ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴳ ⵓⵎⴹⴰⴽⴰⵕ ⵏⵏⵙ ⴰⴽⴷ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ...ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵜⴰⵍⵉⴱⵉⵜ ⵜⴰⵎⵙⵉⴽⵓⴷⵜ ⴼ ⵡⴰⵜⵉⴳ ⵏ ⵜⵣⵣⵉⴳⵣⵜ ⵏ ⵍⵎⵖⵔⵉⴱ ⴳ ⵓⵙⵏⴰⵍ ⵏ ⵓⵎⵙⵓⵔⵓⴼ ⴰⵏⴰⵎⵓⵔ ⴰⵍⵉⴱⵉⵉ
ⵉⵎⴹⴰⴽⴰⵕ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⵏⴰⵙ 28 ⵢⵓⵏⵢⵓ 2021 ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⴷ ⵎⴰⵙⵙ ⵄⴰⴱⴷⵍⵃⴰⵎⵉⴷ ⴷⴱⵉⴱⴰ, ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵜⴰⵎⵙⵉⴽⵓⴷⵜ ⵜⴰⵍⵉⴱⵉⵜ, ⵉⵍⵍⴰⵏ ⴳ ⵓⵔⵣⴰⴼ ⴰⵎⴰⴷⴷⵓⴷ ⵉ ⵜⵎⴰⵣⵉⵔⵜ ⵏⵏⵖ ⴳ ⵢⵉⵅⴼ ⵏ ⵓⴽⴰⴱⴰⵕ ⵉⵙⵜⴰⵡⵀⵎⵎⴰⵏ.
ⴳ ⵓⵏⵎⵓⵇⵇⴰⵔ ⴰⴷ, ⵉⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵜⴰⵎⵙⵉⴽⵓⴷⵜ ⵜⴰⵍⵉⴱⵉⵜ ⵜⵓⴳⴳⴰⵙ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⴰⴷ ⵡⵉⵙ ⵚⴹⵉⵚ ⴳ ⵓⴼⵙⴰⵢ ⵏ ⵜⴰⵙⵙⴰⵙⵜ ⵏ ⵍⵉⴱⵢⴰ, ⵢⵉⵏⵉ:” ⴷⴰ ⵏⵙⵏⵉⵎⵎⵉⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴷ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ , ⵀⴰ ⵏⵏ ⵜⵙⵙⴼⵓⵖⵎ ⴷ ⵜⴰⵙⴳⴰ ⴳ ⵎⵏⵏⴰⵡⵜ ⵜⴰⵙⵙⴰⵙⵉⵏ, ⵜⵙⴽⵔⵎ ⵜⴰⵡⵓⵔⵉ ⵜⴰⵅⴰⵜⴰⵔⵜ ⵉ ⵓⵎⴰⴷⴰⵏ ⴰⵍⵉⴱⵉ, ⵜⵙⵔⵙⵎ ⵜⵉⵔⵙⴰⵍ ⵏ ⵓⵎⵙⴰⵡⴰⵍ ⴰⵍⵉⴱⵉ-ⴰⵍⵉⴱⵉ ⵙⴳ ⵜⵖⵔⵎⵜ ⵏ ⵚⵚⵅⵉⵕⴰⵜ ⴳ ⵍⵎⵖⵔⵉⴱ”. ⵖⵎⴽⵍⵍⵉ ⵉⵙⴷⴷⵉⴷ ⴼ ⵡⴰⵜⵉⴳ ⵏ ⵜⵣⵣⵉⴳⵣⵜ ⵏ ⵍⵎⵖⵔⵉⴱ ⴳ ⵓⵙⵏⴰⵍ ⵏⵏⵙ ⵉ ⵓⵎⵙⵓⵔⵓⴼ ⴰⵏⴰⵎⵓⵔ ⴰⵍⵉⴱⵉ, ⵢⵉⵏⵉ:”ⵉⴳⴰ ⵍⵎⵖⵔⵉⴱ ⵜⴰⵎⴰⵣⵉⵔⵜ ⵜⴰⵔⴰⵡⵙⴰⵏⵜ, ⵉⵥⴹⴰⵕ ⴰⴷ ⵉⵙⵏⴰⵍ ⴰⵎⵙⵓⵔⵓⴼ ⴰⵏⴰⵎⵓⵔ”.
ⵉⵖⵔ ⵎⴰⵙⵙ ⵄⴰⴱⴷ ⵍⵃⴰⵎⵉⴷ ⴷⴱⵉⴱⴰ ⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⴳ ⵜⴷⵎⵙⴰ ⴷ ⵓⵙⵖⵏⵣⵉ ⵊⴰⵔ ⵙⵏⴰⵜ ⵜⵉⵎⵉⵣⴰⵔ, ⵉⵎⵍ ⴷ ⵎⴰⵙ ⵜⵙⵖⴰⵡⵙⴰ “ⵍⵉⴱⵢⴰ ⵜⴰⵎⴰⵢⵏⵓⵜ” ⵉ ⵜⵎⵓⵣⴰⵢⵉⵏ ⴷ ⵜⵎⵙⵙⵓⵔⵉⵏ ⵜⵉⵎⵖⵔⵉⴱⵉⵢⵉⵏ , ⵢⵉⵏⵉ ⵎⴰⵙ ⵉⵍⵍⴰ ⵓⵎⵙⴰⵙⴰ ⴰⴷ ⵢⵉⵍⵉ ⵓⵏⵎⵓⵇⴰⵔ ⴰⴷⵎⵙⴰⵏ ⴰⵎⵖⵔⵉⴱⵉ-ⴰⵍⵉⴱⵉ ⴳ ⵎⴰⴷ ⵢⴰⵥⵏ, ⵉ ⵓⵙⵉⵙⵙⵏ ⵏ ⵡⴰⵏⵏⴰⵣⵏ ⵏ ⵓⵙⵙⴰⵔⵓ ⵊⴰⵔ ⵙⵏⴰⵜ ⵜⵎⵉⵣⴰⵔ ⴷ ⵓⵎⵢⴰⵡⴰⵙ ⵉ ⵉⴷ ⴱⴰⴱ ⵏ ⵜⵡⵓⵔⵉⵡⵉⵏ ⴳ ⵓⵙⴽⵔ ⵏ ⵜⵎⴰⴷⵔⴰⵡⵉⵏ ⵏ ⵜⴷⵎⵙⴰ ⴷ ⵓⵙⵖⵏⵣⵉ.
ⴳ ⵜⵙⴳⴰ ⵏⵏⵙ, ⵉⵏⵏⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⴱⴷⴷⴰⴷ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵓⵎⴰⴷⴰⵏ ⴰⵍⵉⴱⵉ, ⵢⵉⵏⵉ:’ⵍⵎⵖⵔⵉⴱ ⵖⵓⵔⵙ ⵜⵉⵔⴰⵜ ⵜⴰⵙⵔⵜⴰⵏⵜ ⵉⴷⵓⵙⵏ ⵉ ⵓⵖⵓⵍ ⵏ ⵓⵚⴽⵓ ⵏ ⵍⵉⴱⵢⴰ ⴷ ⵓⵙⵏⴰⵍ ⵏ ⵓⵎⵙⴰⵡⴰⵍ ⴰⵍⵉⴱⵉ-ⴰⵍⵉⴱⵉ, ⵉⴳⴰ ⵓⵎⵙⵓⵔⵓⴼ ⴰⵏⴰⵎⵓⵔ ⴰⴼⵙⵙⴰⵢ ⵏ ⵜⴰⵙⵙⴰⵙⵜ ⵜⴰⵍⵉⴱⵉⵜ”.
ⵉⵙⴰⵡⴰⵍ ⵎⴰⵙⵙ ⵍⵎⴰⵍⴽⵉ ⴼ ⵡⴰⵜⵉⴳ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵓⵕⵥⵥⵓⵎ ⵏ ⵉⵎⵏⴰⴷⵏ ⵉⵎⴰⵢⵏⵓⵜⵏ ⵏ ⵓⵎⵢⴰⵡⴰⵙ, ⵉⵙⴷⴷⵉⴷ ⴼ ⵜⵣⴷⴰⵢⵉⵏ ⵥⵉⵍⵏⵉⵏ ⵊⴰⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵏ ⵙⵏⴰⵜ ⵜⵎⵉⵣⴰⵔ, ⵉⴱⴷⵔ ⵉⵙⵔⵙⵏ ⵏ ⵓⵎⵙⴰⵡⴰⵍ ⴰⵍⵉⴱⵉ-ⴰⵍⵉⴱⵉ ⴳ ⵚⵚⵅⵉⵕⴰⵜ ⴷ ⴱⵓⵣⵏⵉⵇⴰ ⴷ ⵕⵕⴱⴰⵟ ⴷ ⵟⴰⴱⵊⴰ. ⵉⵙⴷⴷⵉⴷ ⵎⴰⵙ ⴷ ⵉⵙⵜⴰⵢⵏ ⴷ ⵓⵛⴽⴰⵏⵉⵏ ⴳ ⵜⴳⵉⵔⴰ ⵏ ⵓⵙⴳⴳⵯⴰⵙ ⴳ ⵍⵉⴱⵢⴰ, “ⵔⴰⴷ ⴰⵡⵙⵏ ⵉ ⵓⵎⴰⴷⴰⵏ ⴰⵍⵉⴱⵉ ⴳ ⵓⵖⵓⵍ ⵏ ⵜⵡⴰⴷⴰ ⵏⵏⵙ ⴷ ⵓⵚⴽⵓ ⵏ ⵓⵡⴰⵏⴽ ⵏⵏⵙ ⵉⵔⴳⴳⵉⴳⵏ”.
ⵉⵍⵍⴰ ⴳ ⵓⵏⵎⵓⵇⵇⴰⵔ ⴰⴷ ⵓⵙⵏⴼⵍ ⵏ ⵜⴰⵏⵏⴰⵢⵉⵏ ⵅⴼ ⵜⵎⵙⴰⵔⵉⵏ ⵛⵛⴰⵔⵏⵉⵏ, ⵙⴷⴷⵉⴷⵏ ⵙⵉⵏ ⵉⵎⵙⵜⴳⴳⴰⵔⵏ ⴼ ⵡⴰⵜⵉⴳ ⵏ ⵓⵙⴽⵔ ⵏ ⵜⵙⵇⵇⵉⵎⵜ ⵜⴰⵎⴰⵜⵜⵓⵢⵜ ⵊⴰⵔ ⵍⵎⵖⵔⵉⴱ ⴷ ⵍⵉⴱⵢⴰ, ⴷ ⵓⵙⵎⵖⵔ ⵏ ⵓⵎⵢⴰⵡⴰⵙ ⴰⴷⵎⵙⴰⵏ ⴷ ⵡⵉⵏ ⵓⵙⵖⵏⵣⵉ ⵊⴰⵔ ⵜⵉⵎⵉⵣⴰⵔ, ⴷ ⵓⵙⵔⵅⵓ ⵏ ⵓⵎⵓⴷⴷⵓ, ⴷ ⵡⴰⵜⵉⴳ ⵏ ⵓⵙⴷⵓⵙ ⵏ ⵓⵎⵛⴰⵡⴰⵕ ⴷ ⵓⵣⴷⴷⵓⵢ ⵊⴰⵔ ⵏⵏⵙⵏ ⴳ ⴽⵓ ⵉⵏⵎⵓⵇⴰⵔⵏ ⵉⴳⵔⴰⵖⵍⴰⵏⵏ.