ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2021-2026:
ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵎⵙⵇⵇⴰⴷⵜ ⵏ ⵍⵎⵉⴽⵙⵉⴽ
ⵉⵙⵏⵓⴱⴳ ⵎ.ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵡⴰⵙ 9 ⴷⵓⵊⴰⵏⴱⵉⵔ 2021, ⵎⴰ.ⵎⴰⴱⵉⵍ ⴽⵓⵎⵉⵣ ⵓⵍⴼⵉⵔ ⵜⴰⵎⵙⵇⵇⴰⴷⵜ ⵏ ⵍⵎⵉⴽⵙⵉⴽ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ.
ⴳ ⵜⵣⵡⵉⵔⵉ, ⵜⵙⵏⵉⵎⵎⵔ ⵜⵎⵙⵇⵇⴰⴷⵜ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉ ⵉⵎⵓⵔⴰ ⴼ ⵓⵙⵏⵓⴱⴳ ⴷ ⵓⵙⴱⵔⵔⴽ, ⵜⵙⵙⵔⵖⴷ ⴰⵙ ⵙ ⵓⵙⵜⴰⵢ ⵏⵏⵙ ⴷ ⴰⵏⵙⵙⵉⵅⴼ ⵏ ⵓⵙⵇⵇⵉⵎ, ⴷ ⵜⵎⵢⵉⵎⴰⵏⵜ ⵍⵍⵉ ⵢⵉⵡⵉ ⵙⴳ ⵜⵓⴳⵜ ⵏ ⵉⴳⵎⴰⵎⵏ. ⵜⵙⴷⴷⵉⴷ ⴼ ⵡⴰⵜⵉⴳ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵊⴰⵔ ⵍⵎⵖⵔⵉⴱ ⴷ ⵍⵎⵉⴽⵙⵉⴽ ⴷ ⵓⵙⴷⵓⵙ ⵏⵏⵙⵏⵜ ⴼ ⵜⵎⵙⴰⵔⵉⵏ ⵛⵛⴰⵔⵏⵉⵏ ⴰⵎ ⴰⵣⵡⴰⴳ ⴼ ⵓⵙⵙⴰⵔⵓ ⴷ ⵜⴼⵍⵍⴰⵃⵜ ⴷ ⵜⴷⵍⵙⴰ, ⵜⵉⵏⵉ ⵎⴰⵙ ⵉⵎⵇⵇⵓⵔ ⵓⵎⵢⴰⵡⴰⵙ ⴰⴱⵕⵍⴰⵎⵏⵉ ⵊⴰⵔ ⵍⵎⵖⵔⵉⴱ ⴷ ⵍⵎⵉⴽⵙⵉⴽ, ⵉⵇⵇⴰⵏ ⴷ ⵓⵙⵎⵖⵔ ⵏⵏⵙⵏⵜ ⴳ ⵉⵏⵎⵓⵇⵇⴰⵔⵏ ⵉⵏⵎⵏⴰⴹⵏ ⴷ ⵉⵙⴳⴰⵡⴰⵏⵏ ⴷ ⵉⴳⵔⴰⵖⵍⴰⵏⵏ.
ⵜⵉⵏⵉ ⵜⵎⵙⵇⵇⴰⴷⵜ ⵏ ⵍⵎⵉⴽⵙⵉⴽ ⴰⵙⵏⴰⵍ ⵏ ⵜⵎⴰⵣⵉⵔⵜ ⵏⵏⵙ ⵉ ⵜⴱⵔⵉⴷⵜ ⵏ ⵜⵎⵜⵜⴰ ⵎⵓⵏⵏⵉⵏ ⴷ ⵓⵔⵇⵇⴰⵙ ⴰⵏⵉⵎⴰⵏ ⵏ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵎⵓⵏⵏⵉⵏ ⵃⵎⴰ ⴰⴷ ⵢⵉⵍⵉ ⵓⴼⵙⵙⴰⵢ ⵏ ⵓⴼⵔⴰ ⴷ ⵜⵣⵔⴼⵜ ⵉⵙⵓⵍⵏ ⴼ ⵉⵍⵍⴰ ⵓⵎⵙⴰⵛⴽⴰ ⴼ ⵜⵎⵙⴰⵔⵜ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ, ⵜⵙⴷⴷⵉⴷ ⴼ ⵓⵎⵙⴰⵡⴰⵍ ⴰⴱⵕⵍⴰⵎⴰⵏⵉ ⵊⴰⵔ ⵍⵎⵖⵔⵉⴱ ⴷ ⵍⵎⵉⴽⵙⵉⴽ ⵉ ⵓⵙⵉⵙⴼⵉⵡ ⵏ ⵜⴰⵏⵏⴰⵢⵢⵉⵏ ⴷ ⵡⴰⴷⴷⴰⴷⵏ, ⵜⵉⵏⵉ ⵎⴰⵙ ⵣⵣⵉⴳⵣⵏⵜ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⴳ ⵜⴳⴰⵔⵉⵡⵉⵏ ⴰⴷ, ⵙⵍⴰⵡⵏ ⴰⴽⴽⵯ ⵍⵍⵉⵖ ⵉⴽⵛⵎ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵙ ⵎⵏⵏⴰⵡ ⵉⵏⵎⵓⵇⵇⴰⵔⵏ ⴷ ⵉⴳⵔⴰⵡⵏ ⵉⴱⵕⵍⴰⵎⴰⵏⵉⵢⵏ ⴳ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⵍⴽⴰⵕⴰⵢⵉⴱ.
ⴳ ⵓⵎⵏⵉⴷ ⵏⵏⵙ, ⵉⵙⵏⵉⵎⵎⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵎⵙⵇⵇⴰⴷⵜ ⴼ ⵓⵔⵣⴰⴼ, ⵉⵙⴷⴷⵉⴷ ⵎⴰⵙ ⵉⵕⵥⵎ ⵍⵎⵖⵔⵉⴱ ⴼ ⵜⵙⵏⵜⴰⵢⵉⵏ ⵏ ⵓⵙⵏⴰⵍ ⵏ ⵜⵣⴷⴰⵢⵉⵏ ⵏⵏⵙ ⵜⵉⴱⵕⵍⴰⵎⴰⵏⵉⵢⵉⵏ ⴰⴽⴷ ⵍⵎⵉⴽⵙⵉⴽ, ⵍⵍⵉ ⴷ ⵢⴰⴷ ⵉⴽⴽⴰ, ⵉ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⵙ ⵉⵙⵡⵉⵔⵏ ⴱⴷⴷⵏⵉⵏ ⴼ ⵡⴰⵢⴷⴰ ⴰⵎⵣⵔⴰⵢ ⴰⵏⴼⴳⴰⵏ ⵉⵛⵛⴰⵔⵏ, ⴷ ⵓⵏⵏⵓⵕⵥⵎ ⴼ ⵜⵎⵙⴰⵔⵉⵏ ⴰⵎ ⴰⵣⵡⴰⴳ ⴷ ⵜⵥⴹⴰⵕⵉⵏ ⴷ ⵓⵙⵎⴰⵜⵜⵉ ⴰⵎⵓⵟⵟⵓⵏ ⴷ ⵓⵎⵢⴰⵡⴰⵙ ⴰⴷⵎⵙⴰⵏ ⴷ ⵓⵙⵖⵏⵥⵉ ⴷ ⵜⴷⵍⵙⴰ.
ⵉⵙⵙⴽⵜⵉ ⴷ ⵎ.ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵓⵎⵎⵉⵥⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵖⵔⵉⴱⵉ ⴳ ⵜⵎⵔⴰⵡⵜ ⵉⴳⴳⵓⵔⴰⵏ, ⵢⵉⵍⵉ ⴷⴰⵔⵙ ⵓⴷⵖⴰⵔ ⵉⵥⵉⵍⵏ ⴷⴰⵔ ⴽⵉⴳⴰⵏ ⵏ ⵜⴳⵔⴰⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ, ⵉⵙⴷⴷⵉⴷ ⴼ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⵍⵎⵉⴽⵙⵉⴽ ⴷ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ, ⵖⵎⴽ ⴰⵏⵏ ⴷ ⵓⵙⵡⵉⴳⵎ ⴳ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⵊⴰⵔ ⵉⴼⵔⵉⵇⵢⴰ ⴷ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ ⵉ ⵓⵎⵙⴰⵡⴰⵍ ⴰⴱⵕⵍⴰⵎⴰⵏⵉ ⵉⴼⴼⵓⵙ-ⵉⴼⴼⵓⵙ.
ⵉⴳⴰ ⵓⵙⵏⵓⴱⴳ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎ.ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵏ ⵜⵎⵙⵇⵇⴰⴷⵜ ⵏ ⵍⵎⵉⴽⵙⵉⴽ ⵎⴰ.ⵎⴰⴱⵉⵍ ⴽⵓⵎⵉⵣ ⵓⵍⴼⵉⵔ, ⵜⴰⵎⵍⴷⴰ ⵏ ⵓⵎⴹⴰⴽⴰⵕ ⴷ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ ⴼ ⵜⵎⵙⴰⵔⵉⵏ ⵜⵉⵙⵉⵏⵔⴰⵏⵉⵏ ⵜⵉⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ.