ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵉⵕⵥⵎ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⴼⵙⵔ ⵏ “ⵜⵎⴽⵯⵜⵉⵜ ⵜⴰⴱⵕⵍⴰⵎⴰⵏⵉⵜ”
ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 09 ⵢⵓⵏⵢⵓ 2021, ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⴰⵕⵥⵥⵓⵎ ⵏ ⵓⵙⴼⵙⵔ ⵏ “ⵜⵎⴽⵯⵜⵉⵜ ⵜⴰⴱⵕⵍⴰⵎⴰⵏⵉⵜ” ⵉⵜⵜⵓⵙⴽⴰⵔⵏ ⵙ ⵜⴷⵔⴰⵡⵜ ⵊⴰⵔ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵎⵔⵙⵍⵜ ⵏ ⴰⵕⵛⵉⴼ ⵏ ⵍⵎⵖⵔⵉⴱ ⴷⴷⵓ ⵏ ⵓⵣⵡⵍ:”ⴰⴱⵕⵍⴰⵎⴰⵏ ⴰⵎⵖⵔⵉⴱⵉ: ⵜⵉⵎⵉⵜⴰⵔ ⵏ ⵜⵎⴽⵯⵜⵉⵜ”, ⵙ ⵜⵉⵍⵉⵜ ⵏ ⵎⴰⵙⵙ ⵊⴰⵎⵄ ⴱⵉⴹⴰ ⴰⵏⵎⵀⴰⵍ ⵏ ⴰⵕⵛⵉⴼ ⵏ ⵍⵎⵖⵔⵉⴱ, ⵎⴰⵙⵙ ⵎⵓⵚⵟⴰⴼⴰ ⵔⵔⴰⵎⵉⴷ, ⴰⵎⴰⵡⵙⴰⵙ ⵏ ⵓⵡⴰⵏⴽ ⵉⵜⵜⵓⵙⵎⴰⴳⴰⵍⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵣⴷⴰⵢⵉⵏ ⴷ ⵓⴱⵕⵍⴰⵎⴰⵏ, ⵉⵏⵙⵙⵉⵅⴼⵏ ⵉⵇⴱⵓⵔⵏ, ⵉⴳⵎⴰⵎⵏ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⵓⵔⴰ.
ⵉⵏⵏⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵉⵎ ⵏ ⵉⵎⵓⵔⴰ ⵎⴰⵙ ⵉⴳⴰ ⵓⵙⴼⵙⵔ ⴰⴷ ⵜⴰⵢⴰⴼⵓⵜ ⵏ ⵓⵎⵢⴰⵡⴰⵙ ⵊⴰⵔ ⵓⵙⵇⵇⵉⵎ ⵏ ⵉⵎⵓⵔ ⴷ ⴰⵕⵛⵉⴼ ⵏ ⵍⵎⵖⵔⵉⴱ, ⴷⴼⴼⵉⵔ ⵏ ⵜⵎⵢⴰⵇⵇⴰⵏⵜ ⵏ ⵓⵎⵢⴰⵡⴰⵙ ⵍⵍⵉ ⵣⵎⵎⵉⵎⵏ, ⵢⵉⵏⵉ ⵎⴰⵙ “ⵜⴳⴰ ⵜⵎⴽⵯⵜⵉⵜ ⵜⴰⴱⵕⵍⴰⵎⴰⵏⵉⵜ, ⴷⵉⴳⵙ ⵜⵉⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴳⵣⵣⵓⵎ ⵉⴱⵓⵖⵍⴰⵏ ⴳ ⵓⵎⵣⵔⵓⵢ ⵏⵏⵖ ⴰⵙⵔⵜⴰⵏ ⵏ ⵖⵉⵍⴰⴷ, ⴷ ⵓⵎⵣⵔⵓⵢ ⵏⵏⵖ ⴰⵏⴰⵎⵓⵔ, ⴰⵎⵣⵔⵓⵢ ⵏ ⵜⵖⵏⵙⴰ ⴷ ⵜⵉⴽⴽⵉ ⴷ ⵓⵙⴳⵓⴷⵉ, ⴰⵎⵣⵔⵓⵢ ⵖ ⵜⵍⵍⴰ ⵜⵉⵍⵉⵜ ⵏ ⴽⵕⴰⴹ ⵉⴳⵍⴷⴰⵏⵏ: ⴰⵅⴰⵜⴰⵔ ⵏ ⵓⵙⴷⵔⴼⵉ ⵉⴳⵍⵍⵉⵏ ⵏ ⵎⵓⵃⴰⵎⵎⴰⴷ ⵡⵉⵙ ⵙⵎⵎⵓⵙ, ⴰⴳⵍⵍⵉⴷ ⵉⴱⵏⴰⵏ ⵍⵎⵖⵔⵉⴱ ⴱⴰⴱ ⵏ ⵡⴰⴷⴷⵓⵔ ⵍⵃⴰⵙⴰⵏ ⵡⵉⵙ ⵙⵉⵏ ⴰⴷ ⵜ ⵉⵕⵃⵎ ⵕⴱⴱⵉ, ⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ”.
ⵉⵣⵎⵎⵉⵎ ⵎⴰⵙⵙ ⵍⵎⴰⵍⴽⵉ ⵎⴰⵙ ⵉⵣⴷⵉ ⵓⵎⵣⵔⵓⵢ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴷ ⵓⴷⵎⴰⵡⵏ ⴷ ⵡⴰⵙⵙⴰⵖⵏ ⴷ ⵉⵜⵔⴰⵏ ⵉⵏⴰⵎⵓⵔⵏ ⵙⴳ ⴽⵓ ⵜⵉⵙⵓⵖⴰⵍ ⴷ ⵜⴰⵡⵊⵉⵡⵉⵏ ⵜⵉⵙⵔⵜⴰⵏⵉⵏ ⴷ ⵜⵉⵏ ⵓⵙⵡⵉⵏⴳⵎ, ⵙⴳ ⴽⵓ ⵜⴰⵙⵓⵜⵉⵏ, ⴷ ⴽⵉⴳⴰⵏ ⵏ ⵉⵏⵎⵖⵓⵔⵏ ⵉⵏⴰⵎⵓⵔⵏ ⵙⵡⵓⵔⵉⵏⵉⵏ ⴳ ⵓⴱⵕⵍⴰⵎⴰⵏ ⵉⵡⵙⵏ ⴳ ⵓⴱⵓⵖⵍⵓ ⴷ ⵓⴹⴼⵕ ⴷ ⵓⵙⴳⵓⴷⵉ ⵏⵏⵙ. “ⵉⴳⴰ ⴰⵎⵣⵔⵓⵢ ⵉⴽⵛⵎⵏ ⴷ ⵓⵎⵣⵔⵓⵢ ⵏ ⵍⵎⵖⵔⵉⴱ ⴰⴷⵙⵜⴰⵔ ⴷ ⵓⵙⵔⵜⴰⵏ ⴷ ⵓⵣⵔⴼⴰⵏ, ⴷ ⵓⵎⵣⵔⵓⵢ ⵏ ⵉⴽⴰⴱⴰⵕⵏ, ⴷ ⵓⵎⵣⵔⵓⵢ ⵏⵏⵖ ⴰⵏⴰⵎⵓⵏ ⴷ ⵓⴷⵎⵙⴰⵏ ⴷ ⵓⴷⵍⵙⴰⵏ, ⴳ ⵉⵥⵓⵕⴰⵏ ⵉⵏⴰⵎⵓⵏⵏ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ, ⴷ ⵓⴼⴰⵔⵙ ⵏⵏⵙ ⴰⵣⵣⵔⴰⴼ ⴷ ⵡⵉⵏ ⵜⵉⴹⴰⴼ ⴷ ⵡⵉⵏ ⵜⴷⵉⴱⵍⵓⵎⴰⵙⵉⵜ, ⴷ ⵡⴰⴷⴷⴰⴷⵏ ⵏⵏⵙ ⴳ ⵜⵎⵙⴰⵔⵉⵏ ⵜⵉⵏⴰⵎⵓⵔⵉⵏ ⵜⵉⵅⴰⵜⴰⵔⵉⵏ ⵜⵉⵣⵡⵉⵔ ⵜⵏⵜ ⵜⵎⵙⴰⵔⵜ ⵏ ⵜⵢⴰⵏⵜ ⵏⵏⵖ ⵜⴰⵏⴰⴽⴰⵍⵜ ⴷ ⵜⵎⵙⴰⵔⵉⵏ ⵏⵏⵖ ⵜⴰⵄⵕⴰⴱⵉⵏ ⴷ ⵜⵓⵙⵍⵉⵎⵉⵏ ⴷ ⵜⵉⴼⵔⵉⵇⵉⵢⵉⵏ ⴷ ⵜⵏⴰⵎⵎⴰⵙⵉⵏ ⴷ ⵜⵏⴼⴳⴰⵏⵉⵏ”.
ⵉⵖⵔ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵉ ⵓⵙⵎⵖⵔ ⵏ ⵓⵙⴰⵢⵔⵓⵔ ⵏ ⵜⵎⴽⵯⵜⵉⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵓⵙⵡⵉⵔ ⴰⵅⴰⵜⴰⵔ, ⵙ ⵓⵙⴽⵔ ⵏ ⵜⵙⵏⵏⵉⵖⵜ ⵜⴰⵏⴰⵎⵓⵔⵜ ⵏ ⵜⵎⴽⵯⵜⵉⵜ ⵜⴰⴱⵕⵍⴰⵎⴰⵏⵉⵜ, ⵢⵉⵏⵉ” ⵉⵍⵍⴰ ⵓⵏⴰⵔⵓⵣ ⴰⴷ ⵢⵉⵍⵉ ⴷⴰⵔ ⵍⵎⵖⵔⵉⴱ ⴰⵎⴰⵢⵏⵓ ⴷ ⵜⴷⵉⵎⵓⵇⵔⴰⵟⵉⵜ ⵢⴰⵏ ⵓⴷⵖⴰⵔ ⴰⵎⵇⵔⴰⵏ, ⵉⴱⵓⵖⵍⴰⵏ ⵙ ⵜⵓⵎⴰⵢⵜ ⵏⵏⵙ ⴷ ⵉⵙⵡⵉⵏⴳⵉⵎⵏ ⴷ ⵜⵉⵏⴰⵡⵉⵏ ⴷ ⵜⵙⵓⵎⵔⵉⵏ ⵏ ⵓⵎⵣⵔⵓⵢ ⴷ ⵜⵉⵏ ⵜⵎⴰⵜⴰⵔⵉⵏ, ⵉⴳ ⵢⴰⵜ ⵜⵎⴰⵜⴰⵔⵜ ⵉⵥⵍⵉⵏ ⵉ ⵜⵎⴰⵣⵉⵔⵜ ⵏⵏⵖ ⴷ ⵓⵎⴰⴷⴰⵏ ⵏⵏⵖ”.
ⴳ ⵓⵎⵏⴰⴹ ⴰⴷ, ⵉⵖⵔⴰ ⵎⴰⵙⵙ ⵍⵎⴰⵍⴽⵉ ⵉ ⵉⵏⵙⵙⵉⵅⴼⵏ ⵉⵎⵣⵓⵡⵔⴰ ⵏ ⵓⵙⵇⵇⵉⵎ, ⴷ ⴽⵓ ⵉⴱⵕⵍⴰⵎⴰⵏⵉⵢⵉⵏ, ⴰⴷ ⴼⴽⵉⵏ ⵜⵓⵏⵖⵉⵍⵉⵏ ⵏ ⵜⵓⵍⴰⴼⵉⵏ ⵏⵏⵙ ⵣⴷⵉⵏⵉⵏ ⴷ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ, ⴷ ⵜⴻⵜⴳⴰⵔⵉⵏ, ⴷ ⵉⵡⴰⵔⵛⵉⴼⵏ ⵃⵎⴰ ⴰⴷ “ⴰⵡⵙⵏ ⴳ ⵓⵙⵎⵓⵏ ⵏ ⵡⴰⵕⵛⵉⴼ ⴰⴱⵕⵍⴰⵎⴰⵏⵉ”.
ⵉⵙⵎⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵙⴷⴷⵉⴷ ⵏ ⵓⵃⵟⵟⵓ ⵏ ⵜⵎⴽⵯⵜⵉⵜ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ , ⴷ ⵓⵙⵡⵉⵏⴳⵎ ⵏ ⵓⵙⴽⵔ ⵏ ⵜⵙⵏⵏⵉⵖⵜ ⵜⴰⵏⴰⵎⵓⵔⵜ ⵏ ⵓⵎⵣⵔⵓⵢ ⵏ ⵓⴱⵕⵍⴰⵎⴰⵏ, ⴷ ⵓⵎⵣⵔⵓⵢ ⵏ ⵓⵣⵣⵔⴰⴼ, ⴷ ⵓⵎⵣⵔⵓⵢ ⵏ ⵓⵙⴳⵓⴷⵉ ⴰⴷⵙⵜⴰⵔ ⴷ ⵓⵙⵔⵜⴰⵏ.