ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ ⵓⴱⵕⵍⴰⵎⴰⵏ ⵏ ⵉⵡⴰⵏⴽⵏ ⵏ ⵍⴰⵏⴷⵉⵣ

ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ 2022 ⵏ ⵓⴱⵕⵍⴰⵎⴰⵏ ⵏ ⵉⵡⴰⵏⴽⵏ ⵏ ⵍⴰⵏⴷⵉⵣ ⵉⵍⵍⴰⵏ ⴳ ⴱⵓⴳⵓⵜⴰ ⵢⴰⵎⴰⵣⵓⵏⵜ ⵏ ⴽⵓⵍⵓⵎⴱⵢⴰ ⴳ 28 ⴱⵕⴰⵢⵕ ⴰⵔ 2 ⵎⴰⵕⵚ 2022.

ⵉⵍⵍⴰ ⴳ ⵓⴽⴰⴱⴰⵕ ⵏ ⵓⵙⵇⵇⵉⵎ ⵉⵎⵓⵔⴰ: ⵎⴰⵙⵙ ⴼⴰⵜⵉⵏ ⵍⵖⴰⵍⵉ ⵙⴳ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ, ⴷ ⵎⴰⵙⵙ ⵎⵓⵃⴰⵎⵎⴰⴷ ⵜⵡⵉⵎⵉ ⴱⵏ ⵊⵍⵍⵓⵏ ⵙⴳ ⵜⵥⵖⵓⵔⵜ ⴷ ⵜⵎⴰⵜⵔⴰⵔⵜ.

ⵉⴳⴰ ⵓⴷⵔⴰⵡ ⴰⴷ ⴰⴹⴼⵕ ⵏ ⵜⵉⵍⴰⵍ ⵏ ⵓⴱⵕⵍⴰⵎⴰⵏ ⵏ ⵉⵡⴰⵏⴽⵏ ⵏ ⵍⴰⵏⴷⵉⵣ ⴷ ⵓⵙⴷⵓⵙ ⵏ ⵜⴷⴷⵓⴽⴽⵯⵍⴰ ⴰⴽⴷ ⵉⵎⴰⴷⴰⵏⵏ ⵏ ⵉⵡⴰⵏⴽⵏ ⴰⴷ ⵖⵎⴽ ⴰⵏⵏ ⴷ ⵓⵎⵢⴰⵡⴰⴹ ⴰⴱⵕⵍⴰⵎⴰⵏⵉ.

ⵉⴷⵔⵓ ⵓⴽⴰⴱⴰⵕ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵖⵉⵎⵉⵜ ⵜⴰⵎⴰⵜⴰⵢⵜ ⴷ ⵜⵙⵎⵓⵏⴰⵢ ⵏ ⵜⵙⵇⵇⵉⵎⵉⵏ ⴷ ⵜⵙⵇⵇⵉⵎⵜ ⵏ ⵜⵙⵔⵜⵉⵜ ⵏ ⴱⵕⵕⴰ ⴷ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ.

ⵉⵎⴹⴰⴽⴰⵕ ⵓⴽⴰⴱⴰⵕ ⴷ ⵎⴰⵙⵙ ⵅⵡⴰⵏ ⵃⴰⴱⵍⵓ ⵍⵓⵜⵓⵍⵉⵔ ⵎⵓⵕⵉⵍ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵉⵡⴰⵏⴽⵏ ⵏ ⵍⴰⵏⴷⵉⵣ, ⵉⵙⴰⵡⴰⵍ ⴼ ⵜⵣⵣⵉⴳⵣⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵉⵙⴰⵡⵍ ⴼ ⵡⴰⵏⴰⵡ ⵓⵏⴳⵉⵎ ⴰⵎⴰⵢⵏⵓ ⴷ ⵓⵙⵎⴰⵜⴰ ⵏ ⵓⵙⴼⵍⵙ ⴰⴷⵓⵙⴰⵏ ⴷ ⵓⵡⴰⵏⴽ ⴰⵏⴰⵎⵓⵏ ⴷ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵖⴰⵔⵜ, ⵜⴰⵣⵣⵉⴳⵣⵜ ⵏ ⵓⵙⵙⴰⵔⵓ ⴳ ⵜⵎⵏⴰⴹⵉⵏ ⵏ ⵉⴼⴼⵓⵙ, ⵢⵉⵍⵉ ⵓⵍⴰ ⵓⵙⵙⵀⵔⵛ ⵏ ⴳⴰⵔ ⵜⵉⵎⵙⴽⴰⵔ ⵏ ⴱⵓⵍⵉⵥⴰⵕⵢⵓ ⴳ ⵜⵙⴳⴰ ⴰⴷ.

ⵉⵙⴷⴷⵉⴷ ⵓⴽⴰⴱⴰⵕ ⵎⴰⵙ ⵉⴷⵔⵓ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴰⴽⴷ ⴰⴱⵕⵍⴰⵎⴰⵏ ⵏ ⵍⴰⵏⴷⵉⵣ ⵉⵏⴰⵔⵓⵣⵏ ⵣⴷⵉⵏⵉ ⴷ ⵓⵣⵡⴰⴳ ⴷ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵜ ⴷ ⵓⵙⵏⴰⵍ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵏ ⵜⵎⵙⴰⵔⵉⵏ ⵍⵍⴰⵏⵉⵏ ⴳ ⵜⵙⴳⴰ ⵏ ⵍⴰⵏⴷⵉⵣ, ⵍⵍⵉⵖ ⵉⴳⴰ ⵍⵎⵖⵔⵉⴱ ⵜⵉⵖⵎⵔⵜ ⵏ ⵓⵏⵢⴰⵍⴰⴽⴰⵎ ⵊⴰⵔ ⵎⴰⵔⵉⴽⴰⵏ ⴷ ⵉⴼⵔⵉⵇⵢⴰ ⴷ ⵜⵎⵉⵣⴰⵔ ⵏ ⵡⴰⵄⵕⴰⴱⵏ. ⵉⵙⵙⵉⵙⴼⵉⵡ ⵓⴽⴰⴱⴰⵕ ⴰⴷⴷⴰⴷ ⵏ ⵍⵎⵖⵔⵉⴱ ⴼ ⵜⴰⵙⵙⴰⵙⵜ ⵉⵍⵍⴰⵏ ⵊⴰⵔ ⵔⵓⵙⵢⴰ ⴷ ⵓⴽⵕⴰⵏⵢⴰ ⴷ ⵓⵙⵏⴰⵍ ⵏ ⵜⵢⴰⵏⵜ ⵜⴰⵏⴰⴽⵍⵜ ⵏ ⵉⵡⴰⵏⴽⵏ ⵍⵍⴰⵏⵉⵏ ⴳ ⵜⵎⵜⵜⴰ ⵎⵓⵏⵏⵉⵏ ⴷ ⵓⵙⵉⵜⵜⵉ ⵏ ⵜⵎⴰⵖⵉⵏ ⵖ ⵉⴼⵙⵙⴰⵢⵏ.

ⴳ ⵓⵎⵏⵉⴷ ⵏⵏⵙ, ⵉⵙⴷⴷⵉ ⵓⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵉⵡⴰⵏⴽⵏ ⵏ ⵍⴰⵏⴷⵉⵣ ⴼ ⵜⵣⵣⵉⴳⵣⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴳ ⴽⵓ ⵉⴳⵔⴰⵏ ⴷ ⵓⴷⵔⵓ ⵏ ⵜⵣⴷⴰⵢⵉⵏ ⵏ ⵓⵎⵣⵔⵓⵢ ⵣⴷⵉⵏⵉⵏ ⵊⴰⵔ ⵉⵡⴰⵏⴽⵏ ⵏ ⵍⴰⵏⴷⵉⵣ ⴷ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵓⵙⵏⴰⵍ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ.

ⵉⵙⴽⵔ ⵓⴽⴰⴱⴰⵕ ⵉⵏⵎⵓⵇⵇⴰⵔⵏ ⴷ ⵉⴽⴰⴱⴰⵕⵏ ⵏ ⵍⴱⵉⵔⵓ ⴷ ⵉⴽⵡⴰⴷⵓⵔ ⴷ ⴱⵓⵍⵉⴼⵢⴰ ⴷ ⵛⵛⵉⵍⵉ.

ⵉⵜⵜⵓⵙⴽⴰⵔ ⵓⴱⵕⵍⴰⵎⴰⵏ ⵏ ⵜⵔⴰⴱⴱⵓⵜ ⵏ ⵉⵡⴰⵏⴽⵏ ⵏ ⵍⴰⵏⴷⵉⵣ ⴳ 1979, ⵉⴽⵛⵎ ⵙⵔⵙ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴳ 1996, ⴳⵉⵙ 25 ⵏ ⵓⴳⵎⴰⵎ ⵙ ⵙⵎⵎⵓⵙ ⵉⴳⵎⴰⵎⵏ ⵙⴳ ⴽⵓ ⴰⵡⴰⵏⴽ (ⴱⵓⵍⵉⴼⵢⴰ, ⴽⵓⵍⵓⵎⴱⵢⴰ, ⵉⴽⵡⴰⴷⵓⵔ, ⵍⴱⵉⵔⵓ, ⵛⵛⵉⵍⵉ), ⵉⵡⴰⵜⵜⴰⵙ ⴰⵣⵣⴷⵓⵢ ⵏ ⵓⵣⵣⵔⴰⴼ ⴷ ⵓⵙⵉⴷⴼ ⵊⴰⵔ ⵉⵡⴰⵏⴽⵏ ⵏⵏⵙ.