ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2021-2026:
ⴰⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵊⴰⵔ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⴱⵕⵍⴰⵎⴰⵏ ⵏ ⵜⵔⴰⴱⴱⵓⵜ ⵜⴰⴷⵎⵙⴰⵏⵜ ⵏ ⵉⵡⴰⵏⴽⵏ ⵜⴰⴳⵓⵜ ⵏ ⵉⴼⵔⵉⵇⵢⴰ
ⵉⵎⴹⴰⴽⴰⵕ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⵏⴰⵙ 21 ⴱⵕⴰⵢⵕ 2022 ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⴷ ⵎⴰⵙⵙ ⵙⵉⴷⵉ ⵎⵓⵃⵎⵎⴰⴷ ⵜⵓⵏⵉⵙ ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵜⵔⴰⴱⴱⵓⵜ ⵜⴰⴷⵎⵙⴰⵏⵜ ⵏ ⵉⵡⴰⵏⴽⵏ ⵏ ⵜⴰⴳⵓⵜ ⵏ ⵉⴼⵔⵉⵇⵢⴰ ⵉⵍⵍⴰⵏ ⴳ ⵓⵔⵣⴰⴼ ⵏ ⵜⵡⵡⵓⵔⵉ ⵉ ⵜⵎⴰⵣⵉⵔⵜ ⵏⵏⵖ.
ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵜⵔⴰⴱⴱⵓⵜ ⵜⴰⴷⵎⵙⴰⵏⵜ ⵏ ⵉⵡⴰⵏⴽⵏ ⵏ ⵜⴰⴳⵓⵜ ⵏ ⵉⴼⵔⵉⵇⵢⴰ ⵜⵉⵣⵡⵉⵔⵉ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⴳ ⵉⴼⵔⵉⵇⵢⴰ, ⵉⵙⵓⵜⴳ ⵜⵉⵣⴷⴰⵢⵉⵏ ⴷⵓⵙⵏⵉⵏ ⵙⵎⵓⵏⵏⵉⵏ ⵜⴰⴳⵍⴷⵉⵜ ⵏ ⵍⵎⵖⵔⵉⴱ ⴷ ⵉⵡⴰⵏⴽⵏ ⵏ ⵜⴰⴳⵓⵜ ⵏ ⵉⴼⵔⵉⵇⵢⴰ.
ⵢⵉⵏⵉ ⵎⴰⵙⵙ ⵙⵉⴷⵉ ⵎⵓⵃⵎⵎⴰⴷ ⵜⵓⵏⵉⵙ ⵎⴰⵙ ⵜⵎⵎⴰⵖ ⵜⵔⴰⴱⴱⵓⵜ ⴰⴷ ⴼ ⵓⵙⵕⵚⵓ ⵏ ⵜⵣⴷⴰⵢⵉⵏ ⵥⵉⵍⵏⵉⵏ ⴰⴽⴷ ⴰⴱⵕⵍⴰⵎⴰⵏ ⵏ ⵍⵎⵖⵔⵉⴱ, ⵢⵉⵏⵉ ⵎⴰⵙ ⵔⴰⴷ ⴰⵡⵙⵏⵜ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴳ ⵓⵎⵢⴰⴷⴰⵙ ⵊⴰⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⵔⴰⴱⴱⵓⵜ.
ⴳ ⵓⵎⵏⵉⴷ ⵏⵏⵙ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵎⴰⵙ ⵉⵎⵓⵏ ⵍⵎⵖⵔⵉⴱ ⴷ ⵜⵔⴰⴱⴱⵓⵜ ⴰⴷ ⵙ ⵜⵣⴷⴰⵢⵉⵏ ⴷⵓⵙⵏⵉⵏ, ⵉⵍⵍⵉⵏ ⴷⴰⵜ ⵏⵏⵙⵏ ⵜⵏⴰⵥⴰⵕⵉⵏ ⵏ ⵜⵏⴼⵔⵓⵜ ⴷ ⵓⵔⴳⴳⵉⴳ ⴷ ⵜⴳⵎⵉ ⴷ ⵓⵏⵣⵡⵉ ⴷ ⵜⵥⴹⴰⵕⵉⵏ ⴷ ⵓⴱⴰⵢⵢⵓⵕ ⵏ ⴽⵓⴼⵉⴷ 19, ⴰⵢⵍⵍⵉ ⵉⵙⵖⴰⵡⵙⴰⵏ ⴰⵎⵢⴰⴷⴰⵙ ⴷ ⵓⵣⴷⴷⵓⵢ ⴷ ⵜⵡⵡⵓⵔⵉ ⵉⵛⵛⴰⵔⵏ.
ⵉⵖⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵓⵙⴷⵓⵙ ⵏ ⵜⵡⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵜⴰⴼⵔⵉⵇⵉⵜ ⵉⵛⵛⴰⵔⵏ ⵉ ⵚⴰⵃⴰ ⵏ ⵉⵎⴰⴷⴰⵏⵏ ⵏ ⵓⵎⵏⵥⴰⵡ ⴷ ⵓⵙⴷⵓⵙ ⵏ ⵜⴷⵉⵎⵓⵇⵔⴰⵟⵉⵜ, ⵢⵉⵏⵉ ⵎⴰⵙ ⵜⴳⴰ ⵉⴼⵔⵉⵇⵢⴰ ⴰⵎⵥⴰⵡ ⵏ ⵉⵎⴰⵍ, ⵉⵇⵇⴰⵏ ⴰⴷ ⵉⵙⵡⵓⵔⵉ ⴽⵓⵢⴰⵏ ⵉ ⵜⴳⵎⵉ ⵏⵏⵙ.
ⵎⵙⴰⵛⴽⴰⵏ ⴷ ⵙⵉⵏ ⵉⵎⵙⵜⴳⴳⴰⵔⵏ ⴰⴷ ⵢⵉⵍⵉ ⵓⵎⵢⴰⵡⴰⵙ ⵊⴰⵔ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⴱⵕⵍⴰⵎⴰⵏ ⵏ ⵜⵔⴰⴱⴱⵓⵜ ⵜⴰⴷⵎⵙⴰⵏⵜ ⵏ ⵉⵡⴰⵏⴽⵏ ⵏ ⵜⴰⴳⵓⵜ ⵏ ⵉⴼⵔⵉⵇⵢⴰ, ⴷ ⵓⵎⵛⴰⵡⴰⵕ ⴷ ⵓⵣⴷⴷⵓⵢ ⴼ ⵜⵎⵙⴰⵔⵉⵏ ⵛⵛⴰⵔⵏⵉⵏ ⴷ ⵓⵙⴷⵓⵙ ⵏ ⵓⵎⵙⴰⵡⴰⵍ ⴰⴱⵕⵍⴰⵎⴰⵏⵉ.