ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵙⵇⵇⴰⴷ ⵏ ⵜⴳⴷⵓⴷⴰⵏⵜ ⵏ ⵍⵎⴰⵊⴰⵕ

ⵉⵙⵏⵓⴱⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 12 ⵉⵏⵏⴰⵢⵔ 2022, ⵎⴰⵙⵙ ⵎⵉⴽⵍⵓⵙ ⵜⵔⵓⵎⵍⵔ, ⴰⵎⵙⵇⵇⴰⴷ ⵏ ⵜⴳⴷⵓⴷⴰⵏⵜ ⵏ ⵍⵎⴰⵊⴰⵕ (ⵀⴰⵏⵖⴰⵕⵢⴰ) ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ.

ⴳ ⵜⵣⵡⵉⵔⵉ, ⵉⵙⵙⵔⵖⴷ ⵎⴰⵙⵙ ⴰⵎⵙⵇⵇⴰⴷ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵢⵉⵏⵉ ⴰⵙ ⵉⵙⵔⵖⴷⵏ ⵏ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵍⵎⴰⵊⴰⵕ, ⵙ ⵜⵎⵍⴷⴰ ⵏ ⵓⵙⵜⴰⵢ ⵏⵏⵙ ⴷ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵙⵓⵜⴳ ⵜⵉⵣⴷⴰⵢⵉⵏ ⵕⵡⴰⵏⵉⵏ ⵜⵉⵙⵉⵏⵔⴰⵏⵉⵏ ⴷ ⵜⴳⵜⵉⵔⴰⵏⵉⵏ ⵊⴰⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⴳⴷⵓⴷⴰⵏⵜ ⵏ ⵍⵎⴰⵊⴰⵕ, ⵍⵍⵉ ⵉⵣⵣⵉⴳⵣⵏ ⴳ ⵜⵎⵔⴰⵡⵜ ⴰⴷ ⵜⴰⵎⴳⴳⴰⵔⵓⵜ ⵙ ⵜⵙⵏⵜⴰⵢⵉⵏ ⵍⵍⵉ ⴷ ⵉⵇⵇⴰⵏ ⵓⵙⴷⵓⵙ ⴷ ⵓⵣⴷⴷⵓⵢ ⴷ ⵓⵎⵛⴰⵡⴰⵕ ⴼ ⵜⵎⵙⴰⵔⵉⵏ ⵛⵛⴰⵔⵏⵉⵏ.

ⵉⵙⴰⵡⵍ ⵎⴰⵙⵙ ⴰⵎⵙⵇⵇⴰⴷ ⴼ ⵜⵙⵓⵎⵔⵜ ⵏ ⵓⵏⵔⴰⵎⴰⵙ ⵉⵍⵍⴰⵏ ⵊⴰⵔ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵖⵔⵉⴱⵉ ⴷ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵍⵎⴰⵊⴰⵕ ⴳ 29 ⵉⴱⵔⵉⵔ 2019, ⵜⵙⴰⵡⵍ ⴼ ⵓⵙⵎⵖⵔ ⵏ ⵜⵣⴷⴰⵢⵉⵏ ⵜⵉⵙⵔⵜⴰⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⴷⵍⵙⴰⵏⵉⵏ ⴷ ⵜⵎⴰⵙⵙⴰⵏⵉⵏ ⵊⴰⵔ ⵍⵎⵖⵔⵉⴱ ⴷ ⵍⵎⴰⵊⴰⵕ, ⴷ ⵓⵙⵉⴳⵓⵜ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵙ ⵓⵎⵙⴰⵡⴰⵍ ⴷ ⵓⵎⵛⴰⵡⴰⵕ ⵉ ⵜⵏⵓⴼⴰ ⵏⵏⵙⵏ ⵛⵛⴰⵔⵏⵉⵏ, ⴷ ⵓⵙⵏⴼⵍ ⵏ ⵉⵏⵖⵎⵉⵙⵏ ⴼ ⵜⵉⵍⴰⵍ ⵏ ⵓⵣⵣⵔⴰⴼ ⴷ ⵉⵔⵣⴰⴼⵏ ⴷ ⵓⵎⵢⴰⵡⴰⴹ ⵊⴰⵔ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴷ ⵜⵔⵓⴱⴱⴰ ⵏ ⵜⴷⴷⵓⴽⴽⵯⵍⴰ.

ⵢⵉⵏⵉ ⵓⵎⵙⵇⵇⴰⴷ ⵎⵉⵍⵓⵙ ⵜⵔⵓⵎⵍⵔ ⵉ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵓⵜⴳ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵜⴰⵎⴰⵊⴰⵕⵉⵜ ⵉⴼⴽ ⴰⵙ ⵜⵉⵖⵔⵉ ⵉ ⵓⵔⵣⴰⴼ ⵏ ⴱⵓⴷⴰⴱⵉⵙⵜ ⴳ ⵎⴰⵕⵚ ⴷ ⵢⵓⵛⴽⴰⵏ ⵉ ⵓⵙⴷⵓⵙ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵉⵏⵔⴰⵏⵉⵏ ⴷ ⵜⴳⵜⵉⵔⴰⵏⵉⵏ, ⴰⵢⵍⵍⵉ ⵙ ⵉⵙⴱⵔⵔⴽ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵍⵍⵉ ⵉⵙⴷⴷⵉⴷⵏ ⴼ ⵜⴷⵔⴰⵡⵜ ⵏⵏⵙ ⵉ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ ⴳ ⵜⵎⵙⴰⵔⵉⵏ ⵏ ⵜⵏⴼⵔⵓⵜ ⴷ ⵓⵔⴳⴳⵉⴳ ⴷ ⵓⵣⵡⴰⴳ ⴷ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵓⵎⵢⴰⵡⴰⵙ ⵏ ⵜⴷⵎⵙⴰ ⴷ ⵓⵙⵖⵏⵣⵉ ⴷ ⵜⵓⵙⵙⵏⴰ ⴷ ⵜⴷⵍⵙⴰ, ⴷ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⴷ ⵓⵙⴷⵓⵙ ⵏ ⵓⵎⵛⴰⵡⴰⵕ ⴷ ⵓⵣⴷⴷⵓⵢ ⴰⴱⵕⵍⴰⵎⵏⵉ ⴰⵙⵉⵏⵔⴰⵏ ⴷ ⵓⴳⵜⵉⵔⴰⵏ.

ⵉⵙⴰⵡⵍ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴼ ⵓⵎⵎⵉⵥⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵎⵔⴰⵡⵜ ⵉⴳⴳⵓⵔⴰⵏ, ⵢⵉⵍⵉ ⴳ ⵜⴳⵔⴰⵡⵉⵏ ⴷ ⵜⵎⴰⴷⴷⴰⵙⵉⵏ ⵜⵉⴱⵕⵍⴰⵎⵏⵉⵢⵉⵏ ⵜⵉⵏⵎⵏⴰⴹⵉⵏ ⴷ ⵜⴳⵔⴰⵖⵍⴰⵏⵉⵏ, ⵉⵙⴷⴷⵉⴷ ⵓⵍⴰ ⴼ ⵜⵣⴷⴰⵢⵉⵏ ⵥⵉⵍⵉⵏ ⵊⴰⵔ ⵕⵕⴱⴰⵟ ⴷ ⴱⵓⴷⴰⴱⵉⵙⵜ ⵟⵟⴰⴼⵏⵉⵏ ⴰⵎⵣⵔⵓⵢ. ⵢⵉⵏⵉ ⵎⴰⵙ ⵉⵏⵏⵓⵕⵥⵎ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵖⵔⵉⴱⵉ ⴼ ⵜⵙⵏⵜⴰⵢⵉⵏ ⵏ ⵓⵙⵏⴰⵍ ⵏ ⵜⵣⴷⴰⵢⵉⵏ ⵏⵏⵙ ⴰⴽⴷ ⵜⴰⵎⵙⵎⵓⵏⵜ ⵜⴰⵏⴰⵎⵓⵔⵜ ⵜⴰⵎⴰⵊⴰⵕⵓⵜ ⵉ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⵉ ⵉⵙⵡⵉⵔⵏ ⴰⵜⵜⵓⵢⵏⵉⵏ ⵍⵍⴰⵏⵉⵏ ⴳ ⵓⵖⴰⵡⴰⵙ ⴰⴱⵕⵍⴰⵎⵏⵉ ⴰⴳⵔⴰⵖⵍⴰⵏ.

ⵉⴳⴰ ⵓⵙⵏⵓⴱⴳ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵏ ⵎⴰⵙⵙ ⵎⵉⴽⵍⵓⵙ ⵜⵔⵓⵎⵍⵔ ⴰⵎⵙⵇⵇⴰⴷ ⵏ ⵜⴳⴷⵓⴷⴰⵏⵜ ⵏ ⵍⵎⴰⵊⴰⵕ, ⵜⴰⵎⵍⴷⴰ ⵏ ⵓⵎⴹⴰⴽⴰⵕ ⴷ ⵓⵙⵏⴼⵍ ⵏ ⵜⴰⵏⵏⴰⵢⵉⵏ ⴼ ⴽⵉⴳⴰⵏ ⵏ ⵜⵎⵙⴰⵔ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵏⵔⴰⵏⵉⵏ ⵜⵉⵏⵎⵏⴰⴹⵉⵏ ⴷ ⵜⴳⵔⴰⵖⵍⴰⵏⵉⵏ.