ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2021-2026:
ⴰⵙⴷⵓⵙ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⴰⵙⵉⵏⵔⴰⵏ ⴷ ⵓⴳⵜⵉⵔⴰⵏ ⴳ ⵓⵙⵏⵓⴱⴳ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵓⵎⵙⵇⵇⴰⴷ ⵏ ⵍⵢⴰⴱⴰⵏ
ⵉⵙⵏⵓⴱⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵡⴰⵙ 11 ⵏⵓⵡⴰⵏⴱⵉⵔ 2021, ⵎⴰⵙⵙ ⵛⵉⵏⵓⵣⵓⴽⴰ ⵜⴰⴽⴰⵛⵉ, ⴰⵎⵙⵇⵇⴰⴷ ⵏ ⵍⵢⴰⴱⴰⵏ ⴳ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ.
ⴳ ⵜⵣⵡⵉⵔⵉ, ⵉⵙⵙⵔⵖⴷ ⵓⵎⵙⵇⵇⴰⴷ ⵏ ⵍⵢⴰⴱⴰⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵙ ⵜⵎⵍⴷⴰ ⵏ ⵓⵙⵜⴰⵢ ⵏⵏⵙ ⴷ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵙⵓⵜⴳ ⵎⴰⵙⵙ ⵜⴰⴽⴰⵛⵉ ⵜⵉⵣⴷⴰⵢⵉⵏ ⵥⵉⵍⵏⵉⵏ ⵊⴰⵔ ⵕⵕⴱⴰⵟ ⴷ ⵟⵓⴽⵢⵓ ⴳ ⵜⴷⵎⵙⴰ ⴷ ⵓⵙⵖⵏⵣⵉ ⴷ ⵜⵎⴳⵓⵔⵉ ⴷ ⵜⴷⵍⵙⴰ, ⵉⵙⵓⵜⴳ ⵓⵍⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ , ⴰⴷ ⵜ ⵉⵏⵚⵕ ⵕⴱⴱⵉ, ⴷ ⵉⵙⵡⴰⵍⴰⵢⵏ ⴷ ⵜⵎⵙⴽⴰⵔ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⴽⵓⴼⵉⴷ 19.
ⵢⵉⵏⵉ ⵎⴰⵙⵙ ⴰⵎⵙⵇⵇⴰⴷ ⵛⵉⵏⵓⵣⵓⴽⴰ ⵜⴰⴽⴰⵛⵉ ⵎⴰⵙ ⵡⴰⵜⵜⵙⵏ ⵉⵙⵡⴰⵍⴰⵢⵏ ⵏ ⵜⵏⴱⴰⴹⵜ ⵏⵏⵙ ⴰⵏⵏⵓⵕⵥⵎ ⴼ ⵉⴼⵔⵉⵇⵢⴰ ⴷ ⵜⵎⵙⴰⵔⵉⵏ ⵏ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ, ⵉⵙⵓⵜⴳ ⴳ ⵓⵎⵏⵉⴷ ⴰⴷ ⵜⴰⵙⵔⵜⵉⵜ ⵜⴰⵎⵖⵔⵉⴱⵉⵜ ⴳ ⵢⵉⴳⵔ ⵏ ⵜⵥⴹⴰⵕⵜ, ⵢⵉⵏⵉ ⵎⴰⵙ ⵥⵉⵍⵏⵜ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵊⴰⵔ ⵍⵎⵖⵔⵉⴱ ⴷ ⵍⵢⴰⴱⴰⵏ, ⵜⵉⵔⵉ ⵜⵎⴰⵣⵉⵔⵜ ⵏⵏⵙ ⴰⵙⴷⵓⵙ ⵏⵏⵙⵏ ⴳ ⵓⵙⵡⵉⵔ ⴰⵙⵉⵏⵔⴰⵏ ⴷ ⵓⴳⵜⵉⵔⴰⵏ, ⵙ ⵓⵙⵏⴼⵍ ⵏ ⵉⵔⵣⴰⴼⵏ ⴷ ⵜⵔⵓⴱⴱⴰ ⵏ ⵜⴷⴷⵓⴽⴽⵍⴰ ⴷ ⵓⵣⴷⴷⵓⵢ ⴰⴱⵕⵍⴰⵎⴰⵏⵉ ⴰⴳⵔⴰⵖⵍⴰⵏ.
ⴳ ⵓⵎⵏⵉⴷ ⵏⵏⵙ, ⵉⵙⵏⵉⵎⵎⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴰⵎⵙⵇⵇⴰⴷ ⵏ ⵍⵢⴰⴱⴰⵏ ⴼ ⵓⵙⵙⵔⵖⴷ ⴷ ⵓⵔⵣⴰⴼ, ⵉⵙⵓⵜⴳ ⴰⵙⵡⵉⵔ ⵉⵥⵉⵍⵏ ⵏ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⵍⵢⴰⴱⴰⵏ, ⴷ ⵉⵎⵉⵥ ⵏ ⵟⵓⴽⵢⵓ ⴳ ⵢⴰⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵓⵎⵣⴰⵖ ⵏ ⵜⵏⵓⴼⴰ ⵏⵏⵙ ⵜⵓⴷⴷⵉⵔⵉⵏ ⴳ ⴽⵓ ⵉⵏⵎⵓⵇⵇⴰⵔⵏ ⵉⴳⵔⴰⵖⵍⴰⵏⵏ.
ⵉⵙⵓⵜⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵡⵉⵔ ⵏ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⵍⵢⴰⴱⴰⵏ ⵜⵉⵙⵏⵔⴰⵏⵉⵏ ⴷ ⵜⴳⵜⵉⵔⴰⵏⵉⵏ, ⵢⵉⵏⵉ ⵎⴰⵙ ⵉⵏⵏⵓⵕⵥⵎ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⴽⵓ ⵜⵉⵙⵏⵜⴰⵢⵉⵏ ⴷ ⵜⵎⵙⴰⵔⵉⵏ ⵛⵛⴰⵔⵏⵉⵏ ⴰⵎ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵜⵣⵣⵉⴳⵣⵜ ⵜⴰⵜⵉⴽⵏⵓⵍⵓⵊⵉⵜ.
ⵉⵙⴷⴷⵉⴷ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵎⴰⵙ ⵉⵔⴰ ⴰⵙⵎⵔⵙⵍ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵊⴰⵔ ⵍⵎⵖⵔⵉⴱ ⴷ ⵍⵢⴰⴱⴰⵏ ⴳ ⵉⵙⵡⵉⵔⵏ ⵉⵙⵉⵏⵔⴰⵏ ⴷ ⵉⴳⵜⵉⵔⴰⵏⵏ ⵙ ⵓⵙⵎⵓⵏ ⵏ ⵜⴰⵏⵏⴰⵢⵢⵉⵏ ⴷ ⵡⴰⴷⴷⴰⴷⵏ ⴼ ⵜⵎⵙⴰⵔⵉⵏ ⵛⵛⴰⵔⵏⵉⵏ ⴷ ⵓⵙⴽⵔ ⵏ ⵉⵙⵢⴰⵔⵓⵔⵏ ⵉⵎⴰⵢⵏⵓⵜⵏ ⵏ ⵓⵎⵢⴰⵡⴰⵙ.