ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵙⵓⵜⵍⵜ 76 ⵏ ⵜⵙⵇⵇⵉⵎ ⵜⴰⵎⵣⵣⴳⴰⵔⵜ ⴷ ⵓⴳⵔⴰⵡ 43 ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴼⵔⵉⵇⵉⵜ
ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵙⵓⵜⵍⵜ 76 ⵏ ⵜⵙⵇⵇⵉⵎⵜ ⵜⴰⵎⵣⵣⴳⴰⵔⵜ ⴷ ⵓⴳⵔⴰⵡ 43 ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴼⵔⵉⵇⵉⵜ ⴳ 11 ⴷ 15 ⴽⵟⵓⴱⵕ ⴳ ⵜⵎⴰⵥⵓⵏⵜ ⵏ ⵊⵉⴱⵓⵜⵉ.
ⵢⵉⵡⵙ ⵎ. ⵜⵜⵡⵉⵎⵉ ⴱⵏ ⵊⵍⵍⵓⵏ ⵙ ⵉⵙⵎ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵎⵓⵙⵙⴰ ⴰⴷ, ⵢⵉⵏⵉ ⴳ ⵜⵉⵏⴰⵡⵜ ⵏⵏⵙ ⴷⴰⵜ ⵏ ⵉⴽⴰⴱⴰⵕⵏ ⵉⴱⵕⵍⴰⵎⴰⵏⵉⵢⵏ ⵉⵡⵙⵏⵉⵏ ⴰⵍⵜⴰⵖ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⴷⵔⵓⵜ ⵜⵓⵍⴳⵉⵏⵜ ⴳ ⵜⵡⵡⵓⵔⵉⵡⵉⵏ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴼⵔⵉⵇⵉⵜ. ⵉⴱⴷⵔ ⵓⵍⴰ ⵜⵉⵎⵙⴽⴰⵔ ⵏ ⵍⵎⵖⵔⵉⴱ ⴳ ⵢⵉⴳⵔ ⵏ ⵓⵙⴱⴷⴷⵉ ⵏ ⵓⴼⵉⵔⵓⵙ ⵏ ⴽⵓⴼⵉⴷ 19.
ⴳ ⵓⵎⵏⴰⴹ ⴰⴷ, ⵉⵏⵏⴰ ⵎ. ⵜⵜⵡⵉⵎⵉ ⴱⵏ ⵊⵍⵍⵓⵏ ⵎⴰⵙ ⵉⴷⵔⵓ ⵍⵎⵖⵔⵉⴱ ⴳ ⵓⵙⵏⴼⴰⵔ ⵉⵙⵜⴰⵡⵀⵎⵎⴰⵏ ⵏ ⵓⴼⴰⵔⵙ ⵏ ⵉⴳⵣⵣⴰⵢⵏ ⵏ ⴽⵓⴼⵉⴷ 19, ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵜⵉⵍⵉⵜ ⵏ ⵓⵙⴳⵓⴷⵉ ⵏ ⵓⴼⴰⵔⵙ ⵉⵍⴽⵎⵏ ⵙⵎⵎⵓⵙ ⵉⴷ ⵎⵍⵢⵓⵏ ⵏ ⵓⴳⵣⵣⴰⵢ ⵖ ⴽⵔⴰⵢⴳⴰ ⴰⵢⵢⵓⵔ ⴳ ⵜⴳⵉⵔⴰ ⵏ ⵓⵙⴳⴳⵯⴰⵙ, ⴰⴼⴰⴷ ⴰⴷ ⵢⵉⵍⵉ ⵓⵙⵉⴳⵓⵜ ⵏ ⵓⴼⴰⵔⵙ ⴳ ⵉⵙⴳⴳⵯⴰⵙⵏ ⴷ ⵓⵛⴽⴰⵏⵉⵏ, ⵢⵉⵏⵉ ⵎⴰⵙ ⵔⴰⴷ ⵉⵚⵉⵃⵉ ⵓⵙⵏⴼⴰⵔ ⴰⴷ ⵉ ⵉⵡⴰⵏⴽⵏ ⵉⴼⵔⵉⵇⵉⵢⵏ ⵙ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ ⵉⴳⴰⵏ ⴰⵙⵡⴰⵍⴰ ⴰⵙⵜⵔⴰⵜⵉⵊⵉ ⴳ ⵜⵍⵍⴰ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴳ ⵜⵣⴷⴰⵢⵜ ⵏⵏⵙ ⴷ ⵜⴰⵡⵊⴰ ⵏⵏⵙ ⵜⴰⴼⵔⵉⵇⵉⵜ.
ⵉⵎⵏⴰⵇⵇⴰⵔ ⵎ.ⵎⵓⵃⴰⵎⵎⴰⴷ ⵜⵜⵡⵉⵎⵉ ⴱⵏ ⵊⵍⵍⵓⵏ ⵓⵍⴰ ⴷ ⵎ.ⵄⵍⵉ ⵎⵓⵃⴰⵎⵎⴰⴷ ⵃⵓⵎⴷ ⴰⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵊⵉⴱⵓⵜⵉ, ⵎⴹⴰⴽⴰⵕⵏ ⴼ ⵓⵙⴷⵓⵙ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵉⵏⵔⴰⵏⵉⵏ ⵊⴰⵔ ⵉⵙⵇⵇⵉⵎⵏ ⴷ ⵓⵛⵛⵉⵍ ⵏ ⵓⵙⵎⵀⵍ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵍⴰ ⴷ ⵓⵙⵏⴼⵍ ⵏ ⵉⵔⵣⴰⴼⵏ ⵊⴰⵔ ⵙⵏⴰⵜ ⵜⵎⵉⵣⴰⵔ. ⵙⵓⵜⴳⵏ ⵓⵍⴰ ⵜⵉⵣⴷⴰⵢⵉⵏ ⵜⵉⵙⵔⵜⴰⵏⵉⵏ ⵊⴰⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⴳⴷⵓⴷⴰⵏⵜ ⵏ ⵊⵉⴱⵓⵜⵉ, ⵙⴷⴷⵉⴷⵏ ⴼ ⵓⵙⵎⵖⵔ ⵏ ⵜⵣⴷⴰⵢⵉⵏ ⵜⵉⴷⵎⵙⴰⵏⵉⵏ ⴰⵎ ⵜⵉⵙⵔⵜⴰⵏⵉⵏ ⵥⵉⵍⵏⵉⵏ ⴷ ⵓⵙⵏⴼⵍ ⵏ ⵉⵔⵣⴰⴼⵏ ⵊⴰⵔ ⵉⵎⵙⵜⴳⴳⴰⵔⵏ ⵓⵏⴱⵉⴹⵏ ⴳ ⵙⵏⴰⵜ ⵜⵎⵉⵣⴰⵔ.
ⵔⴰⴷ ⵎⴹⴰⴽⴰⵕⵏ ⵉⴳⵎⴰⵎⵏ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴼⵔⵉⵇⵉⵜ ⴳ ⵜⵙⵎⵓⵏⴰⵢ ⴼ ⵉⴷⵔⵉⵣⵏ ⵏ ⵓⴱⴰⵢⵢⵓⵔ ⵏ ⴽⵓⴼⵉⴷ 19 ⴼ ⵉⵎⴰⴷⴰⵏⵏ ⵉⴼⵔⵉⵇⵉⵢⵏ ⴷ ⵜⵖⴰⵔⴰⵙⵉⵏ ⵏ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵃⵎⴰ ⴰⴷ ⵢⵉⵍⵉ ⵓⴼⵓⵖ ⴳ ⵓⴱⴰⵢⵢⵓⵕ ⴷ ⵓⵙⵎⵖⵔ ⵏ ⵜⴷⴰⵎⵙⴰ ⵉ ⵚⴰⵃⴰ ⵏ ⵜⵏⵓⴼⴰ ⵏ ⵉⵎⴰⴷⴰⵏⵏ ⵉⴼⵔⵉⵇⵉⵢⵏ.
ⵉⴽⵛⵎ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴼⵔⵉⵇⵉⵜ ⴳ ⵏⵓⵡⴰⵏⴱⵉⵔ 1978, ⵉⵎⵎⴰⵖ ⴼ ⵜⴷⵔⴰⵡⵜ ⵏⵏⵙ ⵉⵕⵡⴰⵏ ⴳ ⵉⴳⵔⴰⵡⵏ ⴷ ⵜⵙⵎⵓⵏⴰⵢ ⵏ ⵉⴳⵎⴰⵎⵏ ⵏⵏⵙ ⵉⵣⵣⵔⴰⴼⵏ ⴷ ⵉⵏⵎⵓⵇⴰⵔⵏ ⵏⵏⵙ ⵏ ⵉⴳⵔⴰⵏ ⴷ ⵉⵏⵎⵏⴰⴷⵏ, ⵉ ⵓⵙⵎⵖⵔ ⵏ ⵜⵣⴷⴰⵢⵉⵏ ⴷ ⵜⴳⵎⴰⵜⵜ ⴷ ⵜⴷⴷⵓⴽⴽⵍⴰ ⵏ ⵍⵎⵖⵔⵉⴱ ⴷ ⵜⵎⵉⵣⴰⵔ ⵏ ⵓⵎⵏⵥⴰⵡ, ⴷ ⵓⵎⵣⴰⵖ ⵏ ⵜⵎⵙⴰⵔⵜ ⵏ ⵜⵢⴰⵏⵜ ⵜⴰⵏⴰⴽⴰⵍⵜ ⵏ ⵎⴰⵣⵉⵔⵜ ⵏⵏⵖ.