ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵖⴰⵔ ⵏ ⵜⵖⵔⵎⵜ ⵏ Anvers

ⵉⵙⵏⵓⴱⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⵏⴰⵙ 03 ⴽⵟⵓⴱⵔ 2022 ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⵎⴰⵙⵙ ⴰ Bart De Wever ⴰⵎⴰⵔⵉ ⴰⴱⵕⵍⴰⵎⴰⵏⵉ ⴷ ⵓⵎⵖⴰⵔ ⵏ ⵜⵖⵔⵎⵜ ⵏ Anvers ⴳ ⴱⵉⵍⵊⵉⴽⴰ ⵉⵍⵍⴰⵏ ⴳ ⵓⵔⵣⴰⴼ ⵉ ⵜⵎⴰⵣⵉⵔⵜ ⵏⵏⵖ.

ⴳ ⵜⵣⵡⵉⵔⵉ, ⵉⵙⵓⵜⴳ ⵓⵎⵖⴰⵔ ⴰⵔⴳⴳⵉⴳ ⴷ ⵜⵣⵣⵉⴳⵣⵜ ⴷ ⵜⴳⵎⵉ ⵉⵍⵍⴰⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴷ ⵜⵣⵡⵉⵔⵉ ⵏ ⵍⵎⵖⵔⵉⴱ ⴳ ⵓⵎⵏⵉⴷ ⵏ ⵜⵥⴹⴰⵕⵜ ⵜⴰⵎⴰⵢⵏⵓⵜ ⴷ ⵜⵓⵚⵍⵉⵡⵉⵏ ⵜⵉⵏⴰⴷⴷⵉⵡⵉⵏ ⴷ ⵉⴼⵜⴰⵙⵏ, ⵙⵍⴰⵡⴰⵏⴰ ⴽⴽⵯ ⴰⴼⵜⴰⵙ ⴰⵏⴰⵎⵎⴰⵙ ⵏ ⵟⴰⵏⵊⴰ, ⵢⵉⵏⵉ ⵎⴰⵙ ⵉⵡⴰⵜⵜⵙ ⵓⵔⵣⴰⴼ ⴰⴷ ⵏⵏⵙ ⵉ ⵜⴳⵍⴷⵉⵜ ⴰⴷ ⵉⵙⵙⵏ ⵜⵉⵎⵍⴷⴰ ⵏ ⵓⵙⵙⴰⵔⵓ ⴷ ⵓⵙⴽⵔ ⵏ ⵜⴳⵔⴰⵡⵉⵏ ⵜⵉⴷⵎⵙⴰⵏⵉⵏ ⴳⴰⵏⵉⵏ ⵚⴰⵃⴰ ⵉ ⵙⵏⴰⵜ ⵜⵎⵉⵣⴰⵔ.

ⵅⴼ ⵜⵎⵙⴰⵔⵜ ⵜⴰⵏⴰⵎⵓⵔⵜ, ⵉⵙⴷⴷⵉⴷ ⵎⴰⵙⵙ Bart De Wever ⵎⴰⵙ ⵜⴳⴰ ⵜⵙⵓⵎⵔⵜ ⵏ ⵍⵎⵖⵔⵉⴱ ⵉ ⵓⴼⵓⴽⴽⵓ ⵏ ⵜⵎⵓⴽⵔⵉⵙⵜ ⵜⴰⴷ ⵉⴳⴰⵏ ⵜⵉⵏ ⵜⵉⵍⴰⵡⵜ ⵉ ⵓⴼⵓⴽⴽⵓ ⵏ  ⵓⵙⴷⴰⵡ ⴰⴷ, ⵢⵉⵏⵉ ⵎⴰⵙ ⵉⴳⴰ ⵍⵎⵖⵔⵉⴱ ⵜⴰⵣⴷⴰⵢⵜ ⵊⴰⵔ ⵉⴼⵔⵉⵇⵢⴰ ⴷ ⵓⵕⵓⴱⴱⴰ ⴷ ⵜⵔⵙⵍⵜ ⵏ ⵓⵔⴳⴳⵉⴳ ⴳ ⵜⵙⴳⴰ.

ⴳ ⵓⵎⵏⵉⴷ ⵏⵏⵙ, ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵎⵣⵔⵓⵢ ⵏ ⵜⵎⴰⵖⵜ ⵉⵜⵜⵓⵙⴽⴰⵔⵏ ⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ, ⵢⵉⵏⵉ ⵎⴰⵙ ⵉⵙⵎⵏⵉⴷ ⵍⵎⵖⵔⵉⴱ ⵜⴰⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ ⵉ ⵓⴼⵓⴽⴽⵓ ⵉⵙⵎⴷⵏ ⵏ ⵓⵙⴷⴰⵡ ⴰⴷ, ⴰⵢⵍⵍⵉ ⵢⵉⵡⵉⵏ ⴰⵙⵏⴰⵍ ⵏ ⵡⴰⵎⵓⵏ ⴰⵎⵖⵔⵉⴱⵉ ⵍⵍⵉ ⴳⵉⵙ ⵉⵥⵕⵕⴰⵏ ⴰⴼⵙⵙⴰⵢ ⴰⵙⵔⵜⴰⵏ ⵏ ⵜⵉⵍⴰⵡⵜ ⵉⴳⴰⵏ ⵢⴰⵏ ⵍⵍⵉ ⵔⴰⴷ ⵉⴹⵎⵏ ⴰⵔⴳⴳⵉⴳ ⴳ ⵜⵙⴳⴰ ⴷ ⵜⵣⵣⵉⴳⵣⵜ ⵏⵏⵙ.

ⵉⵙⵎⵏⵉⴷ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵓⵍⴰ ⵉⵙⴰⵡⵓⵔⵏ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵜⵓⵏⵥⵉⵣⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵙ ⴰⴷ ⵜ ⵉⵏⵚⵕ ⵕⴱⴱⵉ, ⵉⵙⴰⵡⵓⵔⵏ ⴰⴷ ⵍⵍⵉ ⵍⵍⴰⵏⵉⵏ ⴼ ⵜⵥⴹⴰⵕⵜ ⵜⴰⵎⴰⵢⵏⵓⵜ ⵉⵖⵓⵙⵏ, ⴰⵙⵡⵓⴷⴷⵓ ⵏ ⵓⵙⵎⵔⵙ ⵏ ⵡⴰⵎⴰⵏ, ⵜⴰⵏⴼⵔⵓⵜ ⵏ ⵡⵓⵜⵛⵓ, ⵜⵉⴳⵎⵉ ⵢⵓⵎⴰⵏ ⵏ ⵜⵙⴳⴳⵉⵡⵉⵏ ⵛ ⵏⵉⵜ ⵍⵍⴰⵏⵜ ⵜⵉⵏ ⵉⴼⴼⵓⵙ, ⴰⴼⵜⴰⵙ ⵏ ⴷⴷⴰⵅⵍⴰ, ⴰⵙⵏⴼⴰⵔ ⵏ ⵍⴳⴰⵣ ⵉⵣⴷⵉⵏ ⵊⴰⵔ ⵏⵉⵊⵉⵔⵢⴰ ⴷ ⵍⵎⵖⵔⵉⴱ ⵉⴼⵜⴰⵏ ⵙ ⵓⵕⵓⴱⴱⴰ.

ⵉⵍⵍⴰ ⵓⵍⴰ ⵓⵎⴹⴰⴽⴰⵕ ⴼ ⵡⴰⵏⴰⵡ ⴰⵎⵖⵔⵉⴱ ⵉⴳⴰⵏ ⵡⵉⵏ ⵓⵎⵙⵓⵔⵓⴼ ⴳ ⵓⵙⵡⵓⴷⴷⵓ ⵏ ⵜⵖⴰⵡⵙⵉⵡⵉⵏ ⵏ ⵓⵙⴳⴷ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵙ ⴰⴳⵍⴷⵓⵏ ⵏ ⵉⵎⵓⵎⵎⵏ, ⴷ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⵜⴰⵎⵖⵔⵉⴱⵉⵜ ⴳ ⵓⵙⵎⵓⵜⵜⴳ ⵏ ⵉⵔⴳⵔⴰⴳⵏ, ⴷ ⵜⵎⵙⴰⵔⵉⵏ ⵢⴰⴹⵏⵉⵏ ⵛⵛⴰⵔⵏⵉⵏ.