ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⵏⵓⴱⴳ ⵜⴰⵎⴰⵡⵙⴰⵙⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵉⵙⵉⵏⴳⴰⵍⵉⵢⵏ ⴳ ⴱⵕⵕⴰ ⴳ ⵜⴳⴷⵓⴷⴰⵏⵜ ⵏ ⵙⵙⵉⵏⵉⴳⴰⵍ
ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 06 ⵉⴱⵔⵉⵔ ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⵎⴰⵙⵙⴰ Aissata Tall Sall ⵜⴰⵎⴰⵡⵙⴰⵙⵜ ⵏ ⴱⵕⵕⴰ ⴷ ⵉⵙⵉⵏⴳⴰⵍⵉⵢⵏ ⴳ ⴱⵕⵕⴰ ⴳ ⵜⴳⴷⵓⴷⴰⵏⵜ ⵏ ⵙⵙⵉⵏⵉⴳⴰⵍ, ⵉⵍⵍⴰⵏ ⴳ ⵓⵔⵣⴰⴼ ⵏ ⵜⵡⵓⵔⵉ ⵉ ⵜⵎⴰⵣⵉⵔⵜ ⵏⵏⵖ ⵍⵍⵉⵖ ⵜⴱⴷⴷ ⴼ ⵓⵕⵥⵥⵓⵎ ⵏ ⵜⵙⵇⵓⵏⵙⵓⵜ ⵏ ⵙⵙⵉⵏⵉⴳⴰⵍ ⴳ ⵜⵖⵔⵎⵜ ⵏ ⴷⴷⴰⵅⵍⴰ.
ⵙ ⵜⵎⵍⴷⴰ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⴷ ⴰⵕⵥⵥⵓⵎ ⵏ ⵙⵙⵉⵏⵉⴳⴰⵍ ⵏ ⵜⵙⵇⵓⵏⵙⵓⵜ ⴳ ⵜⵖⵔⵎⵜ ⵏ ⴷⴷⴰⵅⵍⴰ ⴳ ⵉⴼⴼⵓⵙ ⵏ ⵜⴳⵍⴷⵉⵜ ⵉⴳⴰ ⵜⴰⵢⴼⵓⵜ ⵏ ⵜⵣⴷⴰⵢⵉⵏ ⵜⵉⵙⵜⵔⴰⵜⵉⵊⵉⵢⵉⵏ ⵣⴷⵉⵏⵉⵏ ⵉⵙⵎⵓⵏⵏ ⵙⵏⴰⵜ ⵜⵎⵉⵣⴰⵔ ⵙ ⵜⵏⴰⵔⴰ ⴷ ⵉⵎⴰⴷⴰⵏⵏ, ⵉⴳ ⴰⵎⵙⴰⵙⴰ ⵏ ⵜⴰⵏⵏⴰⵢⵉⵏ ⴼ ⴽⵓ ⵜⵉⵎⵙⴰⵔⵉⵏ ⵜⵉⵏⵎⵏⴰⴹⵉⵏ ⴷ ⵜⴳⵔⴰⵖⵍⴰⵏⵉⵏ, ⵢⵉⵏⵉ:”ⵉⴳⴰ ⵙⵙⵉⵏⵉⴳⴰⵍ ⴰⵏⴰⵡ ⵏ ⵓⵔⴳⴳⵉⴳ ⴷ ⵜⴷⵉⵎⵓⵇⵔⴰⵟⵉⵜ, ⵖⵓⵔⵙ ⴰⴷⵖⴰⵔ ⵉⵥⵍⵉⵏ ⴳ ⵓⵍⴰⵡⵏ ⵏ ⵉⵎⵖⵔⵉⴱⵉⵢⵏ ⵍⵍⵉ ⵙⵓⵜⴳⵏⵉⵏ ⴱⴰⵀⵔⴰ ⵜⴰⴳⵯⵎⴰⵜ ⴷ ⵜⴷⴷⵓⴽⴰⵍ ⴷ ⵓⵙⵏⴰⵍ ⵉⵣⵣⵉⴳⵣⵏ ⵏ ⵙⵙⵉⵏⵉⴳⴰⵍ ⵉ ⵜⵢⴰⵏⵜ ⵜⴰⵏⴽⴰⵍⵜ ⵏ ⵜⴳⵍⴷⵉⵜ”.
ⵉⵙⵉⵙⴼⵉⵡ ⵎⴰⵙⵙ ⵍⵎⴰⵍⴽⵉ ⵎⴰⵙ ⴷ ⵙⵏⴰⵜ ⵜⵎⵉⵣⴰⵔ ⴷⴰⵔⵙⵏⵜ ⵜⵉⵏⴰⵥⴰⵕⵉⵏ ⵛⵛⴰⵔⵏⵉⵏ ⴰⵎ ⴰⴱⴰⵢⵢⵓⵕ ⵏ ⴽⵓⴼⵉⴷ 19, ⵜⵉⴳⵎⵉ ⵜⴰⵙⵓⵍⴰⵏⵜ, ⵉⵙⵏⴼⵍⵏ ⵏ ⵏ ⵓⵏⵣⵡⵉ, ⴰⵣⵡⴰⴳ, ⵜⵉⴷⵔⵙⵉ ⵏ ⵡⴰⵎⴰⵏ ⴷ ⵜⵉⵢⵢⴰⴹ, ⵉⴱⴷⵔ ⵓⵍⴰ ⵜⵓⴳⴳⴰⵙ ⵏ ⵜⴳⵍⴷⵉⵜ ⴳ ⵉⴳⵔⴰⵏ ⴰⴷ, ⵉⵖⵔ ⵉ ⵓⵙⴷⵓⵙ ⵏ ⵜⵡⵓⵔⵉ ⵜⴰⴼⵔⵉⵇⵉⵜ ⵉⵛⵛⴰⵔⵏ ⴳ ⴽⵓ ⵜⵉⵎⵙⴰⵔⵉⵏ ⴰⴷ.
ⴳ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵉⵙⵙⴽⵜⵉ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵜⵉⴳ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵉⴱⴷⵔ ⵜⵉⵔⴰⵜ ⵉⴷⵓⵙⵏ ⵉ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏⴳⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ, ⴷ ⵜⵉⴽⴽⵉ ⵏ ⴽⵉⴳⴰⵏ ⵏ ⵜⴷⵉⵏⴰⵎⵉⵜ ⵉ ⵜⵡⵓⵔⵉ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⵍⴰ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ-ⵜⴰⵙⵉⵏⵉⴳⴰⵍⵉⵜ ⵙ ⴰⵢⵍⵍⵉ ⵔⴰⴷ ⵉⵕⵥⵎ ⵉⵎⵏⴰⴷⵏ ⵉⵎⴰⵢⵏⵓⵜⵏ ⵉ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵛⵛⴰⵔⵏⵉⵏ.
ⴳ ⵜⵙⴳⴰ ⵏⵏⵙ, ⵜⵙⴷⴷⵉⴷ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵉⵙⵉⵏⵉⴳⴰⵍⵉⵢⵏ ⵏ ⴱⵕⵕⴰ ⴳ ⵜⴳⴷⵓⴷⴰⵏⵜ ⵏ ⵙⵙⵉⵏⵉⴳⴰⵍ ⵎⴰⵙ ⴷ ⴰⵕⵥⵥⵓⵎ ⵏ ⵜⵙⵇⵓⵏⵙⵓⵜ ⵏ ⵙⵙⵉⵏⵉⴳⴰⵍ ⴳ ⵜⵖⵔⵎⵜ ⵏ ⴷⴷⴰⵅⵍⴰ ⴰⵔ ⵉⵎⵎⴰⵍ ⵜⴰⴷⵓⵙⵉ ⵏ ⵜⵣⴷⴰⵢⵉⵏ ⵏ ⵜⴷⴷⵓⴽⵍⴰ ⴳⴳⵓⵜⵏⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵜⵙⵓⵜⴳ ⴰⴱⴷⴷⴰⴷ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵙⵙⵉⵏⵉⴳⴰⵍ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ-19, ⵜⵉⵏⵉ ⵎⴰⵙ ⵣⵎⵎⵉⵎⵏⵜ ⵙⵏⴰⵜ ⵜⵎⵉⵣⴰⵔ ⴽⵉⴳⴰⵏ ⵏ ⵜⵎⵢⴰⵇⵇⴰⵏⵉⵏ ⵏ ⵓⵎⵢⴰⵡⴰⵙ ⴳ ⴽⵓ ⵉⴳⵔⴰⵏ.
ⵜⵖⵔⴰ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵉ ⵜⵡⵉⵙⵉ ⵎⵇⵓⵔⵏ ⴷ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⴳ ⵜⵎⵙⵓⵜⵍⵜ ⴰⴷ, ⴷ ⵓⵙⵏⴰⵍ ⵏ ⵜⴳⵎⵉ ⵜⴰⵙⵓⵍⴰⵏⵜ ⴳ ⵜⵎⵉⵣⴰⵔ ⵏ ⵉⴼⴼⵓⵙ, ⴷ ⵉⴳ ⵏ ⵜⵓⴳⴳⴰⵙ ⵉ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵅⴰⵜⵔⵏⵉⵏ ⵏ ⵓⵎⵏⵥⴰⵡ ⵙⵍⴰⵡⴰⵏ ⴰⴽⴽⵯ ⵜⵉⵏ ⵓⵙⵡⵓⴷⴷⵓ ⵏ ⵡⴰⵎⴰⵏ ⴷ ⵓⵙⴱⴷⴷⵉ ⵏ ⵓⵙⵏⵣⵔⵓⴼ, ⵜⵉⵏⵉ ⵎⴰⵙ ⵔⴰⴷ ⵉⵙⵏⵓⴱⴳ ⵙⵙⵉⵏⵉⴳⴰⵍ ⴳ ⵓⵙⴳⴳⵯⴰⵙ ⴷ ⵢⵓⵛⴽⴰ “ⴰⵏⵎⵓⵇⴰⵔ ⴰⴳⵔⴰⵖⵍⴰⵏ ⴼ ⵡⴰⵎⴰⵏ”, ⴷ ⵔⴰⴷ ⵉⵙⴽⵔ “ ⵜⴰⴽⴽⵯⵙⵜ ⵜⴰⵣⴳⵣⴰⵡⵜ ⵜⴰⵅⴰⵜⴰⵔⵜ” ⵉ ⵓⵙⴱⴷⴷⵉ ⵏ ⵓⵙⵏⵣⵔⵓⴼ ⴳ ⵜⵙⴳⴰ ⵏ ⵙⵙⴰⵃⵉⵍ, ⵜⵙⴰⵡⵍ ⴼ ⵡⴰⵜⵉⴳ ⴰⴷ ⵢⵉⵍⵉ ⵚⴰⵃⴰ ⵙⴳ ⵜⵉⵔⵎⵉⵜ ⴷ ⵜⵎⵓⵣⴰⵢⵜ ⵜⴰⵎⵖⵔⵉⴱⵉⵜ ⴳ ⵉⴳⵔⴰⵏ ⴰⴷ.