ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵙⵇⵇⴰⴷ ⵏ ⵜⵓⵕⴽⵢⴰ ⴳ ⵜⴳⵍⴷⵉⵜ
ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵎⵡⴰⵙ 19 ⴱⵕⴰⵢⵕ 2021 ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⵎⴰⵙⵙ Aydin Dogan ⴰⵎⵙⵇⵇⴰⴷ ⵏ ⵜⵓⵕⴽⵢⴰ ⴳ ⵕⵕⴱⴰⵟ, ⴳ ⵓⵔⵣⴰⴼ ⵏ ⵜⴷⴷⵓⴽⵍⴰ ⴷⴼⴼⵉⵔ ⵏ ⵓⵙⵎⴰⴷ ⵏ ⵜⵡⵓⵔⵉ ⵏⵏⵙ ⵜⴰⴷⵉⴱⵍⵓⵎⴰⵙⵉⵜ ⴳ ⵜⴳⵍⴷⵉⵜ.
ⴳ ⵓⵏⵎⵓⵇⴰⵔ ⴰⴷ, ⵉⵙⵓⵜⴳ ⵎⴰⵙⵙ Aydin Dogan ⵜⵉⵕⵡⵉ ⵏ ⵜⵣⴷⴰⵢⵉⵏ ⵜⵉⵎⵣⵔⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⵜⵓⵕⴽⵢⴰ ⵙⴳ ⵓⴳⴳⴰⵔ ⵏ ⵙⵎⵎⵓⵙⵜ ⵜⴰⵙⵓⵜⵉⵏ, ⵉⵙⵓⵜⴳ ⴰⵥⵓⵥⴹ ⵏⵏⵙⵏ ⵉⵛⵛⴰⵔⵏ ⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⴳ ⴽⵓ ⵉⴳⵔⴰⵏ. ⵉⵙⵉⵙⴼⵉⵡ ⵎⴰⵙ ⴷ ⴰⵎⵛⴰⵡⴰⵕ ⵉⵙⵓⵍⵏ ⴷ ⵓⵎⵙⴰⵡⴰⵍ ⵊⴰⵔ ⵙⵏⴰⵜ ⵜⵎⵉⵣⴰⵔ ⵉⵡⵉⵏ ⴷ ⴰⵙⵎⴰⵢⵏⵓ ⵏ ⵜⵎⵢⴰⵇⵇⴰⵏⵜ ⵏ ⵓⵙⵏⴼⵍ ⵉⵍⴻⵍⵍⵉ ⵏⴳⵔⴰⵜⵜⵙⵏⵜ ⵉ ⵜⵏⵓⴼⴰ ⵏ ⵙⵏⴰⵜ ⵜⵎⵉⵣⴰⵔ.
ⴳ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵢⵉⵡⵉ ⴷ ⵎⴰⵙⵙ ⴰⵎⵙⵇⵇⴰⴷ ⵜⴰⵖⵓⵔⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⴰⵜⵓⵕⴽⵉ ⵉ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵓⵔⵣⴰⴼ ⵏ ⵜⵡⵓⵔⵉ ⵉ ⵜⵓⵕⴽⵢⴰ, ⵔⴰⴷ ⵜⴳ ⴰⵣⵎⵣⵣⵓ ⵏ ⵓⵔⵣⵣⵓ ⵏ ⵉⴱⵔⵉⴷⵏ ⵏ ⵓⵙⴷⵓⵙ ⵏ ⵜⴷⴷⵓⴽⵍⴰ ⴷ ⵓⵎⵢⴰⵡⴰⵙ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ ⵏ ⵙⵏⴰⵜ ⵜⵎⵉⵣⴰⵔ.
ⴳ ⵓⵎⵏⵉⴷ ⵏⵏⵙ, ⵉⵙⵓⵜⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵓⵔⴰ ⵜⵉⵕⵡⵉ ⴷ ⵜⴷⵓⵙⵉ ⵏ ⵜⵣⴷⴰⵢⵉⵏ ⵜⵉⵎⵖⵔⵉⴱⵉⵢⵉⵏ-ⵜⵉⵜⵓⵕⴽⵉⵢⵉⵏ, ⵉⵙⴰⵡⵍ ⴼ ⵓⵙⵓⵜⴳ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵏ ⵡⴰⴷⴷⴰⴷ ⵏ ⵜⵓⵕⴽⵢⴰ ⵉⵍⵍⴰⵏ ⴷ ⵜⵢⴰⵏⵜ ⵜⴰⵏⴽⴰⵍⵜ ⵏ ⵜⴳⵍⴷⵉⵜ, ⵍⵍⵉⴳ ⵜⵓⴳⵉ ⴰⴷ ⵢⵉⵍⵉ ⵢⴰⵏ ⵓⴼⵔⴷⵉⵙ ⵏ ⵜⴱⴹⵉⵜ, ⵢⵉⵏⵉ “ⵙⵏⴰⵜ ⵜⵎⵉⵣⴰⵔ ⵉⵙⵎⵓⵏⵜ ⵜⵏⵜ ⵓⵎⵣⵔⵓⵢ ⵉⴷⵔⴰⵏ ⴷ ⵜⵖⵔⵎⴰ ⵜⴰⵅⴰⵜⴰⵔⵜ, ⵣⴷⵉⵏ ⵜⵏⵜⵏ ⵉⵥⵥⵓⵕⴰⵏ ⵛⵛⴰⵔⵏⵉⵏ ⴷⵓⵙⵏⵉⵏ”.
ⵉⵙⴰⵡⵍ ⵎⴰⵙⵙ ⵍⵎⴰⵍⴽⵉ ⴼ ⵜⵥⴹⴰⵕⵉⵏ ⵜⵉⴷⵎⵙⴰⵏⵉⵏ ⵙⵜⴰⵡⵀⵎⵎⴰⵏⵉⵏ ⵏ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ, ⵉⵖⵔ ⵉ ⵉⴷ ⴱⴰⴱ ⵏ ⵓⵙⵙⴰⵔⵓ ⵉⵜⵓⵕⴽⵉⵢⵏ ⵉ ⵓⵙⵡⵓⵔⵉ ⴼ ⵜⵥⴹⴰⵕⵉⵏ ⵜⵉⴷⵎⵙⴰⵏⵉⵏ ⵏ ⵜⵙⴳⴰ, ⵍⵍⵉⵖ ⴰⴷ ⵜⵜⴰⵡⵉⵏⵜ ⴰⵏⵛⴽ ⵉⵣⵣⵉⴳⵣⵏ ⵏ ⵉⴷ ⴱⴰⴱ ⵏ ⵜⵡⵓⵔⵉ ⴳ ⵓⴳⵯⵏⵙ ⴷ ⴱⵕⵕⴰ ⵏ ⵍⵎⵖⵔⵉⴱ.