ⴰⵏⵎⵓⵇⴰⵔ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵍⴰ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ ⵜⴰⵎⴰⵊⴰⵕⵉⵜ ⴷ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵜⴳⵎⵉ ⵜⴰⵙⵓⵍⴰⵏⵜ ⴳ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵍⵎⴰⵊⴰⵕ

ⵜⵙⵏⵎⴰⵍⴰ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵍⴰ ⵜⴰⵎⵖⵔⵉⴱⵉⵜ ⵜⴰⵎⴰⵊⴰⵕⵉⵜ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵖⵔⵉⴱⵉ ⴷ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵍⵎⴰⵊⴰⵕ, ⴰⵢⵏⴰⵙ 20 ⵉⴱⵔⵉⵔ 2021, ⴰⵏⵎⵓⵇⴰⵔ ⵖ ⵜⵉⴳⴳⵓⴳⵜ ⴷ ⵜⵏⵙⵙⵅⴼⵜ ⵏ ⵜⵙⵇⵇⵉⵎⵜ ⵏ ⵜⴳⵎⵉ ⵜⴰⵙⵓⵍⴰⵏⵜ ⵖ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵍⵎⴰⵊⴰⵕ, ⴼ ⵜⴳⵎⵉ ⵜⴰⵙⵓⵍⴰⵏⵜ ⴷ ⵓⵎⵢⴰⵡⴰⵙ ⴰⵙⵉⵏⵔⴰⵏ ⵊⴰⵔ ⵙⵏⴰⵜ ⵜⵎⵉⵣⴰⵔ.

ⴳ ⵓⵎⵏⵉⴷ ⴰⵎⵖⵔⵉⴱⵉ, ⵜⵃⴰⴹⵕ ⵎⴰⵙⵙⴰ ⵙⵓⵄⴰⴷ ⴱⵓⵍⵄⵉⵛ ⵃⵊⵔⴰⵡⵉ, ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵖⵔⵉⴱ-ⵍⵎⴰⵊⴰⵕ, ⵎⴰⵙⵙ ⵄⴰⴱⴷ ⵍⵄⴰⵣⵉⵣ ⵍⵄⴰⵢⴹ ⴰⴳⵎⴰⵎ ⵏ ⵜⵙⵇⵇⵉⵎⵜ ⵏ ⵜⵓⵚⴽⵉⵡⵉⵏ ⵜⵉⵏⴰⴷⴷⵉⵡⵉⵏ, ⵎⴰⵙⵙ ⵄⴰⴱ ⵍⴼⵜⵜⴰⵃ ⵍⵄⴰⵡⵏⵉ, ⴰⴳⵎⴰⵎ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⵍⴰ. ⵖ ⵓⵎⵏⵉⴷ ⵏ ⵍⵎⴰⵊⴰⵕ, ⵜⵃⴰⴹⵕ ⵎⴰⵙⵙⴰ ⵉⵔⵣⵉⴱⵉⵜ ⵛⵎⵓⴽ, ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⵙⵓⵍⴰⵏⵜ ⴳ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵍⵎⴰⵊⴰⵕ, ⴷ ⵎⴰⵙⵙ ⵍⴰⵣⵍⵓ ⴱⵓⵔⵓⴽ, ⴰⴳⵎⴰⵎ ⵏ ⵜⵙⵇⵇⵉⵎⵜ, ⴷ ⵎⴰⵙⵙⴰ ⵜⵉⵎⴰ ⵣⴰⴱⵓ, ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⵍⴰ ⵜⴰⴱⵕⵍⴰⵎⴰⵏⵉⵜ-ⵍⵎⵖⵔⵉⴱ, ⴷ ⵎⴰⵙⵙ ⵍⴰⵣⵍⵓ ⵀⴰⵊⴷⵓ ⴰⵎⴰⵔⵉ ⴳ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵍⵎⴰⵊⴰⵕ, ⴷ ⵎⴰⵙⵙ ⵎⵉⴽⵍⵓⵙ ⵜⵔⵓⵎⵍⵔ ⴰⵎⵙⵇⴰⴷ ⵏ ⵍⵎⴰⵊⴰⵕ ⴳ ⵕⵕⴱⴰⵟ.

ⵉⵙⴱⵔⵔⴽ ⵎⴰⵙⵙ ⴰⵎⵙⵇⴰⴷ ⵏ ⵍⵎⴰⵊⴰⵕ ⴳ ⵕⵕⴱⴰⵟ ⵙ ⵉⵎⴷⵔⴰⵡⵏ ⵖ ⵓⵏⵎⵓⵇⴰⵔ ⵎⵇⵇⴰⵔ ⵍⵍⴰⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19, ⵉⴱⴷⵔ ⵜⴰⵣⵣⵉⴳⵣⵜ ⵏ ⵜⵣⴷⴰⵢⵉⵏ ⵜⵉⵎⵖⵔⵉⴱⵉⵢⵏ ⵜⵉⵎⴰⵊⴰⵕⵉⵢⵉⵏ  ⴳ ⵜⵙⵔⵜⵉⵜ ⴷ ⵜⴷⵎⵙⴰ ⴷ ⵓⵙⵏⴼⵍ ⴰⵎⴰⵙⵙⴰⵏ, ⵖ 2019 ⵍⵍⴰⵏ ⵙⴰ ⵉⵔⵣⴰⴼⵏ ⵏ ⵉⵡⵔⵉⴽⵏ ⵉⵅⴰⵜⴰⵔⵏ ⵉ ⵍⵎⴰⵊⴰⵕ, ⵉⵙⵓⵜⴳ ⵓⵍⴰ ⵜⵉⵍⴰⵍⵜ ⵜⴰⴱⵕⵍⴰⵎⴰⵏⵉⵜ, ⵙⵍⴰⵡⴰⵏ ⴰⴽⴽⵯ ⵜⴰⵡⵓⵔⵉ ⵏ ⵜⵔⵓⴱⴱⴰ ⵏ ⵜⴷⴷⵓⴽⵍⴰ ⴳ ⵓⵙⵎⵖⵔ ⵏ ⵓⵙⵡⵉⵔ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ. ⵉⵙⴰⵡⵍ ⵎⴰⵙⵙ ⵓⵎⵙⵇⴰⴷ ⵓⵍⴰ ⴼ ⵜⵓⴳⴳⴰⵙ ⵏ ⵍⵎⵖⵔⵉⴱ ⴳ ⵜⴳⵎⵉ ⵜⴰⵙⵓⵍⴰⵏⵜ ⴷ ⵡⴰⵡⵏⴰⴹ ⴷ ⵜⵥⴹⴰⵕⵜ, ⵖⵎⴽ ⴰⵏⵏ ⴷ ⵓⵅⵎⵎⴻⵎ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵉⵎⵔⵙⵉ ⴷ ⵜⵙⵜⵔⴰⵜⵉⵊⵉⵜ ⵏ ⵜⵥⴹⴰⵕⵜ ⴷ ⵓⵏⵣⵡⵉ ⵏ ⵍⵎⵖⵔⵉⴱ.

ⵜⵙⵎⵏⵉⴷ ⵎⴰⵙⵙⴰ ⵙⵓⵄⴰⴷ ⴱⵓⵍⵄⵉⵛ ⵃⵊⵔⴰⵡⵉ, ⵜⴰⵏⵙⵙⵉⵅⴼⵜ ⵏ ⵜⴷⴷⵓⴽⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵖⵔⵉⴱ-ⵍⵎⴰⵊⴰⵕ, ⵜⵓⴳⴳⴰⵙ ⵍⵍⴰⵏⵏⵉⵏ ⵉ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⴷ ⵎⴰⵙ ⵢⵓⵊⴰⴷ ⵍⵎⵖⵔⵉⴱ ⵉ ⵓⵏⵏⵓⵕⵥⵎ ⵏ ⵓⵎⵙⴰⵡⴰⵍ, ⵍⵍⵉⵖ ⵉⴳⴰ ⵍⵎⵖⵔⵉⴱ ⵜⴰⵎⴰⵣⵉⵔⵜ ⵏ ⵓⵔⴳⴳⵉⴳ ⴷⴰⵔ ⵍⵎⴰⵊⴰⵕ, ⴷ ⵜⵎⴰⵣⵉⵔⵜ ⵏ ⵉⵙⴰⵡⵓⵔⵏ ⵉⵅⴰⵜⴰⵔⵏ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ, ⵜⵖⵔ ⵉ ⵓⵙⴷⵓⵙ ⵏ ⵓⵙⵏⴼⵍ ⴰⵏⵙⴱⴰⴱ ⵊⴰⵔ ⴱⵓⴷⴰⴱⵉⵙⵜ ⴷ ⵕⵕⴱⴰⵟ ⵍⵍⵉⵖ ⵉⴳⴰ ⵍⵎⵖⵔⵉⴱ ⴰⵎⴷⵔⵓ ⴰⴷⵎⵙⴰⵏ ⵡⵉⵙ ⴽⵕⴰⴹ ⴳ ⵓⵙⵡⵉⵔ ⴰⴼⵔⵉⵇⵉ

ⵉⵙⴰⵡⵍ ⵎⴰⵙⵙ ⴰⵎⴰⵔⵉ ⵄⴰⴱⴷⵍⴼⴰⵜⵜⴰⵃ ⵍⵄⴰⵡⵏⵉ ⴼ ⵜⵉⵍⴰⵍⵜ ⵏ ⵍⵎⵖⵔⵉⴱ ⴳ ⵢⵉⴳⵔ ⴰⵡⵏⴹⴰⵏ, ⵍⵍⵉⵖ ⵉⴳⴰ ⵖ ⵜⵎⵣⵡⴰⵔ ⵏ ⵜⵎⵉⵣⴰⵔ ⵉⵙⴽⴰⵔⵏ ⵜⴰⵥⴹⴰⵕⵜ ⵉⵜⵜⵓⵙⵎⴰⵢⵏⵓⵏⵏ ⵙ ⵉⵙⵏⴼⴰⵔⵏ ⵍⵍⴰⵏⵉⵏ, ⵢⵉⵏⵉ ⵎⴰⵙ ⵉⴱⴷⴷ ⵢⵉⴳⵔ ⴰⵏⴼⵍⴰⵃ ⴼ ⵓⴼⵔⴰⴳ ⵏ ⵡⴰⵎⴰⵏ ⵙ ⵜⵙⵔⵜⵉⵜ ⵏ ⵡⴰⴳⴳⴰⴳⵏ.

ⵜⵙⵎⵏⵉⴷ ⵎⴰⵙⵙⴰ ⵉⵔⵣⵉⴱⵉⵜ ⵛⵎⵓⴽ ⵜⴰⵢⴰⴼⵓⵜ ⵏ ⵜⵙⵇⵇⵉⵎⵜ ⵍⵍⵉ ⵜⵙⵙⵉⵅⴼ, ⴳ ⵓⴼⵔⴰⴳ ⵏ ⵡⴰⵡⵏⴰⴹ ⴷ ⵉⵙⵓⴳⴰⵎ ⵏ ⵓⴳⴰⵎⴰ ⴷ ⵜⴷⵓⵙⵉ ⵏ ⵡⴰⵡⵏⴰⴹ, ⴷ ⵓⵙⵏⵍⵍⵉ ⵏ ⵓⵙⵎⵔⵙ ⵏ ⵜⵖⴰⵡⵙⵉⵡⵉⵏ ⵜⵉⴽⵉⵎⴰⵡⵉⵢⵉⵏ ⴳ ⵜⴼⵍⵍⴰⵃⵜ ⴷ ⵓⴼⵔⴰⴳ ⵏ ⵉⵎⵓⴷⴰⵔ, ⵖⵎⴽ ⵍⵍⵉ ⵜⴰⴽⴽⴰ ⵜⵉⵙⵓⵎⵔⵉⵏ ⵉ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵍⵎⴰⵊⴰⵕ ⵉ ⵓⴼⵔⴰⴳ ⵏ ⵡⴰⵡⵏⴰⴹ.

ⵉⵙⵎⵏⵉⴷ ⵎⴰⵙⵙ ⵄⴰⴱⴷⵍⵄⴰⵣⵉⵣ ⵍⵄⴰⵢⴹ ⵢⴰⵏ ⵓⵙⵎⴰⵇⵍ ⴳⵣⵣⵓⵍⵏ ⴼ ⵜⵢⴰⴼⵓⵜ ⵏ ⵜⵙⵇⵇⵉⵎⵜ ⵙ ⵓⴹⴼⵕ ⵏ ⵓⵙⵍⴳⵏ ⴰⵙⴰⵜⵉ ⴼ ⵓⵏⵣⵡⵉ, ⴷ ⵓⵙⵍⴳⵏ ⵓⵟⵟⵓⵏ 28/00 ⴼ ⵓⵙⵡⵓⴷⴷⵓ ⵏ ⵉⴼⵕⴰⴹⵏ, ⵢⵉⵏⵉ ⵎⴰⵙ ⵉⵣⵣⵉⴳⵣ ⵍⵎⵖⵔⵉⴱ ⵖ ⵓⴱⴰⵔⴰⵣ ⵏ ⵜⵥⴹⴰⵕⵜ ⵉⵜⵜⵓⵙⵎⴰⵢⵏⵓⵏⵏ ⴷ ⵉⵖⵓⵙⵏ ⴰⵎ ⵉⵙⵏⴼⴰⵔⵏ ⵏ ⵏⵓⵕ 1 ⴷ ⵏ ⵏⵓⵕ 2 ⴷ ⵓⵙⵡⵓⴷⴷⵓ ⵏ ⵉⴼⵕⴰⴹⵏ.

ⵜⵙⴷⴷⵉⴷ ⵎⴰⵙⵙⴰ ⵜⵉⵎⴰ ⵣⴰⴱⵓ ⴼ ⵓⵙⵓⵜⴳ ⵏ ⵜⵡⵓⵔⵉ ⵏ ⵍⵎⵖⵔⵉⴱ ⴳ ⵢⵉⴳⵔ ⴰⵡⵏⴹⴰⵏ, ⵜⵙⴰⵡⵍ ⴼ ⵜⵏⴰⵥⴰⵕⵉⵏ ⴷⴰⵜ ⵏ ⵜⵎⴰⵣⵉⵔⵜ ⵏⵏⵙ ⴰⵎ ⵉⴽⵎⵎⵓⴹⵏ ⵏ ⵜⴰⴳⴰⵏⵉⵏ, ⵜⴰⵎⵓⴽⵔⵉⵙⵜ ⵏ ⵡⴰⴽⴰⵍ ⴷ ⵉⵎⵓⴷⴰⵔ ⴷ ⵓⵙⵏⵣⵔⵓⴼ.

ⵖ ⵜⴳⵉⵔⴰ, ⵜⵙⴰⵡⵍ ⵎⴰⵙⵙⴰ ⵙⵓⵄⴰⴷ ⴱⵓⵍⵄⵉⵛ ⵃⵊⵔⴰⵡⵉ ⴼ ⵓⵏⴰⵔⵓⵣ ⵏⵏⵙ ⴰⴷ ⵉⵍⵉⵏ ⵉⴳⵔⴰⵏ ⵏ ⵓⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵉⵣⴰⵔ ⵙⵍⴰⵡⴰⵏ ⴰⴽⴽⵯ ⴳ ⵓⵎⵏⵉⴷ ⵏ ⵜⵥⴹⴰⵕⵜ ⵉⵜⵜⵓⵙⵎⴰⵢⵏⵓⵏⵏ. ⴰⵢⵍⵍⵉ ⵏⵉⵜ ⴷⵉⴷⵙ ⵜⴷⵔⵓ ⵜⵏⵙⵙⵉⵅⴼⵜ ⵏ ⵜⴳⵎⵉ ⵜⴰⵙⵓⵍⴰⵏⵜ ⵖ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵍⵎⴰⵊⴰⵕ. ⵜⵙⵓⵜⴳ ⵎⴰⵙⵙⴰ ⵃⵊⵔⴰⵡⵉ ⵙ ⵡⴰⴷⴷⴰⴷ ⵏ ⴱⵓⴷⴰⴱⵉⵙⵜ ⴳ ⵓⵙⵏⴰⵍ ⵏ ⵍⵎⵖⵔⵉⴱ ⴳ ⵓⵎⵏⵉⴷ ⵏ ⵚⵚⵃⵕⴰ ⵜⴰⵎⵖⵔⵉⴱⵓⵉⵜ ⵙ ⵜⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ, ⵜⵖⵔ ⵉ ⵓⵙⵎⵖⵔ ⵏ ⵓⵎⵢⴰⵡⴰⴹ ⴰⴱⵕⵍⴰⵎⴰⵏⵉ ⵏⴳⵔ ⵍⵎⵖⵔⵉⴱ ⴷ ⵍⵎⴰⵊⴰⵕ ⵙ ⵓⵙⵡⵉⵔ ⵏ ⵓⵏⵎⵓⵇⴰⵔ ⴰⴱⵕⵍⴰⵎⴰⵏⵉ ⵎⴽ ⵉⵏⵏⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ.