ⴰⵙⵖⵣⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⴽⴽⵓⵥ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ ⴼ ⵉⵙⵜⴰⵢⵏ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵎⵡⴰⵙ 5 ⵎⴰⵕⵚ 2021 ⵙ ⵜⵓⴳⵜ, ⴽⴽⵓⵥ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ ⴳ ⵜⵙⵓⵜⵍⵜ ⵜⴰⵣⵣⵔⴰⴼⵜ ⵉⵥⵍⵉⵏ, ⴼ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵙⵇⵇⵉⵎ ⵏ ⵉⵎⵛⵉⵡⴰⵕ ⴷ ⵉⴳⵎⴰⵎⵏ ⵏ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵉⴽⴰⴱⴰⵕⵏ ⵉⵙⵔⵜⴰⵏⵏ, ⴳ ⵜⵖⵉⵎⵉⵜ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵜⵉⵍⵉⵜ ⵏ ⵎⴰⵙ ⵄⴰⴱⴷ ⵍⵡⴰⴼⵉ ⵍⴼⵜⵉⵜ, ⴰⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ.
ⴳ ⵓⵙⵎⵏⵉⴷ ⵏ ⵉⵙⵏⴼⴰⵔⵏ, ⵉⵙⴷⴷⵉⴷ ⵎⴰⵙⵙ ⴰⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ ⵎⴰⵙ ⵜⵙⵓⵊⴰⴷ ⵜⵏⴱⴰⴹⵜ ⵉⴹⵕⵉⵚⵏ ⵉⵣⵣⵔⴰⴼⵏ ⵏ ⵉⵙⵜⴰⵢⵏ ⵙ ⵓⵎⵙⴰⵙⴰ ⴳ ⵉⵍⵍⴰ ⵓⵚⴽⵓ, ⵉⴱⴷⵔ ⵉⵙⵓⵔⵙⵏ ⵣⴷⵉⵏⵉⵏ ⴷ ⵉⵎⵛⴰⵡⴰⵕⵏ ⴰⴽⴷ ⵉⵎⵙⴽⴰⵔⵏ ⵉⵙⵔⵜⴰⵏⵏ ⵙ ⵜⵎⵢⴰⴷⴰⵙⵜ ⵏ ⵓⴷⵔⴰⵡ ⵉⵍⵍⴰⵏ ⴼ ⵓⵙⵖⵡⵏ ⴷ ⵜⵎⴰⵙⴰⵢⵜ ⵉⵛⵛⴰⵔⵏ.
ⵉⵙⵉⵙⴼⵉⵡ ⵎⴰⵙⵙ ⵍⴼⵜⵉⵜ ⵎⴰⵙ ⵡⴰⵜⵜⵙⵏ ⵉⴹⵕⵉⵚⵏ ⴰⴷ ⴰⵙⴱⵓⵖⵍⵓ ⵏ ⵓⵏⴳⵔⴰⵡ ⵏ ⵉⵙⵜⴰⵢⵏ ⵉ ⵓⴹⴼⵕ ⵏ ⵜⴷⵉⵏⴰⵎⵉⵜ ⵏ ⵡⴰⵎⵓⵏ ⴰⵎⵖⵔⵉⴱⵉ, ⴷ ⵓⵙⵖⵏⵓ ⵏ ⵉⴹⵕⵉⵚⵏ ⵏ ⵖⵉⵍⴰⴷ ⵙ ⴽⵉⴳⴰⵏ ⵏ ⵜⵉⵕⵡⵉ ⵏ ⵉⵙⵜⴰⵢⵏ ⴷ ⵓⵙⵏⴰⵍ ⵏ ⵓⵖⵣⴰⵏ ⵏ ⵜⵡⵓⵔⵉ ⵏ ⵉⵙⵜⴰⵢⵏ.
ⵢⵉⵡⵉ ⴷ ⵓⵙⵏⴼⴰⵔ ⵏ ⵓⵙⵍⴳⵏ ⴰⵎⴰⴷⴷⴰⵙ 04.21 ⴰⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ ⴰⵎⴰⴷⴷⴰⵙ 27.11 ⴼ ⵓⵙⵇⵇⵉⵎ ⵏ ⵉⵎⵓⵔⴰ, ⵔⴰⴷ ⵉⵜⵜⵓⵙⵏⴼⵉⵍ ⵓⴷⵖⴰⵔ ⴰⵏⴰⵎⵓⵔ ⵏ ⵓⵙⵜⴰⵢ ⵙ ⵉⴷⵖⴰⵔⵏ ⵉⵏⵎⵏⴰⴹⵏ ⵏ ⵓⵙⵜⴰⵢ, ⵔⴰⴷ ⵜⵉⵎⵖⵓⵔ ⵜⴳⵏⵙⴰⵙⵜ ⵏ ⵜⵎⵖⴰⵔⵜ ⴳ ⵜⵎⵔⵙⵍⵜ ⵜⴰⵣⵣⵔⴰⴼⵜ. ⵢⵉⵡⵉ ⴷ ⵓⵙⵏⴼⴰⵔ ⵓⵍⴰ ⴰⵙⵖⵡⵏ ⴰⵙⵔⵜⴰⵏ ⵏ ⵉⵎⵙⵜⴰⵢⵏ ⵍⵍⵉ ⵔⴰⴷ ⵉⵜⵜⵓⴽⴽⵉⵙ ⴽⵓ ⴰⵎⴰⵔⵉ ⵉⴼⵍⵏ ⴰⴽⴰⴱⴰⵕ ⵏⵏⵙ ⴰⵙⵔⵜⴰⵏ, ⴷ ⵉⵙⵡⵓⴷⴷⵓⵜⵏ ⴼ ⵜⵎⴰⴼⴰⵡⵜ ⵏ ⵉⵎⵓⵙⵙⵓⵜⵏ ⵏ ⵉⵙⵜⴰⵢⵏ, ⴷ ⵓⵙⵓⵜⴳ ⵏ ⵜⵡⵓⵔⵉ ⵏ ⵉⵎⵓⵔⴰ ⵙ ⵓⵥⵍⴰⵢ ⵊⴰⵔ ⵜⴰⴳⵎⴰⵎⵜ ⴳ ⵉⵙⵇⵇⵉⵎⵏ.
ⵢⵉⵡⵉ ⴷ ⵓⵙⵏⴼⴰⵔ ⵏ ⵓⵙⵍⴳⵏ ⴰⵎⴰⴷⴷⴰⵙ 05.21 ⴼ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⴰⴷ ⵜⴻⵟⵟⵉⴼ ⵜⵎⴰⴷⴷⴰⵙⵜ ⵜⴰⵣⵣⵓⵍⴰⵏⵜ ⵏ ⵉⴷ ⴱⴰⴱ ⵏ ⵜⵡⵓⵔⵉ (ⵍⴱⴰⵟⵕⵓⵏⴰ) ⵜⴰⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ ⴳ ⵓⵙⵇⵇⵉⵎ ⴰⴷ, ⵙ ⵜⵙⵉⵎⴰⵏⵜ ⵏⵏⵙ ⵃⵎⴰ ⴰⴷ ⵜⵙⴰⵡⴰⵍ ⴼ ⵜⵎⵓⴽⵔⵉⵙⵉⵏ ⵏ ⵉⵎⵙⴽⴰⵔⵏ ⵉⴷⵎⵙⴰⵏⵏ ⴷ ⵉⵏⴰⵔⵓⵣⵏ ⵏ ⵜⵎⵙⵙⵏⵜⴰⵢ ⵜⵉⵏⴰⵎⵓⵔⵉⵏ ⵉ ⵚⴰⵃⴰ ⵏ ⵜⴷⵎⵙⴰ ⵜⴰⵏⴰⵎⵓⵔⵜ.
ⵢⵉⵡⵉ ⴷ ⵓⵙⵏⴼⴰⵔ ⵏ ⵓⵙⵍⴳⵏ ⴰⵎⴰⴷⴷⴰⵙ 06.21 ⴼ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ ⴰⵎⴰⴷⴷⴰⵙ 59.11 ⴼ ⵓⵙⵜⴰⵢ ⵏ ⵉⴳⵎⴰⵎⵏ ⵏ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ, ⴰⵙⴳⵉⴷⴷⵉ ⵜⴱⵔⵉⴷⵜ ⵏ ⵜⵉⵍⵉⵜ ⴳ ⵉⵙⵜⴰⵢⵏ ⵏ ⵜⴳⵔⴰⵡⵉⵏ ⴷ ⵜⵙⴳⵉⵡⵉⵏ ⴷ ⵓⵙⵏⴰⵍ ⵏ ⵜⴳⵏⵙⴰⵙⵜ ⵏ ⵜⵎⵖⴰⵔⵜ ⴳ ⵜⴳⵔⴰⵡⵉⵏ ⴰⴷ, ⴷ ⵓⵙⵖⵓⴷⵓ ⵏⵏⵙⵏ. ⵉⵥⵍⵉ ⵓⵙⵏⴼⴰⵔ ⴰⴼⴽⵕⴰⴹ ⴳ ⵉⵙⵇⵇⵉⵎⵏ ⵏ ⵜⵎⵏⴰⴹⵉⵏ ⵉ ⵜⵎⵖⴰⵔⵉⵏ, ⴷ ⵓⵣⵔⴼ ⴰⴷ ⵉⵍⵉⵏ ⵓⵍⴰ ⴳ ⵙⵉⵏ ⵍⵍⵉ ⴷ ⵖⴰⵎⴰⵏⵉⵏ ⵙ ⵜⵏⴳⴰⴷⴷⴰⵢⵜ ⵊⴰⵔ ⵉⵔⴳⴰⵣⵏ ⴷ ⵜⵎⵖⴰⵔⵉⵏ.
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵍⴳⵏ ⴰⵎⴰⴷⴷⴰⵙ 07.21 ⵉ ⵓⵙⵏⴼⵍ ⵏ ⵓⵙⵍⴳⵏ ⴰⵎⴰⴷⴷⴰⵙ 29.11 ⴼ ⵉⴽⴰⴱⴰⵕⵏ ⵉⵙⵔⵜⴰⵏⵏ, ⵔⴰⴷ ⵢⵉⵍⵉ ⵓⵙⵎⵀⵍ ⵏ ⵉⵙⵡⴰⵍⴰⵢⵏ ⴰⵜⵜⵓⵢⵏⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴼ ⵓⵙⵎⵔ ⵏ ⵓⵙⵏⴰⵍ ⴰⴳⴷⵓⴷⴰⵏ ⵉ ⵉⴽⴰⴱⴰⵕⵏ, ⵉ ⵓⴹⴼⵕ ⵏⵏⵙⵏ ⴼ ⵓⵙⵎⴰⵢⵏⵓ ⵏ ⵜⵎⴰⵎⴽⵉⵏ ⵏ ⵜⵡⵓⵔⵉ ⵏⵏⵙⵏ, ⴰⵍⵍⵉ ⵔⴰⴷ ⵢⴰⵡⵙ ⴳ ⵓⴱⵓⵖⵍⵓ ⵏ ⵜⵡⵓⵔⵉ ⵏⵏⵙⵏⵜ ⴷ ⵓⵙⵖⵓⴷⵓ ⵏ ⵉⵣⵣⵔⴰⴼⵏ ⴷ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⴷ ⵓⵥⵍⴰⵢ ⵏ ⵓⴳⵣⵣⵓⵎ ⴳ ⵓⵙⵏⴰⵍ ⴰⴳⴷⵓⴷⴰⵏ ⵉ ⵜⵙⵓⴳⴰⵔ ⵏⵏⵙⵏ ⴳ ⵉⴱⴰⵔⴰⵣⵏ ⵏ ⵓⵙⵡⵉⵏⴳⵎ ⴷ ⵓⵙⴼⵙⵉ ⴷ ⵓⵙⵎⴰⵢⵏⵓ.
ⵜⵣⵔⵉ ⵜⵖⵉⵎⵉⵜ ⴰⴷ ⵜⴰⵣⵣⵔⴰⴼⵜ ⴳ ⵚⴹⵉⵚⵜ ⵜⵙⵔⴰⴳⵉⵏ ⵙ ⵜⴽⵛⵛⵓⵎⵉⵏ ⵏ ⵉⴳⵏⵙⴰⵙⵏ ⵏ ⵜⵔⵓⴱⴱⴰ ⴷ ⵜⴳⵓⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵏ, ⵙⴰⵡⵍⵏ ⴼ ⵡⴰⴷⴷⴰⴷⵏ ⴳ ⵉⵙⵏⴼⵍⵏ ⴷ ⵉⵎⴰⴳⵔⴰⴷⵏ ⵏ ⵉⵙⵏⴼⴰⵔⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ ⵜⵜⵓⵙⵎⵏⴰⴷⵏⵉⵏ.