ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵙⵓⵊⴷ ⵉⵙⵓⵍⵏ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⵉ ⵓⵍⵜⴰⵖ ⴳ ⵓⵙⴰⵡⵓⵔ ⴰⵏⴰⵎⵓⵏ ⵉⵥⵍⵉⵏ ⵙ ⵡⴰⵏⴰⵡ ⴰⵏⴳⵎⵓ ⴰⵎⴰⵢⵏⵓ ⵍⵍⵉ ⴼ ⵢⵉⵡⵣ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ
ⵉⵙⴷⴷⵉⴷ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴼ ⵓⵙⵓⵊⴷ ⵉⵙⵓⵍⵏ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⵉ ⵓⵍⵜⴰⵖ ⴳ ⵓⵙⴰⵡⵓⵔ ⴰⵏⴰⵎⵓⵏ ⵉⵥⵍⵉⵏ ⵙ ⵡⴰⵏⴰⵡ ⴰⵏⴳⵎⵓ ⴰⵎⴰⵢⵏⵓ ⵍⵍⵉ ⴼ ⵢⵉⵡⵣ ⴱⴰⴱ ⵏ ⵡⴰⴷⴷⵓⵔ ⴰⴳⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, "ⵉⴳⴰ ⴷⴰⵔⵏⵖ ⵢⴰⵜ ⵜⴽⵕⴹⴰ ⵏ ⵓⴱⵔⵉⴷ ⵜⴰⵎⴰⵢⵓⵜ ⵉ ⵓⵣⴳⵔ ⵏ ⵓⴼⵔⴰ ⵙ ⵍⵎⵖⵔⵉⴱ ⵏ ⵉⵎⴰⵍ”, ⵉⵙⵓⵜⴳ ⵓⵍⴰ ⵜⵉⵢⴰⴼⵓⵜⵉⵏ ⴷ ⵉⵙⵖⵍⴰⴼ ⵏ ⵜⵙⵇⵇⵉⵎⵜ ⵏ ⵡⴰⵏⴰⵡ ⴰⵏⴳⵎⵓ.
ⵉⵜⵜⵓⵏⵏⴰ ⵎⴰ ⴰⵏⵏ ⴳ ⵜⴳⵓⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵓⵏⵎⵓⵇⵇⴰⵔ ⵉⵜⵜⵓⵙⴽⴰⵔⵏ ⴰⵙⵉⵏⴰⵙ 1 ⵢⵓⵏⵢⵓ 2021 ⴳ ⵓⵙⵖⵉⵎ ⵏ ⵓⴱⵕⵍⴰⵎⴰⵏ, ⵉ ⵓⵙⵙⴼⵍⴷ ⵉ ⵜⵉⵏⴰⵡⵜ ⵏ ⵎⴰⵙⵙ ⵛⴰⴽⵉⴱ ⴱⵏⵎⵓⵙⴰ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵉⵥⵍⵉⵏ ⵙ ⵡⴰⵏⴰⵡ ⴰⵏⴳⵎⵓ ⴼ ⵓⵏⵇⵇⵉⵙ ⵏⵏⵙ, ⴳ ⵉⵏⵎⵓⵇⵇⴰⵔⵏ ⵍⵍⵉ ⵜⵙⴽⴰⵔ ⵜⵙⵇⵇⵉⵎⵜ ⴷ ⵉⵎⵙⴽⴰⵔⵏ ⵉⵏⴰⵎⵓⵔⵏ ⴷ ⵉⵏⴰⵎⵓⵏⵏ, ⵙ ⵓⵣⵣⴳⵉⵔ ⵏ ⵉⵙⵡⴰⵍⴰⵢⵏ ⴰⵜⵜⵓⵢⵏⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.
ⵖ ⵓⵏⵎⵓⵇⵇⴰⵔ ⴰⴷ ⵍⵍⵉ ⵉⵙⵙⵉⵅⴼ ⴷ ⵎⴰⵙⵙ ⵄⴰⴱⴷⵍⵃⴰⴽⵉⵎ ⴱⵏ ⵛⵎⵎⴰⵛ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵙ ⵜⵉⵍⵉⵜ ⵏ ⵉⴳⵎⴰⵎⵏ ⵏ ⵓⵙⵉⵔⴰ ⵏ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵏ ⵡⴰⵏⴰⵡ ⴰⵏⴳⵎⵓ, ⵉⵏⵏⴰ ⵎⴰⵙⵙ ⵍⵎⴰⵍⴽⵉ “ⵎⴰⵙ ⵉⴳⴰ ⵓⵙⵎⵏⵉⴷ ⵏ ⵜⵢⴰⴼⵓⵜⵉⵏ ⵏ ⵓⵙⵇⵇⵉⵎ ⴰⵎⴰⵜⴰⵢ ⵏ ⵡⴰⵏⴰⵡ ⴰⵏⴳⵎⵓ ⴰⵎⴰⵢⵏⵓ ⴳ ⵓⴱⵕⵍⴰⵎⴰⵏ ⵢⴰⵜ ⵜⵖⴰⵡⵙⴰ ⵉⵟⵟⴰⴼⵏ ⴰⵎⵎⴰⴽⵏ ⵏⵏⵙ ⴷⵓⵙⵏⵉⵏ, ⵍⵍⵉⵖ ⵉⴳⴰ ⵓⴱⵕⵍⴰⵎⴰⵏ ⴷ ⵔⴰⴷ ⴱⴷⴷⴰ ⵉⴳ ⴰⵙⴰⵢⵔⵓⵔ ⵏ ⵓⵙⵡⵓⵜⵜⵓ ⵏ ⵓⵎⴹⴰⴽⴰⵕ ⴰⵎⴰⵜⴰⵢ, ⴷ ⵓⵎⴷⴰⵡⴰⵍ ⵏ ⵉⵙⵡⵉⵏⴳⵉⵎⵏ ⴷ ⵜⴰⵏⵏⴰⵢⵉⵏ, ⵉⴳ ⵜⴰⵎⴰⵜⴰⵔⵜ ⵏ ⵜⵉⵔⴰⵜ ⵜⴰⵎⴷⵏⴰⵏⵜ ⴷ ⵜⴷⵉⵎⵓⵇⵔⴰⵟⵉⵜ ⵏ ⵜⴳⵏⵙⴰⵙⵜ ⴷ ⵜⵎⴰⴷⵔⴰⵡⵜ ⵙ ⴽⵓ ⵉⵎⵏⵉⴷⵏ ⵏⵏⵙ”.
ⵉⵙⴰⵡⵍ ⵎⴰⵙⵙ ⵍⵎⴰⵍⴽⵉ ⴼ ⵓⵙⵓⵜⴳ ⵏ ⵉⵏⴰⵡ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⴰⵎⴷ ⵡⵉⵙ ⵚⴹⵉⵙ ⴳ ⵓⵕⵥⵥⵓⵎ ⵏ ⵓⵙⴳⴳⵯⴰⵙ ⴰⵣⵣⵔⴰⴼ 2017-2018 “ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⵖ ⵓⴱⵕⵍⴰⵎⴰⵏ ⵎⴰⵙ ⵉⵙⴽⵔ ⵍⵎⵖⵔⵉⴱ ⵜⴰⵣⵣⵉⴳⵣⵜ ⵉⴼⴰⵡⵏ, ⵙ ⵉⵙⵙⵏ ⵓⵎⴰⴹⴰⵍ, ⵉⵙⵖⴰⵡⵙⴰ ⵓⵍⴰ ⵙ ⵢⴰⵏ ⵡⴰⵏⴰⵡ ⴰⵏⴳⵎⵓ ⴰⵏⴰⵎⵓⵔ ⴰⵎⴰⵢⵏⵓ, ⵍⵍⵉⵖ ⵓⵔ ⵉⵥⴹⴰⵕ ⵡⴰⵏⴰⵡ ⵉⵣⵔⵉⵏ ⴰⴷ ⵉⵔⴰⵔ ⵉ ⵜⵓⵜⵔⴰⵡⵉⵏ ⴱⵉⴷⴷⵏⵉⵏ ⴷ ⵉⵙⵖⴰⵡⵙⴰⵜⵏ ⵣⵣⵉⴳⵣⵏⵉⵏ ⵏ ⵉⵏⵎⵓⵔⴰⵏ, ⴷ ⵓⵙⴱⴷⴷⵉ ⵏ ⵉⵙⵏⵓⵃⵢⵓⵜⵏ ⵏⴳⵔ ⵉⵡⴷⴰⵏ ⴷ ⵉⴷⵖⴰⵔⵏ, ⴷ ⵓⵙⴽⵔ ⵏ ⵜⵣⵔⴼⵜ ⵜⴰⵏⴰⵎⵓⵏⵜ. ⵖⵎⴽ ⴰⵏⵏ ⴰⴼ ⵉⵖⵔⴰ ⴱⴰⴱ ⵏ ⵡⴰⴷⴷⵓⵔ ⵉ ⵜⵏⴱⴰⴹⵜ ⴷ ⵓⴱⵕⵍⴰⵎⴰⵏ ⴷ ⴽⵓ ⵜⵉⵎⵔⵙⴰⵍ ⴷ ⵜⴳⵔⴰⵡⵉⵏ, ⵉ ⵜⵖⵔⵉ ⵏ ⵡⴰⵏⴰⵡ ⴰⵏⴳⵎⵓ ⵉⵣⵔⵉⵏ, ⴷ ⵓⵙⵓⵊⴷ ⵏ ⵓⵙⵎⴰⵇⵍ ⴰⵙⵉⴷⴼⴰⵏ ⵏ ⵡⴰⵏⴰⵡ ⴰⴷ, ⵙ ⵜⵉⴽⴽⵉ ⵏ ⵢⴰⵏ ⵓⵏⴼⵓⵙ ⴰⵎⴰⵢⵏⵓ. ⵖⵎⴽ ⴰⵏⵏ ⴰⴼ ⵉⵙⵎⵍ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵢⴰⵜ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵉ ⵓⵙⵓⵊⴷ ⵏ ⵡⴰⵏⴰⵡ ⴰⵏⴳⵎⵓ ⴰⵎⴰⵢⵏⵓ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵛⴰⴽⵉⴱ ⴱⵏⵎⵓⵙⴰ ⵍⵍⵉ ⵎⵓ ⵔⴰⴷ ⵏⵙⵙⴼⵍⴷ ⵖⵉⵍⴰⴷ”.
ⵢⵉⵏⵉ ⵎⴰⵙ ⵉⵍⵍⴰ ⵓⵏⵎⵓⵇⵇⴰⵔ ⴷⴼⴼⵉⵔ ⵎⴰ ⴷ ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴰⵙⵉⵏⴰⵙ 25 ⵎⴰⵢⵢⵓ ⴳ ⵓⴳⴰⴷⵉⵔ ⴰⴳⵍⴷⴰⵏ ⴳ ⴼⴰⵙ ⵜⴰⴼⵓⴳⵍⴰ ⵏ ⵓⵙⵎⵏⵉⴷ ⵏ ⵓⵏⵇⵇⵉⵙ ⴰⵎⴰⵜⴰⵢ ⵏ ⵜⵙⵇⵇⵉⵎⵜ. “ ⵉⴳⴰ ⵜⴰⵎⵍⴷⴰ ⵏ ⵓⵙⵓⵜⴳ ⵏ ⵜⵎⵢⴰⴷⴰⵙⵜ ⵏ ⵓⴷⵔⴰⵡ ⴷ ⵓⵎⵢⴰⵡⴰⵙ ⵍⵍⵉ ⵙ ⵜⵙⵡⵓⵔⵉ ⵜⵙⵇⵉⵎⵜ, ⴷ ⵜⵓⵎⴰⵢⵜ ⵏ ⵓⵏⵇⵇⵉⵙ ⵙ ⵡⴰⴽⴰⵣ ⵏ ⵉⵙⵓⵔⵙⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵡⵉⵢⵢⴰⴹ, ⴷ ⵜⵉⴽⴽⵉ ⵏ ⵓⵙⵎⴰⵇⵇⵍ ⵏ ⵉⵎⴰⵍ ⵉⴼⴰⵡⵏ ⵉⴱⴷⴷⵏ ⴼ ⵜⵔⵙⴰⵍ ⴷ ⵉⵙⴰⵖⵓⵍⵏ ⵉⵎⴰⵙⵙⴰⵏⵏ ⵏ ⴽⵓ ⵜⵉⵙⵔⵜⴰⵢ ⴷ ⵉⵖⴰⵡⴰⵙⵏ ⵉⴳⴷⵓⴷⴰⵏⵏ”.
ⵙ ⵉⵙⵎ ⵏ ⵉⴼⵔⴷⴰⵙ ⵏ ⵓⴱⵕⵍⴰⵎⴰⵏ, ⵉⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵜⵉⵢⴰⴼⵓⵜⵉⵏ ⴷ ⵉⵙⵖⵍⴰⴼ ⵏ ⵓⵏⵇⵇⵉⵙ “ⵍⵍⵉ ⵉⵡⵉⵏⵉⵏ ⴰⵅⵎⵎⴻⵎ ⵉⵥⵍⵉⵏ ⵏ ⵜⴳⵔⴰⵡⵉⵏ ⵜⵉⴳⵔⴰⵖⵍⴰⵏⵉⵏ”. ⵉⵙⵓⵜⴳ ⵓⵍⴰ ⵉⵎⴰⵏ ⵏ ⵓⵙⴷⵔⵓ ⴷ ⵓⵙⵙⴼⵍⴷ ⵉ ⴽⵓ ⵉⴼⵔⴷⴰⵙ ⵉⵙⵔⵜⴰⵏⵏ ⴷ ⵉⵏⵎⵓⵍⵍⴰ ⴷ ⵜⵎⵙⵎⵓⵏⵉⵏ ⵜⵉⵖⵔⵎⴰⵏⵉⵏ ⴷ ⵜⵣⵣⵓⵍⴰⵏⵉⵏ ⴷ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵜⵉⵏ ⵖ ⵓⵙⵓⵊⴷ ⵏ ⵜⴻⵜⴳⴰⵔⵜ ⴰⴷ ⵜⴰⵙⵜⵔⴰⵜⵉⵊⵉⵜ.