ⴰⵙⵉⵔⴰ(2016-2021):
ⵉⴷⵔⵓ ⵎⴰⵙⵙ ⵎⵓⵃⴰⵎⵎⴰⴷ ⵜⵡⵉⵎⵉ ⴱⵏ ⵊⵍⵍⵓⵏ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵜⵙⵎⵓⵏⵉ ⵏ ⵜⵙⵇⵇⵉⵎⵜ ⵜⴰⵙⵓⵍⴰⵏⵜ ⵖ ⵓⵙⵉⵔⴰ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⴼⵕⴰⵏⴽⵓⴼⵓⵏⵉⵜ, ⵉⵙⴷⴷⵉⴷ ⴼ ⵓⵙⵏⴰⵍ ⵏ ⵍⵎⵖⵔⵉⴱ ⵏ ⵜⵓⴳⴳⴰⵙ ⵏ ⵓⴼⵙⵙⴰⵢ ⴰⵙⵔⵜⴰⵏ ⵉⵎⵙⴰⵙⴰⵏ ⵖ ⵎⴰⵍⵉ
ⵜⵙⵏⵎⴰⵍⴰ ⵜⵙⵇⵇⵉⵎⵜ ⵜⴰⵙⵓⵍⴰⵏⵜ ⵖ ⵓⵙⵉⵔⴰ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⴼⵕⴰⵏⴽⵓⴼⵓⵏⵉⵜ ⴰⵙⵙ ⵏ ⵡⴰⵢⵏⴰⵙ 30 ⵏⵓⵡⴰⵏⴱⵉⵔ 2020 ⵜⴰⵙⵎⵓⵏⵉ ⵙ ⵓⴼⵉⵣⵢⵓⵏⴽⵓⵏⴼⵉⵕⵓⵏⵚ, ⵉⴷⵔⵓ ⴳⵉⵙ ⵎⴰⵙⵙ ⵎⵓⵃⴰⵎⵎⴰⴷ ⵜⵡⵉⵎⵉ ⴱⵏ ⵊⵍⵍⵓⵏ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵜⵥⵍⵉ ⵉ ⵓⵙⵓⵔⵙ ⵖ ⵎⴰⵍⵉ ⴷ ⵍⵓⴱⵏⴰⵏ ⴷ ⴰⵔⵎⵉⵏⵢⴰ ⴷ ⵙⴰⵃⵉⵍ ⵍⵄⴰⵊ ⴷ ⴱⵓⵕⴽⵉⵏⴰⴼⴰⵚⵓ ⴷ ⵜⵎⵙⴰⵔⵉⵏ ⵢⴰⴹⵏⵉⵏ ⵉⵡⵉⵏⵉⵏ ⴰⵅⵎⵎⴻⵎ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⴼⵕⴰⵏⴽⵓⴼⵓⵏⵉⵜ.
ⵉⵙⴷⴷⵉⴷ ⵎⴰⵙⵙ ⵎⵓⵃⴰⵎⵎⴰⴷ ⵜⵡⵉⵎⵉ ⴱⵏ ⵊⵍⵍⵓⵏ ⴼ ⵜⴷⵓⵙⵉ ⵏ ⵜⵣⴷⴰⵢⵉⵏ ⵜⵉⵎⵣⵔⴰⵢⵉⵏ ⵙⵎⵓⵏⵏⵉⵏ ⵏⴳⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⴳⴷⵓⴷⴰⵏⵜ ⵏ ⵎⴰⵍⵉ, ⴰⵎ ⵜⵉⵣⴷⴰⵢⵉⵏ ⵜⵉⵎⵣⵔⴰⵢⵉⵏ ⵏ ⵓⵙⵖⵏⵣⵉ ⴷ ⵉⴽⴰⴱⴰⵕⵏ ⵜⵜⴱⴱⵉⵏⵉⵏ ⵚⵚⵃⵕⴰ ⵜⴰⵎⵇⵔⴰⵏⵜ ⴱⴷⴷⵏⵜ ⵖ ⴼⴰⵙ ⴷ ⵎⵕⵕⴰⴽⵛ, ⴷ ⵜⵖⵏⵙⴰ ⵏ ⵙⵉⵏ ⵉⵎⴰⴷⴰⵏⵏ ⵉ ⵓⵙⵍⴻⵍⵍⵉ ⵙⴳ ⵓⵙⴷⵓⵔⵔⵉ ⵣⵖ ⵜⵉⵙⵎⵎⵓⵙⵉⵏ ⵏ ⵜⴰⵙⵓⵜ ⵉⵣⵔⵉⵏ, ⵢⵉⵏⵉ: “ ⵓⵔ ⵔⴰⴷ ⵜⴱⵉⴷⴷ ⵜⴳⴷⵓⴷⴰⵏⵜ ⵏ ⵎⴰⵍⵉ ⵖ ⵓⵙⴽⵔ ⵏ ⵜⵉⵍⴰⵍⵜ ⵏⵏⵙ ⵜⴰⵎⵣⵔⴰⵢⵜ ⴷ ⵓⵥⵏⵥⵕ ⵏⵏⵙ ⵖ ⵜⵎⴰⵥⵓⵏⵜ ⴷ ⵜⵡⵉⵙⵉ ⵏⵏⵙ ⵖ ⵡⴰⵢⴷⴰ ⴰⵏⴼⴳⴰⵏ ⵏ ⵓⵎⴰⴹⴰⵍ”.
ⵉⵙⴷⴷⵉⴷ ⵎⴰⵙⵙ ⵎⵓⵃⴰⵎⵎⴰⴷ ⵜⵡⵉⵎⵉ ⴱⵏ ⵊⵍⵍⵓⵏ ⴼ ⵓⵙⵏⴰⵍ ⵏ ⵍⵎⵖⵔⵉⴱ ⵏ ⵜⵢⴰⵏⵜ ⵏ ⵡⴰⴽⴰⵍ ⵏ ⵜⵎⴰⵣⵉⵔⵜ ⵏ ⵎⴰⵍⵉ ⵎⵍⵍⵉⵖ ⴳⵉⵙ ⵜⵍⵍⴰ ⵜⴰⵙⵙⴰⵙⵜ, ⵉⵖⵔ ⵉ ⵜⵙⴳⴳⵉⵡⵉⵏ ⵎⵎⴰⵖⵏⵉⵏ ⵉ ⵓⵎⵙⵓⵔⴼ ⵃⵎⴰ ⴰⴷ ⵜⵉⵍⵉ ⵜⵏⴼⵔⵓⵜ ⵖ ⵜⵎⴰⵣⵉⵔⵜ ⴰⴷ ⵉⴳⴰⵏ ⵜⴰⵔⵙⵍⴰⵏⵜ ⵖ ⵜⵎⴰⵥⵓⵏⵜ, ⵢⵉⵏⵉ ⵎⴰⵙ ⵉⴱⴷⴷ ⵍⵎⵖⵔⵉⴱ ⴼ ⵓⵔⴳⴳⵉⴳ ⴷ ⵜⴳⵎⵉ ⵜⴰⵙⵓⵍⴰⵏⵜ ⵖ ⵓⴳⵯⵏⵙ ⵏ ⵉⴼⵔⵉⵇⵢⴰ ⴷ ⴱⵕⵕⴰ ⵏⵏⵙ.
ⵉⵙⵙⴽⵜⵉ ⴷ ⵎⴰⵙⵙ ⴰⵎⴰⵔⵉ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵔⵣⴰⴼ ⵍⵍⵉ ⵉⵙⴽⵔ ⵎⴰⵙⵙ ⴰⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ, ⵙ ⵉⵙⵡⴰⵍⴰⵢⵏ ⴰⵜⵜⵓⵢⵏⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴰⵙⵙ ⵏ 29 ⵛⵓⵜⴰⵏⴱⵉⵔ 2020 ⵉ ⴱⴰⵎⴰⴽⵓ ⵢⴰⵡⵉ ⴷⵉⴷⵙ ⵜⴰⴱⵔⴰⵜ ⵏ ⵓⵙⵙⵔⵇⴱ ⴷ ⵜⴷⴷⵓⴽⵍⴰ ⴷ ⵜⵡⵉⵣⵉ ⵎⵏⵉⴷ ⵏ ⵜⵏⴱⴰⴹⵉⵏ ⵏ ⵎⴰⵍⵉ ⴷ ⵓⵎⴰⴷⴰⵏ ⵏ ⵎⴰⵍⵉ. ⵢⵉⵏⵉ ⵎⴰⵙ ⵉⴳⴰ ⵓⵔⵣⴰⴼ ⴰⴷ ⵢⴰⵜ ⵜⴱⵔⴰⵜ ⵏ ⵜⴷⴷⵓⴽⵍⴰ ⵉ ⴽⵓ ⵉⵎⵙⴽⴰⵔⵏ ⵓⴷⴷⵉⵔⵏ ⵖ ⵎⴰⵍⵉ ⵃⵎⴰ ⴰⴷ ⵢⵉⵍⵉ ⵓⵙⵎⵓⵔⵙ ⵏ ⵜⴼⵔⴽⴰ ⵏ ⵓⵙⵎⴰⵜⵜⵉ, ⵙ ⵓⵡⵇⵇⵔ ⵏ ⵓⴷⵓⵙⵜⵓⵔ ⵃⵎⴰ ⴰⴷ ⵓⵔ ⵜⵉⵍⵉ ⵜⴰⵙⵙⴰⵙⵜ ⵉⴹⵕⵕⴰⵏ ⴰⵎⴰⴷⴰⵏ ⴰⵎⴰⵍⵉ.
ⵉⵣⵎⵎⵉⵎ ⵎⴰⵙⵙ ⵎⵓⵃⴰⵎⵎⴰⴷ ⵜⵡⵉⵎⵉ ⴱⵏ ⵊⵍⵍⵓⵏ ⴰⵙⵏⵉⵎⵎⵔ ⵏ ⴽⵓ ⵉⵎⵙⴽⴰⵔⵏ ⵉⵎⴰⵍⵉⵢⵏ ⵢⵉⵍⵉ ⴳⵉⵙⵏ ⵓⵏⵙⵙⵉⵅⴼ ⵏ ⵜⴳⴷⵓⴷⴰⵏⵜ ⵎⴰⵙⵙ ⴱⴰⵀ ⵏⴷⴰⵡ, ⴰⵙⵏⵉⵎⵎⵔ ⵏⵏⵙⵏ ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴼ ⵓⵅⵎⵎⴻⵎ ⵏⵏⵙ ⵉⵙⵓⵍⵏ ⵖ ⵜⴳⴷⵓⴷⴰⵏⵜ ⵏ ⵎⴰⵍⵉ ⴷ ⵓⵎⴰⴷⴰⵏ ⵏⵏⵙ ⴰⵅⴰⵜⴰⵔ.
ⵉⵙⴷⴷⵉⴷ ⵎⴰⵙⵙ ⴰⵎⴰⵔⵉ ⴼ ⵓⵙⵏⴰⵍ ⵏ ⵍⵎⵖⵔⵉⴱ ⵉ ⵜⵓⴳⴳⴰⵙ ⵏ ⵓⵎⵙⵓⵔⴼ ⴷ ⵓⵖⵓⵍ ⵏ ⵓⴼⵔⴰ, ⵉⵣⵣⵉⴳⵣ ⵓⵍⴰ ⵖ ⵓⵙⵏⴰⵍ ⵏⵏⵙ ⵉ ⵓⵎⵢⴰⵡⴰⵙ ⴰⵏⴼⵔⵓ ⴷ ⵓⴷⵙⵍⴰⵏ ⴷ ⵜⴳⵎⵉ ⵜⴰⵏⴰⵎⵓⵏⵜ ⴷ ⵜⴷⵎⵙⴰⵏⵜ ⴷ ⵜⵏⴼⴳⴰⵏⵜ, ⵖⵎⴽ ⴰⵏⵏ ⴷ ⵜⵣⴷⴰⵢⵉⵏ ⵏ ⵉⵎⴰⵏ ⵍⵍⵉ ⵉⵙⵙⴷⵓⵙⵏ ⵜⴰⴳⵯⵎⴰⵜⵜ ⵏⴳⵔ ⵍⵎⵖⵔⵉⴱ ⴷ ⵎⴰⵍⵉ ⵉ ⴽⵉⴳⴰⵏ ⵏ ⵜⴰⵙⵓⵜⵉⵏ ⵙ ⵓⵙⵎⵓⵜⵜⴳ ⵏ ⵡⴰⴳⴳⴰⴳⵏ ⵉⵎⴰⵍⵉⵢⵏ ⵖ ⵓⵙⵉⵏⴰⴳ ⵏ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵓⵙⵎⵓⵜⵜⴳ ⵏ ⵡⴰⴳⴳⴰⴳⵏ ⵉⵎⴰⵏⴰⵔⵏ ⴷ ⵜⵎⴰⵏⴰⵔⵉⵏ, ⴰⵙⵉⵏⴰⴳ ⴰⴷ ⵉⵣⵓⵣⵣⵓⵔⵏ ⵜⴰⵡⵍⴰⴼⵜ ⵏ ⵜⵉⴷⵜ ⴼ ⵍⵉⵙⵍⴰⵎ ⴰⵎⵙⵓⵔⵓⴼ ⵉⵏⵏⵓⵕⵥⵎⵏ ⴼ ⵓⵣⵎⵣ ⵏⵏⵙ, ⵖ ⵓⵙⴰⵜⵉ ⵏ ⵍⵎⴰⴷⵀⴰⴱ ⴰⵙⵓⵏⵏⵉ ⴰⵎⴰⵍⵉⴽⵉ.
ⵉⵖⵔⴰ ⵎⴰⵙⵙ ⵎⵓⵃⴰⵎⵎⴰⴷ ⵜⵡⵉⵎⵉ ⴱⵏ ⵊⵍⵍⵓⵏ ⴰⴷ ⵉⵍⵉⵏⵜ ⵜⵎⵙⴰⵔⵉⵏ ⵙⴳ ⵉⴷⵔⵉⵣⵏ ⵏ ⵓⴱⴰⵢⵢⵓⵕ, ⵃⵎⴰ ⴰⴷ ⵜⵜⵓⵙⴽⵉⵔⵏⵜ ⵜⵣⵔⴰⵡⵉⵏ ⵖ ⵜⵙⵇⵇⵉⵎⵉⵏ ⵥⵍⵉⵏⵉⵏ ⵖ ⵓⴳⵯⵏⵙ ⵏ ⵜⵎⵙⵎⵓⵏⵜ ⵙ ⵜⵡⵉⵙⵉ ⵏ ⵜⵎⵔⵙⴰⵍ ⵜⵉⴳⵔⴰⵖⵍⴰⵏⵉⵏ ⴰⵎ ⵜⴰⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵜⴷⵓⵙⵉ ⵃⵎⴰ ⴰⴷ ⵓⵔ ⵉⵍⵉⵏⵜ ⵜⵎⵓⴽⵔⵉⵙⵉⵏ ⵜⵉⴷⵓⵙⴰⵏⵉⵏ ⵖ ⵉⵎⴰⵍ.