ⴰⵙⴷⵓⵙ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⴰⵙⵉⵏⵔⴰⵏ ⴷ ⵓⴳⵜⵉⵔⴰⵏ ⴳ ⵓⵙⵏⵓⴱⴳ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵜⵎⵙⵇⵇⴰⴷⵜ ⵏ ⴼⵕⴰⵏⵚⴰ

ⵉⵙⵏⵓⴱⴳ ⵎ.ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 8 ⴷⵓⵊⴰⵏⴱⵉⵔ 2021 ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⵎⴰ. ⵀⵉⵍⵉⵏ ⵍⵓⴳⴰⵍ ⵜⴰⵎⵙⵇⵇⴰⴷⵜ ⵏ ⴼⵕⴰⵏⵚⴰ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ.

ⴳ ⵜⵣⵡⵉⵔⵉ, ⵜⵙⵏⵉⵎⵎⵔ ⵜⵎⵙⵇⵇⴰⴷⵜ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵙⵏⵓⴱⴳ ⴷ ⵓⵙⴱⵔⵔⴽ, ⵜⵙⵔⵔⵖ ⴷ ⵜ ⵙ ⵜⵎⵍⴷⴰ ⵏ ⵓⵙⵜⴰⵢ ⵏⵏⵙ ⴷ ⴰⵏⵏⵙⵉⵅⴼ ⵏ ⵓⵙⵇⵇⵉⵎ, ⵜⵙⴰⵡⵍ ⴼ ⵓⵏⴰⵔⵓⵣ ⵏⵏⵙ ⵉ ⵓⵙⵎⵖⵔ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵉⵏⵔⴰⵏⵉⵏ ⴷ ⵜⴳⵜⵉⵔⴰⵏⵉⵏ ⴷ ⵓⵣⴷⴷⵓⵢ ⵊⴰⵔ ⵍⵎⵖⵔⵉⴱ ⴷ ⴼⵕⴰⵏⵚⴰ ⴳ ⵉⵏⵎⵓⵇⵇⴰⵔⵏ ⵉⴱⵕⵍⴰⵎⴰⵏⵉⵢⵉⵏ ⵉⵏⵎⵏⴰⴹⵏ ⴷ ⵉⴳⵔⴰⵖⵍⴰⵏⵏ, ⵍⵍⵉⵖ ⵉⴳⴰ ⵍⵎⵖⵔⵉⴱ ⴰⵎⴷⵔⴰⵡ ⴰⵎⵣⵡⴰⵔⵓ ⵏ ⴼⵕⴰⵏⵚⴰ  ⴳ ⴽⵉⴳⴰⵏ ⵏ ⵉⴳⵔⴰⵏ ⴷ ⵜⵎⵔⵙⴰⵍ.

ⵜⵙⵓⵜⴳ ⵜⵎⵙⵇⵇⴰⴷⵜ ⴰⵙⵏⴼⴰⵔ ⵏ ⵜⴳⵯⵎⴰⵜ ⵜⴰⵎⵔⵙⵍⴰⵏⵜ ⵜⴰⴱⵕⵍⴰⵎⴰⵏⵉⵜ, ⵜⵉⵏⵉ ⵎⴰⵙ ⵥⵉⵍⵏⵜ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⴷ ⵎⴰⵙ ⴷ ⵉⵇⵇⴰⵏ ⵓⴼⵔⴰⴳ ⵏ ⵜⴷⵉⵏⴰⵎⵉⵜ ⴰⴷ ⴷⴼⴼⵉⵔ ⵏ ⵉⵙⵜⴰⵢⵏ ⵉⴱⵕⵍⴰⵎⴰⵏⵉⵢⵏ ⴳ ⴼⵕⴰⵏⵚⴰ ⴳ ⵢⵓⵏⵢⵓ ⴷ ⵢⵓⵛⴽⴰⵏ, ⵙ ⵜⵔⵓⴱⴱⴰ ⵏ ⵜⴷⴷⵓⴽⴽⵍⴰ ⴷ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ  ⴰⴼⵕⴰⵏⵚⴰⵡⵉ ⴰⵎⵖⵔⵉⴱⵉ ⵖ ⵉⵍⵍⴰ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ ⴷ ⵉⵙⵡⵉⵏⴳⵉⵎⵏ ⴼ ⵜⵎⵙⴰⵔ ⵛⵛⴰⵔⵏⵉⵏ, ⴰⵎ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵓⵙⵎⴰⵜⵜⵉ ⴰⵎⵓⵟⵟⵓⵏ, ⴷ ⵜⵎⵙⵓⵜⴰⵍ ⵏ ⵓⴱⴰⵢⵢⵓⵔ ⵙ ⵜⵎⵣⵡⴰⵔ ⵜⵉⴷⵓⵙⴰⵉⵏ ⴷ ⵜⵏⴰⵎⵓⵏⵉⵏ ⴷ ⵜⴷⵎⵙⴰⵏⵉⵏ ⵍⵍⴰⵏⵉⵏ ⴳ ⵓⵖⴰⵡⴰⵙ ⴰⴱⵕⵍⴰⵎⴰⵏⵉ.

ⴳ ⵓⵎⵏⵉⴷ ⵏⵏⵙ, ⵉⵙⴱⵔⵔⴽ ⵎ.ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵎⴰ. ⵀⵉⵍⵉⵏ ⵍⵓⴳⴰⵍ ⵜⴰⵎⵙⵇⵇⴰⴷⵜ ⵏ ⴼⵕⴰⵏⵚⴰ, ⵢⵉⵏⵉ ⵎⴰⵙ ⵥⵉⵍⵏⵜ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⴼⵕⴰⵏⵚⴰ ⴳ ⴽⵓ ⵉⵙⵡⵉⵔⵏ ⴳ ⵓⵙⴰⵜⵉ ⵏ ⵓⵡⵇⵇⵔ ⵉⵜⵜⵓⵙⵏⴼⴰⵍⵏ ⵉ ⵜⵏⵏⵓⴱⴹⴰ ⵜⴰⵏⴰⵎⵓⵔⵜ ⴷ ⵓⵎⵣⴰⵖ ⵏ ⵜⵏⵓⴼⴰ ⵛⵛⴰⵔⵏⵉⵏ ⵏ ⵙⵏⴰⵜ ⵜⵎⵉⵣⴰⵔ, ⵉⵙⵓⵜⴳ ⵜⵉⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵉⵏⵔⴰⵏⵉⵏ ⵍⵍⴰⵏⵉⵏ ⴳ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⵍⵍⵉ ⵉⵙⴽⵔⵏ ⵎⵏⵏⴰⵡⵜ ⵜⵙⵓⵜⵍⵉⵏ, ⵉⴳ ⴰⵏⴰⵡ ⵉⵕⵡⴰⵏ ⴳ ⵜⵣⴷⴰⵢⵉⵏ ⵜⵉⵙⵏⵔⴰⵏⵉⵏ ⴷ ⵜⴳⵜⵉⵔⴰⵏⵉⵏ, ⵉⵙⴰⵡⵍ ⴼ ⵡⴰⵜⵉⴳ ⵏ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵉⴱⵕⵍⴰⵎⴰⵏⵉⵢⵏ ⵙ ⵓⵙⴷⵓⵙ ⵏ ⵜⵉⵍⴰⵍⵜ ⵏ ⵜⵔⵓⴱⴱⴰ ⵏ ⵜⴷⴷⵓⴽⴽⵍⴰ ⵜⴰⴱⵕⴰⵍⴰⵎⴰⵏⵉⵜ.

ⴳ ⵓⵏⵎⵓⵇⵇⴰⵔ ⴰⴷ, ⵉⵙⴰⵡⵍ ⵎ.ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴼ ⵓⵎⵎⵉⵥⵏ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⴷ ⵜⵙⵏⵜⴰⵢⵉⵏ ⵏⵏⵙ ⵍⵍⵉ ⵙⴽⵔⵏⵉⵏ ⴳ ⵜⴳⵍⴷⵉⵜ ⵜⴰⵎⴰⵣⵉⵔⵜ ⵜⴰⵎⵣⵡⴰⵔⵓⵜ ⴳ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19. ⵉⵙⵎⵏⵉⴷ ⵎⴰ.ⵟⴰⵍⴱⵉ ⵍⵄⴰⵍⴰⵎⵉ ⴰⵙⵎⴰⵇⵇⵍ ⴼ ⵜⵉⵔⵎⵉⵜ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ ⴷ ⵜⵎⵙⵓⵜⴰⵍ ⵏ ⵓⵙⵏⵎⴰⵍⴰ ⵏ ⵉⵙⵜⴰⵢⵏ ⴳⴳⵓⵔⴰⵏⵉⵏ ⵎⵇⵇⴰⵔ ⵉⵍⵍⴰ ⵓⴱⴰⵢⵢⵓⵕ, ⴰⵢⵍⵍⵉ ⵉⵣⵉⵢⴷⵏ ⴳ ⵜⵎⵢⵉⵎⴰⵏⵜ ⴳ ⵡⴰⵏⴰⵡ ⴰⵎⵖⵔⵉⴱⵉ ⴷ ⵉⵙⵡⴰⵍⴰⵢⵏ ⵏⵏⵙ.

ⵉⴳⴰ ⵓⵙⵏⵓⴱⴳ ⴰⴷ ⵓⵍⴰ ⵜⴰⵎⵍⴷⴰ ⵏ ⵓⵎⴹⴰⴽⴰⵕ ⴷ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ ⴼ ⵜⵎⵙⴰⵔⵉⵏ ⵜⵉⵙⵉⵏⵔⴰⵏⵉⵏ ⵜⵉⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ ⵛⵛⴰⵔⵏⵉⵏ.