴰⵔⵉⵏ ⴳⴰⵏⵉⵏ ⵜⵉⴳⵎⴰⵎⵉⵏ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ (ⴳⴰⵏⵜ 7.30 %), ⴰⵔ ⵙⵓⵜⴳⵖ ⵜⴰⵡⵡⵓⵔⵉ ⴷ ⵜⵉⵍⵉⵜ ⵏ ⵜⴳⵎⴰⵎⵉⵏ ⵏ ⵓⵙⵇⵇⵉⵎ, ⵙⵓⵜⴳⵖ ⵜⴰⵡⵡⵓⵔⵉ ⵏⵏⵙⵏⵜ ⵜⴰⵎⵙⵔⵙⵍⴰⵏⵜ ⴷ ⵜⵙⵔⵜⴰⵏⵜ ⵉⵔⵡⴰⵏ, ⵉⵥⵍⵉⵏ ⴳ ⵜⵉⴹⴰⴼ ⴷ ⵓⵣⵣⵔⴰⵢ ⴷ ⵓⵙⵓⵜⴳ ⴷ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ, ⵉⵖ ⵏⵏⵙⵏ ⵎⴰⵙ ⴷ ⴰⵙⵡⵉⵔ ⴰⵏⵎⵍⴰⵏ ⴷ ⵜⵓⴳⴳⴰ ⵜⵉⵎⴰⵙⵙⴰⵏⵉⵏ ⵟⵟⴰⴼⵏⵜ ⴽⵓ ⵜⵉⴳⵎⴰⵎⵏⵉⵏ ⵏ ⵓⵙⵇⵇⵉⵎ ⴰⵜⵜⵓⵢⵏⵉⵏ ⴱⴰⵀⵔⴰ ⴳⵉⵏⵜ ⵜⵉⵎⵉⵜⴰⵔ ⵏ ⵓⴱⵓⵔⵣ.

ⴰⵙⵓⵜⴳ ⴷ ⵓⵣⵓⵍ ⵉ ⴽⵓ ⵜⵉⵏⴳⴳⵯ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵜⵎⵙⵡⵓⵔⵉⵏ ⵏ ⵓⵙⵇⵇⵉⵎ, ⴷ ⵉ ⴽⵓ ⵜⵉⵎⵖⴰⵔⵉⵏ ⵏ ⵍⵎⵖⵔⵉⴱ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ

ⵉⵢⵍⵍⵉ ⵉⵜⵜⵓⵙⴽⴰⵔⵏ ⴳ ⵢⵉⴳⵔ ⵏ ⵉⵣⵔⴰⴼⵏ ⵏ ⵜⵎⵖⴰⵔⵉⵏ ⴷ ⵜⵉⵍⵉⵜ ⵏⵏⵙⵏⵜ ⴳ ⵡⴰⵎⵎⴰⵙⵏ ⵏ ⵜⵖⵜⴰⵙⵜ ⵜⴰⵙⵔⵜⴰⵏⵜ ⴷ ⵜⵎⵔⵙⴰⵍⴰⵏⵜ, ⵙ ⵉⵡⵉⵣ ⵎⵇⵇⵓⵔⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ ⵉ ⵜⵎⵙⴰⵙⵔⵜ ⵏ ⵜⵎⵖⴰⵔⵉⵏ ⴷ ⵓⵙⵉⵥⴹⵕ ⵏⵏⵙⵏⵜⵏ ⴷ ⵜⵉⵔⴰⵜ ⵏ ⴱⴰⴱ ⵏ ⵡⴰⴷⴷⵓⵔ ⵍⵍⵉ ⵉⵙⵔⵙⵏ ⵜⵉⵎⵖⴰⵔⵉⵏ ⴳ ⵜⵙⵔⵜⴰⵢ ⵜⵉⵎⴰⵜⴰⵢⵉⵏ ⴷ ⵜⵉⴳⴷⵓⴷⴰⵏⵉⵏ ⴷ ⵉⵡⵉⵣ ⵏⵏⵙ ⴼ ⵢⵉⵙⴽⵉⵍ ⵏ ⵜⵎⵖⴰⵔⵉⵏ.

ⵜⵎⵏⴰⵇⵇⴰⵔ ⵜⵉⵔⴰⵜ ⵜⴰⴳⵍⴷⴰⵏⵜ ⴷ ⵓⵙⵎⵓⵙⵙⵓ ⵏ ⵉⴽⴰⴱⴰⵕⵏ ⵉⵏⴰⵎⵔⵏ ⴷ ⵡⴰⵎⵓⵏ ⴰⵖⵔⵎⴰⵏ ⴷ ⵉⵎⵙⴽⴰⵔⵏ ⵉⵏⴰⵎⵓⵏⵏ ⵡⴰⵜⵜⵙⵏⵉⵏ ⵉⵡⵜⵜⴰⵙⵏ ⴰⴷ.

ⴰⴷ ⵏⵍⴽⵎ ⵢⵉⵙⴽⵉⵍ ⵓⵔ ⵉⴳⵉ ⵜⴰⵖⴰⵡⵙⴰ ⵉⵛⵇⵇⴰⵏ, ⵉⵔⴰ ⵜⵉⵔⴰⵜ ⵜⴰⵙⵔⵜⴰⵏ ⴷ ⵓⵙⵎⴰⵇⵇⵍ ⵉⵍⴻⵍⵍⵉ ⴷ ⵓⵏⴼⵓⵙ ⴷ ⵓⵙⵉⵥⴹⵕ ⵏ ⵜⵄⵔⵔⵉⵎⵉⵏ, ⵜⵉⵎⵖⴰⵔⵉⵏ ⵏ ⵉⵎⴰⵍ, ⴳ ⵓⵙⵙⵍⵎⴷ ⴷ ⵓⵙⴷⵍⵙ ⴷ ⵓⵙⵎⵓⵜⵜⴳ ⵉⵕⵡⴰⵏ, ⴳⴰⵏⵄⵏ ⵉⵎⵉⵙⵙ ⵏ ⵓⵙⵎⵖⵔ ⴰⵏⴰⵎⵓⵏ, ⴷ ⵜⵙⵉⵎⴰⵏⵜ ⴳ ⵓⵙⵡⵉⵏⴳⵎ ⴷ ⵓⵙⴽⵔ ⵏ ⵜⵖⵜⴰⵙⵜ, ⴷ ⵉⵎⴰⵙⵙⵏ ⵏ ⵓⵏⵏⵓⵕⵥⵎ, ⵉⵙⵖⴰⵡⵙⴰ ⵓⵍ ⴰⵙⵍⴻⵍⵉ ⵏ ⵜⴷⵍⵙⴰ ⵜⴰⵏⴰⵎⵓⵏⵜ ⴷ ⵉⵙⵡⵉⵏⴳⵉⵎⵏ ⵏ ⵉⵔⴳⴰⵣⵏ ⴳⴰⵏⵉⵏ ⵎⴳⴰⵍ ⵏ ⵉⵣⵔⴼⴰⵏ ⵏ ⵜⵎⴰⵖⴰⵔⵉⵏ ⴷ ⵜⵉⵍⵉⵜ ⵏ ⵡⴰⵜⵉⴳⵏ ⵏ ⵢⵉⵙⴽⵉⵍ.

ⵉⵔⴰ ⵡⴰⵡⵜⵜⴰⵙ ⴰⴷ ⵓⵍⴰ ⴰⵙⴽⵔ ⵏ ⵢⵉⵙⴽⵉⵍ ⴳ ⵜⴳⴰⵔⵡⵉⵏ ⵜⵉⵙⵔⵜⴰⵏⵉⵏ ⵉ ⵓⵙⴷⵓⵙ ⵏ ⵓⵙⴳⵎⵉ ⵏ ⵜⵉⴽⴽⵉ ⵏ ⵡⴰⵏⴰⵡ, ⵙ ⵜⵉⵍⴰⵍ ⵏⵏⵙⵏⵜ ⴳ ⵓⵙⵎⵓⵜⵜⴳ ⵏ ⵉⵏⵎⵓⵔⴰⵏ ⵉ ⵜⴷⵔⴰⵡⵜ ⴳ ⵜⵖⴰⵡⵙⴰ ⵜⴰⵎⴰⵜⴰⵢⵜ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵓⵔ ⵉⴳⵉ ⵓⵙⵉⴷⴼ ⵏ ⵜⵎⵖⴰⵔⵉⵏ ⴳ ⵜⴳⵎⵉ ⵖⴰⵙ ⴰⵙⵜⴰⵢ, ⵉⴳⴰ ⵓⵛⵛⵉⵍ, ⵓⵔ ⵏⵓⴼⵉ ⴰⴷ ⵏⵇⴱⵍ ⴰⴷ ⴱⴷⴷⵏ ⵜⴷⵓⵍⴰ ⵎⵇⵇⵓⵔⵏⵉⵏ ⴳ ⵡⴰⵎⵓ, ⵖⵎⴽ ⴰⵏⵏ ⴰⴼ ⵉⵙⵔⵙ ⵓⵙⵡⵉⵏⴳⵎ ⵉⵥⵍⵉⵏ ⴷ ⵡⴰⵏⴰⵡ ⵓⵏⴳⵉⵎ ⴰⵎⴰⵢⵏⵓ ⵜⵉⵎⵖⴰⵔⵉⵏ ⴳ ⵓⴳⵯⵏⵙ ⵏ ⵡⴰⵏⴰⵡ ⴰⴷ ⵢⵉⵡⵉⵏ ⴰⵎⵙⴰⵙⴰ ⵏ ⵜⵎⵜⵜⴰ.

ⴳ ⵡⴰⵙⵙ ⴰⵎⴰⴹⵍⴰⵏ ⵏ ⵜⵎⵖⴰⵔⵜ, ⵉⵇⵇⴰⵏ ⴷ ⴰⴷ ⵏⵙⵙⴽⵯⵜⵉ ⵓⴷⵎⴰⵡⵏ ⵏ ⵓⵎⵓⵔⵙ ⵏ ⵜⵎⵖⴰⵔⵉⵏ ⵜⵉⵎⵖⵔⵉⴱⵉⵢⵉⵏ ⴳⴰⵏⵉⵏ ⵜⵉⵏⵙⵙⵉⵅⴼⵉⵏ ⵏ ⵜⴳⵔⴰⵡⵉⵏ ⵜⵉⴷⵙⵜⴰⵔⵉⵏ ⴷ ⵜⵉⵏ ⵓⵏⴱⴰⴹ ⴷ ⵜⵎⵙⵙⵏⵜⴰⵢ ⴷ ⵜⴱⴰⵕⵍⴰⵎⴰⵏⵉⵢⵉⵏ ⴷ ⵜⵎⴰⵡⵙⴰⵙⵉⵏ ⴷ ⵜⵎⵙⵇⵇⴰⴷⵉⵏ ⴷ ⵜⵏⵙⵙⵉⵅⴼⵉⵏ ⵏ ⵜⵎⵙⵙⵏⵜⴰⵢ ⵜⵉⴳⴷⵓⴷⴰⵏⵉⵏ ⵜⵉⵙⵜⵔⴰⵜⵉⵊⵉⵢⵉⵏ, ⴷ ⵜⵙⵔⴷⴰⵙ ⴷ ⵜⵎⵏⵖⵓⵔⵉⵏ ⴱⴷⴷⵏⵉⵏ ⴼ ⵓⴼⵔⴰⴳ ⵏ ⵡⴰⵎⵓⵏ, ⴷ ⵜⵎⵙⵡⵓⵔⵉⵏ ⵏ ⵜⵏⴼⵔⵓⵜ ⵏ ⵡⴰⵎⵓⵏ, ⴷ ⵜⵎⵣⵡⴰⵔ ⵏ ⵜⴷⵎⵙⴰ ⵜⴰⵏⴰⵎⵓⵏⵜ ⴷ ⵜⵉⵏ ⵜⵡⵉⵣⵉⵏ ⴷ ⵜⴼⵍⵍⴰⵃⵉⵏ ⴳ ⵍⵎⵖⵔⵉⴱ ⵉⴷⵔⴰⵏ, ⴷ ⵜⵏⴰⵥⵓⵕⵉⵏ ⴷ ⵜⵎⵙⵏⴼⵍⵓⵏⵉⵏ ⴷ ⵜⵎⵙⵡⵓⵔⵉⵢⵉⵏ ⵎⵎⴰⵖⵏⵉⵏ ⴰⴷ ⵜⴱⴷⴷ ⵜⵎⴰⵜⴰⵔⵜ ⵏ ⵍⵎⵖⵔⵉⴱ, ⴷ ⵜⵏⴱⴹⴰⵢⵉⵏ ⴷ ⵜⵙⵍⵎⴰⴷⵉⵏ ⴷ ⵜⵎⵙⴰⵙⴼⵔⵉⵏ ⴷ ⵜⴼⵔⵎⵍⵉⵢⵉⵏ ⴷ ⵜⵎⵙⵡⵓⵔⵉⵢⵉⵏ. ⵡⴰⴷ ⵓⴷⵎ ⵏ ⵍⵎⵖⵔⵉⴱ ⵉⴼⴰⵡⵏ ⴳ ⵢⵉⴳⵔ ⵏ ⵉⵙⴽⵉⵍ ⴷ ⵓⵙⵍⴻⵍⵍⵉ ⵏ ⵜⵎⵖⴰⵔⵜ, ⵓⴷⵎ ⵍⵍⵉ ⴷ ⵉⵉⵇⴰⵏ ⵓⴱⵓⵔⵣ.

ⵍⵍⵉⵖ ⵜⵍⵍⴰⵎⵜ ⴳ ⵓⴷⵖⴰⵔ ⵏ ⵜⵎⵙⵙⵏⵜⴰⵢ ⵙⴽⴰⵔⵏⵉⵏ ⴰⵣⵣⵔⴰⴼ, ⴷⴰⵔⵓⵏⵜ ⴰⵏⴰⵥⴰⵕ ⵉⴳⴳⵓⵜⵏ ⵉ ⵓⵙⵖⵓⴷⵓ ⵏ ⵉⵙⵓⵔⵙⵏ ⵏ ⵜⵎⵖⴰⵔⵉⵏ ⴷ ⵓⵙⵖⵣⵏ ⵏ ⵉⵣⵣⵔⴰⴼⵏ ⴷ ⵜⵙⵔⵜⴰⵢ ⵉⵡⵙⵏⵉⵏ ⴳ ⵢⵉⵙⴽⵉⵍ. ⴰⵏⵎⵓⵇⵇⴰⵔ ⵔⴰⴷ ⵉⵙⴽⵉⵟⵟⵉ ⵉⵡⵜⵜⴰ ⵏ ⵜⵉⵍⵉⵜ ⵜⴰⵙⵔⵜⴰⵏⵜ ⵊⴰⵔ ⵏⵏⵓⵏⵜ ⵉ ⵓⵙⵡⵓⵔⵉ ⵉ ⵙⴰⵃⴰ ⵏ ⵜⵎⵙⴰⵔⵜ ⵏ ⵜⵎⵖⴰⵔⵉⵏ, ⵜⴳ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵡⵓⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵢⵉⵙⴽⵉⵍ ⴷ ⵓⵙⴰⵎⵓ ⵉⵜⵜⵓⴱⴷⴰⵔⵏ ⴳ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵍⵍⵉ ⵉⴳⴰⵏ ⴰⵙⵏⴰⵍ ⴷ ⵓⵙⴷⵓⵙ ⵏ ⵜⵢⵢⴰⴼⵓⵜⵓⵏ ⵏ ⵜⵎⵖⴰⵔⵉⵏ ⵖ ⴽⵓ ⵉⴳⵔⴰⵏ.

ⵓⵔ ⴳⵉⵙ ⵜⵓⵔⴷⴰ ⵎⴰⵙ ⴷ ⴰⵏⴰⵡ ⵏ ⵉⵏⵎⵓⵇⵇⴰⵔⵏ ⴰⴷ ⴰⵔ ⴰⵖ ⵎⵎⴰⵍⴰⵏⵜ ⵜⵉⵎⵙⴽⴰⵔ ⵜⵉⴳⵔⴰⵖⵍⴰⵏⵉⵏ ⵜⵉⵎⵣⴰⵔⵉⵢⵉⵏ, ⵔⴰⴷ ⴰⵡⵏⵜ ⴰⵡⵙⵏⵜ ⴰⴷ ⵜⵙⵙⵏⵎⵜ ⵜⵉⵎⵙⴽⵔⵜ ⵜⴰⵎⵖⵔⵉⴱⵉⵜ ⴳ ⵜⵎⵙⴰⵔⵜ ⵏ ⵜⵎⵖⴰⵔⵜ. ⵉ ⵉⵎⴷⵔⴰⵡⵏ ⵏⵏⵖ ⵉⴳⵔⴰⵖⵍⴰⵏⵏ, ⵢⵉⵍⵉ ⴳⵉⵙⵏ ⵓⵎⴷⵔⴰⵡ ⵏⵏⵖ ⵜⵉⵎⵔⵙⵍⵜ ⵏ ⵡⵉⵙⵜⵎⵉⵏⵙⵜⵔ ⵉ ⵜⴷⵉⵎⵓⵇⵔⴰⵟⵉⵜ ⴷ ⵉⵎⴷⵔⴰⵡⵏ ⵏⵏⵖ ⵉⴽⴰⵏⴰⴹⵉⵢⵏ, ⴷ ⵉⵙⵍⵎⴰⴷⵏ ⵉⵎⵓⵣⴰⵢⵏ ⴰⵙⵏⵉⵎⵎⵔ ⵏⵏⵖ.

ⵙⵉⵜⵎⵖ ⴰⵎⵓⵔⵙ ⵉ ⵜⵡⵡⵓⵔⵉⵡⵉⵏ ⵏⵏⵓⵏ, ⴰⵔ ⴽⵏⵜ ⵙⵏⵉⵎⵎⵉⵔⵖ ⴼ ⵓⵙⵙⴼⵍⴷ ⵏⵏⵓⵏⵜ.