ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⵙⵉⵅⴼ ⵜⴰⵙⵎⵓⵏⵉ ⵏ ⵓⵎⵛⴰⵡⴰⵕ ⴷ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵜⴰⴱⵕⵍⴰⵎⴰⵏⵉⵜ ⵉⵛⵛⴰⵔⵏ ⵊⴰⵔ ⵍⵎⵖⵔⵉⴱ ⴷ ⵜⵎⵓⵏⵜ ⵏ ⵓⵕⵓⴱⴱⴰ ⵖ ⵓⵎⵏⵉⴷ ⴰⵎⵖⵔⵉⴱⵉ
ⵜⵍⵍⴰ ⵖ ⵡⴰⵢⵏⴰⵙ 07 ⴷⵓⵊⴰⵏⴱⵉⵔ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵏ ⵓⵎⵛⴰⵡⴰⵕ ⵏⴳⵔ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵍⴰⵃⴱⵉⴱ ⵍⵎⴰⵍⴽⵉ ⴷ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵜⴰⴱⵕⵍⴰⵎⴰⵏⵉⵜ ⵉⵛⵛⴰⵔⵏ ⵊⴰⵔ ⵍⵎⵖⵔⵉⴱ ⴷ ⵜⴰⵎⵓⵏⵜ ⵏ ⵓⵕⵓⴱⴱⴰ ⵖ ⵓⵎⵏⵉⴷ ⴰⵎⵖⵔⵉⴱⵉ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵛⴰⵡⵉ ⴱⵍⵄⵙⵙⴰⵍ.
ⵉⵍⵍⴰ ⵖ ⵜⵙⵎⵓⵏⵉ ⴰⴷ, ⴰⵣⵣⵔⴰⵢ ⵏ ⵜⵎⵙⴽⴰⵔ ⵏ ⵓⵙⴳⴳⵯⴰⵙ ⵏ ⵜⵙⵇⵇⵉⵎⵜ ⴰⴷ ⴷ ⵓⵙⵔⵓⵙ ⵏ ⵉⵙⴰⵡⵓⵔⵏ ⴼ ⵓⵎⵢⴰⵡⴰⵙ ⴰⵙⵔⵜⴰⵏ ⵊⴰⵔ ⵍⵎⵖⵔⵉⴱ ⴷ ⵜⵎⵓⵏⵜ ⵏ ⵓⵕⵓⴱⴱⴰ, ⵉⵙⴷⴷⵉⴷ ⵎⴰⵙⵙ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵉⵎⵉⵥ ⴰⵙⵉⵏⵔⴰⵏ ⵖ ⵜⵎⴷⵔⴰⵡⵜ ⵉⴳⴰⵏ ⴰⵏⴰⵡ ⵏⴳⵔ ⵍⵎⵖⵔⵉⴱ ⴷ ⵓⵕⵓⴱⴱⴰ ⵉⴳⴰⵏ ⵜⴰⴱⵖⵓⵔⵜ ⵎⵓ ⴳⴳⵓⵜⵏ ⵉⵎⵏⵉⴷⵏ ⵏⵏⵙ, ⵉⴳⴰⵏ ⵜⴰⵢⴰⴼⵓⵜ ⵏ ⵓⴳⴳⴰⵔ ⵏ ⵓⵣⴳⵏ ⵏ ⵜⴰⵙⵓⵜ, ⵉⵖⵔ ⴰⴷ ⵢⵉⵍⵉ ⵓⴼⵔⴰⴳ ⵏ ⵜⵎⴷⵔⴰⵡⵜ ⴰⴷ ⴷ ⵓⵙⵎⵖⵔ ⵏⵏⵙ ⵖ ⵉⴳⵔⴰⵏ ⵏ ⵏ ⵜⵙⵔⵜⵉⵜ ⴷ ⵡⴰⵎⵓⵏ ⴷ ⵜⴷⵎⵙⴰ ⴷ ⵜⵏⴼⵔⵓⵜ.
ⵜⴳⴰ ⵜⵙⵎⵓⵏⵉ ⴰⴷ ⴰⵙⴷⵓⵙ ⵏ ⵓⵎⵙⴰⵡⴰⵍ ⴰⵎⵖⵔⵉⴱⵉ ⴼ ⵜⵎⴷⵔⴰⵡⵜ ⵏⵏⵙ ⴷ ⵓⵕⵓⴱⴱⴰ, ⵜⴰⵡⵉ ⴷ ⵜⵉⵎⵔⴰⵔⵓⵜⵉⵏ ⵜⵜⵓⵣⴷⴰⵢⵏⵉⵏ ⴼ ⵉⵎⵔⵙⵉⵡⵏ ⵛⵛⴰⵔⵏⵉⵏ: ⵜⴰⵙⵔⵜⵉⵜ ⵏ ⵜⵓⴹⵊⵓⵕⴰ ⴷ ⵓⵕⵓⴱⴱⴰ, ⵜⴰⵏⴼⵔⵓⵜ, ⴰⵣⵡⴰⴳ ⴷ ⵜⴳⵎⵉ ⵜⴰⵏⴼⴳⴰⵏⵜ, ⴰⵙⴱⴷⴷⵉ ⵏ ⵓⴱⵔⵙⵙⵉⵡⴷ, ⴰⵎⵢⴰⵡⴰⵙ ⵖ ⵜⴷⵎⵙⴰ ⴷ ⵓⵙⵖⵏⵣⵉ, ⵜⵉⵣⴷⴰⵢⵉⵏ ⵊⴰⵔ ⵜⴰⵎⵓⵏⵜ ⵏ ⵓⵕⵓⴱⴱⴰ ⴷ ⵍⵎⵖⵔⵉⴱ ⴷ ⵜⵎⵓⵏⵜ ⵏ ⵉⴼⵔⵉⵇⵢⴰ.
ⵃⵎⴰ ⴰⴷ ⵢⵉⵍⵉ ⵓⵙⵙⴰⵔⵓ ⵏ ⴽⵓ ⵉⵣⵎⴰⵣ ⵏ ⵓⵎⵢⴰⵡⴰⵙ, ⵙⵍⴰⵡⴰⵏ ⴰⴽⴽⵯ ⵖ ⵜⵎⵙⴰⵙⵜⵍⵜ ⴰⴷ ⵏ ⵓⴱⴰⵢⵢⵓⵕ, ⵃⵎⴰ ⴰⴷ ⵢⵉⵍⵉ ⵓⵙⴷⵓⵙ ⵏ ⵓⵎⵛⴰⵡⴰⵕ ⴷ ⵓⵎⵙⴰⵡⴰⵍ ⵏⴳⵔ ⵍⵎⵖⵔⵉⴱ ⴷ ⵓⵕⵓⴱⴱⴰ ⴷ ⵓⵙⵏⴼⵍ ⵏ ⵜⵎⵓⵣⴰⵢⵉⵏ, ⵉⵍⵍⴰ ⵓⵎⵙⴰⵛⴽⴰ ⴼ ⵓⵙⵏⵎⴰⵍⴰ ⵏ ⵡⴰⵙⵙ ⵏ ⵜⵖⵓⵔⵉ ⴼ ⵜⵉⵍⴰⵍⵜ ⵏ ⵜⵎⴷⵔⴰⵡⵜ ⵊⴰⵔ ⵍⵎⵖⵔⵉⴱ ⴷ ⵓⵕⵓⴱⴱⴰ ⵖ ⵓⵙⴷⵓⵙ ⵏ ⵜⴷⵎⵙⴰ ⵏ ⵉⴼⵔⵉⵇⵢⴰ ⴷⴼⴼⵉⵔ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⵃⵎⴰ ⴰⴷ ⵉⵜⵜⵓⵙⵙⵉⵏ ⵡⴰⵜⵉⴳ ⵏ ⵓⵙⵖⵏⵣⵉ ⵏ ⵡⴰⴽⴰⵍ ⵊⴰⵔ ⵍⵎⵖⵔⵉⴱ ⴷ ⵉⵡⴰⵏⴽⵏ ⵏ ⵉⴼⵔⵉⵇⵢⴰ ⴷ ⵏⴳⵔ ⵓⵕⵓⴱⴱⴰ ⴷ ⵉⴼⵔⵉⵇⵢⴰ.
ⵖ ⵓⵙⴰⵜⵉ ⴰⴷ, ⵉⵙⴷⴷⵉⴷ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵉⵍⴽⵎ ⵓⵣⵎⵣ ⴰⴷ ⵉⵍⵉⵏ ⵉⵙⵏⴼⴰⵔⵏ ⵎⵇⵓⵔⵏⵉⵏ ⵛⵛⴰⵔⵏⵉⵏ ⵏⴳⵔ ⵍⵎⵖⵔⵉⴱ ⴷ ⵓⵕⵓⴱⴱⴰ, ⴰⵢⵍⵍⵉ ⵔⴰⴷ ⵉⴼⴽ ⵜⴰⴷⵓⵙⵉ ⵉ ⵜⴷⵎⵙⴰ ⵏ ⵉⴼⵔⵉⵇⵢⴰ ⵖ ⵢⴰⵜ ⵜⵎⴷⵔⵡⴰⵜ ⵖ ⵍⵍⴰⵏ ⴽⵕⴰⴹ ⵉⵎⵏⵉⴷⵏ: ⵍⵎⵖⵔⵉⴱ ⴷ ⵓⵕⵓⴱⴱⴰ ⴷ ⵉⴼⵔⵉⵇⵢⴰ, ⴰⵢⵍⵍⵉ ⵔⴰⴷ ⵢⴰⵡⵙ ⵖ ⵓⵙⵉⴷⴼ ⴰⵙⴳⴰⵡⴰⵏ ⴷ ⵓⴷⵎⵙⴰⵏ ⵏ ⵜⵙⴳⴰ ⵏ ⵙⵙⴰⵃⵉⵍ ⴷ ⵚⵚⵃⵕⴰ, ⵙ ⵓⵙⵎⵀⵍ ⵏ ⵉⵙⵏⴼⵍⵏ ⵏ ⵓⵙⵖⵏⵣⵉ ⴷ ⵓⵙⴽⵔ ⵏ ⵜⵣⵣⵓⵍⵉⵏ ⴷ ⵓⵙⴱⴷⴷⵉ ⵏ ⵓⵥⵍⴰⴹ ⴰⵢⵍⵍⵉ ⵔⴰⴷ ⵉⴳ ⵜⴰⵎⵔⴰⵔⵓⵜ ⵉⴷⵓⵙⵏ ⵎⵏⵉⴷ ⵏ ⵜⵔⵓⴱⴱⴰ ⵏ ⵓⴱⵔⵙⵙⵉⵡⴷ ⵖ ⵜⵙⴳⴰ.