ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙⵎⵎⵓⵙ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴼ ⵜⴷⵎⵙⴰ ⴷ ⵓⵥⵕⴼ ⴷ ⵜⵙⵓⵎⵔⵜ ⵏ ⵓⵙⵍⴳⵏ ⴼ ⵜⵙⴷⴰⵍⵉⵏ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵓⵎⴰⴽⵕⴰⴹ, ⴰⵙⵉⵏⴰⵙ 22 ⵢⵓⵏⵢⵓ 2021, ⵙⵎⵎⵓⵙ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴷ ⵢⴰⵜ ⵜⵙⵓⵎⵔⵜ ⵏ ⵓⵙⵍⴳⵏ, ⴳ ⵙⵏⴰⵜ ⵜⵖⵉⵎⵉⵜⵉⵏ ⵍⵍⵉ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵃⴰⵎⵎⴰⴷ ⴱⵏⵄⴰⴱⴷⵍⵇⴰⴷⵔ ⴰⵎⴰⵡⵙⴰⵙ ⵏ ⵜⵣⵔⴼⵜ, ⴷ ⵎⴰⵙⵙ ⵎⵓⵃⴰⵎⵎⴰⴷ ⴱⵏⵛⴰⵄⴱⵓⵏ ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ.
ⴳ ⵓⵙⵎⵏⵉⴷ, ⵏ ⵓⵙⵏⴼⴰⵔ ⵏ ⵓⵙⵍⴳⵏ 95.17 ⴼ ⵜⵏⴼⴳⵓⵔⵜ ⴷ ⵜⵔⵇⵇⴰⵙⵜ ⵏ ⵓⵎⵙⴰⵙⴰ, ⵉⵏⵏⴰ ⵓⵎⴰⵡⵙⴰⵙ ⵏ ⵜⵣⵔⴼⵜ ⵎⴰⵙ ⵉⴳⴰ ⴰⵙⵎⴰⴷ ⵏ ⵓⵣⵣⵔⴰⴼ ⴳ ⵢⵉⴳⵔ ⵏ ⵓⵎⵓⴽⵏ ⵏ ⵜⵣⵔⴼⵜ, ⴷ ⵓⵙⵎⴰⵢⵏⵓ ⵏ ⵓⵏⴳⵔⴰⵡ ⴰⵣⵔⴼⴰⵏ ⴰⵏⴰⵎⵓⵔ ⵏ ⵓⵥⵕⴼ ⴷ ⵜⵡⵓⵔⵉⵡⵉⵏ, ⵢⵉⵏⵉ ⴰⵜⵉⴳ ⵏ ⵉⵎⴰⵙⵙⵏ ⵢⴰⴹⵏⵉⵏ ⴳ ⵓⴼⵓⴽⴽⵓ ⵏ ⵉⵎⴰⵖⵏ ⵙⵍⴰⵡⴰⵏ ⴰⴽⴽⵯ ⵜⴰⵔⵇⵇⴰⵙⵜ ⴷ ⵜⵏⴼⴳⵓⵔⵜ.
ⵉⵙⵎⵖⵔ ⵓⵙⵏⴼⴰⵔ ⵏ ⵓⵙⵍⴳⵏ ⵜⴰⵏⴼⴳⵓⵔⵜ ⵜⴰⴳⵯⵏⵙⴰⵏⵜ ⵍⵍⵉ ⵢⵓⵎⴰⵏ ⵉⵎⴰⵖⵏ ⵉⵖⵔⵎⴰⵏⵏ, ⴷ ⵡⴰⵔ ⵜⵉⵍⵉⵜ ⵏ ⵓⵏⴼⴳⵓⵔ ⵉ ⵜⵉⴹⴰⴼ ⵏ ⴽⵔⴰ ⵏ ⵜⵣⵔⴼⵜ, ⴷ ⵓⵙⴽⵔ ⵏ ⵓⵎⵙⴰⵙⴰ ⵏ ⵜⵏⴼⴳⵓⵔⵜ ⴷ ⵜⵔⵇⵇⴰⵙⵜ ⵏ ⵓⵎⵙⴰⵙⴰ ⵙ ⵜⴱⵔⴰⵜ ⵜⴰⵍⵉⴽⵟⵕⵓⵏⵉⵜ ⵙ ⵓⵎⵙⴰⵙⴰ ⴷ ⵉⵣⵣⵔⴰⴼⵏ ⵍⵍⴰⵏⵉⵏ.
ⵉⵡⴰⵜⵜⵙ ⵓⵙⵏⴼⴰⵔ ⵏ ⵓⵙⵍⴳⵏ 37.21 ⴼ ⵉⵙⵡⵓⴷⴷⵓⵜⵏ ⵥⵍⵉⵏⵉⵏ ⵙ ⵓⵙⵖⵏⵣⵉ ⵓⵙⵔⵉⴷ ⵏ ⵉⴳⵓⵎⵎⴰ ⴷ ⵉⵛⴰⴽⴰⵏ ⴳ ⵓⵙⴰⵜⵉ ⵏ ⵓⵙⵎⵓⵏ ⴰⵏⴼⵍⴰⵃ, ⴰⴷ ⵉⵍⵉⵏⵜ ⵜⵓⵔⴰⴳⵉⵏ ⴷⴰⵔ ⵉⴼⵍⵍⴰⵃⵏ ⵙⴳ ⵜⴰⵏⴱⴰⴹⵜ ⵏ ⵓⵙⵖⵏⵣⵉ ⵏ ⵉⵛⴰⴽⴰⵏ ⴷ ⵉⴳⵓⵎⵎⴰ ⵍⵍⴰⵏⵉⵏ ⴳ ⵉⵙⵏⴼⴰⵔⵏ ⵏ ⵓⵙⵎⵓⵏ ⴰⵏⴼⵍⴰⵃ ⵙ ⵓⵙⵔⵉⴷ ⴱⵍⴰ ⵣⵔⵉⵏ ⴳ ⵉⴳⴰⴷⴰⵣⵏ ⵏ ⵍⵊⵎⴰⵍⵜ, ⴷ ⵜⵡⵉⵙⵉ ⵉ ⵉⴼⵍⵍⴰⵃⵏ ⵎⵥⵥⵉⵏⵉⵏ ⴷ ⵓⵙⵖⵓⴷⵓ ⵏ ⵓⴼⴰⵔⵙ ⵏⵏⵙⵏ ⴷ ⵓⴽⵛⵎ ⵙ ⵉⴳⴰⴷⴰⵣⵏ ⵉⵎⴰⵢⵏⵓⵜⵏ, ⴷ ⵓⵙⵔⵓⵙ ⵏ ⵜⴼⴰⴷⵉⵡⵉⵏ ⴷ ⵜⵎⴰⵎⴽⵉⵏ ⵏ ⵜⵉⴽⴽⵉ ⵏ ⵜⵓⵔⴰⴳⵉⵏ.
ⵉⵙⵎⵏⵉⴷ ⵓⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ ⴰⵙⵏⴼⴰⵔ ⵏ ⵓⵙⵍⴳⵏ 83.20 ⴼ ⵜⵎⵙⴽⴰⵔ ⵏ ⵓⵕⵟⵟⴰⵍ ⵙ ⵉⵍⵓⵔⵉⵢⵏ, ⵢⵉⵏⵉ ⵎⴰⵙ ⵜⵣⵣⵉⴳⵣ ⵜⵎⴰⵣⵉⵔⵜ ⵏⵏⵖ ⴳ ⵓⵎⵓⴽⵏ ⵏ ⵓⵏⴳⵔⴰⵡ ⵏ ⵓⴳⴰⴷⴰⵣ ⴰⵥⵕⴼⴰⵏ ⴰⵏⴰⵎⵓⵔ ⵃⵎⴰ ⴰⴷ ⵉⴷⵓⵙ.
ⵢⵉⵡⵉ ⴷ ⵓⵙⵏⴼⴰⵔ ⵓⵛⵛⵉⵍ ⵏ ⵓⵙⴽⵔ ⵏ ⵉⴹⴰⴽⴰⵍⵏ ⴷ ⵓⵙⵎⵖⵔ ⵏ ⵜⵔⵇⵇⴰⵙⵜ ⴳ ⵉⵕⵟⵟⴰⵍⵏ, ⴷ ⵓⵙⵎⵖⵔ ⵏ ⵉⵡⴷⴰⵏ ⴷ ⵜⴳⵔⴰⵡⵉⵏ ⵎⵓ ⵔⴰⴷ ⵜⵜⵓⴼⴽⵉⵏ, ⴷ ⵓⵙⵎⴰⵜⴰ ⵏ ⵉⵍⵓⵔⵉⵢⵏ ⵍⵍⴰⵏⵉⵏ ⴳ ⵜⵡⵓⵔⵉⵡⵉⵏ ⵏ ⵉⵕⵟⵟⴰⵍⵏ.
ⵉⴳⴰ ⵓⵙⵏⴼⴰⵔ ⵏ ⵓⵙⵍⴳⵏ 50.20 ⴼ ⵓⵙⵥⵕⴼ ⴰⵎⵥⵢⴰⵏ ⴰⵙⵉⴷⴼ ⵏ ⵢⵉⴳⵔ ⵏ ⵉⵕⵟⵟⴰⵍⵏ ⵎⵥⵥⵉⵏⵉⵏ ⴳ ⵢⵉⴳⵔ ⴰⵥⵕⴼⴰⵏ ⴷ ⵓⵙⴷⵓⵙ ⵏ ⵓⵏⴱⴰⴹ ⵏⵏⵙ, ⵢⵉⵡⵉ ⴷ ⴰⵙⵡⵓⵜⵜⵓ ⵏ ⵉⵕⵟⵟⴰⵍⵏ ⵎⵥⵥⵉⵏⵉⵏ ⵙ ⵓⵎⵕⵚⵓⵎ, ⴰⵙⵉⵙⴼⵉⵡ ⵏ ⵓⴼⵓⴽⴽⵓ ⵏ ⵜⵎⵙⵎⵓⵏⵉⵏ ⵏ ⵉⵕⵟⵟⴰⵍⵏ ⵎⵥⵥⵉⵏⵉⵏ, ⴰⵙⵔⵓⵙ ⵏ ⵢⴰⵜ ⵜⴳⵏⵙⴰⵙⵜ ⵏ ⵢⵉⴳⵔ ⴰⴷ, ⴰⵎⵙⴰⵙⴰ ⴷ ⵓⵙⵍⴳⵏ ⵏ ⵍⴰⴱⵏⴰⴽ.
ⵉⴽⵛⵎ ⵓⵙⵏⴼⴰⵔ ⵏ ⵓⵙⵍⴳⵏ 19.20 ⵉ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ 17.95 ⴼ ⵜⵎⵙⵙⵓⵔⵉⵏ ⵜⵉⵡⵔⵙⴰⵖⵉⵏ ⴷ ⵓⵙⵍⴳⵏ 5.96 ⴼ ⵜⵎⵙⵙⵓⵔⵉⵏ ⵏ ⵜⵡⵉⵣⵉ ⴷ ⵜⵎⵙⵓⵔⵜ ⵏ ⵍⵓⵚⵉⵜ ⵜⴰⴼⵔⴰⵔⵜ ⴷ ⵜⵎⵙⵙⵓⵔⵜ ⵏ ⵍⵓⵚⵉⵜ ⵙ ⵜⵉⵍⴰⵜⵉⵏ ⴷ ⵜⵎⵙⵙⵓⵔⵜ ⵏ ⵜⴰⵎⴰⵙⴰⵢⵜ ⵉⵜⵜⵓⵙⵡⴰⵜⵜⵓⵏ ⴷ ⵜⵎⵙⵙⵓⵔⵜ ⵏ ⵜⵓⵛⵛⵔⴽⴰ, ⴳ ⵓⵙⵖⵓⴷⵓ ⵏ ⵜⵡⵓⵔⵉⵡⵉⵏ ⴷ ⵓⵙⵙⴰⵔⵓ, ⴰⵙⴷⵓⵙ ⵏ ⵓⵎⵏⵣⴰⵢ ⵏ ⵢⵉⵙⴽⵉⵍ ⵏⴳⵔ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⴳ ⵓⴳⵏⵙ ⵏ ⵜⵎⵙⵙⵏⵜⴰⵢⵜ, ⴰⵙⵙⵔⵇⴱ ⵏ ⵜⵙⵏⵜⴰⵢⵉⵏ ⵏ ⵜⵎⵙⵙⵓⵔⵉⵏ, ⴰⵙⵙⵔⵅⵓ ⵏ ⵓⴽⵛⵓⵎ ⵏ ⵜⵎⵙⵙⵏⵜⴰⵢⵉⵏ ⵙ ⵓⴳⴰⴷⴰⵣ ⵏ ⵉⵍⵓⵔⵉⵢⵏ , ⴰⵙⵖⵓⴷⵓ ⵏ ⵓⵏⴱⴰⴹ ⴷ ⵜⵎⴰⴼⴰⵡⵜ ⴷⴰⵔ ⵜⵎⵙⵙⵓⵔⵉⵏ ⵏ ⵜⵡⵉⵙⵉ, ⴰⵙⵎⴰⵜⴰ ⵏ ⵉⵎⴰⵙⵙⵏ ⵏ ⵓⵏⵢⴰⵍⴽⴰⵎ ⵙ ⵡⴰⵡⴰⵍ ⴷ ⵜⵓⵍⴰⴼⵜ ⵙ ⵜⵖⴰⵔⴰⵙⵜ ⵜⴰⵙⵓⵍⴰⵏⵜ ⴳ ⵜⵙⵎⵓⵏⴰⵢ ⵏ ⵉⵏⴳⵎⴰⵎⵏ ⵏ ⵜⵎⵙⵙⵓⴳⵓⵔⵜ ⴷ ⵓⵏⴱⴰⴹ ⵏ ⵜⵎⵙⵙⵓⵔⵉⵏ ⵏ ⵜⵡⵉⵣⵉ.
ⴳ ⵜⵖⵉⵎⵉⵜ ⵜⴰⵣⵣⵔⴰⴼⵜ ⵜⵉⵙ ⵙⵏⴰⵜ, ⵜⵙⵎⵏⵉⴷ ⵎⴰⵙⵙⴰ ⴰⵎⵉⵏⴰ ⵟⵟⴰⵍⴱⵉ, ⵙⴳ ⵜⵔⴰⴱⴱⵓⵜ ⵜⴰⵙⵔⵎⵓⵏⵜ, ⵜⴰⵙⵓⵎⵔⵜ ⵏ ⵓⵙⵍⴳⵏ ⵉⵙⵏⴼⵍⵏ ⵉⵎⵏⵏⵉⵜⵏ 9 ⴷ 24 ⴳ ⵓⵙⵍⴳⵏ 40.4 ⵉⴳⴰⵏ ⴰⵏⴳⵔⴰⵡ ⴰⴷⵙⵍⴰⵏ ⵏ ⵜⵙⴷⴰⵍⵉⵏ ⴼ ⵉⵍⵍⴰ ⵓⴹⴰⵀⵉⵕ ⵉ ⵓⵣⵣⴳⵉⵔ 1.08.77 ⵏ 20 ⵛⵡⵡⴰⵍ 1429 (20 ⴽⵟⵓⴱⵕ 2008), ⵜⵉⵡⵉ ⴷ ⵓⵛⵛⵉⵍ ⴰⴷ ⵜⵜⵓⴼⴽⵉⵏⵜ ⵜⵎⵢⴰⵇⵇⴰⵏⵉⵏ ⵏ ⵓⵙⴼⵍⵙ ⵉ ⵉⴷ ⴱⴰⴱⴰⵜⵙⵏ ⵏ ⵜⴰⵣⵣⴰⵏⵉⵏ, ⴷ ⵡⴰⵍⴰⵢ ⵏ ⵓⵏⵛⴽ ⵏ ⵜⴼⴳⵓⵔⵜ ⵉⵖ ⵓⵔ ⵉⵣⵎⵎⵉⵎ ⴱⴰⴱ ⵏ ⵜⵎⵔⵙⵍⵜ ⴽⵓ ⵜⴰⵣⵣⴰⵏⵉⵏ, ⴷ ⵜⵎⴰⵙⴰⵢⵜ ⵜⴰⵥⵕⴼⴰⵏⵜ ⵏ ⴱⴰⴱ ⵏ ⵜⵎⵔⵙⵍⵜ ⵎⵏⵉⴷ ⵏ ⴽⵔⴰ ⵏ ⵜⵎⵙⴰⵔⵜ ⵉⵊⵕⴰⵏ ⵉ ⴽⵔⴰ ⵏ ⵡⴰⵣⵣⴰⵏ ⵓⵔ ⵉⴽⵛⵎⵏ ⴰⵙⴼⵍⵙ.