ⴰⵙⵉⵔⴰ(2016-2021):
ⴰⵙⵉⵡⴹ ⴼ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 7 ⵉⴱⵔⵉⵔ 2021
ⵉⵙⴳⵓⵎⵏ ⵏ ⵜⵙⵎⵓⵏⵉ : ⴰⵕⵥⵥⵓⵎ ⵏ ⵜⵙⵓⵜⵍⵜ ⵜⴰⵣⵣⵔⴰⴼⵜ, ⵉⵎⵏⴰⴷⵏ ⵏ ⵜⵡⵓⵔⵉ ⴳ ⵓⵣⵣⵔⴰⴼ ⴷ ⵜⵉⴹⴰⴼ
ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ, ⴰⴽⵕⴰⵙ 7 ⵉⴱⵔⵉⵔ 2021, ⵜⵥⵍⵉ ⵉ ⵓⵕⵥⵥⵓⵎ ⵏ ⵜⵙⵓⵜⵍⵜ ⵜⴰⵣⵣⵔⴰⴼⵜ ⴷ ⵉⵎⵏⴰⴷⵏ ⵏ ⵜⵡⵓⵔⵉ ⴳ ⵜⵉⴹⴰⴼ ⴷ ⵓⵣⵣⵔⴰⴼ.
ⴳ ⵜⵣⵡⵉⵔⵉ, ⵉⴼⴽⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵙⵎⵏⵉⴷ ⴳⵣⵣⵓⵍⵏ ⴼ ⵜⵡⴰⵍⴰ ⵜⴰⵣⵣⵔⴰⴼⵜ ⵍⵍⵉ ⵉⵣⵔⵉⵏ, ⴳ ⵍⵍⴰⵏ ⴽⵉⴳⴰⵏ ⵏ ⵉⵙⴰⵡⵓⵔⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ, ⴰⵢⵍⵍⵉ ⵉⵟⵟⴰⴼⵏ ⵉⴷⵔⵉⵣⵏ ⵏⵏⵙ ⴼ ⵜⵡⵓⵔⵉ ⵏ ⵓⵙⵇⵇⵉⵎ, ⴷ ⴰⵢⵍⵍⵉ ⵉⴱⴷⴷⵏ ⴼ ⵓⵎⵙⴰⵙⴰ ⴼ ⵜⵎⵙⴰⵔⵉⵏ ⵀⵎⵎⴰⵏⵉⵏ ⵜⴰⵎⵓⵔⵜ ⵏⵏⵖ ⵉⵄⵣⵣⴰⵏ, ⵎⴽ ⵉⵏⵏⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ.
ⵎⵇⵇⴰⵔ ⵉⵍⵍⴰ ⵓⴱⴰⵢⵢⵓⵕ, ⵉⵥⴹⴰⵕ ⵓⵙⵇⵇⵉⵎ ⵙ ⵜⵓⴳⴳⴰⵙ ⵏ ⵉⵏⴳⵎⴰⵎⵏ ⵏⵏⵙ ⴷ ⴽⵓ ⵉⴳⵎⴰⵎⵏ ⵏⵏⵙ ⴰⴷ ⵉⵙⴽⵔ ⵜⴰⵡⵓⵔⵉ ⵏⵏⵙ ⵙ ⵜⵖⴰⵔⴰⵙⵜ ⴷ ⵢⵓⵙⴰⵏ, ⵉⵙⵡⵓⴷⴷⵓ ⴰⵎⵣⴰⵔⴰⵢ ⵙ ⵓⴼⵔⴰⴽ ⴰⵎⴳⵔⵓ ⵍⵍⵉⵖ ⵉⴳⴰ ⵜⴰⵔⵙⵍⵜ ⵏ ⵜⴷⵉⵎⵓⵇⵔⴰⵟⵉⵜ ⴳ ⵜⵡⵓⵔⵉ ⵜⴰⵙⵔⵜⴰⵏⵜ ⵙ ⵓⵎⴰⵜⴰ.
ⵉⵙⴰⵡⵍ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⴼ ⵜⵡⵓⵔⵉ ⵜⴰⵎⴳⵔⵓⵜ ⴳ ⵜⵣⵣⵉⴳⵣⵜ ⵏ ⵜⵡⵓⵔⵉ ⵙ ⵜⵉⵔⴰⵜ ⵉ ⵚⴰⵃⴰ ⵏ ⵜⵏⵓⴼⴰ ⵜⵉⵎⴰⵜⵜⵓⵢⵉⵏ ⵏ ⵜⵎⵓⵔⵜ, ⵣⵎⵎⵉⵎⵏ ⵙ ⵓⴱⵓⵔⵣ ⵜⴰⵢⴰⴼⵓⵜ ⵏ ⵍⵎⵖⵔⵉⴱ ⴳ ⵉⵙⵡⵉⵔⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⵙ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ.
ⴰⵕⵥⵥⵓⵎ ⵏ ⵜⵙⵓⵜⵍⵜ ⵜⵉⵙ ⵙⵏⴰⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ : ⵙ ⵓⵎⵙⴰⵙⴰ ⴷ ⵓⵎⴰⴳⵔⴰⴷ 65 ⵏ ⵓⴷⵓⵙⵜⵓⵔ, ⵔⴰⴷ ⵜⵉⵍⵉ ⵜⵖⵉⵎⵉⵜ ⵜⴰⴳⴷⵓⴷⴰⵏⵜ ⵏ ⵓⵕⵥⵥⵓⵎ ⵏ ⵜⵙⵓⵜⵍⵜ ⴳ ⵓⵙⵉⵎⵡⴰⵙ 9 ⵉⴱⵔⵉⵔ 2021 ⴳ ⵜⵉⵙ 16.
ⵜⴰⵡⵓⵔⵉ ⵏ ⵜⵉⴹⴰⴼ ⵉⵥⵍⵉⵏ ⵙ ⵉⵙⵇⵙⵉⵜⵏ ⵉⵏⵎⵍⴰⵙⵙⵏ : ⴼ ⵓⵎⵛⴰⵡⴰⵕ ⵍⵍⵉ ⵜⵙⴽⵔ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⵔⴰⴷ ⵜⵥⵍⵉ ⵜⵖⵉⵎⵉⵜ ⵏ 12 ⵉⴱⵔⵉⵔ ⵉ ⵓⵙⴳⵓⵎ ⴰⴷⵎⵙⴰⵏ ⴷ ⵓⵏⴰⵎⵓⵏ, ⵔⴰⴷ ⵥⵍⵉⵏⵜ ⵜⵖⵉⵎⵉⵜⵉⵏ ⵜⵉⴳⴷⵓⴷⴰⵏⵉⵏ ⵏ ⵕⴰⵎⴰⴹⵏ ⵉ ⵉⵙⵇⵙⵉⵜⵏ ⵍⵍⵉ ⴷ ⵉⴹⴼⵕ ⵓⵎⴹⴰⴽⴰⵕ, ⵙ ⵉⴳⵔⴰⵏ ⵏ ⵜⴳⵯⵏⵙⴰⵏⵜ ⴷ ⵜⴼⵍⵍⴰⵃⵜ ⴷ ⵓⵙⴳⵎⵉ ⴰⵏⴰⵎⵓⵔ ⴳ ⵜⵎⵣⵡⴰⵔⵓⵜ.
ⵔⴰⴷ ⵉⵍⵉⵏ ⵉⵅⴼⴰⵡⴰⵍⵏ ⵢⴰⴹⵏⵉⵏ ⴳ ⵉⵙⵇⵙⵉⵜⵏ ⵍⵍⵉ ⴷ ⴹⴼⵕⵏ ⵉⵎⴹⴰⴽⴰⵕⵏ ⵃⵎⴰ ⴰⴷ ⵢⵉⵍⵉ ⵓⵏⵢⴰⵍⴽⴰⵎ ⵉⵕⵡⴰⵏ ⵊⴰⵔ ⵓⵙⵇⵇⵉⵎ ⴷ ⵜⵏⴱⴰⴹⵜ.
ⴰⵣⵣⵔⴰⴼ : ⵉⵥⵕⴰ ⵓⵙⵉⵔⴰ ⵉⵙⵏⴼⴰⵔⵏ ⴷ ⵜⵙⵓⵎⵔⵉⵏ ⵍⵍⴰⵏⵉⵏ ⴷⴰⵔ ⵜⵙⵇⵇⵉⵎⵉⵏ, ⵔⴰⴷ ⵜⵉⵍⵉ ⵜⵖⵉⵎⵉⵜ ⵜⴰⴳⴷⵓⴷⴰⵏⵜ ⵉ ⵜⵖⵔⵉ ⴷ ⵓⵙⵜⴰⵢ ⵏ ⵉⴹⵕⵉⵚⵏ ⵓⵊⴰⴷⵏⵉⵏ ⴷⴼⴼⵉⵔ ⵏ ⵜⵖⵉⵎⵉⵜ ⵏ ⵡⴰⵢⵏⴰⵙ 12 ⵉⴱⵔⵉⵔ 2021.