ⵎⴰⵙⵙ ⵟⴰⵕⵉⵇ ⵇⴰⴷⵉⵔⵉ, ⴰⴳⵎⴰⵎ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵙⴰⵡⵍ ⴼ ⵓⴷⵖⴰⵔ ⴰⴳⵔⴰⵖⵍⴰⵏ ⴰⵎⵣⵡⴰⵔⵓ ⵏ ⵍⵎⵖⵔⵉⴱ, ⴳ ⵢⵉⴳⵔ ⵏ ⵓⵙⵎⴰⵜⵜⵉ ⴰⵥⴹⴰⵕⴰⵏ ⴷ ⵜⵥⴹⴰⵕⵉⵏ ⵖⵓⵙⵏⵉⵏ ⵜⵉⵎⴰⵢⵏⵓⵜⵉⵏ ⴳ ⵓⵏⵎⵓⵇⵇⴰⵔ ⵡⵉⵙ 8 ⵏ ⵓⴳⵔⴰⵡ ⵏ ⵉⴷ ⴱⴰⴱ ⵏ ⵓⵣⵣⵔⴰⴼ ⴷ ⵜⵙⵓⵜⵍⵜ ⵜⵉⵙ 13 ⵏ ⵜⵙⵏⵓⵔⴰⵢⵜ ⵜⴰⴳⵔⴰⵖⵍⴰⵏⵜ (IRENA)

ⵉⴷⵔⵓ ⵎⴰⵙⵙ ⴰⵎⴰⵔⵉ ⵟⴰⵕⵉⵇ ⵇⴰⴷⵉⵔⵉ, ⴰⴳⵎⴰⵎ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵜⵙⵓⵜⵍⵜ ⵜⵉⵙ 8 ⵏ ⵓⴳⵔⴰⵡ ⵏ ⵉⴷ ⴱⴰⴱ ⵏ ⵓⵣⵣⵔⴰⴼ ⴷ ⵜⵙⵓⵜⵍⵜ ⵜⵉⵙ 13  ⵏ ⵜⵙⵏⵓⵔⴰⵢⵜ ⵜⴰⴳⵔⴰⵖⵍⴰⵏⵜ ⵏ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵜⵏ (IRENA) ⵉⵍⵍⴰⵏ ⴳ ⴰⴱⵓ ⴹⴰⴱⵉ ⵙⴳ 13 ⴰⵔ 15 ⵉⵏⵏⴰⵢⵔ 2023.

ⵉⵍⵍⴰ ⵓⵎⵓⵙⵙⵓ ⴰⴷ ⴳ ⵓⵙⴰⵜⵉ ⵏ ⵉⵎⴰⵍⴰⵙⵙ ⵏ ⴰⴱⵓ ⴹⴰⴱⵉ ⵉ ⵜⵙⵓⵍⴰⵏⵜ 2023, ⴳ ⴷⵔⵓⵏ ⵉⵏⵙⵙⵉⵅⴼⵏ ⵏ ⵉⵡⴰⵏⴽⵏ ⴷ ⵜⵏⴱⴰⴹⵉⵏ ⴷ ⵉⵎⴰⵡⵙⴰⵙⵏ ⵏ ⵜⵥⴹⴰⵕⵜ ⴷ ⵡⴰⵡⵏⴰⴹ ⴷ ⵜⵙⵓⵍⴰⵏⵜ ⴷ ⵉⴱⵕⵍⴰⵎⴰⵏⵉⵢⵉⵏ ⴷ ⵉⴷ ⴱⴰⴱ ⵏ ⵜⵡⵡⵓⵔⵉ ⵉ ⵓⵙⵎⵖⵔ ⵏ ⵜⴳⵎⵉ ⵜⴰⵙⵓⵍⴰⵏⵜ ⴷ ⵓⵙⵔⵙ ⵏ ⵉⵖⴰⵡⴰⵙⵏ ⴼ ⵓⵙⵎⴰⵜⵜⵉ ⴰⵥⴹⴰⵕⴰⵏ ⴳ ⵓⵎⴰⴹⴰⵍ ⴷ ⵓⵙⴱⴷⴷⵉ ⵏ ⵓⵙⵏⴼⵍ ⵏ ⵓⵏⵣⵡⵓ ⴷ ⵓⴼⵔⴰⴳ ⵏ ⵡⴰⵡⵏⴰⴹ ⴷ ⵓⵙⵔⵙ ⵏ ⵜⵙⵜⵔⴰⵜⵉⵊⵉⵢⵉⵏ ⵛⵛⴰⵔⵏⵉⵏ ⴼ ⵓⵙⵡⵓⵔⵉ ⵉ ⵓⵏⵣⵡⵉ.

ⴳ ⵜⴳⵓⵔⵉ ⵏⵏⵙ, ⵉⵙⴰⵡⵍ ⵎⴰⵙⵙ ⵇⴰⴷⵉⵔⵉ ⴼ ⵓⴷⵖⴰⵔ ⴰⵎⵣⵡⴰⵔⵓ ⵏ ⵍⵎⵖⵔⵉⴱ ⴳ ⵓⵎⵏⵉⴷ ⵏ ⵓⵙⵎⴰⵜⵜⵉ ⴰⵥⴹⵕⴰⵏ ⴷ ⵓⵙⵡⵓⵔⵉ ⵙ ⵜⵥⴹⴰⵕⵉⵏ ⵖⵓⵙⵏⵉⵏ ⵜⵉⵎⴰⵢⵏⵓⵜⵉⵏ, ⵢⵉⵏⵉ ⵎⴰⵙ ⵉⴳⴰ ⵍⵃⴰⵍ ⴰⴼⴰⵔⵙ ⵏ ⵜⵙⵔⵜⴰⵢ ⵜⵉⵏⴰⵎⵓⵔⵉⵏ ⴷ ⵉⵙⵡⴰⵍⴰⵢⵏ ⵉⵙⵜⵔⴰⵜⵉⵊⵉⵢⵏ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ.

ⵖⵎⴽ ⵍⵍⵉ ⵉⵙⴰⵡⵍ ⵓⵍⴰ ⴼ ⵜⵣⵡⵉⵔⵉ ⵏ ⵍⵎⵖⵔⵉⴱ ⴳ ⵓⴼⴰⵔⵙ ⵏ ⵜⵥⴹⴰⵕⵜ ⵏ ⵜⴰⴼⵓⴽ ⴷ ⵡⴰⴹⵓ ⵙ ⵉⵙⵓⵔⵙ ⵉⵅⴰⵜⴰⵔⵏ ⴳ ⵓⵎⴰⴹⴰⵍ, ⵉⴳ ⴰⵎⵣⵡⴰⵔ ⴳ ⵉⴼⵔⵉⵇⵢⴰ ⴷ ⵜⵎⵉⵣⴰⵔ ⵏ ⵡⴰⵄⵕⴰⴱⵏ ⵙⵎⵏⵉⴷⵏⵉⵏ ⵜⴰⴽⵕⴹⴰ ⵏ ⵓⴱⵔⵉⴷ ⵉ ⵓⴼⴰⵔⵙ ⵏ ⵀⵉⴷⵕⵓⵊⵉⵏ ⴰⵣⴳⵣⴰⵡ ⵉⴳ ⵙⴳ 7 ⵜⵎⵉⵣⴰⵔ ⵟⵟⴰⴼⵏⵉⵏ ⵜⵉⵥⴹⴰⵕⵉⵏ ⴷ ⵜⵓⵚⴽⵉⵡⵉⵏ ⵜⵉⵏⴰⴷⴷⵉⵡⵉⵏ ⴳ ⵢⵉⴳⵔ ⴰⴷ.

ⴳ ⵓⵙⵡⵉⵔ ⴰⴱⵕⵍⴰⵎⴰⵏⵉ ⴰⵙⵉⵏⵔⴰⵏ ⴷ ⵓⴳⵜⵉⵔⴰⵏ, ⵉⵙⵎⵏⵉⴷ ⵎⴰⵙⵙ ⵇⴰⴷⵉⵔⵉ ⵉⵙⵖⵍⴰⴼⴼ ⵓⵙⵎⵔⵙⵍ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⴰⴳⵔⴰⵖⵍⴰⵏ ⴼ ⵓⵣⵓⵛⵛⵍ ⵏ ⵓⵙⵎⴰⵜⵜⵉ ⴰⵥⴹⴰⵕⴰⵏ ⵙ ⵓⵙⴽⵔ ⵏ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⴷ ⵓⵙⴽⵔ ⵏ ⵜⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵓⵍⴰⵏⵉⵏ ⴳ ⵜⵎⵔⵙⴰⵍ ⴷ ⵜⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵎⵏⵥⴰⵡⵉⵏ ⴷ ⵜⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ, ⵉ ⵓⵙⵙⵔⵇⴱ ⵏ ⵉⴱⵕⵍⴰⵎⴰⵏⵉⵢⵉⵏ ⵃⵎⴰ ⴰⴷ ⵙⵔⵙⵏ ⵉⵣⵣⵔⴰⴼⵏ ⵉⵏⴰⵎⵓⵔⵏ ⵍⵍⵉ ⵔⴰⴷ ⵉⴳ ⴰⵙⴰⵜⵉ ⵓⵍⴳⵉⵏ ⵉ ⵜⵡⵡⵓⵔⵉ ⵏ ⵜⵏⴱⴰⴹⵜ ⴳ ⵓⴱⵔⵉⴷ ⵏ ⵓⵙⴽⵔ ⵏ ⵓⵙⵎⴰⵜⵜⵉ ⴰⵎⵓⵟⵟⵓⵏ, ⴷ ⵓⵙⴷⵓⵙ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵊⴰⵔ ⵜⵉⵙⵇⵇⵉⵎⵉⵏ ⵜⵉⵙⵓⵍⴰⵏⵉⵏ ⵥⵍⵉⵏⵉⵏ ⵙ ⵜⵥⴹⴰⵕⵜ ⴳ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴳ ⵓⵎⴰⴹⴰⵍ.

ⵔⴰⴷ ⵢⵉⵍⵉ ⵉⵎⴰⵍⴰⵙⵙ ⵏ ⴰⴱⵓ ⴹⴰⴱⵉ ⵉ ⵜⵙⵓⵍⴰⵏⵜ 2023 ⴰⵔ 21 ⵉⵏⵏⴰⵢⵔ, ⵔⴰⴷ ⴳⵉⵙ ⵉⴷⵔⵓ ⵎⴰⵙⵙ ⵄⴰⵣⵉⵣ ⴰⵅⵏⵓⵛ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴷ ⵎⴰⵙⵙⴰ ⵍⴰⵢⵍⴰ ⴱⵏⵄⵍⵉ ⵜⴰⵎⴰⵡⴰⵙⴰⵙⵜ ⵏ ⵓⵙⵎⴰⵜⵜⵉ ⴰⵥⴹⴰⵕⴰⵏ ⴷ ⵜⴳⵎⵉ ⵜⴰⵙⵓⵍⴰⵏⵜ ⴳ ⵜⵎⴰⵣⵉⵔⵜ ⵏⵏⵖ.