ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵜⵉⵡⵉⵙⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵙⵎⵓⵏⵉ ⵏ ⵓⵙⵉⵔⴰ ⴷ ⵓⵙⵉⵔⴰ ⴰⵅⴰⵜⴰⵔ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⵎⵓⵏⵜ ⵉ ⵓⵏⴰⵎⵎⴰⵙ, ⴰⵖⵓⵔⵉ ⵉ ⵜⵡⵉⵙⵉ ⴷ ⵓⵎⵏⵥⴰⵡ ⵏ ⵉⴼⵔⵉⵇⵢⴰ
ⵢⵉⵡⵙ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 27 ⵉⵏⵏⴰⵢⵔ 2021 ⵖ ⵜⵙⵎⵓⵏⵉ ⵏ ⵓⵙⵉⵔⴰ ⴷ ⵓⵙⵉⵔⴰ ⴰⵅⴰⵜⴰⵔ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⵎⵓⵏⵜ ⵉ ⵓⵏⴰⵎⵎⴰⵙ, ⵙ ⵜⵖⴰⵔⴰⵙⵜ ⵏ ⵓⴼⵉⵣⵢⵓⴽⵓⵏⴼⵉⵕⵓⵏⵚ.
ⵍⵍⵉⵖ ⵉⴳⴰ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⵎⵓⵏⵜ ⵉ ⵓⵏⴰⵎⵎⴰⵙ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵡⴰⵜⵉⴳ ⵏ ⵜⴷⵉⵏⴰⵎⵉⵜ ⵏ ⵜⵡⵓⵔⵉ ⵏ ⵜⵎⵙⵎⵓⵏⵜ, ⵉⴱⴷⴷ ⴼ ⵜⵏⴰⵥⴰⵕⵉⵏ ⵏ ⵜⵙⴳⴰ ⵏ ⵓⵏⴰⵎⵎⴰⵙ, ⴰⵢⵍⵍⵉ ⵉⵙⵉⴳⴳⵉⵍⵏ ⴽⵉⴳⴰⵏ ⵏ ⵜⵓⴳⴳⴰⵙ ⵉ ⵓⵙⴱⴷⴷⵉ ⵏⵏⵙⵏⵜ. ⵉⴱⴷⴷ ⵓⵍⴰ ⴼ ⵉⴷⵔⵉⵣⵏ ⵀⵔⵛⵏⵉⵏ ⵏ ⴽⵓⴼⵉⴷ19 ⴼ ⵜⴷⵎⵙⴰ ⵏ ⵜⵙⴳⴰ, ⵉⵖⵔ ⴰⴷ ⵢⵉⵍⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴷⵎⵙⴰⵏ ⴷ ⵜⴳⵎⵉ ⵢⵓⵎⴰⵏ ⴷⴼⴼⵉⵔ ⵏ ⵓⴱⴰⵢⵢⵓⵔ.
ⵉⵙⴰⵡⵍ ⵎⴰⵙⵙ ⵍⵎⴰⵍⴽⵉ ⴼ ⵜⵓⴳⴳⴰⵙ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵖ ⵜⵎⵙⴰⵔⵉⵏ ⵜⵓⴷⴷⵉⵔⵉⵏ ⵜⵉⵎⵣⵡⵓⵔⴰ ⴳ ⵜⵙⴳⴰ ⵏ ⵓⵏⴰⵎⵎⴰⵙ ⴰⵎ ⵜⵉⴳⵎⵉ ⵜⴰⵙⵓⵍⴰⵏⵜ ⴷ ⵜⵏⴼⵔⵓⵜ ⴷ ⵓⴼⵔⴰ ⴷ ⵓⵣⵡⴰⴳ ⴷ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ. ⵉⵙⵙⴽⵜⵉ ⴷ ⴰⵙⵏⵎⴰⵍⴰ ⵏ ⵍⵎⵖⵔⵉⴱ ⵏ ⵓⴳⵔⴰⵡ ⵏ ⵓⵏⵣⵡⵉ ⴳ ⵎⵕⵕⴰⴽⵛ 2016 ⴷ ⵜⵣⵡⵉⵔⵉ ⵏⵏⵙ ⵜⴰⵎⴰⴹⵍⴰⵏⵜ ⵖ ⵢⵉⴳⵔ ⵏ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏⵏ ⴷ ⵓⴷⵔⴰⵡ ⵏ ⵜⵉⵔⵎⵉⵜ ⵏⵏⵙ ⴷ ⵜⵎⵉⵣⴰⵔ ⵜⴰⵢⴰⵜⵎⴰⵜⵉⵏ ⵙⵍⴰⵡⴰⵏ ⴰⴽⴽⵯ ⵜⵉⴼⵔⵉⵇⵉⵢⵉⵏ.
ⵢⵉⵏⵉ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⴷ ⵍⵎⵖⵔⵉⴱ, ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵉⵎⵔⵙ ⴳ ⵓⵎⵢⴰⴷⴰⵙ ⵏ ⵜⴰⵏⵏⴰⵢⵉⵏ ⵏⴳⵔ ⵉⵍⵉⴱⵉⵢⵏ ⵙ ⵜⵖⵣⴰⵏⵜ ⵏⵏⵙ ⴷ ⵓⵙⵙⵔⵅⵓ ⵏⵏⵙ ⵏ ⵓⵎⵙⴰⵡⴰⵍ ⴰⵍⵉⴱⵉ-ⴰⵍⵉⴱⵉ ⴱⵍⴰ ⵉⴽⵛⵎ ⵖ ⵓⴳⵏⵙ ⵏ ⵜⵡⵓⵔⵉ ⵜⴰⵍⵉⴱⵉⵜ, ⵢⵉⵏⵉ ⵎⴰⵙ “ⵜⴳⴰ ⵜⵏⴼⵔⵓⵜ ⴷ ⵓⵔⴳⴳⵉⴳ ⵏ ⵍⵉⴱⵢⴰ ⴰⴳⵣⵣⵓⵎ ⴳ ⵜⵏⴼⵔⵓⵜ ⴷ ⵓⵔⴳⴳⵉⴳ ⵏ ⵍⵎⵖⵔⵉⴱ”, ⴷ ⵎⴰⵙ ⴳⴰⵏⵜ ⵜⴽⵛⵛⵓⵎⵉⵏ ⵜⵉⴱⵕⵕⴰⵏⵉⵢⵉⵏ ⵜⴰⴱⴱⴰⵢⴹⴰⵕⵜ ⵏ ⵜⵎⵙⴰⵔⵜ ⵜⴰⵍⵉⴱⵉⵜ ⵉⵜⵜⴰⵡⵙⵏ ⴳ ⵜⴰⵙⵙⴰⵙⵜ ⵏⵏⵙ.
ⴳ ⵓⵣⵡⴰⴳ, ⵉⵖⵔⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵜⵙⴳⴰ ⵜⴰⵕⵓⴱⴱⵉⵜ ⵉ ⵓⵙⵎⵏⵉⴷ ⵏ ⵓⵙⵏⴰⵍ ⵉ ⵉⴼⵔⵉⵇⵢⴰ ⴷ ⵓⵎⵢⴰⵡⴰⵙ ⴷⵉⴷⵙ, ⵙⵍⴰⵡⴰⵏ ⴰⴽⴽⵯ ⵖ ⵓⵣⵎⵣ ⵏ ⵓⴱⴰⵢⵢⵕ, ⵢⵉⵏⵉ ⵎⴰⵙ ⵉⴳⴰ ⵓⵙⵎⴰⵜⴰ ⵏ ⵓⴳⵣⵣⴰⵢ ⵎⴳⴰⵍ ⵏ ⴽⵓⴼⵉⴷ 19 ⵜⴰⵖⴰⵡⵙⴰ ⵍⵍⵉ ⵔⴰⴷ ⵉⴹⵎⵏ ⵜⴰⵏⴼⵔⵓⵜ ⵜⴰⴷⵓⵙⴰⵏⵜⵉ ⵉⴼⵔⵉⵇⵢⴰ ⴷ ⵓⵕⵓⴱⴱⴰ.
ⵉⵙⵉⵙⴼⵉⵡ ⵎⴰⵙⵙ ⵍⵎⴰⵍⴽⵉ ⵎⴰⵙ ⵉⵙⴽⵔ ⵍⵎⵖⵔⵉⴱ ⵢⴰⵜ ⵜⵙⵜⵔⴰⵜⵉⵊⵉⵜ ⵜⴰⵎⵢⴰⵏⵏⴰⵡⵜ ⵖ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ, ⵉⴱⴷⴷ ⴼ ⵜⵡⵉⵙⵉ ⴷ ⴽⵓ ⵉⵡⴰⵏⴽⵏ ⵙⵍⴰⵡⴰⵏ ⴰⴽⴽⵯ ⵓⵕⵓⴱⴱⴰ ⴷ ⵉⴼⵔⵉⵇⵢⴰ, “ ⵍⵎⵖⵔⵉⴱ ⴷⴰⵔⵙ ⴰⵡⵇⵇⵔ ⴷ ⵓⵙⵓⵜⴳ ⵉⴳⴳⵓⵜⵏ ⵏ ⵓⵏⴳⵔⴰⵡ ⴰⴳⵔⴰⵖⵍⴰⵏ”.
ⵉⵃⴰⴹⵕ ⴳ ⵓⵏⵎⵓⵇⴰⵔ ⴰⴷ ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵓⵕⵓⴱⴱⴰ ⵎⴰⵙⵙ David Sassoli, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵚⴱⴰⵏⵢⴰ ⵎⴰⵙⵙⴰ Meritxell Batet Lamaña, ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵜⴰⵎⵓⵏⵜ ⵉ ⵓⵏⴰⵎⵎⴰⵙ, ⴷ ⵎⴰⵙⵙ ⵎⵓⵚⵟⴰⴼⴰ ⵉⴱⵔⴰⵀⵉⵎⵉ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵓⵙⵖⵓⴷⵓ ⵏ ⵜⵓⴷⵔⵜ ⴷ ⵉⵙⵏⴼⵍⵏ ⵊⴰⵔ ⵡⴰⵎⵓⵏⵏ ⵉⵖⵔⵎⴰⵏⵏ ⴷ ⵜⴷⵍⵙⴰ ⴳ ⵜⵎⵙⵎⵓⵏⵜ.