ⴰⵙⵉⵡⴹ ⵉⵛⵛⴰⵔⵏ ⵏ ⵓⴱⵕⵍⴰⵎⴰⵏ: ⴰⵏⵢⴰⵍⴽⴰⵎ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴷ ⵜⵎⴰⴷⴷⴰⵙⵉⵏ ⴷ ⵜⵎⵓⵏⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵏⵎⵏⴰⴹⵉⵏ ⴷ ⵜⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ ⴼ ⵜⵉⴷⵜ ⵏ ⵓⵙⵓⵔⵙ ⵖ ⵓⵙⴰⴽⴰ ⵏ ⵍⴳⵔⴳⴰⵔⴰⵜ ⵏⴳⵔ ⵍⵎⵖⵔⵉⴱ ⴷ ⵎⵓⵕⵉⵟⴰⵏⵢⴰ

ⴷⴼⴼⵉⵔ ⵏ ⵜⵣⵣⵉⴳⵣⵉⵏ ⵏ ⵓⵙⵓⵔⵙ ⵖ ⵓⵙⴰⴽⴰ ⵉⵣⴷⵉⵏ ⵏⴳⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⴳⴷⵓⴷⴰⵏⵜ ⵜⵓⵙⵍⵉⵎⵜ ⵜⴰⵎⵓⵕⵉⵟⴰⵏⵉⵜ ⵉⴳⴰⵏ ⵜⴰⴳⵯⵎⴰⵜ, ⵙ ⵓⵅⵎⵎⴻⵎ ⴷ ⵓⴹⴼⵕ ⵉⴳⴳⵓⵜⵏ ⵉⵙⵇⵇⵉⵇⵏ ⵏ ⵉⴳⵏⵙⴰⵙⵏ ⵏ ⵜⵎⵜⵜⵉ ⵉ ⵓⵙⵓⵔⵙ ⴰⴷ, ⵙ ⵜⵓⴼⵔⴰⵢⵉⵏ ⵏ ⵓⴱⵓⵔⵣ ⴷ ⵜⵎⵔⴰⵔⵓⵜ ⵉⵕⵚⴰⵏ ⵏ ⵓⴼⵔⴰ ⵏ ⵜⵎⴰⵣⵉⵔⵜ ⵏⵏⵖ ⵎⵏⵉⴷ ⵏ ⵜⵣⵣⵉⴳⵣⵉⵏ ⴰⴷ, ⵖ ⵓⵙⵎⵀⵍ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵉ ⵡⴰⵍⴰⵢ ⵏ ⵡⴰⵡⴰⵍ ⵏ ⵍⵎⵖⵔⵉⴱ ⵉⴳⴰⵏ ⴰⵣⵔⴼⴰⵏ ⵉⵖⵣⴰⵏⵏ ⴷⴰⵔ ⴽⵓ ⵜⵉⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⴳⴰⵡⴰⵏⵉⵏ ⴷ ⵜⵏⵎⵏⴰⴹⵉⵏ ⴷ ⵜⴳⵔⴰⵖⵍⴰⵏⵉⵏ, ⴱⴷⴷⵏ ⵉⵏⵙⵙⵉⵅⴼⵏ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ, ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵎⴰⵙⵙ ⵄⴰⴱ ⵍⵃⴰⴽⵉⵎ ⴱⵏ ⵛⵎⵎⴰⵛ, ⴰⴷ ⵜⵉⵍⵉ ⵜⵎⵢⴰⵣⴰⵏⵜ ⵉ ⴽⵓ ⵜⵉⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵏⵎⵏⴰⴹⵉⵏ ⴷ ⵜⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ ⵃⵎⴰ ⴰⴷ ⵙⵙⵏⵜ ⵜⵉⴷⵜ ⵏ ⵓⵙⵓⵔⵙ ⴷ ⵓⵖⵣⴰⵏ ⴷ ⵜⵓⵏⵥⵉⵥⵜ ⵏ ⵜⵡⵓⵔⵉ ⵏ ⵓⴼⵔⴰ ⵜⴰⵎⵖⵔⵉⴱⵉⵜ ⵖ ⵜⵙⴳⴰ.

ⵍⵍⵉⵖ ⵙⴷⴷⵉⴷⵏ ⵙⵉⵏ ⵉⵏⵙⵉⵅⴼⵏ ⵏ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴼ ⵜⵎⴼⵓⵥⵥⵕⵜ ⵏ ⵜⵎⵙⴰⵔⵜ ⵜⴰⵏⴰⵎⵓⵔⵜ ⵜⴰⵎⵣⵡⴰⵔⵓⵜ, ⵜⵉⵏ ⵚⵚⵃⵕⴰ ⵜⴰⵎⵖⵔⵉⴱⵉⵜ, ⵍⵍⵉ ⵜⵎⵎⴰⵍ ⵜⵓⵍⴳⵉⵏⵜ ⵏⵏⵙ ⵜⴰⵎⵣⵔⴰⵢⵜ ⴷ ⵜⵣⵔⴼⴰⵏⵜ ⴷ ⵜⵉⵏ ⵜⵉⵍⴰⵡⵜ ⴰⵖⵣⴰⵏ ⵏ ⵡⴰⴷⴷⴰⴷ ⴰⵎⵖⵔⵉⴱⵉ, ⵉⵎⵓⵏⵏ ⴷ ⵓⵎⴰⴽⵕⴰⴹ ⴰⵏⴰⵎⵓⵔ ⵉⵙⵓⵍⵏ ⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ. ⴳⴰⵏⵜ ⵜⵉⴱⵔⴰⵜⵉⵏ ⵉ ⵉⵏⵙⵙⵉⵅⴼⵏ ⴷ ⵜⵏⵙⵙⵉⵅⴼⵉⵏ ⵏ ⵜⵎⴰⴷⴷⴰⵙⵉⵏ ⴷ ⵜⵎⵓⵏⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵏⵎⵏⴰⴹⵉⵏ ⴷ ⵜⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ ⴼ ⵜⴽⵏⵓⵕⵓⵍⵓⵊⵉⵜ ⵏ ⴳⴰⵔ ⵉⵙⴽⴽⵉⵔⵏ ⵀⵔⵛⵏⵉⵏ ⵓⵔ ⵜⵜⵓⵇⴱⴰⵍⵏⵉⵏ ⵏ ⵍⵎⵉⵍⵉⵛⵉⵢⴰⵜ ⵏ “ⴱⵓⵍⵉⵙⴰⵔⵢⵓ” ⵍⵍⵉⵖ ⴽⵛⵎⵏⵜ ⵜⴰⵔ ⵜⵓⵍⴳⵉⵏⵜ ⵙⴳ 21 ⴽⵟⵓⴱⵕ ⵉⵣⵔⵉⵏ ⵙ ⵓⵙⴰⴽⴰ ⵏ ⵍⴳⵔⴳⴰⵔⴰⵜ ⵖ ⵚⵚⵃⵕⴰ ⵜⴰⵎⵖⵔⵉⴱⵉⵜ, ⵙ ⵜⵎⵙⴽⴰⵔ ⵜⵉⵏⴱⴽⴰⴹⵉⵏ ⵙⵙⵉⵡⵉⴷⵏⵉⵏ, ⴷ ⵓⵙⴱⵉⴹⵕ ⵏ ⵜⵍⴻⵍⵍⵉ ⵏ ⵓⵎⵎⴰⵜⵜⵉ ⵏ ⵉⵡⴷⴰⵏ ⴷ ⵓⵙⵖⵏⵣⵉ, ⴷⴼⴼⵉⵔ ⵏ ⵜⴱⴱⴰⵢⴹⴰⵕⵉⵏ ⵢⴰⴹⵏⵉⵏ ⵖ ⴽⴽⵓⵥ ⵉⵙⴳⴳⵯⴰⵙⵏ ⴰⴷ ⴳⴳⵓⵔⴰⵏⵉⵏ, ⵉⵡⵉⵏⵉⵏ ⵜⴰⵢⵏⵉⵜ ⵏ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵎⵓⵏⵏⵉⵏ, ⵙ ⵜⵉⵕⵥⵉ ⵉⴼⴰⵡⵏ ⵏ ⵜⵖⵜⴰⵙⵉⵏ ⵏ ⵓⵙⵇⵇⵉⵎ ⵏ ⵜⵏⴼⵔⵓⵜ ⵍⵍⵉ ⵉⵖⵔⴰⵏ ⵉ “ⴱⵓⵍⵉⵙⴰⵔⵢⵓ” ⴰⴷ ⵜⵙⴱⵉⴷⴷ ⵜⵉⵎⵙⴽⴰⵔ ⴰⴷ ⵏ ⵓⵙⵎⴰⵙⵙ ⵏ ⵓⵔⴳⴳⵉⴳ.

ⵜⵉⵏⵉ ⵜⵎⵢⴰⵣⴰⵏⵜ ⴰⴷ ⵎⴰⵙ ⵢⵓⵎⵥ ⵍⵎⵖⵔⵉⴱ ⵖ ⵉⵅⴼ ⵏⵏⵙ, ⵉⵙⴽⵔ ⴰⴷ ⵢⵉⵍⵉ ⵓⴼⵙⵙⴰⵢ ⴰⴷⵉⴱⵍⵓⵎⴰⵙⵉ ⵙ ⵜⵡⵓⵔⵉⵡⵉⵏ ⵥⵉⵍⵏⵉⵏ ⵏ ⵜⵎⵜⵜⴰ ⵎⵓⵏⵏⵉⵏ, ⵓⵔ ⴷⴰⵔⵙ ⴰⴱⵍⴰ ⴰⴷ ⵉⵙⴽⵔ ⵙ ⵜⵎⴰⵙⴰⵢⵉⵏ ⵏⵏⵙ ⴷ ⵓⵡⵇⵇⵔ ⵏ ⵜⵎⵥⵍⴰⵢ ⵏⵏⵙ ⴷ ⵓⵙⴽⵔ ⵏ ⵜⵡⵓⵔⵉ ⵏⵏⵙ ⵜⵓⵍⴳⵉⵏⵜ, ⵙ ⵓⵎⵙⴰⵙⴰ ⵉⵙⵎⴷⵏ ⴷ ⵜⵓⵍⴳⵉⵏⵜ ⵜⴰⴳⵔⴰⵖⵍⴰⵏⵜ, ⵖ ⵓⴼⵔⴰⴳ ⵏ ⵓⵙⴰⴽⴰ ⵏ ⵉⵡⵜⵜⴰ ⵉⵣⴷⵉⵏ ⵏⴳⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⴰⴹⵊⴰⵕⵜ ⵎⵓⵕⵉⵟⴰⵏⵢⴰ, ⵖ ⵉⵍⵍⴰ ⵓⵙⴱⴷⴷⵉ ⵏ ⵡⴰⴷⴷⴰⴷ ⵏ ⵓⵙⴱⵉⴹⵕ ⵉⴳⴰⵏ ⵜⴰⵢⴰⴼⵓⵜ ⵏ ⴳⴰⵔ ⵜⵎⵙⴽⴰⵔ ⵙⵙⵉⵡⵉⴷⵏⵉⵏ ⵏ ⵍⵎⵉⵍⵉⵛⵢⴰⵜ ⵏ “ⴱⵓⵍⵉⵙⴰⵔⵢⵓ” ⵍⴰⵏⵉⵏ ⴰⴱⴰⵕⵓⴹ ⴷ ⵓⵖⵓⵍ ⵏ ⵓⵙⵕⵚⵓ ⵏ ⵜⵍⴻⵍⵍⵉ ⵏ ⵓⵎⵎⴰⵜⵜⵉ ⵏ ⵉⵡⴷⴰⵏ ⴷ ⵓⵙⵖⵏⵣⵉ ⵖ ⵍⴳⵔⴳⴰⵔⴰⵜ, ⵙ ⵎⴰⴷ ⵉⵡⵉⵏ ⵉⵙⵡⴰⵍⴰⵢⵏ ⴰⵜⵜⵓⵢⵏⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴰⵏⵙⵙⵉⵅⴼ ⴰⵎⴰⵜⵜⵓⵢ ⴷ ⵓⵏⵙⵙⵉⵅⴼ ⵏ ⵜⵔⵙⴰⵍ ⵏ ⵜⵎⴰⵖⵜ ⵜⴰⵎⴰⵜⴰⵢⵜ,  ⴷ ⵓⵙⴼⵍⵙ ⵏⵏⵙ ⴷ ⵓⵏⵏⵓⵕⵥⵎ ⵏⵏⵙ ⴷⴰⵜ ⵏ ⵉⵡⴷⴰⵏ ⴷ ⵓⵙⵖⵏⵣⵉ ⵙ ⵜⵖⴰⵔⴰⵙⵜ ⵏ ⵓⴼⵔⴰ, ⴱⵍⴰ ⴽⵔⴰ ⵏ ⵓⵇⵔⵢⴰⵏ ⴷ ⵓⵙⴷⵉⴷⴷⵉⵢ ⵏ ⵜⴼⴰⵜⵉⵜ ⵏ ⵉⵡⴷⴰⵏ

ⵉⵙⴷⴷⵉⴷ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵎⴰⵙ ⴷ ⵜⴰⴳⵍⴷⵉⵜ ⵜⴰⵎⵖⵔⵉⴱⵉⵜ, ⵖⵎⴽ ⵍⵍⵉ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ ⵖ ⵓⵏⵢⴰⵍⴽⴰⵎ ⵏⵏⵙ ⴰⵙⵙ ⵏ ⵡⴰⵢⵏⴰⵙ 16 ⵏⵓⵡⴰⵏⴱⵉⵔ ⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵎⵓⵏⵏⵉⵏ ⵎⴰⵙⵙ ⴰⵏⵟⵓⵏⵢⵓ ⴳⵓⵜⵉⵔⵉⵛ, ⵔⴰⴷ ⵉⵣⵣⵉⴳⵣ ⵖ ⵜⵡⵓⵔⵉⵡⵉⵏ ⵜⵓⵛⵛⵉⵍⵉⵏ ⵍⵍⵉ ⵔⴰⴷ ⵉⴹⵎⵏ ⴰⵏⴳⵔⴰⵡ ⴷ ⵓⵎⵎⴰⵜⵜⵉ ⵏ ⵓⴼⵔⴰ ⵉⵣⵣⵉⴳⵣⵏ ⵏ ⵉⵡⴷⴰⵏ ⴷ ⵜⵎⴳⵓⵔⴰ ⵖ ⵜⵙⴳⴰ ⵉⵍⵍⴰⵏ ⵖ ⵉⵡⵜⵜⴰ ⵏⴳⵔ ⵜⴳⵍⴷⵉⵜ ⴷ ⵜⴳⴷⵓⴷⴰⵏⵜ ⵜⵓⵙⵍⵉⵎⵜ ⵜⴰⵎⵓⵕⵉⵟⴰⵏⵉⵜ, ⵖⵎⴽ ⵍⵍⵉ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴼ ⵓⵙⵏⴰⵍ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵏ ⵜⵓⴳⴳⴰⵙ ⵏ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵎⵓⵏⵏⵉⵏ, ⵖ ⵓⵙⴰⵜⵉ ⵏ ⵜⵡⵓⵔⵉ ⵜⴰⵙⵔⵜⴰⵏⵜ, ⵍⵍⵉ ⴷ ⵉⵇⵇⴰⵏⵏ ⴰⴷ ⵢⵉⵍⵉ ⴼ ⵜⵙⵖⴰⵍⵉⵏ ⴼⴰⵡⵏⵉⵏ ⵙ ⵜⴷⵔⴰⵡⵜ ⵏ ⴽⵓ ⵜⴰⵙⴳⵉⵡⵉⵏ ⵏ ⵜⵉⴷⵜ ⵖ ⵓⵎⵏⵣⴰⵖ ⴰⴷ ⴰⵙⴳⴰⵡⴰⵏ, ⴰⵢⵍⵍⵉ ⵔⴰⴷ ⵢⴰⵡⵙ ⵖ ⵜⵉⵍⵉⵜ ⵏ ⵓⴼⵙⵙⴰⵢ ⵏ ⵜⵉⵍⴰⵡⵜ ⵍⵍⵉ ⵔⴰⴷ ⵉⵜⵜⵓⵙⴽⵉⵔ ⵖ ⵓⵙⴰⵜⵉ ⵏ ⵓⴱⴰⴹ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ.

ⵍⵍⵉⵖ ⵉⵍⵍⴰ ⵓⵙⵎⴰⵢⵏⵓ ⵏ ⵓⵙⵉⵡⵍ ⴼ ⵜⵓⴼⵔⴰⵢⵉⵏ ⵏ ⵓⵙⵓⵜⴳ ⴷ ⵓⵙⵉⵙⵙⵏ ⴷⵔⴰⵏⵉⵏ ⵉ ⵡⴰⴷⴷⴰⴷⵏ ⵏ ⵉⵡⴰⵏⴽⵏ ⴳⴰⵏⵉⵏ ⵉⵎⴷⴷⵓⴽⴽⴰⵍ ⴷ ⴰⵢⵜⵎⴰⵜⵏ ⵍⵍⵉ ⵓⴳⵉⵏⵉⵏ ⵜⵉⴱⴹⵉⵜ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵍⵎⵖⵔⵉⴱ ⴷ ⵓⵔⴳⴳⵉⴳ , ⵙⵏⴰⵍⵏⵜ ⵜⵉⵡⵓⵔⵉⵡⵉⵏ ⵏ ⵓⴼⵔⴰ ⵔⴰⵏⵉⵏ ⴰⵙⵕⵚⵓ ⵏ ⵜⵍⴻⵍⵍⵉ ⵏ ⵓⵎⵎⴰⵜⵜⵉ ⵏ ⵉⵡⴷⴰ      ⵏ ⴷ ⵓⵙⵖⵏⵣⵉ ⴷ ⵜⵉⵍⵉⵜ ⵏ ⵜⵏⴼⵔⵓⵜ ⴷ ⵓⵔⴳⴳⵉⴳ ⵖ ⵉⵡⵜⵜⴰ ⵊⴰⵔ ⵍⵎⵖⵔⵉⴱ ⴷ ⵎⵓⵕⵉⵟⴰⵏⵢⴰ ⴷ ⵜⵙⴳⴰ ⴰⴽⴽⵯ, ⵙⴷⴷⵉⴷⵏ ⵉⵏⵙⵙⵉⵅⴼⵏ ⵏ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ  ⵙ ⵜⵎⵢⴰⵣⴰⵏⵉⵏ ⴰⴷ, ⵎⴰⵙ ⵉⴳⴰ ⵓⵙⵏⵖⵎⵙ ⵏ ⵜⵏⵙⵙⵉⵅⴼⵉⵏ ⴷ ⵉⵏⵙⵙⵉⵅⴼⵏ ⵏ ⵜⵎⴰⴷⴷⴰⵙⵉⵏ ⴷ ⵜⵎⵓⵏⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵏⵎⵏⴰⴹⵉⵏ ⴷ ⵜⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ, ⴰⵙⴷⵓⵙ ⵏ ⵡⴰⵜⵉⴳⵏ ⵏ ⵓⵎⵙⴰⵡⴰⵍ ⴷ ⵓⵎⵛⴰⵡⴰⵕ ⴷ ⵓⵙⵓⵜⴳ ⵏ ⵓⵎⵣⵔⵓⵢ ⵏ ⵜⵣⴷⴰⵢⵉⵏ ⴷⵓⵙⵏⵉⵏ ⵍⵍⴰⵏⵉⵏ ⵏⴳⵔ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⴽⵓ ⵜⵉⵎⴰⴷⴷⴰⵙⵉⵏ ⴰⴷ, ⵖⵎⴽ ⴰⵏⵏ ⴷ ⵓⵙⵙⴽⵯⵜⵉ ⵏ ⵡⴰⴷⴷⴰⴷⵏ ⵏ ⵜⴳⵯⵎⴰⵜ ⵉⵥⵉⵍⵏ ⴼ ⵙⴰⵡⵍⵏⵜ ⴽⵉⴳⴰⵏ ⵏ ⵜⵎⴰⴷⴷⴰⵙⵉⵏ ⵙ ⵓⵙⵏⴰⵍ ⵏⵏⵙⵏⵜ ⵉⵙⵎⴷⵏ ⵉ ⵜⵓⴳⴳⴰⵙ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⵎⵜⵜⴰ ⵎⵓⵏⵏⵉⵏ ⵉ ⵓⵙⵉⴳⴳⵍ ⵏ ⵓⴼⵙⵙⴰⵢ ⵏ ⵓⴼⵔⴰ ⵉⵙⵎⴷⵏ ⵉ ⵓⵎⵏⵣⴰⵖ ⵉⵜⵜⵓⵙⴽⴰⵔⵏ ⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ ⵙ ⴰⵢⵍⵍⵉ ⵉⴼⵔⴳⵏ ⴰⴱⴰⴹ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⵢⴰⵏⵜ ⵏⵏⵙ ⵜⴰⵏⴰⴽⴰⵍⵜ.