ⴰⵙⵖⵣⵏ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 74.19 ⴼ ⵡⴰⵍⴰⵙ ⵏ ⵓⵙⵏⵎⴰⵍⴰ ⵏ ⵜⴽⴰⴷⵉⵎⵉⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵡⴰⵢⵏⴰⵙ 9 ⵏⵓⵡⴰⵏⴱⵉⵔ 2020 ⵙ ⵓⵎⴰⴽⵕⴰⴹ ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 74.19 ⴼ ⵡⴰⵍⴰⵙ ⵏ ⵓⵙⵏⵎⴰⵍⴰ ⵏ ⵜⴽⴰⴷⵉⵎⵉⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ, ⵖ ⵜⵖⵉⵎⵉⵜ ⵜⴰⵣⵣⵔⴰⴼⵜ ⵍⵍⵉ ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵙ ⵜⵉⵍⵉⵜ ⵏ ⵎⴰⵙⵙ ⴰⵎⴰⵡⵙⴰⵙ ⵏ ⵜⴷⵍⵙⴰ ⴷ ⵜⵄⵄⵓⵔⵎⴰ ⴷ ⵜⵓⵏⵏⵓⵏⵜ ⵎⴰⵙⵙ ⵄⵓⵜⵎⴰⵏ ⵍⴼⵉⵔⴷⴰⵡⵙ.
ⵖ ⵓⵙⵎⵏⵉⴷ ⵏ ⵓⵙⵏⴼⴰⵔ ⵏ ⵓⵙⵍⴳⵏ, ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⵎⴰⵙ “ⵉⴳⴰ ⵓⵙⵏⴼⴰⵔ ⴰⴷ ⴰⵣⵣⴳⵉⵔ ⵏ ⵉⵙⵡⴰⵍⴰⵢⵏ ⵉⴳⵍⴷⴰⵏⵏ ⴰⵜⵜⵓⵢⵏⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵓⵙ ⵚⴹⵉⵚ ⴼ ⵡⴰⵍⴰⵙ ⵏ ⵓⵙⵏⵎⴰⵍⴰ ⵏ ⵜⵎⵔⵙⵍⵜ ⴰⴷ ⵢⴰⵜⵜⵓⵢⵏ ⵙ ⵓⵙⵡⵉⵏⴳⵎ ⴰⵎⴰⵢⵏⵓ ⵍⵍⵉ ⵔⴰⴷ ⵉⵙⴷⵓⵙ ⵜⵉⵍⴰⵍⵜ ⵏⵏⵙ ⵍⵍⵉⵖ ⵜⴳⴰ ⵜⵉⵎⵔⵙⵍⵜ ⵜⴰⵏⴰⵎⵓⵔⵜ ⵜⴰⵎⴰⵙⵙⴰⵏⵜ ⵉⵜⵜⴰⵡⵙⵏ ⵖ ⵓⵥⵏⵥⵕ ⴰⴷⵍⵙⴰⵏ ⵏ ⵜⵎⴰⵣⵉⵔⵜ ⵏⵏⵖ ⴷ ⵓⵎⵢⴰⵡⴰⴹ ⴷ ⵓⵏⵏⵓⵕⵥⵎ ⵏ ⵓⵙⵡⵉⵏⴳⵎ ⴷ ⵜⵖⵔⵎⴰ ⴼ ⴽⵓ ⵜⴰⴷⵍⵙⵉⵡⵉⵏ”.
ⵢⵉⵡⵉ ⴷ ⵓⵙⵏⴼⴰⵔ ⴰⵣⵣⵔⴰⵢ ⵏ ⵜⵡⵓⵔⵉⵡⵉⵏ ⵏ ⵜⴽⴰⴷⵉⵎⵉⵜ ⴷ ⵓⵏⴳⵔⴰⵡ ⵏ ⵉⴳⵎⴰⵎ ⵏⵏⵙ ⴷ ⵓⵙⵏⵎⴰⵍⴰ ⵏⵏⵙ ⴷ ⵓⵏⴱⴰⴹ ⵏⵏⵙ, ⴳⵉⵙ 79 ⵏ ⵓⵎⵏⵏⵉ ⴱⴹⴰⵏⵉⵏ ⴼ ⵚⴹⵉⵚ ⵉⴳⵣⵣⵓⵎⵏ, ⵉⵍⵍⴰ ⵓⵙⵎⵖⵔ ⵏ ⵜⵉⵍⴰⵍ ⵏ ⵜⴽⴰⴷⵉⵎⵉⵜ ⴰⴷ ⵖ ⵜⵖⵔⵉ ⴷ ⵓⵔⵣⵣⵓ ⴷ ⵓⵙⵙⵔⵇⴱ ⵏ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵎⵖⵔ ⵏⵏⵙ, ⴷ ⵓⵙⵎⵓⵙⵙⵓ ⵏ ⵜⵥⴹⴰⵕⵉⵏ ⵏ ⵓⵙⵡⵉⵏⴳⵎ ⴷ ⵜⵓⵙⵙⵏⴰ ⵖ ⵉⵙⵡⵉⵔⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ, ⴷ ⵓⵙⵙⵔⵇⴱ ⵏⵏⵙⵏⵜ ⵖ ⵜⵡⵉⵙⵉ ⵖ ⵜⵉⵍⴰⵍ ⵏ ⵜⵓⵙⵙⵏⴰ ⴷ ⵜⴷⵍⵙⴰ ⵍⵍⵉ ⵜⵙⵏⵎⴰⵍⴰ ⵜⴽⴰⴷⵉⵎⵉⵜ.
ⵉⵜⵜⵉⴼⴽⴰ ⵉ ⵜⴽⴰⴷⵉⵎⵉⵜ ⵓⵍⴰ ⴰⵙⵙⵔⵇⴱ ⵏ ⵓⵙⵏⴼⵍⵓⵍ ⴰⴷⵍⵙⴰⵏ ⴰⵎⵖⵔⵉⴱⵉ ⴷ ⵜⵓⵙⵙⵏⴰ ⵏⵏⵙ ⴷ ⵓⵙⵓⵜⴳ ⵏⵏⵙ ⴷ ⵓⵙⵏⵎⴰⵍⴰ ⵏ ⵉⵏⵎⵓⵇⴰⵔⵏ ⵉⴽⴰⴷⵉⵎⵉⵢⵏ ⵙⴳ ⴽⵓ ⵜⴰⵙⴳⵉⵡⵉⵏ ⵏ ⵓⵎⴰⴹⴰⵍ, ⴷ ⵓⵙⵓⵊⴷ ⵏ ⵉⵙⴳⴰⵡⵔⵏ ⵏ ⵜⵓⵙⵙⵏⴰ ⵉ ⵓⵎⴹⴰⴽⵕ ⵏ ⵜⵎⵙⴰⵔⵉⵏ ⵏ ⵓⵙⵡⵉⵏⴳⵎ, ⴷ ⵓⵙⴽⵔ ⵏ ⵜⵙⵎⵖⵓⵔⵉⵏ ⵏ ⵓⵙⵎⵖⵔ ⵏ ⵉⵡⵔⵉⴽⵏ ⵉⵅⴰⵜⴰⵔⵏ ⴷ ⵜⵡⵓⵔⵉⵡⵉⵏ ⵥⵉⵍⵏⵉⵏ ⵏ ⵓⵙⵡⵉⵏⴳⵎ ⴷ ⵉⵙⵏⴼⵍⵓⵍⵏ ⵏ ⵜⵥⵓⵕⵉ ⵍⴰⵏⵉⵏ ⴰⵙⵡⵉⵔ.
ⵙ ⵓⵙⵏⴼⴰⵔ ⴰⴷ, ⵉⵍⵍⴰ ⵓⵙⵏⵎⴰⵍⴰ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵓⵔⵣⵣⵓ ⵖ ⵓⵎⵣⵔⵓⵢ ⵏ ⵍⵎⵖⵔⵉⴱ, ⴷ ⵓⵙⴽⵔ ⵏ ⵙⵉⵏ ⵉⵏⴳⵎⴰⵎⵏ ⵥⵍⵉⵏⵉⵏ ⵖ ⵓⵙⵓⵖⵍ ⴷ ⵜⵥⵓⵕⵉ. ⵍⵍⵉⵖ ⵉⵍⵍⴰ ⵓⵙⵖⵣⵏ ⵏ ⵓⴱⵕⵍⴰⵎⴰⵏ ⴼ ⵓⵙⵏⴼⴰⵔ ⴰⴷ, ⵔⴰⴷ ⵉⵙⵔⵙ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵜⴰⵙⵇⵇⵉⵎⵜ ⵜⴰⵎⵙⵉⴽⵓⴷⵜ ⵍⵍⵉ ⵔⴰⴷ ⵉⵙⵓⵊⴰⴷ ⵉⵙⵎⴰⵡⵏ ⵏ ⵉⵡⵔⵉⴽⵏ ⵏ ⵜⵓⵙⵙⵏⴰ ⴷ ⵓⵙⵡⵉⵏⴳⵎ ⵍⵍⵉ ⵔⴰⴷ ⵢⵉⵍⵉ ⵖ ⵜⴽⴰⴷⵉⵎⵉⵜ ⴷⴼⴼⵉⵔ ⵏ ⵓⴼⵓⵖ ⵏ ⵓⵙⵍⴳⵏ ⴰⴷ.