ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵉⵙⵓⵜⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵢⴰⵡⴰⵙ ⴷ ⵓⵏⵎⵓⵇⴰⵔ ⵏ ⵉⵏⵙⵙⵉⵅⴼⵏ ⴷ ⵜⵏⵙⵙⵉⵅⴼⵉⵏ ⵏ ⵉⴱⵕⵍⴰⵎⴰⵏⵏ ⴳ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⴷ ⵍⴽⴰⵔⴰⵢⵢⵉⴱ ⴷ ⵍⵎⵉⴽⵙⵉⴽ
ⵉⴷⵔⵓ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵡⴰⵙ 25 ⴱⵕⴰⵢⵕ ⴳ ⵜⵙⵓⵜⵍⵜ ⵜⵉⵙ 39 ⵏ ⵓⵏⵎⵓⵇⴰⵔ ⵏ ⵏ ⵉⵏⵙⵙⵉⵅⴼⵏ ⴷ ⵜⵏⵙⵙⵉⵅⴼⵉⵏ ⵏ ⵉⴱⵕⵍⴰⵎⴰⵏⵏ ⴳ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⴷ ⵍⴽⴰⵔⴰⵢⵢⵉⴱ ⴷ ⵍⵎⵉⴽⵙⵉⴽ (ⴼⵓⴱⵔⵉⵍ) ⵙ ⵓⴼⵉⵣⵢⵓⴽⵓⵏⴼⵉⵕⵓⵏⵚ.
ⴳ ⵜⴳⵓⵔⵉ ⵏⵏⵙ, ⵉⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵢⴰⵡⴰⵙ ⵊⴰⵔ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴷ ⵓⵏⵎⵓⵇⴰⵔ ⵏ ⵉⵏⵙⵙⵉⵅⴼⵏ ⴷ ⵜⵏⵙⵙⵉⵅⴼⵉⵏ ⵏ ⵉⴱⵕⵍⴰⵎⴰⵏⵏ ⴳ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⴷ ⵍⴽⴰⵔⴰⵢⵢⵉⴱ ⴷ ⵍⵎⵉⴽⵙⵉⴽ. ⵢⵉⵏⵉ ⵎⴰⵙ ⵉⵍⵍⴰ ⵍⵎⵖⵔⵉⴱ ⴷ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ ⵙ ⵜⵉⵔⴰⵜ ⵉⴷⵓⵙⵏ ⴳ ⵓⵕⵥⵥⵓⵎ ⵏ ⵓⵎⵢⴰⵡⴰⴹ ⴷ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⴷ ⵜⵎⵓⵥⴰⵢⵉⵏ ⴷ ⵓⵙⵎⵓⵏ ⵏ ⵡⴰⴷⴷⴰⴷⵏ ⴷ ⵜⵎⵉⵣⴰⵔ ⵏ ⵜⵙⴳⴰ.
ⵢⵉⵏⵉ ⵎⴰⵙⵙ ⵍⵎⴰⵍⴽⵉ ⵎⴰⵙ ⵉⴷⵔⵓ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵎⵍⵉⵖ ⵉⴳⴰ ⴰⴳⵎⴰⵎ ⵉⵎⵥⵕⵉ ⴳ ⵓⵏⵎⵓⵇⴰⵔ ⴳ 2014, ⴳ ⵜⴷⵉⵏⴰⵎⵉⵜ ⵜⴰⵎⴰⵢⵏⵓⵜ ⵏ ⵓⵎⵢⴰⵡⴰⵙ ⵊⴰⵔ ⵏⵏⵙⵏ, ⵢⵉⵏⵉ ⵎⴰⵙ ⵜⵍⵍⴰ ⵜⵉⵔⴰⵜ ⴳ ⵜⵣⵣⵉⴳⵣⵜ ⵏ ⵓⵎⵙⴰⵡⴰⵍ ⴷ ⵓⵏⵎⵓⵇⴰⵔ ⵏ “ⴼⵓⴱⵔⵉⵍ” ⴳ ⵓⵙⴷⵓⵙ ⵏ ⵜⴷⴷⵓⴽⴽⵍⴰ ⴷ ⵉⴳⵏⵙⴰⵙⵏ ⵏ ⵉⵎⴰⴷⴰⵏⵏ ⵏ ⵜⵙⴳⴰ ⴳ ⵜⵏⵙⵙⵉⵅⴼⵜ ⵜⴰⵎⴰⵢⵏⵓⵜ ⴼ ⵓⵏⵎⵓⵇⴰⵔ ⴰⴷ.
ⴳ ⵜⵙⵓⵜⵍⵜ ⵜⴰⵏⵎⵢⴰⵔⵜ ⵜⵉⵙ 39 ⵏ “ⴼⵓⴱⵔⵉⵍ” ⵜⵎⵎⴰⵜⵜⵉ ⵜⵏⵙⵙⵉⵅⴼⵜ ⵉ ⵎⴰⵙⵙⴰ Dulce María Sauri ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵉⴽⵙⵉⴽⵉ. ⵉⵡⴰⵜⵜⵙ ⵓⵏⵎⵓⵇⴰⵔ ⵏ ⴼⵓⴱⵔⵉⵍ ⵉⵍⵍⴰⵏ ⵙⴳ 1994 ⴰⵙⵏⴰⵍ ⵏ ⵉⵎⴰⵙⵙⵏ ⵏ ⵓⵙⴽⵔ ⴷ ⵓⵣⴷⴷⵓⵢ ⵏ ⵉⵣⵣⵔⴰⴼⵏ ⵊⴰⵔ ⵉⵡⴰⵏⴽⵏ ⵉⴳⵎⴰⵎⵏ, ⴷ ⵓⵙⴽⵔ ⵏ ⵉⵎⴰⵙⵙⵏ ⵉⵎⵛⴰⵡⴰⵕⵏ ⵊⴰⵔ ⵉⵏⵙⵙⵉⵅⴼⵏ ⵏ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵉ ⵓⵙⵎⴽⵍ ⵏ ⵜⵎⵓⴽⵔⵉⵙⵉⵏ ⵏ ⵜⵙⴳⴰ, ⴷ ⵓⵙⵏⴰⵍ ⵏ ⵜⵖⵓⵔⵉⵡⵉⵏ ⵜⵉⵣⵣⵔⴰⴼⵉⵏ ⴳ ⵓⵙⵡⵉⵔ ⴰⵏⵎⵏⴰⴹ.
ⵍⵍⴰⵏ ⴳ ⵓⵏⵎⵓⵇⴰⵔ ⴰⴷ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⵏ ⵎⵔⴰⵡ ⵉⵡⴰⵏⴽⵏ ⵉⴳⵎⴰⵎⵏ: ⴳⵡⴰⵜⵉⵎⴰⵍⴰ, ⴱⵉⵍⵉⵣ, ⵙⵙⴰⵍⴼⴰⴹⵓⵕ, ⵀⵉⵏⴹⵓⵕⴰⵚ, ⵏⵉⴽⴰⵔⴰⴳⵡⴰ, ⴽⵓⵙⵜⴰⵔⵉⴽⴰ, ⴱⴰⵏⴰⵎⴰ, ⴷⴷⵓⵎⵉⵏⵉⴽⴰⵏ, ⵍⵎⵉⴽⵙⵉⴽ, ⴱⵓⵔⵜⵓⵔⵉⴽⵓ. ⵉⵍⵍⴰ ⵓⵙⵖⵉⵎ ⵏⵏⵙ ⴳ ⵎⴰⵏⴰⴳⵡⴰ ⵜⴰⵎⴰⵥⵓⵏⵜ ⵏ ⵜⴳⴷⵓⴷⴰⵏⵜ ⵏ ⵏⵉⴽⴰⵔⴰⴳⵡⴰ.