ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵉⵙⵓⵜⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵣⵣⵉⴳⵣⵜ ⵏ ⵓⵎⵢⴰⵡⴰⵙ ⵊⴰⵔ ⵍⵎⵖⵔⵉⴱ ⴷ ⵕⵡⴰⵏⴷⴰ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴷ ⵓⵏⵙⵙⵉⵅⴼ ⴰⵅⴰⵜⴰⵔ “ⴱⵓⵍ ⴽⴰⴳⴰⵎⵉ”
ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵎⵡⴰⵙ 07 ⵎⴰⵢⵢⵓ 2021, ⵖ ⵓⵎⵓⵙⵙⵓ ⵍⵍⵉ ⵜⵙⵏⵎⴰⵍⴰ ⵜⵎⵙⵇⴰⴷⵜ ⵏ ⵕⵡⴰⵏⴷⴰ ⴳ ⵕⵕⴱⴰⵟ, ⴳ ⵓⵙⴼⵓⴳⵍⵓ ⵏ ⵓⴽⵜⵜⴰⵢ ⵡⵉⵙ ⵡⴰⴳⵏⴰⵔ ⴷ ⵙⴰ ⵏ ⵓⴱⴽⴽⴰⴹ ⴰⵎⴳⵔⵓ ⵎⴳⴰⵍ ⵜⵓⵜⵙⵉ ⴳ 1994 ⴳ ⵜⴳⴷⵓⴷⴰⵏⵜ ⵏ ⵕⵡⴰⵏⴷⴰ ⵎⴰⵙ “ ⴳⴰⵏ ⵉⴱⴽⴽⴰⴹⵏ ⵏⵏⴰ ⵉⵎⴳⵔⴰ ⵡⵉⴷ ⴱⴰⵀⵔⴰ ⵀⵔⵛⵏⵉⵏ ⵍⵍⴰⵏⵉⵏ ⴳ ⵜⴰⵙⵓⵜ ⵉⵣⵔⵉⵏ, ⵙ ⵜⵓⴳⵜ ⵏ ⵡⴰⴳⴳⴰⵙⵏ ⵉⵏⴼⴳⴰⵏⵏ ⴷ ⵜⵉⵕⵥⵉ ⵏ ⵜⵢⴰⵏⵜ ⵏ ⵉⵕⵡⴰⵏⴷⵉⵢⵏ ⴷ ⵜⵔⵙⵍⴰⵍ ⵏ ⵜⵓⴷⵔⵜ ⵉⵛⵛⴰⵔⵏ ⴷ ⵜⵎⵢⵉⴷⵉⵔⵜ”, ⵉⵙⴰⵡⵍ ⴼ ⵜⵡⵉⵣⵉ ⴷ ⵜⴰⵡⵊⵉⵡⵉⵏ ⵏ ⵉⴷ ⴱⴰⴱ ⵏ ⵡⴰⴳⴳⴰⵙⵏ ⴷ ⵓⵎⴰⴷⴰⵏ ⴰⵕⵡⴰⵏⴷⵉ “ⵉⵎⵎⴰⵖⵏ ⴼ ⵓⵙⵕⵚⵓ ⵏ ⵜⴷⵍⵙⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵡⴰⴷⴰ ⵏⵏⵙ ⵎⵏⵉⴷ ⵏ ⵜⴳⵎⵉ ⴷ ⵜⵣⵣⵉⴳⵣⵜ”.
ⵉⵣⵎⵎⵉⵎ ⵎⴰⵙⵙ ⵍⵎⴰⵍⴽⵉ ⵎⴰⵙ ⵉⵎⵎⴰⵍ ⵓⴽⵜⵜⵓⵢ ⴰⴷ ⵎⴰⵙ ⴷ ⴰⵜⵉⴳⵏ ⵏ ⵜⵓⴷⵔⵜ ⵉⵛⵛⴰⵔⵏ ⴷ ⵓⵡⵇⵇⵔ ⵏ ⵡⴰⵢⵢⴰⴹ ⴷ ⵓⵎⵙⵓⵔⵓⴼ ⴷ ⵜⵡⵉⵣⵉ ⴳⴰⵏ ⵓⵎⵎⵉⵥⵏ ⵏ ⵜⵖⵔⵎⴰ ⵜⴰⵏⴼⴳⴰⵏⵜ ⵎⴳⴰⵍ ⵏ ⵜⴻⵟⵟⵓⵕⴼⴰ ⴷ ⴳⴰⵔ ⴰⵙⴽⴽⵉⵔ ⵖ ⵍⵍⴰⵏ ⴳⴰⵔ ⵉⵙⵡⵉⵏⴳⵉⵎⵏ ⴳⴰⵏⵉⵏ ⵡⵉⵏ ⵜⵉⵍⵍⴰⵙ, ⵉⴱⴷⴷ ⵓⵍⴰ ⴼ ⵜⵎⵙⴰⵔⵉⵏ ⵙⴳ ⵜⵉⵔⵎⵉⵜ ⴰⴷ, ⵉⵖⵔ ⵉ ⵓⵙⴱⴷⴷⵉ ⵏ ⵉⵏⴰⵡ ⵉⴷ ⴱⴰⴱ ⵏ ⵡⴰⵔⵜⴰⵢⵔⵉ ⵍⵍⵉ ⴷ ⵉⵜⵜⴰⵡⵉⵏ ⵜⴰⵎⴰⵖⵉⵏ ⵜⵉⵥⵓⵕⴰⵏⵉⵏ ⴷ ⵜⵉⵏ ⵓⵙⴳⴷ.
ⵉⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⵓⴳⴳⴰⵙ ⵏ ⵓⵅⴰⵜⴰⵔ ⴰⵏⵙⵙⵉⵅⴼ ⵏ ⵜⴳⴷⵓⴷⴰⵏⵜ ⵏ ⵕⵡⴰⵏⴷⴰ ⵎⴰⵙⵙ ⴱⵓⵍ ⴽⴰⴳⴰⵎⵉ ⵍⵍⵉ ⵉⵙⵎⵓⵏⵏ ⵙ ⵜⵏⴰⵔⴰ ⵏⵏⵙ ⵏⴳⵔ ⵉⴼⵔⴷⴰⵙ ⵏ ⵓⵎⴰⴷⴰⵏ ⴰⵕⵡⴰⵏⴷⵉ, ⵙ ⵜⵡⵓⵉⵙⵉ ⴳ ⵓⵚⴽⵓ ⵏ ⵓⵡⴰⵏⴽ ⴰⵕⵡⴰⵏⴷⵉ ⵍⵍⵉ ⵉⵙⵙⵏⵜⵉⵏ ⴳ ⵓⵎⵣⵔⵓⵢ ⵏⵏⵙ ⵉ ⵓⵚⴽⵓ ⵏ ⵉⵎⴰⵍ, ⵉⵙⵓⵜⴳ ⵓⵍⴰ ⵜⴰⵡⵓⵔⵉ ⵜⴰⵅⴰⵜⴰⵔⵜ ⵏ ⵕⵡⴰⵏⴷⴰ ⴳ ⵓⴼⵔⴰⴳ ⵏ ⵜⵎⴽⵜⵉⵜ ⵏ ⵓⵙⵓⵔⵙ ⴰⴷ ⵉⵃⵕⵕⴰⵏ.
ⵉⵙⵙⴽⵜⵉ ⴷ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵜⴰⴷⵓⵙⵉ ⵏ ⵜⵣⴷⴰⵢⵉⵏ ⵊⴰⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⴳⴷⵓⴷⴰⵏⵜ ⵏ ⵕⵡⴰⵏⴷⴰ ⴷ ⵜⴷⵉⵏⴰⵎⵉⵜ ⵏ ⵜⵎⴰⴷⵔⴰⵡⵜ ⴰⴷ, ⵍⵍⵉⵖ ⵉⵙⵏⴼⵍ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴷ ⵓⵅⴰⵜⴰⵔ ⴰⵏⵏⵙⵉⵅⴼ ⵏ ⵜⴳⴷⵓⴷⴰⵏⵜ ⵏ ⵕⵓⵡⴰⵏⴷⴰ ⴱⵓⵍ ⴽⴰⴳⴰⵎⵉ ⵎⵏⵏⴰⵡ ⵉⵔⵣⴰⴼⵏ ⴳ ⵉⵍⵍⴰ ⵓⵙⵎⵖⵔ ⵏ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ.
ⵉⵙⴷⴷⵉⴷ ⵎⴰⵙ ⴷⵔⵓⵏ ⵉⵅⴰⵜⴰⵔⵏ ⵏ ⵙⵏⴰⵜ ⵜⵎⵉⵣⴰⵔ ⵜⴰⵏⵏⴰⵢⵜ ⵜⴰⵙⵜⵔⴰⵜⵉⵊⵉⵜ ⴳ ⵜⵍⵍⴰ ⵜⴳⵎⵉ ⵏ ⵓⵎⵏⵥⴰⵡ ⵏ ⵉⴼⵔⵉⵇⵢⴰ ⴷ ⵜⵎⵢⵉⵎⴰⵏⵜ ⴳ ⵜⵙⵓⴳⴰⵔ ⵏⵏⵙ, ⵢⵉⵏⵉ ⵎⴰⵙ ⵜⵜⵓⵙⴽⴰⵔ ⵜⵙⴳⴰ ⵏ ⵓⵙⵏⴼⵍ ⵉⵍⴻⵍⵍⵉ ⴰⴼⵔⵉⵇⵉ ⴷⴷⵓ ⵏ ⵜⵏⵙⵙⵉⵅⴼⵜ ⵏ ⵕⵡⴰⵏⴷⴰ ⴳ ⵓⴳⵔⴰⵡ ⵡⵉⵙ ⵎⵔⴰⵡ ⵉⵥⵍⵉⵏ ⵏ ⵜⵎⵓⵏⵜ ⵜⴰⴼⵔⵉⵇⵉⵜ.
ⴳ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵉⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵣⴷⴰⵢⵉⵏ ⵏ ⵜⵎⴰⴷⵔⴰⵡⵜ ⴷ ⵓⵎⵢⴰⵡⴰⵙ ⵉⵙⵎⵓⵏⵏ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵏ ⵙⵏⴰⵜ ⵜⵎⵉⵣⴰⵔ, ⵉⵙⵙⴽⵜⵉ ⴷ ⴰⵔⵣⴰⴼ ⵏ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵕⵓⵡⴰⵏⴷⴰ ⵉ ⵜⴳⵍⴷⵉⵜ ⴳ 2018, ⵉⵙⵓⵜⴳ ⵜⴰⴷⵉⵏⴰⵎⵉⵜ ⵉⵣⵣⵉⴳⵣⵏ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵏⴳⵔ ⵙⵏⴰⵜ ⵜⵎⵉⵣⴰⵔ.