ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2021-2026:
ⴰⵣⵎⵎⴻⵎ ⵏ ⵜⵎⵢⴰⵇⵇⴰⵏⵜ ⵏ ⵓⵎⵢⴰⵡⴰⵙ ⵊⴰⵔ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⵎⴰⵡⴰⵙⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⵉⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ
ⴰⵙⵙ ⵏ ⵓⵙⵉⵏⴰⵙ 1 ⴱⵕⴰⵢⵕ 2022, ⵉⵙⵙⵉⵅⴼ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵎⴰⵙⵙ ⵏⵄⵎⴰ ⵎⵉⵢⵢⴰⵕⴰ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⴷ ⵎⴰⵙⵙ ⵏⴰⵚⵉⵕ ⴱⵓⵕⵉⵟⴰ, ⴰⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⵉⴱⵉⵢⵏ ⵏ ⴱⵕⵕⴰ, ⵜⴰⴼⴼⵓⴳⵍⴰ ⵏ ⵓⵣⵎⵎⴻⵎ ⵏ ⵜⵎⵢⴰⵇⵇⴰⵏⵜ ⵏ ⵓⵎⵢⴰⵡⴰⵙ ⵊⴰⵔ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⵎⴰⵡⴰⵙⵜ ⴰⴷ ⵉⵜⵜⵓⴳⵏⵙⴰⵙⵏ ⵙ ⵜⴽⴰⴷⵉⵎⵉⵜ ⵜⴰⵎⵖⵔⵉⴱⵉⵜ ⵉ ⵜⵖⵓⵔⵉⵡⵉⵏ ⵜⵉⴷⵓⴱⵍⵓⵎⴰⵙⵉⵢⵉⵏ.
ⵉⵍⵍⴰ ⵓⵏⵎⵓⵇⵇⴰⵔ ⴰⴷ ⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵉⵙⴷⴷⵉⴷ ⵕⴰⵛⵉⴷ ⵟⴰⵍⴱⵉ ⵍⵄⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵎⴰⵙ ⵉⴳⴰ ⵓⵣⵎⵎⴻⵎ ⵏ ⵜⵎⵢⴰⵇⵇⴰⵏⵜ ⴰⴷ ⴰⵎⵢⴰⵡⴰⵙ ⴷ ⵓⵙⵎⴰⴷ ⵊⴰⵔ ⵓⴱⵕⵍⴰⵎⴰⵏ ⴷ ⵜⵏⴱⴰⴹⵜ ⵜⴰⵎⵙⵙⵓⴳⵓⵔⵜ, ⵉ ⵚⴰⵃⴰ ⵏ ⵜⵏⵓⴼⴰ ⵏ ⵜⵎⵓⵔⵜ. ⵉⵙⵙⴽⵜⵉⴷ ⵉⵙⵡⴰⵍⴰⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵓ ⴳ ⵓⵕⵥⵥⵓⵎ ⵏ ⵜⵡⴰⵍⴰ ⴰⴷ ⵜⴰⵣⵣⵔⴰⴼⵜ ⵍⵍⵉⵖ ⵉⵖⵔⴰ ⴱⴰⴱ ⵏ ⵡⴰⴷⴷⵓⵔ ⴰⴷ ⵉⴳⵓⵜⵏⵜ ⵜⵓⴳⴳⴰⵙ ⴼ ⵜⵎⵣⵡⴰⵔ ⵜⵉⵙⵜⵔⴰⵜⵉⵊⵉⵢⵉⵏ ⵉ ⵜⵣⵣⵉⴳⵣⵜ ⵏ ⵓⴱⵔⵉⴷ ⵏ ⵜⴳⵎⵉ ⴷ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵏ ⴱⵕⵕⴰ. ⵖⵎⴽ ⴰⵏⵏ ⴷ ⵉⵙⵡⴰⵍⴰⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴼ ⵓⵙⵎⴰⴷ ⴷ ⵓⵎⵙⴰⵙⴰ ⵊⴰⵔ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ ⵉ ⵚⴰⵃⴰ ⴰⵎⴰⵜⴰⵢ ⴷ ⵓⵎⵣⴰⵖ ⵏ ⵜⵎⵙⴰⵔⵉⵏ ⵜⵉⵣⵔⴼⴰⵏⵉⵏ ⵏ ⵜⵎⵜⵜⵉ.
ⵢⵉⵏⵉ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵉⴱⵓⵖⵍⴰ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵙ ⵉⴼⵔⴷⴰⵙ ⵏⵏⵙ ⵉⵙⵔⵜⴰⵏⵏ ⴷ ⵉⵏⵎⵓⵍⵍⵉⵢⵏ ⴷ ⵉⵏⴰⵎⵓⵏⵏ, ⵔⴰⴷ ⵉⵙⴽⵔ ⵜⵉⵍⴰⵍⵜ ⵏⵏⵙ ⴳ ⵓⵙⵡⵉⵔ ⴰⴷⵉⴱⵍⵓⵎⴰⵙⵉ ⴰⴱⵕⵍⴰⵎⴰⵏⵉ, ⵉⵙⵓⵜⴳ ⴰⵙⵏⴰⵍ ⵏ ⵜⵎⵙⵇⵇⴰⴷⵉⵏ ⵜⵉⵎⵖⵔⵉⴱⵉⵢⵉⵏ ⴳ ⴱⵕⵕⴰ ⵉ ⵉⴱⵕⵍⴰⵎⵏⵉⵢⵉⵏ ⴳ ⵜⵡⵡⵓⵔⵉ ⵏⵏⵙ ⴱⵕⵕⴰ ⵏ ⵜⵎⵓⵔⵜ.
ⵢⵉⵏⵉ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵎⴰⵙ ⵔⴰⴷ ⵜⴰⵡⵙ ⵜⵎⵢⴰⵇⵇⴰⵏⵜ ⴰⴷ ⴳ ⵓⵙⵏⴰⵍ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵙ ⵜⵎⵓⵛⴰ ⵙⵇⵇⵉⵇⵏⵉⵏ , ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵓⵎⵣⴰⵖ ⵏ ⵜⵎⵙⴰⵔⵉⵏ ⵜⵉⵏⴰⵎⵓⵔⵉⵏ ⴳ ⵜⵢⴰⵏⴰⵜ ⵜⴰⵏⴰⴽⴰⵍⵜ, ⴷ ⵓⴷⵔⴰⵡ ⵏ ⵜⴰⵏⵏⴰⵢⵢⵉⵏ ⴰⴽⴷ ⵉⴱⵕⵍⴰⵎⴰⵏⵏ ⵏ ⵓⵎⴰⴹⴰⵍ ⴼ ⵜⵎⵙⴰⵔⵉⵏ ⵛⵛⴰⵔⵏⵉⵏ ⴰⵎ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵓⵙⵎⴰⵜⵜⵉ ⴰⵎⵓⵟⵟⵓⵏ.