ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2021-2026:
ⵜⴰⴷⵉⵏⴰⵎⵉⵜ ⵜⴰⵎⴰⵢⵏⵓⵜ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵊⴰⵔ ⵍⵎⵖⵔⵉⴱ ⴷ ⴽⵓⵔⵢⴰ
ⵉⵙⵏⵓⴱⴳ ⵎ.ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵡⴰⵙ 9 ⴷⵓⵊⴰⵏⴱⵉⵔ 2021 ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⵎ.ⴽⵢⵓⵏⴳ ⵜⵛⵓⵏⴳ, ⴰⵎⵙⵇⵇⴰⴷ ⵏ ⵜⴳⴷⵓⴷⴰⵏⵜ ⵏ ⴽⵓⵔⵢⴰ ⴳ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ.
ⴳ ⵜⵣⵡⵉⵔⵉ, ⵉⵙⵙⵔⵖⴷ ⵓⵎⵙⵇⵇⴰⴷ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵙ ⵜⵎⵍⴷⴰ ⵏ ⵓⵙⵜⴰⵢ ⵏⵏⵙ ⴷ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵙⵓⵜⴳ ⵜⵉⵣⴷⴰⵢⵉⵏ ⵊⴰⵔ ⵕⵕⴱⴰⵟ ⴷ ⵙⵢⵓⵍ, ⴷ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴼ ⵉⵙⵡⴰⵍⴰⵢⵏ ⴷ ⵜⵎⵙⴽⴰⵔ ⵉ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⴽⵓⴼⵉⴷ 19.
ⵉⵙⴷⴷⵉⴷ ⵓⵎⵙⵇⵇⴰⴷ ⵏ ⴽⵓⵔⵢⴰ ⴰⵙⵏⴰⵍ ⵏ ⵜⵎⴰⵣⵉⵔⵜ ⵏⵏⵙ ⵉ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⵎⵙⴰⵔⵉⵏ ⵏⵏⵙ ⵜⵉⵣⵔⴼⴰⵏⵉⵏ ⴳ ⴽⵓ ⵉⵏⵎⵓⵇⵇⴰⵔⵏ ⵉⵏⵎⵏⴰⴹⵏ ⴷ ⵉⴳⵔⴰⵖⵍⴰⵏⵏ, ⵢⵉⵏⵉ ⵎⴰⵙ ⵜⵔⴰ ⵙⵢⵓⵍ ⴰⴷ ⵜⵙⵙⴷⵓⵙ ⵜⵉⵣⴷⴰⵢⵉⵏ ⵏⵏⵙ ⴷ ⵕⵕⴱⴰⵟ ⴳ ⵉⴳⵔⴰⵏ ⵛⵛⴰⵔⵏⵉⵏ ⴰⵎ ⴰⵙⵙⴰⵔⵓ ⴷ ⵓⵎⵢⴰⵡⴰⵙ ⴰⴷⵎⵙⴰⵏ ⴷ ⵓⵙⵏⴼⵍ ⵏ ⵓⵙⵖⵏⵣⵉ ⴷ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵜⵥⴹⴰⵕⵜ ⵜⴰⵎⴰⵢⵏⵓⵜ ⴷ ⵜⴻⵜⵉⴽⵏⵓⵍⵓⵊⵉⵜ.
ⵢⵉⵏⵉ ⵓⵍⴰ ⵎⴰⵙ ⵔⴰⴷ ⵜⵙⴼⵓⴳⵍⵓ ⵜⵎⵙⵇⵇⴰⴷⵜ ⵏ ⴽⵓⵔⵢⴰ ⴳ ⵓⵙⴳⴳⵯⴰⵙ ⴷ ⵢⵓⵛⴽⴰⵏ (2022) ⴰⴽⵜⵜⵓⵢ ⵏⵏⵙ ⵡⵉⵙ 60, ⵜⴳ ⵜⴰⵎⵍⴷⴰ ⵏ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⴳ ⵉⵙⵡⵉⵔⵏ ⵉⴱⵕⵍⴰⵎⴰⵏⵉⵢⵏ.
ⵉⵙⵏⵉⵎⵎⵔ ⵎ.ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵎ.ⴽⵢⵓⵏⴳ ⵜⵛⵓⵏⴳ, ⴰⵎⵙⵇⵇⴰⴷ ⵏ ⵜⴳⴷⵓⴷⴰⵏⵜ ⵏ ⴽⵓⵕⵢⴰ, ⴼ ⵓⵙⵙⵔⵖⴷ ⴷ ⵓⵔⵣⴰⴼ, ⵉⵙⵓⵜⴳ ⴰⵙⵡⵉⵔ ⵏ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⴽⵓⵔⵢⴰ, ⵢⵉⵏⵉ ⵎⴰⵙ ⴷ ⵉⵇⵇⴰⵏ ⵓⵏⵏⵓⵕⵥⵎ ⴼ ⵉⵙⴰⵢⵔⵓⵔⵏ ⵉⵎⴰⵢⵏⵓⵜⵏ ⴷ ⵓⵔⵣⵣⵓ ⵏ ⵜⵎⴷⵔⴰⵡⵉⵏ, ⵜⴳ ⵙⵢⵓⵍ ⴰⵎⴷⵔⴰⵡ ⴰⵎⴷⴷⴰⴽⴽⵍ ⵏ ⵕⵕⴱⴰⵟ ⵍⵍⵉⵖ ⵍⵍⴰⵏⵜ ⵜⵎⵏⴰⴳⴰⵔⵉⵏ ⵏ ⵜⵎⵙⴰⵔⵉⵏ ⴷ ⵜⵏⴰⵥⴰⵕⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴳ ⵎⵏⵏⴰⵡ ⵉⵙⵡⵉⵔⵏ, ⵉⴳ ⵍⵎⵖⵔⵉⴱ ⵜⵉⴼⵍⵓⵜ ⵏ ⴽⵓⵔⵢⴰ ⵙ ⵉⴼⵔⵉⵇⵢⴰ.
ⵉⵙⴼⵙⵔ ⵎ.ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵓⵎⵎⵉⵥⵏ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵉⵥⵉⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴷ ⵜⵙⵏⵜⴰⵢⵉⵏ ⵏⵏⵙ ⵜⵉⵎⴰⵜⵜⵓⵢⵉⵏ ⵙⴽⵔⵏⵉⵏ ⴳ ⵍⵎⵖⵔⵉⴱ ⵜⴰⵎⴰⵣⵉⵔⵜ ⵜⵎⵣⵡⴰⵔⵓⵜ ⴳ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19. ⵉⵙⵎⵏⵉⴷ ⵓⵍⴰ ⴰⵙⵎⴰⵇⵇⵍ ⴼ ⵜⵉⵔⵎⵉⵜ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ ⴷ ⵓⵙⴽⵔ ⵏ ⵉⵙⵜⴰⵢⵏ ⴳ ⵓⵣⵎⵣ ⵏ ⵓⴱⴰⵢⵢⵓⵕ, ⴰⵢⵍⵍⵉ ⵉⵣⵉⵢⴷⵏ ⵜⴰⵎⵢⵉⵎⴰⵏⵜ ⴳ ⵡⴰⵏⴰⵡ ⴰⵎⵖⵔⵉⴱⵉ ⴷ ⵉⵙⵡⴰⵍⴰⵢⵏ ⵏⵏⵙ.
ⵉⵙⴰⵡⵍ ⵓⵏⵙⵙⵉⵡⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵏⴰⵔⵓⵣ ⵏⵏⵙ ⵉ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⴽⵓⵔⵢⴰ ⴳ ⵉⵙⵡⵉⵔⵏ ⴰⵙⵉⵏⵔⴰⵏ ⴷ ⵓⴳⵜⵉⵔⴰⵏ ⵙ ⵓⵙⵎⵓⵏ ⵏ ⵜⴰⵏⵏⴰⵢⵢⵉⵏ ⴷ ⵡⴰⴷⴷⴰⴷⵏ ⴼ ⵜⵎⵙⴰⵔⵉⵏ ⵜⵉⴱⵕⵍⴰⵎⵏⵉⵢⵉⵏ ⵛⵛⴰⵔⵏⵉⵏ, ⴷ ⵓⵙⴽⵔ ⵏ ⵉⵙⴰⵢⵔⵓⵔⵏ ⵉⵎⴰⵢⵏⵓⵜⵏ ⵏ ⵓⵎⵢⴰⵡⴰⵙ ⴷ ⵓⵎⴹⴰⴽⴰⵕ ⴳ ⵉⴳⵔⴰⵏ ⵏ ⵓⵙⵙⵍⵎⴷ ⴷ ⵓⵙⴳⵎⵉ ⴷ ⵡⴰⵎⴰⵏ ⴷ ⵜⵥⴹⴰⵕⵉⵏ ⴷ ⵓⵙⵎⴰⵜⵜⵉ ⴰⵎⵓⵟⵟⵓⵏ ⴷ ⵉⵄⵔⵔⵉⵎⵏ ⴷ ⵜⴳⵎⵉ ⵜⴰⴷⵎⵙⴰⵏⵜ ⴷ ⵜⵎⴳⵓⵔⵉ ⴷ ⵓⵙⵙⴰⵔⵓ.
ⵉⴳⴰ ⵓⵙⵏⵓⴱⴳ ⴰⴷ ⵜⴰⵎⵍⴷⴰ ⵏ ⵓⵎⴹⴰⴽⴰⵕ ⴼ ⴽⵉⴳⴰⵏ ⵏ ⵜⵎⵙⴰⵔⵉⵏ ⵜⵉⵙⵏⵔⴰⵏⵉⵏ ⵛⵛⴰⵔⵏⵉⵏ ⵍⵍⵉ ⵔⴰⴷ ⵢⴰⵡⵙ ⴳ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ.