ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2021-2026:
ⵉⴷⵔⵓ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴳ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⴰⵎⵓⵏⵜ ⵉ ⵓⵏⴰⵎⵎⴰⵙ, ⴰⵙⵇⵇⵉⵎ ⵏ ⵉⵎⵓⵔⴰ ⴷ ⴰⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵙⴳ ⴷⵓⵊⴰⵏⴱⵉⵔ
ⵉⵙⴷⴷⵉⴷ ⵓⵙⵉⵔⴰ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⴰⵎⵓⵏⵜ ⵉ ⵓⵏⴰⵎⵎⴰⵙ, ⴰⵙⵉⵏⴰⵙ 16 ⵏⵓⵡⵏⴱⵉⵔ 2021, ⵉⵙ ⵢⵓⵎⵥ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵖⵔⵉⴱⵉ ⵜⴰⵏⵙⵙⵉⵅⴼⵜ ⵏ ⵜⵎⵙⵓⵎⵏⵜ ⴰⴷ ⵙⴳ ⴰⴳⵔⴰⵡ ⵏ 3 ⴷ 4 ⴷⵓⵊⴰⵏⴱⵉⵔ, ⴷⴼⴼⵉⵔ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ.
ⴳ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵜⵎⵙⵎⵓⵏⵜ ⵙ ⵓⴼⵉⵣⵢⵓⴽⵓⵏⴼⵉⵕⵓⵏⵚ, ⵉⵙⴷⴷⵉⴷ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴼ ⵡⴰⵜⵉⴳ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⴰⵎⵓⵏⵜ ⵉ ⵓⵏⴰⵎⵎⴰⵙ ⵍⵍⵉ ⵉⴳⴰⵏ ⴰⵙⴰⵢⵔⵓⵔ ⵏ ⵓⵎⵙⴰⵡⴰⵍ ⴷ ⵓⵎⵛⴰⵡⴰⵕ ⴳ ⵜⵙⴳⴰ ⴰⴷ ⵉ ⵚⴰⵃⴰ ⵏ ⵓⴼⵔⴰ ⴷ ⵓⵔⴳⴳⵉⴳ ⴷ ⵜⴷⵉⵎⵓⵇⵔⴰⵟⵉⵜ.
ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵜⵏⴰⵥⴰⵕⵉⵏ ⵛⵛⴰⵔⵏⵉⵏ ⴷⴰⵜ ⵏ ⵜⵎⵉⵣⴰⵔ ⵏ ⵓⵏⴰⵎⵎⴰⵙ, ⵖ ⵍⵍⴰⵏ ⵉⵙⴷⵓⴷⴷⵉⵢⵏ ⴳ ⵜⵙⴳⴰ ⵏ ⵙⵙⴰⵃⵉⵍ, ⵉⵙⵓⵔⵙⵏ ⵏ ⵍⵉⴱⵢⴰ ⴷ ⵙⵓⵔⵢⴰ ⴷ ⴼⴰⵍⵉⵚⵟⵉⵏ, ⴰⵣⵡⴰⴳ ⴷ ⵓⴼⵔⴰ ⴷ ⵓⵔⴳⴳⵉⴳ, ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵡⴰⵡⵏⴰⴹ, ⴰⵎⴰⵏ ⴷ ⵜⵥⴹⴰⵕⵜ ⴷ ⵜⵏⴰⵥⴰⵕⵉⵏ ⵏ ⵜⵣⴷⵓⵖⵜ ⴷ ⵜⵎⵙⴰⵔⵉⵏ ⵢⴰⴹⵏⵉⵏ.
ⵢⵉⵏⵉ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵎⴰⵙ ⴷ ⵉⵇⵇⴰⵏ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵏ ⴽⵔⴰ ⵏ ⵉⵡⴰⵏⴽⵏ ⵏ ⵉⴼⴼⵓⵙ, ⴰⵎ ⴰⵙⵏⵣⵔⴼ ⴷ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵜⵏⴼⵔⵓⵜ ⴷ ⵓⵔⴳⴳⵉⴳ ⴷ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⴽⵓⴼⵉⴷ 19, ⵙ ⵜⵖⴰⵔⴰⵙⵜ ⵜⴰⵎⴳⵔⵓⵜ ⴷ ⵜⵙⵜⵔⴰⵜⵉⵊⵉⵜ ⵉⵣⵡⴰⵔⵏ ⴳ ⵉⴳⵔⴰⵏ ⵏ ⵜⴷⵎⵙⴰ ⴷ ⵜⴷⵍⵙⴰ ⴷ ⵜⵏⴼⵔⵓⵜ. ⵉⵙⴷⴷⵉⴷ ⵎⴰⵙ ⵉⴳⴰ ⵍⵎⵖⵔⵉⴱ ⴰⵏⴰⵡ ⴷ ⵜⵙⵉⵍⴰ ⵏ ⵜⵏⴼⵔⵓⵜ ⴷ ⵓⵔⴳⴳⵉⴳ ⴳ ⵜⵙⴳⴰ ⵏ ⵓⵏⴰⵎⵎⴰⵙ, ⵉⵎⵎⴰⵖ ⴼ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴽⴷ ⵉⵎⴷⴷⵓⴽⴽⴰⵍ ⴷ ⵡⴰⴹⵊⴰⵕⵏ ⴷ ⵉⵎⴷⵔⴰⵡⵏ ⵉ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⴰⴷ.
ⵉⵖⵔⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵓⵙⵔⵙ ⵏ ⵓⵎⵙⴰⵡⴰⵍ ⵉⵕⵡⴰⵏ ⵊⴰⵔ ⵜⵎⵉⵣⴰⵔ ⵏ ⵉⵥⵥⵍⵎⴹ ⴷ ⵉⴼⴼⵓⵙ ⵏ ⵓⵏⴰⵎⵎⴰⵙ ⵉⴱⴷⴷⵏ ⴼ ⵓⵡⵇⵇⵔ ⵉⵜⵜⵓⵙⵏⴰⴼⴰⵍⵏ, ⵢⵉⵏⵉ ⵎⴰⵙ ⵢⵓⵊⴰⴷ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵖⵔⵉⴱⵉ ⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴽⴷ ⵉⴱⵕⵍⴰⵎⴰⵏⵏ ⵏ ⵓⵏⴰⵎⵎⴰⵙ ⵉ ⵚⴰⵃⴰ ⵏ ⵉⵎⴰⴷⴰⵏⵏ ⵏⵏⵙ.
ⵢⵉⵏⵉ ⵎⴰⵙⵙ ⵕⴰⵛⵉⴷ ⵟⴰⵍⵍⴱⵉ ⵍⵄⴰⵍⴰⵎⵉ ⵎⴰⵙ ⴳⴰⵏ ⵉⵙⵏⴼⵍⵏ ⵏ ⵓⵏⵣⵡⵉ ⵜⴰⵡⵡⵓⵔⵉ ⵜⴰⵎⵣⵡⴰⵔⵓⵜ ⵏ ⵉⴱⵕⵍⴰⵎⴰⵏⵏ ⵏ ⵓⵏⴰⵎⵎⴰⵙ, ⵖⵎⴽ ⴰⵏⵏ ⴷ ⵓⵏⵏⵓⵕⵥⵎ ⴼ ⵉⴱⵕⵍⴰⵎⴰⵏⵏ ⵢⴰⴹⵏⵉⵏ ⵙⵍⴰⵡⴰⵏ ⴰⴽⴽⵯ ⵡⵉⵏ ⵜⴳⵍⴷⵉⵜ ⵏ ⵍⵓⵕⴹⵓⵏ, ⴷ ⵓⵙⴷⵓⵙ ⵏ ⵜⵎⵙⵙⵓⴳⵓⵔⵜ ⴷ ⵜⵎⵉⵔⵉⵜ ⵜⴰⵎⴰⵜⴰⵢⵜ ⵏ ⵜⵎⵙⵎⵓⵏⵜ.
ⵉⵍⵍⴰ ⴳ ⵜⵙⵎⵓⵏⵉ ⴰⴷ ⵓⵙⵓⵊⴷ ⵉ ⵓⴳⵔⴰⵡ ⵏ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⵏ ⵜⵎⵙⵎⵓⵏⵜ, ⴰⵙⵏⵎⴰⵍⴰ ⵏ ⵜⵏⴼⵍⵓⵙⵜ ⵏⵏⵙ ⵜⴰⵎⴰⵜⴰⵢⵜ, ⴷ ⵜⵏⵇⵇⴰⴹ ⵢⴰⴹⵏⵉⵏ ⵏ ⵓⵖⴰⵡⴰⵙ ⵏ ⵜⵡⵡⵓⵔⵉ.
ⵉⴳⴰ ⵍⵎⵖⵔⵉⴱ ⵙⴳ ⵉⵎⵙⴽⴰⵔⵏ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⴰⵎⵓⵏⵜ ⵉ ⵓⵏⴰⵎⵎⴰⵙ, ⵉⴳⴰ ⴰⵏⵙⵙⵉⵅⴼ ⵏⵏⵙ ⵙⵏⴰⵜ ⵜⵉⴽⴽⴰⵍ, ⵉⴳ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵓⵣⵣⵔⴰⵢ ⴷ ⵓⴹⴼⵕ ⵏ ⵜⴼⵔⴽⴰ ⴷⴼⴼⵉⵔ ⵏ ⴽⵓⴼⵉⴷ 19, ⵉⵙⵏⵓⴱⴳ ⵓⵍⴰ ⴽⵉⴳⴰⵏ ⵏ ⵜⵙⵎⵓⵏⴰⵢ ⵏ ⵜⵙⵇⵇⵉⵎⵉⵏ ⵏⵏⵙ ⵜⵉⵎⵖⵍⴰⵍⵉⵏ.